Walọ Dagbe Nọ De Sinsẹ́n Tọ́n

TO LOPO pẹvi de ji he ma dẹn do hùwaji Japon tọn, onọ̀ de po ovi etọn pẹvi atọ̀n lẹ po jẹ Biblu plọn hẹ Kunnudetọ Jehovah tọn lẹ ji. To lẹdo he to olá ehe mẹ, gbẹtọ lẹ yin hẹngogonọ taun; enẹwutu to whenuena kọmẹnu yetọn lẹ doayi ehe go yé jẹ winwọnya na onọ̀ lọ ji whedepopenu he yé mọ ẹn. “Nuhe vẹna mi hugan aṣa lọ nado wọnya na mi wẹ yindọ yé nọ dovọ́na asu ṣie po ovi ṣie lẹ po,” wẹ onọ̀ lọ dọ. Mahopọnna enẹ, e dọna ovi etọn lẹ dọ: “Mí dona zindonukọn nado nọ dọnudo kọmẹnu mítọn lẹ na [oyín] Jehovah tọn wutu.”—Matiu 5:47, 48.

To whégbè, e plọn ovi etọn lẹ nado nọ do sisi hia mahopọnna dọ yé yin gbigbẹdai. To whenuena yé to aliho ji jei asisa osin míawu tọn he tin to lẹdo lọ mẹ he kọ̀n yé nọ yì whẹwhẹ tó, ovi lọ lẹ nọ vọ́ nudọdomẹ yetọn lẹ plọn to mọto mẹ. Tlolo he ovi lọ lẹ biọ ohọ̀ lọ mẹ, yé nọ dọ po ayajẹ po dọ, “Konnichiwa!”—he zẹẹmẹdo: “Mì fọ́n dagbe ya?” Whẹndo lọ zindonukọn nado nọ dọnudo mẹhe yé dukosọ hẹ lẹpo po sọwhiwhe po, dile etlẹ yindọ kọmẹnu lọ lẹ ma nọ yigbe to aliho he jọmẹ mẹ. Ṣigba, gbẹtọ lẹ ma sọgan nọma doayi walọ dagbe ovi lọ lẹ tọn go gba.

To godo mẹ, kọmẹnu voovo lẹ nọ yigbe na nudọdomẹ ovi lọ lẹ tọn bo nọ dọ“Konnichiwa.” To owhe awe godo, diblayin mẹlẹpo to tòpẹvi lọ mẹ wẹ nọ yigbe na nudọdomẹ whẹndo lọ tọn. Humọ, kọmẹnu lọ lẹ sọ nọ dọnudo yedelẹ bo nọ do gbigbọ họntọnjihẹmẹ tọn hia dogọ to yedelẹ ṣẹnṣẹn. Mẹhe bọdo ogán tòpẹvi lọ tọn go jlo nado na pipà ovi lọ lẹ na adà he yé yiwà to diọdo ehe mẹ. Ṣigba onọ̀ yetọn hẹn ẹn deji dọ nuhe Klistiani lẹ dona wà poun wẹ yé to wiwà. To nukọnmẹ, to agbàwhinwhlẹn hodidọ gbangba lopo lọ blebu tọn de tẹnmẹ, visunnu yọnnu lọ tọn dopo dọ lehe onọ̀ etọn plọn whẹndo lọ nado nọ dọnudo mẹdevo lẹ po sisi po do mahopọnna lehe yé yigbe gbọn. Hodidọ etọn dù nunina daho hugan lọ bo yin zinzinjẹgbonu to linlinwe tòpẹvi lọ tọn mẹ. To egbehe, whẹndo lọ hùnhomẹ tlala dọ nunọwhinnusẹ́n Klistiani tọn lẹ yíyí do yizan mẹ ko tindo kọdetọn dagbe sọmọ. Wẹndagbe lọ lilá na mẹdevo lẹ nọ bọawu hugan to whenuena gbẹtọ lẹ tindo gbigbọ họntọnjihẹmẹ tọn.