Mẹde-Yido-Sanvọ́ Nọ Hẹn Dona Jehovah Tọn Wá — WESẸDOTẸN INTẸNẸT JI TỌN Watchtower Tọn

‘Alọgọ Ṣie Wá sọn Jehovah Dè’

Mẹde-Yido-Sanvọ́ Nọ Hẹn Dona Jehovah Tọn Wá

DAWE de to gbejizọnlinzin po kẹkẹ tata po gbọn zungbo daho Cameroun tọn de mẹ. E nọ kùn kẹkẹ na ganhiho susu gbọn aliho he gọ́ na osin po obọ́ po ji, bosọ nọ ze ogbẹ̀ etọn do owù mẹ nado hẹn mẹdevo lẹ lodo. Nado sọgan plọnnu kándo de, mẹmẹsunnu delẹ to Zimbabwe nọ basi gbejizọnlin na kilomẹtlu 15 gbọ̀n otọ̀-sisa gigọ́ lẹ mẹ, bo nọ bẹ avọ̀ po afọpa yetọn lẹ po do ota nado hẹn yé do húhú ji. To fidevo, yọnnu de nọ fọ́n to ogàn ẹnẹ mẹ to afọnnu nado basi dlapọn po oplọn po na doto mẹgopọntọ yọnnu de he nọ tindo dotẹnmẹ ganhiho dopo poun tọn to afọnnu fuu lẹ nado plọnnu.

Etẹwẹ mẹhe to vivẹnu mọnkọtọn dó lẹ tindo to kọndopọ mẹ? Yé mẹpo wẹ yin lizọnyizọnwatọ whenu-gigọ́ Kunnudetọ Jehovah tọn lẹ tọn he ze yede jo na azọ́n nugbo Biblu tọn pinplọnmẹ. Lizọnyizọnwatọ whenu-gigọ́ tọn lẹ bẹ gbehosọnalitọ whepoponu tọn po titengbe po, mẹdehlan, nugopọntọ tomẹyitọ, po fọtọ́n susu mẹdezejotọ́ he to azọ́nwa to owhé Bẹtẹli tọn gbè lẹdo aihọn pé po lẹ hẹn. Podọ mẹde-yido-sanvọ́ wẹ hẹn yé gbọnvo.a

Mẹwhinwhàn He Sọgbe

Kunnudetọ Jehovah tọn lẹ nọ dotoai na avase apọsteli Paulu tọn na Timoti he dọmọ: “Dovivẹnu nado do dewe hia di mẹhe pegan hlan Jiwheyẹwhe, azọ́nwatọ he ma do na kuwinyan, ehe nọ má ohó nugbo tọn dile e jẹ do kẹdẹ.” (2 Timoti 2:15) Ṣigba etẹwẹ nọ whàn Kunnudetọ fọtọ́n susu nado nọ wadevizọn taidi lizọnyizọnwatọ whenu-gigọ́ tọn?

To whenuena devizọnwatọ whenu-gigọ́ tọn lẹ yin kinkanse nuhe zọ́n bọ yé nọ yí yede zan na sinsẹ̀nzọn Jehovah tọn, gblọndo yetọn nọ bẹ owanyi he yé tindo na Jiwheyẹwhe podọ na gbẹtọ lẹ hẹn. (Matiu 22:37-39) Ehe wẹ yọnhugan, na eyin mẹwhinwhàn lọ ma yin sọn owanyi mẹ, huhlọn depope he yin yiyizan na yin to ovọ́ mẹ.—1 Kọlintinu lẹ 13:1-3.

Sinsẹ̀nzọn Mẹde-Yido-Sanvọ́ Tọn

Klistiani he ko klan yede do wiwe lẹpo dona kẹalọyi oylọ basinamẹ Jesu tọn he dọmọ: “Eyin mẹdepope jlo na hodo mi, gbọ e ni mọ́n ede, bo sọ ze [yatin] etọn, bo hodo mi.” (Matiu 16:24) Mídelẹ mimọ́n zẹẹmẹdo dide sọn ojlomẹ nado litai bo yin anadena gbọn Jehovah Jiwheyẹwhe po Jesu Klisti po dali. Na mẹsusu, ehe ko dekọtọn do sinsẹ̀nzọn mẹde-yido-sanvọ́ tọn to lizọnyizọn whenu-gigọ́ tọn mẹ.

Kunnudetọ susu lẹ nọ dovivẹnu tlala nado gbloada na sinsẹ̀nzọn yetọn hlan Jehovah. Gbadopọnna apajlẹ Júlia he tindo owhe 56, he yin gbehosọnalitọ whepoponu tọn to São Paulo, to Brésil. E flin dọmọ: “Mẹmẹsunnu Chine tọn de tẹkan bo kanse mi eyin vlavo yẹn na jlo nado plọn Chine-gbè. Na owhe ṣie wutu, yẹn ma nọ lẹnnupọndo ogbè yọyọ de pinplọn ji. Ṣigba to azán pẹẹde godo, n’kẹalọyi azọ́n sinsinyẹn lọ. To egbehe, yẹn ko penugo nado plọnmẹ Owe-wiwe to Chine-gbè mẹ.”

Alahọ Kunnudetọ Jehovah tọn lẹ tọn he to Perou na linlin dọ: “To owhe agọe tọn lẹ mẹ, gbehosọnalitọ whepoponu tọn kanweko susu wẹ sẹtẹn yì aigba he ma ko yin didenamẹ de ji, bo do adọgbigbo daho po gbigbọ mẹde-yido-sanvọ́ tọn po hia. Yé sẹtẹn yì tòpẹvi he dẹn lẹ mẹ fie dandannu gbẹ̀mẹ tọn lẹ matin te podọ dotẹnmẹ agbasazọ́n mimọ tọn whè te. Mẹmẹsunnu po mẹmẹyọnnu ehelẹ po tindo ojlo nado wà nudepope he e biọ to yé si nado hẹn azọ́ndenamẹ yetọn lẹ di. Ṣigba, nuhe jẹna ayidego hugan wẹ yindọ azọ́n yetọn to lizọnyizọn lọ mẹ nọ tindo kọdetọn dagbe to fisusu. Nugopọntọ tomẹyitọ lẹ na linlin dọ pipli yọyọ lẹ to yinyin didoai po alọgọ gbehosọnalitọ whepoponu tọn mẹde-yido-sanvọ́ tọ ehelẹ tọn po.”

Klistiani delẹ ko ze ogbẹ̀ yetọn do owù mẹ nado gọalọna yisenọ hatọ yetọn lẹ. (Lomunu lẹ 16:3, 4) Nugopọntọ lẹdo tọn de to lẹdo Aflika tọn fie awhàn ko gbakija delẹ mẹ na linlin dọ: “Whẹpo mí nado jẹ fie ali yin súsú te godo tọn he to ṣẹnṣẹn na aigba atẹṣitọ lẹ tọn po aigba gandudu otò lọ tọn po kọ̀n, awhàngán atẹṣitọ lẹ tọn ẹnẹ po awhànfuntọ yetọn lẹ po lẹdo asi ṣie po yẹn po, bo kàn omẹ nankọ he mí yin sè. Whenuena yé dindona kalti mẹyinyọnẹn tọn mítọn lẹ godo, yé mọdọ mí wá sọn lẹdo he gandudu otò lọ tọn to anadena lọ mẹ, enẹwutu yé masọ vò to yede mẹ ba. Yẹn yin whẹsadokọna taidi amẹ́ de. Enẹwutu, yé magbe nado ze mi dlan odò de mẹ. N’basi zẹẹmẹ omẹ nankọ he mí yin tọn, enẹgodo yé dike mí ni yì.” Lehe agun lọ lẹ dopẹ́ dọ asu po asi po mẹde-yido-sanvọ́ tọ ehelẹ tindo kọdetọn dagbe nado basi dlapọn na yé do sọ!

Mahopọnna awusinyẹnnamẹnu lẹ, sọha lizọnyizọnwatọ whenu-gigọ́ tọn lẹ tọn fọ́n bo to jijideji lẹdo aihọn pé. (Isaia 6:8) Azọ́nwatọ sọwhiwhenọ ehelẹ nọ wlebòna lẹblanulọkẹyi he yé tindo nado sẹ̀n Jehovah. Po gbigbọ mẹde-yido-sanvọ́ tọn mọnkọtọn po, gbẹtọ livi susu devo lẹ to gigopana Jehovah todin. Taidi kọdetọn de, Jehovah nọ kọ̀n dona susu do yé ji. (Howhinwhẹn lẹ 10:22) Azọ́nwatọ sọwhiwhenọ ehelẹ nọ dejido dona po godonọnamẹ etọn po go, bo nọ do walọ psalm-kantọ lọ tọn hia mẹhe jihàn dọ: ‘Alọgọ ṣie wá sọn Jehovah dè.’—Psalm 121:2.

[Nudọnamẹ odò tọn]

a Pọ́n Calendrier des Témoins de Jéhovah 2005, osun novembre po décembre po tọn.

[Blurb on page 9]

“Gbẹtọ towe lẹ na yin ojlonọ to azán huhlọn towe tọn gbè.”—PSALM 110:3

Apotin to weda 8]

JEHOVAH NỌ WLEBÒNA DEVIZỌNWATỌ AHUNDOPONỌ ETỌN LẸ

“Mì yin tenọglinọ, masẹafọ, bo nọ to susudeji to azọ́n Oklunọ tọn mẹ whepoponu, sọle mì yọnẹn do dọ tuklajẹ mìtọn ma yin ovọ́ to Oklunọ mẹ gba.”—1 Kọlintinu lẹ 15:58.

“Jiwheyẹwhe ma yin mawadodonọ nado wọn azọ́n mìtọn po tukla owanyi mìtọn tọn po, he mì ko sọhia gbọn oyín etọn dali.”—Heblu lẹ 6:10.