Kanbiọ lẹ sọn Wehiatọ lẹ Dè

Psalm 102:26 dọ dọ aigba po olọn lẹ po “na và.” Be enẹ zẹẹmẹdo dọ planẹti mítọn he yin Aigba na yin vivasudo wẹ ya?

Psalm-kantọ lọ dọ to odẹ̀ mẹ hlan Jehovah dọmọ: “Sọn hoho wẹ hiẹ ko do dòdó aihọn [kavi aigba] tọn ai; olọn lẹ sọ wẹ azọ́n alọ towe nù tọn. Yé na và, ṣigba hiẹ na to ote: nugbo yemẹpo na dohó taidi avọ̀: di awù wẹ hiẹ na diọ yé, yé nasọ yin didiọ.” (Psalm 102:25, 26) Lẹdo hodidọ lọ tọn dohia dọ wefọ ehelẹ ma to hodọdo vasudo aigba tọn ji gba, ṣigba do tintin kakadoi Jiwheyẹwhe tọn ji. Lẹdo hodidọ lọ tọn sọ do nuhewutu nugbo tangan enẹ do yin homẹmiọnnamẹnu na devizọnwatọ Jiwheyẹwhe tọn lẹ hia.

Psalm-kantọ lọ, he sọgan ko tin to kanlinmọgbenu to Babilọni, bẹjẹeji po zẹẹmẹ yajiji etọn lẹ tọn po. E wule dọ ogbẹ̀ emitọn to jujuyi “di azọ̀.” Ayimajai sinsinyẹn hẹn agbasa etọn gble, bo “fiọ [ohú etọn lẹ] di zòpọ́ miyọ́n.” Nuṣikọna ẹn bọ e “yọ́ taidi ogbé,” bosọ mọ ede to ṣokẹdẹ, taidi ‘ohẹ he tin gánna to ohọta aga.’ Whlepọn etọn lẹ ko zọ́n bọ adọ̀ etọn sú podọ azán etọn lẹpo wẹ gọ́ na awubla. (Psalm 102:3-11) Etomọṣo, psalm-kantọ lọ ma hẹn todido bu mlẹnmlẹn gba. Etẹwutu? Na nuhe Jehovah ko dopagbe nado wà na Ziọni, kavi Jelusalẹm wutu.

Dile etlẹ yindọ Ziọni ko yin vivasudo, Jehovah dopagbe dọ e na yin hinhẹngọwa. (Isaia 66:8) Enẹwutu, psalm-kantọ lọ yí jidide do dọhlan Jehovah dọmọ: “Hiẹ na . . . tindo lẹblanu to Ziọni ji: na ojlẹ sọ nado tindo awubla to e ji, nugbo, ojlẹ he yè de lọ sọ. Na OKLUNỌ [na] ze Ziọni dote.” (Psalm 102:13, 16) Enẹgodo psalm-kantọ lọ sọ gọwá whẹho yajiji etọn tọn ji. Na taun tọn, e yihojlẹdohogo dọ eyin Jelusalẹm he ko jẹvọ́ sọgan yin hinhẹngọwa gbọn huhlọn Jiwheyẹwhe tọn gblamẹ, be Jehovah sọgan whlẹn ewọ lọsu sọn ninọmẹ blawu etọn mẹ. (Psalm 102:17, 20, 23) Podọ onú devo sọ whàn psalm-kantọ lọ nado dejido Jehovah go mlẹnmlẹn. Etẹwẹ yin nulọ? Nugbo lọ dọ Jehovah tin kakadoi wẹ.

To vogbingbọn mlẹnmlẹn mẹ na gbẹzan gli psalm-kantọ lọ tọn, Jehovah tin kakadoi. “Owhe towe tin whẹndo lẹpo mẹ,” wẹ e dọna Jehovah. (Psalm 102:24) Enẹgodo psalm-kantọ lọ dọmọ: “Sọn hoho wẹ hiẹ ko do dòdó aihọn tọn ai; olọn lẹ sọ wẹ azọ́n alọ towe nù tọn.”—Psalm 102:25.

Ṣogan, ojlẹ dindẹn he aigba po olọn lẹ po ko nọ̀ aimẹ na ma tlẹ sọgan yin yiyijlẹdo tintin kakadoi Jehovah tọn go. Psalm-kantọ lọ yidogọ dọmọ: “ Yé [aigba po olọn lẹ po] na và, ṣigba hiẹ na to ote.” (Psalm 102:26) Nuhe sọgan gble wẹ aigba po olọn yinukundomọ lẹ po yin. Nugbo wẹ dọ, Jehovah dọ to wefọ devo lẹ mẹ dọ yé na nọte kakadoi. (Psalm 119:90; Yẹwhehodọtọ 1:4) Ṣigba yé sọgan yin vivasudo eyin enẹ wẹ lẹndai Jiwheyẹwhe tọn. To vogbingbọn mẹ, Jiwheyẹwhe ma sọgan kú. Nudida yinukundomọ lẹ yin hinhẹn ‘lodo kakadoi’ kiki na Jiwheyẹwhe hẹn yé dote wutu. (Psalm 148:6) Eyin Jehovah ma zindonukọn nado to nudida yinukundomọ lẹ hẹn jẹ yọyọ, “yemẹpo wẹ na dohó taidi avọ̀.” (Psalm 102:26) Kẹdẹdile gbẹtọ nọ nọgbẹ̀ dẹn hú avọ̀ etọn lẹ do, mọ wẹ Jehovah sọgan nọgbẹ̀ dẹn hú nudida etọn do niyẹn—eyin e basi dide nado wàmọ. Ṣigba, mí ko plọn sọn wefọ devo lẹ mẹ dọ e ma yin enẹ wẹ ojlo etọn gba. Ohó Jiwheyẹwhe tọn na mí jide dọ Jehovah ko magbe dọ aigba po olọn yinukundomọ lẹ po na gbọṣi aimẹ kakadoi.—Psalm 104:5.

Homẹmiọnnamẹnu wẹ e yin nado yọnẹn dọ Jehovah na tin to finẹ to whepoponu nado hẹn opagbe etọn lẹpo di. Mahopọnna whlepọn he sọgan wá mí ji lẹ, eyin mí dawhá ylọ ẹ, mí sọgan deji dọ ewọ ‘na hò odẹ̀ agbátọnọ lẹ tọn pọ́n, bo ma na vlẹ odẹ̀ yetọn gba.’ (Psalm 102:17) Mọwẹ, jidenamẹ godonọnamẹ Jehovah tọn he yin mimọ to Psalm 102 mẹ tlẹ sọ dolido hú aigba he ji mí tin te.