Be Mì Nọ Dọhodopọ Ganji Ya?
“WEKANHLANMẸ Owanyi tọn sọn Owhe-60-Mẹvi Dè.” Ehe yin hosọ agbàwhinwhlẹn de tọn he yin awuwlena gbọn akuẹsẹdotẹn de dali to Japon to owhe vude lẹ die. E dotuhomẹna Japon-nu he tin to owhe 50 po 60 po gblamẹ lẹ nado dọ “numọtolanmẹ ahundoponọ” yetọn lẹ tọ́n jẹgbonu na alọwlemẹ yetọn. Dopo to mẹhe tindo mahẹ to agbàwhinwhlẹn lọ mẹ lẹ mẹ wlan hlan asi etọn dọmọ: “E sọgan whẹ́n na we, ṣigba e na vẹna mi eyin n’ma dọ ẹ tọ́n, enẹwutu nuhe n’jlo na dọna we poun wẹ yindọ: A basi taun dọ a yigbe bo dà mi.”
To aṣa voovo lẹ mẹ, kakajẹ Whèzẹtẹn-waji aihọn tọn lẹ tọn mẹ, numọtolanmẹ mẹtọn lẹ didọ jẹgbonu to paa mẹ ko yin agọjẹdo. Ṣogan, hugan gbẹtọ 15 000 wẹ tindo mahẹ to agbàwhinwhlẹn wekanhlanmẹ owanyi tọn enẹ mẹ. Agbàwhinwhlẹn lọ diyin sọmọ bọ devo sọ yin bibasi bọdego, podọ owe lẹ yin zinzinjẹgbonu do wekanhlanmẹ lọ lẹ ji. Ehe dohia dọ ojlo lọ tin to ahun mẹsusu tọn mẹ nado dọ numọtolanmẹ he yé tindo na alọwlemẹ yetọn tọ́n. Ṣigba, mẹdevo lẹ nọ gbẹ́ nado wàmọ. Etẹwutu? Vlavo na e nọ biọ vivẹnudido kavi nugopipe jẹ obá de mẹ to yé si nado sọgan dike mẹdevo lẹ—taidi alọwlemẹ yetọn—ni mọnukunnujẹ numọtolanmẹ yetọn mẹ wutu.
Hitoshi Kato, he wlan owe de do gbọjẹ gaa yíyí ji, dọ dọ to asu po asi po yọnhonọ lẹ ṣẹnṣẹn to Japon, asi lẹ wẹ nọ saba ze afọdide tintan gbẹdai tọn lẹ na homẹgble sinsinyẹn he ko hòpli na owhe susu lẹ wutu. E yidogọ dọmọ: “Ṣigba, awugbopo asu po asi po lọ tọn nado nọ dọhodopọ to whenuena nuhahun lẹ sọawuhia wẹ sọ nọ hẹn ehe wá.”
To gbọjẹ gaa yíyí godo, e sọgan paṣa asu de to whenuena asi etọn dọna ẹn dọ emi jlo na basi gbẹdai. Yé omẹ awe lẹ sọgan ko gọ̀n ma dọhodo numọtolanmẹ he yé tindo na ode awetọ yetọn ji na owhe susu. Asu po asi po lọ sọgan ko tẹnpọn nado dọ numọtolanmẹ yetọn lẹ tọ́n ṣigba yé ma nọ penugo nado hẹn hodọdopọ lọ wá tadona dagbe kọ̀n. Kakati nado wleawuna haṣinṣan pẹkipẹki de, yé nọ to núdọ̀n pludopludo.
Nawẹ asu po asi po sọgan didẹ gbemanọpọ yetọn lẹ to jijọho mẹ bo nọ dọ numọtolanmẹ yetọn lẹ tọ́n to aliho dagbe mẹ gbọn? E sọgan paṣa we nado yọnẹn dọ ayinamẹ he yọn-na-yizan hugan lẹ ma nọ yin mimọ to owe agọe tọn de he ayinamẹtọ alọwle tọn de kàn mẹ gba, ṣigba to owe de he ko dohó he yè ko na sisi na owhe susu lẹ mẹ—yèdọ Biblu.