“Okunnu de Hlan Akọta Lẹpo”
“Mìwlẹ nasọ yin kunnudetọ na mi . . . jẹ opodo aigba tọn.”—Owalọ lẹ 1:8.
1. Whetẹnu podọ fie wẹ devi lẹ sè dọdai he yin kinkàndai to Matiu 24:14 mẹ te to tintan whenu?
SUHUGAN mítọn jẹakọ hẹ ohó Jesu tọn he yin kinkàndai to Matiu 24:14 mẹ lẹ sọmọ bọ mí sọgan vọ́ yé dọ sọn tamẹ. Podọ dọdai ayidego tọn de wẹ e yin na nugbo tọn. Yí nukun homẹ tọn do pọ́n nuhe devi lẹ na ko lẹn to whenuena yé sè dọdai ehe to tintan whenu! Owhe 33 W.M. wẹ. Devi lẹ ko nọpọ́ hẹ Jesu na nudi owhe atọ̀n, podọ todin yé hodo e wá Jelusalẹm. Yé ko mọ azọ́njiawu etọn lẹ bo ko sè nuplọnmẹ etọn lẹ. Dile etlẹ yindọ nugbo họakuẹ he Jesu ko plọn yé lẹ hùnhomẹ na yé taun, yé yọnẹn ganji dọ e ma yin mẹlẹpo wẹ tindo numọtolanmẹ dopolọ hẹ yé gba. Jesu tindo kẹntọ huhlọnnọ he diyin lẹ.
2. Owù po avùnnukundiọsọmẹnu tẹlẹ po wẹ devi lẹ na pehẹ?
2 To Osó Olivie tọn ji, devi ẹnẹ sinai hẹ Jesu, bo tẹ́ otó yetọn lẹ dai dile e to hodọdo owù po avùnnukundiọsọmẹnu he yé na pehẹ to sọgodo lẹ po ji. Jesu ko dọna yé jẹnukọn dai dọ ewọ na yin hùhù. (Matiu 16:21) Todin e hẹn ẹn họnwun na yé dọ yelọsu na tindo numimọ nukundiọsọmẹ vẹadi tọn. Gbẹtọ lẹ “na jo mì hlan nukunbibia, yé nasọ hù mì,” wẹ e dọ. “Yè nasọ gbẹwanna mì to akọta lẹpo mẹ na oyín ṣie tọn wutu.” E ma ko vọ̀ do finẹ gba. Yẹwhegán lalonọ lẹ na klọ mẹsusu. Mẹdelẹ na dahli bo nasọ de yenọzo gbà bo nasọ gbẹwanna yenọzo. Podọ “mẹsusu” devo lẹ na tlẹ na dotẹnmẹ owanyi yetọn na Jiwheyẹwhe po Ohó etọn po ni lẹzun mimiọn.—Matiu 24:9-12.
3. Naegbọn hodidọ Jesu tọn he yin mimọ to Matiu 24:14 mẹ do hẹnmẹ jọsi?
3 Ninọmẹ mẹhẹngbọjọ tọn ehelẹ wẹ Jesu dọ fó tlolo bo wá yí hodidọ he dona ko paṣa devi lẹ taun de dogọ. E dọmọ: “Yè nasọ dọyẹwheho wẹndagbe ahọludu tọn helẹ to aigba fininọ lẹpo mẹ na okunnu de hlan akọta lẹpo; whenẹnu wẹ opodo na wá.” (Matiu 24:14) Mọwẹ, azọ́n he Jesu bẹjẹeji to Islaeli—nado “dekunnu hlan nugbo lọ”—na zindonukọn bo na dlẹnkan jẹ aigba fininọ lẹpo mẹ. (Johanu 18:37) Dọdai he hẹnmẹ jọsi nankọtọn die! Avùnnukundiọsọmẹnu wẹ e na yin nado dlẹnkanna azọ́n enẹ jẹ “akọta lẹpo” mẹ; podọ mọwiwà to ‘wangbẹnamẹ akọta lẹpo tọn’ nukọn na dibla biọ huhlọn hugan jọwamọ tọn. Gbọnvona dọ azọ́n pligidi ehe wiwadotana na do huhlọn po nupojipetọ-yinyin Jehovah tọn po hia, e nasọ do owanyi, lẹblanu, po linsinsinyẹn etọn po hia ga. To yidogọ mẹ, e na hùn dotẹnmẹ dote na devizọnwatọ etọn lẹ nado do yise po mẹdezejo yetọn po hia.
4. Mẹnu lẹ wẹ azọ́n kunnudide tọn yin zizedo alọmẹ na, podọ opagbe homẹmiọnnamẹ tọn tẹwẹ Jesu dó na yé?
4 Jesu hẹn ẹn họnwun hezeheze na devi etọn lẹ dọ azọ́n pligidi de wẹ yin zizedonukọnna yé nado hẹndi. Whẹpo Jesu do hẹji yì olọn mẹ, e sọawuhia yé bo dọmọ: “Mìwlẹ na mọ huhlọn yí whenuena [gbigbọ wiwe] wá mì ji: mìwlẹ nasọ yin kunnudetọ na mi to Jelusalẹm mẹ, to Jude lẹpo mẹ, po Samalia po, podọ jẹ opodo aigba tọn.” (Owalọ lẹ 1:8) Nugbo wẹ dọ mẹdevo lẹ na kọnawudopọ hẹ yé to madẹnmẹ. Etomọṣo, sọha devi lẹ tọn ma sù sọmọ. Lehe e na ko yin homẹmiọnnamẹnu nado yọnẹn dọ gbigbọ wiwe huhlọnnọ Jiwheyẹwhe tọn na na yé huhlọn nado hẹn azọ́n he Jiwheyẹwhe dena yé ehe di do sọ!
5. Etẹwẹ devi lẹ ma yọnẹn gando azọ́n kunnudide tọn lọ go?
5 Devi lẹ yọnẹn dọ yé dona dọyẹwheho wẹndagbe lọ tọn bo “hẹn akọta lẹpo zun nuplọntọ.” (Matiu 28:19, 20) Ṣigba yé ma yọ́n obá he mẹ okunnu lọ na yin dide jẹ, podọ yé ma yọ́n whenue opodo lọ na wá. Mílọsu ma yọnẹn gba. Jehovah kẹdẹ wẹ mọdona whẹho ehelẹ. (Matiu 24:36) Eyin kunnudide ko yin nina jẹ obá he jlo Jehovah mẹ, e na hẹn titonu ylankan ehe wá vivọnu. Whenẹnu wẹ Klistiani lẹ na wá tunwun dọ azọ́n yẹwhehodidọ tọn ko yin wiwadotana sọgbe hẹ lẹndai Jehovah tọn. E na ko vẹawuna devi dowhenu tọn enẹlẹ nado mọ obá he mẹ kunnudide he na yin nina to ojlẹ opodo tọn ehe mẹ na gbloada jẹ hlan nukọn.
Azọ́n Kunnudide Tọn to Owhe Kanweko Tintan Whenu
6. Etẹwẹ jọ to Pẹntikọsti 33 W.M. podọ ojlẹ vude to enẹgodo?
6 To owhe kanweko tintan whenu, azọ́n yẹwhehodidọ Ahọluduta tọn po mẹhẹnzun devi tọn po de sinsẹ́n he sẹhundaga lẹ tọ́n. To azán Pẹntikọsti 33 W.M., nudi devi 120 wẹ pli to abò aga tọn de mẹ to Jelusalẹm. Gbigbọ wiwe Jiwheyẹwhe tọn yin kinkọ̀n do yé ji, apọsteli Pita na hodidọ he whànmẹ de nado basi zẹẹmẹ azọ́njiawu ehe tọn, podọ nudi gbẹtọ 3 000 lẹzun yisenọ bo yin bibaptizi. Bẹjẹeji poun wẹ enẹ yin. Mahopọnna gbemima sinsẹ̀ngán lẹ tọn nado doalọtena wẹndagbe lọ lilá, ‘Jehovah to dide dogọ devi lẹ egbesọegbesọ mẹhe nkọ yè na whlẹngán lẹ.’ To madẹnmẹ, “sọha yetọn yì sunnu degbadefọtọ́n.” To enẹgodo, “yisenọ susu wẹ yè sọ to dide dogọ yé, sunnu po yọnnu po.”—Owalọ lẹ 2:1-4, 8, 14, 41, 47; 4:4; 5:14.
7. Naegbọn e do yin nujijọ ayidego tọn to whenuena Kọneliọsi diọzun yisenọ?
7 Nujijọ ayidego tọn devo wá aimẹ to owhe 36 W.M. to whenuena Kọneliọsi he yin Kosi de diọzun yisenọ bo yin bibaptizi. Gbọn anadidena apọsteli Pita yì dawe budisi Jiwheyẹwhe tọ́ ehe dè dali, Jehovah dohia dọ gbedide Jesu tọn nado “hẹn akọta lẹpo zun nuplọntọ” ma nọte do Ju he tin to otò voovo mẹ lẹ kẹdẹ ji gba. (Owalọ lẹ 10:44, 45) Nawẹ mẹhe to nukọntọ yin lẹ yinuwa gbọn? To whenuena apọsteli lẹ po sunnu mẹho he tin to Jude lẹ po mọdọ wẹndagbe lọ dona yin hinhẹn yì omẹ akọta tọn lẹ dè—enẹ wẹ mẹhe ma yin Ju lẹ—yé pagigona Jiwheyẹwhe. (Owalọ lẹ 11:1, 18) To ojlẹ dopolọ mẹ, azọ́n yẹwhehodidọ lọ tọn to sinsẹ́n detọ́n zọnmii to Ju lẹ ṣẹnṣẹn. To owhe delẹ godo, vlavo to nudi owhe 58 W.M., gbọnvona Kosi he ko lẹzun yisenọ lẹ, “fọtọ́n fọtọ́n sọha Ju lẹ tọn he yise” sọgan yin mimọ ga.—Owalọ lẹ 21:20.
8. Nawẹ wẹndagbe lọ nọ yinuwado gbẹtọ lẹ ji gbọn?
8 Dile etlẹ yindọ sọha mẹhe kọnawudopọ hẹ Klistiani lẹ to owhe kanweko tintan whenu tọn sẹhundaga, mí ma dona wọnji e go gbede dọ gbẹtọ lẹ wẹ sọha ehelẹ nọtena. Owẹ̀n Biblu tọn he yé sè tindo huhlọn. (Heblu lẹ 4:12) E diọ gbẹzan mẹhe kẹalọyi i lẹ tọn to aliho ayidego tọn de mẹ. Gbẹtọ lẹ lẹ̀ yede wé, ze gbẹtọ yọyọ lọ dogo, bo gbọwhẹ hẹ Jiwheyẹwhe. (Efesunu lẹ 4:22, 23) Nudopolọ wẹ to jijọ to egbehe. Podọ mẹhe to alọkẹyi wẹndagbe lọ lẹpo wẹ tindo nukundido jiawu lọ nado nọgbẹ̀ kakadoi.—Johanu 3:16.
Azọ́nyiwahẹmẹtọ Dopọ hẹ Jiwheyẹwhe
9. Lẹblanulọkẹyi po azọngban tẹ po wẹ Klistiani dowhenu tọn lẹ yọnẹn dọ yé tindo?
9 Klistiani dowhenu tọn lẹ ma sọalọakọ́n dọ emilẹ wẹ dona yin pipà na nuhe yin wiwadotana lọ lẹ gba. Yé yọnẹn dọ azọ́n yetọn taidi lizọnyizọnwatọ lẹ nọ yin godonọna gbọn ‘huhlọn gbigbọ wiwe tọn’ dali. (Lomunu lẹ 15:13, 19) Jehovah wẹ nọ hẹn jideji gbigbọmẹ tọn wá. To ojlẹ dopolọ mẹ, Klistiani enẹlẹ yọnẹn dọ yé tindo lẹblanulọkẹyi po azọngban lọ po nado yin “azọ́nyiwahẹmẹtọ dopọ hẹ Jiwheyẹwhe.” (1 Kọlintinu lẹ 3:6-9) Enẹwutu, to kọndopọmẹ hẹ tudohomẹnamẹ Jesu tọn, yé vánkan to azọ́n he yin didena yé nado wà lọ mẹ.—Luku 13:24.
10. Vivẹnu tẹlẹ wẹ Klistiani dowhenu tọn delẹ dó nado dekunnu na akọta lẹpo?
10 Taidi “apọsteli Kosi lẹ tọn,” Paulu zingbejizọnlin na kilomẹtlu fọtọ́n susu lẹ to aigba po ohù po ji, bo do agun susu ai to ayimatẹn Lomu tọn heyin Asia podọ to Grèce. (Lomunu lẹ 11:13) E sọ zingbejizọnlin yì Lomu podọ vlavo yì Espagne. To ojlẹ dopolọ mẹ, apọsteli Pita, he tindo azọngban lọ nado lá “wẹndagbe [na omẹ] owhẹgbo tọn” lẹ, zingbejizọnlin yì awà awetọ ji nado wadevizọn to Babilọni, fie Ju susu tin te to ojlẹ enẹ mẹ. (Galatianu lẹ 2:7-9; 1 Pita 5:13) Yọnnu lẹ taidi Tlifena po Tlifosa po tin to mẹsusu devo he jẹtukla to azọ́n Oklunọ tọn mẹ lẹ mẹ. Yọnnu devo, he nọ yin Pelsi, yin alọdlẹndo taidi mẹhe “wazọ́n susu to Oklunọ mẹ.”—Lomunu lẹ 16:12.
11. Nawẹ Jehovah dona vivẹnudido devi lẹ tọn gbọn?
11 Jehovah dona vivẹnudido azọ́nwatọ zohunhunnọ enẹlẹ po mẹdevo lẹ po tọn susugege. To nuhe ma pé owhe 30 to whenuena Jesu dọ dọdai dọ okunnu na yin dide na akọta lẹpo godo, Paulu wlan dọ “wẹndagbe” lọ ko yin “yẹwheho etọn [dọ] hlan mẹhe tin to olọn glọ lẹpo.” (Kọlọsinu lẹ 1:23) Be opodo wá to whenẹnu ya? To linlẹn de mẹ, mí sọgan dọ mọwẹ. E wá titonu Ju lẹ tọn ji to owhe 70 W.M. to whenuena awhànpa Lomu tọn lẹ và Jelusalẹm po tẹmpli etọn po sudo. Ṣogan, Jehovah ko magbe dọ kunnudide he gbloada taun humọ na yin nina whẹpo aihọn ylankan Satani tọn blebu na yin vivasudo.
Azọ́n Kunnudide Tọn to Egbehe
12. Nawẹ Biblu Plọntọ dowhenu tọn lẹ mọnukunnujẹ gbedide lọ nado dọyẹwheho mẹ gbọn?
12 Sẹpọ vivọnu owhe 1800 lẹ tọn, yèdọ ojlẹ gaa to whenuena atẹṣiṣi sinsẹ̀n tọn ko gbayipe godo, sinsẹ̀n-bibasi wiwe ṣeke yin vivọ́ doai. Biblu Plọntọ lẹ, dile Kunnudetọ Jehovah tọn lẹ nọ yin yiylọdọ to whenẹnu, mọnukunnujẹ gbedide lọ nado hẹn akọta lẹpo zun nuplọntọ mẹ hezeheze. (Matiu 28:19, 20) To 1914, nudi gbẹtọ 5 100 wẹ to mahẹ tindo to nuwiwa yẹwhehodidọ tọn mẹ po zohunhun po, podọ wẹndagbe lọ ko jẹ nudi aigba 68 ji. Etomọṣo, Biblu Plọntọ dowhenu tọn enẹlẹ ma mọnukunnujẹ zẹẹmẹ gigọ́ Matiu 24:14 tọn mẹ gba. To vivọnu owhe 1800 lẹ tọn, Biblu, he bẹ wẹndagbe lọ hẹn, ko yin lilẹdo ogbè susu mẹ bo yin zinzinjẹgbonu gbọn ogbẹ́ Biblu tọn lẹ dali bosọ yin mimá lẹdo aihọn pé. Enẹwutu, na owhe susu, Biblu Plọntọ lẹ lẹndọ okunnu hlan akọta lẹpo ko yin dide.
13, 14. Nukunnumọjẹnumẹ he họnwun gando ojlo po lẹndai Jiwheyẹwhe tọn po go tẹwẹ sọawuhia to zinjẹgbonu Atọ̀họ̀-Nuhihọ́ Lọ Tọn 1928 tọn mẹ?
13 Vudevude, Jehovah na nukunnumọjẹnumẹ he họnwun omẹ etọn lẹ gando ojlo po lẹndai etọn po go. (Howhinwhẹn lẹ 4:18) Atọ̀họ̀-Nuhihọ́ Lọ Tọn [Glẹnsigbe] 1er décembre 1928, dọmọ: “Be mí sọgan dọ dọ Biblu he yin mimá gbayipe hẹn dọdai lọ nado dọyẹwheho wẹndagbe ahọluduta lọ tọn di wẹ ya? Paali! Mahopọnna dọ Biblu ko yin mimá gbayipe, dandannu wẹ e gbẹ́ yin na pipli kunnudetọ Jiwheyẹwhe tọn vude he tin to aigba ji lẹ tọn nado zín owe he basi zẹẹmẹ [lẹndai] Jiwheyẹwhe tọn lẹ tọn jẹgbonu bo dla owhé he gbè Biblu ehelẹ tin te lẹ pọ́n. Eyin e ma yinmọ gbẹtọ lẹ na yin jijodo zinvlu mẹ na nuhe dù didoai gandudu Mẹssia tọn to azán mítọn gbè.”
14 Zinjẹgbonu Atọ̀họ̀-Nuhihọ́ Lọ Tọn enẹ zindonukọn dọmọ: “To 1920, . . . Biblu Plọntọ lẹ wá tindo nukunnumọjẹnumẹ he sọgbe gando dọdai Oklunọ mítọn tọn he tin to Matiu 24:14 mẹ go. Yé wá mọdọ ‘wẹndagbe ehe’ he dona yin lilá to aihọn lọ blebu mẹ na okunnu de hlan Kosi lẹ kavi akọta lẹpo, ma yin wẹndagbe ahọluduta he na gbẹ́ wá to sọgodo de tọn gba ṣigba wẹndagbe de he to didohia hezeheze dọ Ahọlu Mẹssia ko bẹ gandudu etọn jẹeji do aigba ji.”
15. Nawẹ azọ́n kunnudide tọn lọ ko jideji sọn owhe 1920 lẹ whenu gbọn?
15 “Pipli kunnudetọ . . . vude” enẹ tọn to owhe 1920 lẹ mẹ ma gbọṣi sọha kleun de mẹ gba. To owhe ao ao he bọdego lẹ gblamẹ, “gbẹtọ susugege” “lẹngbọ devo” lẹ tọn yin yinyọnẹn bosọ jẹ yinyin bibẹpli ji. (Osọhia 7:9; Johanu 10:16) To egbehe, wẹndagbe-jlatọ 6 613 950 wẹ tin to aigba 235 lẹ ji. Hẹndi dọdai tọn he jiawu nankọtọn die! “Wẹndagbe ahọludu tọn he” ma ko yin lilá to obá daho mọnkọtọn mẹ pọ́n to whenuho mẹ gba. Podọ devizọnwatọ nugbonọ Jehovah tọn lẹ ma ko sù sọmọ pọ́n to aigba ji.
16. Etẹwẹ yin wiwadotana to owhe sinsẹ̀nzọn tọn he wayi mẹ? (Pọ́n apotin he tin to weda 27-30.)
16 To pọmẹ, Kunnudetọ susugege ehelẹ ko hẹn alọnu ján to owhe sinsẹ̀nzọn 2005 tọn whenu. Yé ko yí hugan ganmẹ liva dopo zan nado lá wẹndagbe lọ to aigba 235 ji. Gọyìpọn livi susu yin bibasi, bọ plọnmẹ Biblu fọtọ́n kanweko susu yin anadena. Azọ́n ehe ko yin wiwadotana gbọn Kunnudetọ Jehovah tọn lẹ dali, he ko yí whenu po nutindo yetọn lẹ po zan vọnu nado dọ Ohó Jiwheyẹwhe tọn na mẹdevo lẹ. (Matiu 10:8) Gbọn gbigbọ wiwe huhlọnnọ etọn gblamẹ, Jehovah zindonukọn nado to huhlọnna devizọnwatọ etọn lẹ nado hẹn ojlo etọn di.—Zekalia 4:6.
Vivẹnu Vẹkuvẹku Dido Nado Dekunnu
17. Nawẹ omẹ Jehovah tọn lẹ to gbeyina nuhe Jesu dọ gando wẹndagbe lọ lilá go gbọn?
17 Dile etlẹ yindọ nudi owhe 2 000 ko juwayi sọn whenue gbọ́n Jesu dọ dọ wẹndagbe lọ na yin lilá, zohunhun omẹ Jiwheyẹwhe tọn lẹ tọn na azọ́n ehe ma ko depò gba. Mí yọnẹn dọ gbọn akọ́ndonanu mítọn to dagbewiwa mẹ dali, mí nọ hodo apajlẹ jẹhẹnu Jehovah tọn lẹ tọn taidi owanyi, lẹblanu, po linsinsinyẹn po. Taidi ewọ, mí ma jlo dọ mẹdepope ni dọ̀n adavo dọ gbẹtọ lẹ ni lẹnvọjọ bo gbọwhẹ hẹ Jehovah. (2 Kọlintinu lẹ 5:18-20; 2 Pita 3:9) Po godonọnamẹ gbigbọ Jiwheyẹwhe tọn po, Kunnudetọ Jehovah tọn lẹ yí zohunhun do to wẹndagbe lọ lá jẹ aigba podo. (Lomunu lẹ 12:11) Taidi kọdetọn de, gbẹtọ lẹ to filẹpo to alọkẹyi nugbo lọ bo to gbẹzan yetọn hẹn sọgbe hẹ anademẹ owanyinọ Jehovah tọn. Gbadopọnna apajlẹ delẹ.
18, 19. Dọ numimọ mẹdelẹ tọn he yigbena wẹndagbe lọ to aliho dagbe mẹ.
18 Charles yin glesi de to whèyihọ-waji Kenya tọn. To 1998 e sà taba he hugan kilo 8 000 bo mọ gbedewema mẹpipa tọn de yí taidi Glesi He Sà Taba Hugan. To ojlẹ enẹ mẹ, e jẹ Biblu plọn ji. To madẹnmẹ e wá mọ dọ mẹhe doalọ to awuwiwlena taba mẹ ko gbà osẹ́n Jesu tọn nado yiwanna kọmẹnu mẹtọn. (Matiu 22:39) Tlolo he Charles wá tadona lọ kọ̀n na ede dọ ‘glesi he sà taba hugan’ wẹ sọ yin ‘mẹhutọ hugan,’ e hù atin taba tọn he to ogle etọn mẹ lẹpo pete. E yinukọn jẹ klandowiwe po baptẹm po kọ̀n. Todin e ko lẹzun gbehosọnalitọ whepoponu tọn podọ devizọnwatọ lizọnyizọnwiwa tọn de.
19 Ayihaawe ma tin dọ Jehovah to akọta lẹ whàn gbọn kunnudide he to yinyin nina lẹdo aihọn pé lọ dali, podọ onú tindo ojlona lẹ—yèdọ gbẹtọ lẹ—to tintọ́n wá. (Hagai 2:7) Pedro he nọ nọ̀ Portugal, biọ wehọmẹ yẹwhenọ-zọ́n pinplọn tọn to owhe 13 mẹvi-yinyin mẹ. Yanwle etọn wẹ nado lẹzun mẹdehlan bo plọn Biblu gbẹtọ lẹ. Nalete, to ojlẹ vude godo, e jo wehọmẹ lọ do na Biblu ma nọ yin nùdego sọmọ to nupinplọn klasi tọn lẹ mẹ wutu. To owhe ṣidopo godo, e gbẹ́ tin to wehọmẹ alavọ tọn de mẹ to Lisbonne bo to nuplọn gando jijọ gbẹtọvi tọn go. E nọ nọ̀ nafẹ etọn, he yin Kunnudetọ Jehovah tọn de pá, mẹhe na ẹn tuli nado plọn Biblu. To ojlẹ enẹ mẹ, Pedro ma tindo nujikudo eyin Jiwheyẹwhe tin, mọjanwẹ e ma sọgan basi nudide vlavo nado plọn Biblu kavi lala. E dọho hẹ mẹplọntọ etọn gando nuhahun etọn nado basi nudide go. Mẹplọntọ lọ dọna ẹn dọ sọgbe hẹ nunọwhinnusẹ́n jijọ gbẹtọ tọn lẹ, mẹhe ma sọgan basi nudide lẹ nọ tindo ayilinlẹn lọ nado hù yede. Po enẹ po, Pedro magbe nado plọn Biblu. To agọe, e yin bibaptizi podọ todin ewọ lọsu to anadena plọnmẹ Biblu lẹ.
20. Naegbọn mí sọgan jaya dọ okunnu hlan akọta lẹpo to yinyin dide to obá daho mọnkọtọn mẹ?
20 Mí ma yọ́n obá he mẹ okunnu na gbẹsọ yin didena akọta lẹ jẹ, mọjanwẹ mí ma yọ́n azán po ganmẹ opodo lọ tọn po do niyẹn. Nuhe mí yọnẹn lẹpo wẹ yindọ e ko sẹpọ. Mí jaya dọ wẹndagbe he yin lilá to obá daho mọnkọtọn mẹ yin dopo poun to nususu he dohia dọ ojlẹ lọ ko sẹpọ na Ahọluduta Jiwheyẹwhe tọn nado yitẹn to gandudu gbẹtọvi tọn lẹ si mẹ. (Daniẹli 2:44) Dile owhe dopodopo to jujuyi, dotẹnmẹ lọ to yinyin nina gbẹtọ livi susu lẹ nado kẹalọyi wẹndagbe lọ, podọ ehe nọ pagigona Jiwheyẹwhe mítọn, Jehovah. Mì gbọ mí ni magbe nado gbọṣi nugbonọ-yinyin mẹ podọ nado hẹn alọnu ján to kunnudide na akọta lẹpo mẹ to pọmẹ hẹ mẹmẹsunnu mítọn lẹ lẹdo aihọn pé. Gbọn mọwiwà dali, mí na whlẹn mídelẹ gọna mẹhe dotoaina mí lẹ.—1 Timoti 4:16.
Be Hiẹ Flin Ya?
• Naegbọn Matiu 24:14 do yin dọdai ayidego tọn de?
• Vivẹnu tẹlẹ wẹ Klistiani dowhenu tọn lẹ dó to azọ́n yẹwhehodidọ tọn mẹ, podọ etẹwẹ yin kọdetọn lọ lẹ?
• Nawẹ Biblu Plọntọ lẹ wá mọnukunnujẹ nuhudo lọ mẹ nado dekunnu na akọta lẹpo gbọn?
• To nulinlẹnpọndo nuwiwa omẹ Jehovah tọn lẹ tọn ji to owhe sinsẹ̀nzọn tọn he wayi mẹ, etẹwẹ whàn we taun?
[Apotin to weda 27-30]
LINLIN OWHE SINSẸ̀NZỌN 2005 TỌN HEYIN KUNNUDETỌ JEHOVAH TỌN LẸ TỌN LẸDO AIHỌN PÉ
Pọ́n zinjẹgbonu lọ mẹ
[Yẹdide to weda 24]
Jehovah deanana Pita nado dekunnu na Kọneliọsi po whẹndo etọn po
[Yẹdide to weda 25]
Paulu zingbejizọnlin na kilomẹtlu fọtọ́n susu to aigba po ohù po ji nado lá wẹndagbe lọ