“Míwlẹ Ma Hà Nọma Setonuna Jiwheyẹwhe Hú Gbẹtọ”

‘Jehovah Tọn Wẹ Awhàn Lọ’

AWHÀNPA agbàwhlẹntọ awe ṣite pannukọn yedelẹ to adà voovo agbàdo de tọn ji. Na azán 40, sunnu Islaeli tọn lẹ to budi tlala, bọ Goliati, awhàngán huhlọnnọ Filistininu lẹ tọn lọ to zùnzùn yé badabada.—1 Samuẹli 17:1-4, 16.

Goliati deafu do Islaelivi lẹ po ogbè lélé po dọmọ: “De mẹde na mì, bo gbọ e ni jẹte wá dè e. Eyin ewọ tin sọgan nado hoavùn hẹ mi, bosọ hù mi, be whenẹnu míwlẹ na yin mẹmẹsi mìtọn lẹ: ṣigba eyin yẹn hugan ewọ to huhlọn mẹ, bosọ hù i, be whenẹnu mìwlẹ na yin mẹmẹsi míwlẹ tọn lẹ, bo nọ sẹ̀n mí. . . . Yẹn deafu do awhàn Islaeli tọn to azán he gbè; na mẹde mi, na mí ni pé avùn.”—1 Samuẹli 17:8-10.

To hohowhenu, nuhe gbayipe wẹ e yin dọ awhàngán huhlọnnọ lẹ ni ze afọ awhànpa yetọn tọn dai to agbàwhinwhlẹn sunnu de-pé-de tọn lẹ mẹ. Eyin awhàngán de duto omẹ awetọ ji, be awhànpa etọn gbawhàn niyẹn. Ṣigba awhàngán he to afude do Islaeli ehe ma yin awhànfuntọ depope poun gba. Gángánsu he tọ́nalùn taun de wẹ—yèdọ kẹntọ he ylanhùn bosọ dobu de. Ṣigba, gbọn awhànpa omẹ Jehovah tọn lẹ tọn vivlẹko dali, Goliati hẹn dindọn wá ede ji.

Ehe ma yin agbàwhinwhlẹn awhànfunfun tọn de poun gba. Agbàwhinwhlẹn lọ tin to Jehovah po yẹwhe Filistininu lẹ tọn po ṣẹnṣẹn. Kakati nado yí adọgbigbo do deanana awhànpa etọn sọta kẹntọ Jiwheyẹwhe tọn lẹ, obu ko gbàhundona Ahọlu Sauli Islaeli tọn.—1 Samuẹli 17:11.

Sunnu Jọja de Dejido Jehovah Go

To ojlẹ he mẹ awhànpa awe lẹ ṣite ṣúdúdú pannukọn yedelẹ te ehe mẹ, sunnu jọja de he ko yin yiyiamisisadode nado lẹzun ahọlu Islaeli tọn wá dla nọvisunnu etọn lẹ pọ́n to awhànpa Sauli tọn mẹ. Yinkọ etọn wẹ Davidi. To whenuena e sè hogbe Goliati tọn lẹ, e kanse dọmọ: “Mẹnu wẹ Filistininu whẹmagbonọ he, bọ ewọ nado deafu do awhàn Jiwheyẹwhe ogbẹ̀nọ tọn lẹ?” (1 Samuẹli 17:26) To nukun Davidi tọn mẹ, Goliati ze afọ Filistininu lẹ po yẹwhe yetọn lẹ po tọn dai. Na homẹgble e po whẹjijọ po wutu, Davidi jlo nado yiavunlọna Jehovah po Islaeli po bo hoavùn sọta gángánsu kosi lọ. Ṣigba Ahọlu Sauli dọmọ: “Hiẹ ma tin sọgan nado yì Filistininu he ji nado hoavùn hẹ ẹ gba na omẹ ovu de wẹ hiẹ.”—1 Samuẹli 17:33.

Lehe pọndohlan Sauli po Davidi po tọn gbọnvo do sọ! Sauli pọ́n Davidi hlan taidi visunnu lẹngbọhọtọ de poun he jlo nado pé avùn hẹ asuka kanylantọ de. Ṣigba, na Davidi, gbẹtọvi tata de poun wẹ Goliati yin he to nukundiọsọ Oklunọ Nupojipetọ Jehovah. Adọgbigbo Davidi tọn sinai do nujikudo etọn dọ Jiwheyẹwhe ma na dike oyín Etọn po omẹ Etọn lẹ po ni yin ṣinṣanko matin yasanamẹ ji. To whenuena Goliati to awagundo to huhlọn etọn mẹ, Davidi ze jidide etọn do Jehovah mẹ, bo pọ́n ninọmẹ lọ hlan sọn pọndohlan Jiwheyẹwhe tọn mẹ.

‘Yẹn Ja Dè We to Oyín Jehovah Tọn Mẹ’

Yise Davidi tọn dolido taun. E flindọ Jiwheyẹwhe ko gọalọna ẹn nado whlẹn lẹngbọ etọn lẹ sọn beali de po kinnikinni de po si. Jọja lẹngbọhọtọ lọ deji dọ Jehovah nasọ gọalọna ẹn todin nado hoavùn hẹ kẹntọ Filistininu he dobu ehe. (1 Samuẹli 17:34-37) Po akòtopẹ́ de po to alọmẹ gọna zannu flinflin atọ́n, Davidi tọ́n nado yì pé Goliati.

Avùnnukundiọsọmẹ ehe taidi nuhe zẹ̀ nugopipe jọja Davidi tọn go, ṣigba e basi nudide nado pehẹ ẹ gbọn ginganjẹ huhlọn he Jehovah nọ na go dali. Po adọgbigbo po, e dọna Filistininu lọ dọmọ: “Hiẹ ja dè e po ohí de po, po owhán de po, po dludlu de po: ṣigba yẹn ja dè we to oyín [Jehovah] awhànpa lẹ tọn mẹ, Jiwheyẹwhe awhàn Islaeli tọn lẹ tọn, he hiẹ deafu do. Azán he gbè wẹ [Jehovah] na jo we do alọ ṣie mẹ . . . Na aihọn lẹpo nido yọnẹn dọ Jiwheyẹwhe de tin to Islaeli mẹ: podọ na agun pipli he lẹpo nido yọnẹn dọ [Jehovah] ma nọ yí ohí po owhán po do whlẹnmẹ gba: na [Jehovah] tọn wẹ awhàn lọ.”—1 Samuẹli 17:45-47.

Etẹwẹ yin kọdetọn lọ? Kandai gbọdo lọ dọmọ: “Davidi yí akòtopẹ́ de po zannu de po do gbawhàn to Filistininu lọ ji, bo hò Filistininu lọ, bosọ hù i; ṣigba ohí de ma tin to alọ Davidi tọn mẹ gba.” (1 Samuẹli 17:50) Ohí de ma tin to alọ etọn mẹ, ṣigba e tindo godonọnamẹ huhlọnnọ Jehovah Jiwheyẹwhe tọn.a

Lehe yise Davidi tọn to Jehovah mẹ yin whẹsuna to agbàwhinwhlẹn enẹ mẹ do sọ! To whenuena mí dona basi nudide to budisi gbẹtọ po jidide do huhlọn mẹwhlẹngán Jehovah tọn go po ṣẹnṣẹn, nudide he mí na basi họnwun: “Míwlẹ ma hà nọma setonuna Jiwheyẹwhe hú gbẹtọ.” (Owalọ lẹ 5:29) Humọ, eyin mí pọ́n ninọmẹ sinsinyẹn lẹ hlan sọn pọndohlan Jehovah Jiwheyẹwhe tọn mẹ, mí nọ penugo nado tindo pọndohlan jlẹkaji tọn gando nuhahun he tlẹ sẹhundaga lẹ go.

[Nudọnamẹ Odò Tọn]

[Apotin/Yẹdide to weda 9]

NAWẸ GOLIATI KLO SỌ?

Kandai 1 Samuẹli 17:4-7 tọn dọna mí dọ tedidi Goliati tọn hugan awagbà ṣidopo—nudi mẹtlu atọ̀n. Nuhe sọgan gọalọna mí nado yọ́n lehe Filistininu lọ klo sọ po huhlọn etọn po wẹ yin awu gànlinlọn tọn etọn he yin bibasi po gànvẹẹ po. E pẹnzin sọ kilo 57! Atin owhán etọn tọn tin taidi opọ̀ntin avọ̀lọntọ́ tọn, yèdọ atin he nọ saba pẹnzin taun de, podọ ota gànyuu tọn owhán etọn tọn pẹnzin sọ kilo ṣinawe. Etẹ nkọ, e yọnbasi taun dọ gbaja Goliati tọn pẹnzin hú Davidi lọsu!