Anademẹ Dejidego de Nado Tindo Ayajẹ

MẸLẸPO wẹ tindo jlọjẹ nado “doafọna ayajẹ.” Pọndohlan he mẹhe kàn Nulila Mẹdekannujẹ États-Unis d’Amérique tọn lẹ tindo niyẹn. Ṣigba, afọdidona yanwle de ma yin nudopolọ po yanwle lọ kọ̀n jijẹ po. Dile etlẹ yindọ jọja susu nọ doafọna yanwle gbẹzan tọn lẹ to ayidedai po aihundida lanmẹyiya tọn lẹ po mẹ, nẹmu to yé mẹ wẹ hiẹ yọnẹn he ko tindo kọdetọn dagbe he yé ko jlo vẹkuvẹku lọ nugbonugbo? Hànjitọ he diyin de he yọ́n nuhe kanvinván nado lẹzun hànsinọ kọdetọn dagbenọ de bẹhẹn ganji dọmọ: “E yọnbasi dọ hiẹ ma na tindo kọdetọn dagbe.”

Eyin hiẹ tindo numọtolanmẹ dopolọ dọ hiẹ ma sọgan tindo kọdetọn dagbe to afọdidona ayajẹ mẹ, a dibu blo. Eyin hiẹ doafọna ayajẹ to aliho he sọgbe mẹ, hiẹ na tindo e. Etẹwutu mí sọgan dọ mọ? Hosọ he jẹnukọn dọho gando ‘Jiwheyẹwhe ayajẹnọ lọ,’ Jehovah go. (1 Timoti 1:11) To Biblu mẹ, Jiwheyẹwhe na anademẹ lẹ he sọgan zọ́n bọ hiẹ ma na yin hinhẹn jẹflumẹ to vivẹnu he dó a te nado mọ ayajẹ lẹ mẹ. Jehovah sọgan gọalọna we nado duto nuhe nọ saba hẹn awubla wá lẹ ji. Di apajlẹ, lẹnnupọndo homẹmiọn he e wleawu etọn na we to whenuena mẹyiwanna towe de kú ji.

To Whenuena Mẹyiwanna de Kú

Be onú dagbe depope sọgan yin didọ gando okú go ya? Okú nọ klan mẹjitọ lẹ sọn ovi lẹ go podọ ovi lẹ sọn mẹjitọ lẹ go. E nọ klan họntọn vivẹ lẹ bo nọ hẹn kọmẹnu he tin to kọndopọ pẹkipẹki mẹ lẹ tindo numọtolanmẹ hihọ́-matindo tọn. To whenuena okú gbànú, whẹndo ayajẹnọ de sọgan tlọ́ biọ awubla mẹ.

E họnwun hezeheze dọ nugbajẹmẹji de wẹ okú yin. Etomọṣo, mẹdelẹ nọ gbẹkọ nugbo enẹ go bo nọ do okú hia taidi dona de. Lẹnnupọndo nuhe jọ to whenuena jẹhọn-ahizi Katrina gbànú to golfe du Mexique to août 2005 godo ji. To ṣiọdidi dopo whenu, sinsẹ̀ngán lọ dọmọ: “Katrina ma hù i gba. Jiwheyẹwhe wẹ ylọ ẹ yì whégbè.” To ojlẹ devo mẹ, azọ́nwatọ dotowhé tọn ahundoponọ de dọna viyọnnu de dọ ni ma hanú blo, dọ Jiwheyẹwhe ko ze onọ̀ etọn yì olọn mẹ. Viyọnnu lọ doavigbe dọmọ: “Etẹwutu, etẹwutu wẹ e dona ze e yì sọn dè e?”

E họnwun dọ linlẹn agọ̀ mọnkọtọn lẹ gando oṣiọ lẹ go ma nọ saba miọnhomẹna mẹhe to aluẹmẹ lẹ gba. Etẹwutu? Na hodidọ ehelẹ ma nọ do nugbo lọ hia gando okú go gba. Dehe tlẹ sọ ylan hugan wẹ yindọ, yé nọ do Jiwheyẹwhe hia taidi mẹhe nọ fìn mẹyiwanna lẹ sọn whẹndo po họntọn lẹ po si to aliho ylankan he nọ hẹn awufiẹsa wá mẹ. Kakati nado yin asisa homẹmimiọn tọn de, Jiwheyẹwhe nọ yin didohia taidi danuwatọ de he nọ hẹn nugbajẹmẹji okú tọn wá. Ṣigba Ohó Jiwheyẹwhe tọn dọ nugbo lọ gando okú go.

Biblu ylọ okú dọ kẹntọ de. E yí okú jlẹdo ahọlu de go he ko dugán do gbẹtọvi lẹ ji. (Lomunu lẹ 5:17; 1 Kọlintinu lẹ 15:26) Okú yin kẹntọ de he tindo huhlọn sọmọ bọ gbẹtọvi depope ma sọgan nọavunte sọta ẹ, podọ mẹyiwanna depope he kú nọ yin dopo poun to gbẹtọ madosọha he okú ko hù lẹ mẹ. Nugbo Biblu tọn ehe basi zẹẹmẹ awubla po flumẹjijẹ po he okú mẹyiwanna de tọn nọ hẹnwa na mí tọn ganji. E dohia dọ numọtolanmẹ enẹlẹ sọgbe. Etomọṣo, be Jiwheyẹwhe nọ yí kẹntọ lọ he yin okú zan nado bẹ mẹyiwanna mítọn lẹ yì olọn mẹ wẹ ya? Mì gbọ mí ni pọ́n gblọndo he Biblu na na kanbiọ enẹ.

Yẹwhehodọtọ 9:5, 10 dọmọ: “Oṣiọ lẹ ma yọ́n nude . . . Azọ́n ma tin, linlẹn ma tin, zinzan ma tin, kavi nuyọnẹn to kutomẹ [Ṣeol] fie hiẹ jei.” Etẹwẹ yin Ṣeol? Yọdò paa gbẹtọvi lẹ tọn he mẹ gbẹtọ lẹ nọ yì eyin yé kú wẹ. To yọdò mẹ, oṣiọ lẹ ma sọgan wà nudepope, yé ma sọgan whàngo, tindo numọtolanmẹ, kavi tindo linlẹn wunmẹ depope. Yé tin to ninọmẹ de mẹ he sọgan yin yiyijlẹdo amlọn yìkànmẹ de didọ go.a Gbọnmọ dali, Biblu dohia hezeheze dọ Jiwheyẹwhe ma nọ ze mẹyiwanna mítọn he kú lẹ na yé nido nọ̀ hẹ ẹ to olọn mẹ gba. Nuyiwadomẹji okú tọn ko zọ́n bọ yé masọ yọ́n nude ba bo tin to yọdò mẹ.

Jesu zinnudo nugbo ehe ji to okú họntọn etọn Lazalọsi tọn godo. Jesu yí okú jlẹdo amlọn go. Eyin Lazalọsi ko yì olọn mẹ nado tin hẹ Jiwheyẹwhe Ganhunupotọ wẹ, e ma na ko yin nuyiwa homẹdagbe tọn dọ Jesu ni hẹn ẹn gọwá aigba ji nado sọ wá kú whladopo dogọ to nukọnmẹ. Kandai gbọdo lọ dọ dọ to whenuena Jesu wá ṣiọditẹn lọ, e dawhá dọmọ: “Lazalọsi, jẹgbonu wá”! Biblu zindonukọn dọmọ: “Ewọ he yin oṣiọ lọ sọ jẹgbonu wá.” Lazalọsi gọwá ogbẹ̀ whladopo dogọ. Jesu yọnẹn dọ Lazalọsi ma tlọ́n aigba ji gba. E to ninọmẹ nudemayọnẹn tọn mẹ to yọdò mẹ wẹ.—Johanu 11:11-14, 34, 38-44.

Nujijọ ehe he yin kinkàn do Biblu mẹ gọalọna mí nado mọnukunnujẹemẹ dọ okú ma yin aliho de he Jiwheyẹwhe nọ yizan nado diọtẹnna gbẹtọvi lẹ sọn aigba ji yì olọn mẹ. Enẹwutu, mí sọgan yin whinwhàn nado dọnsẹpọ Jiwheyẹwhe, na mí yọnẹn dọ e ma yin ewọ wẹ nọ hẹn awubla mítọn wá gba. Mí sọ sọgan deji dọ e yọ́n awubla po hẹngble he kẹntọ lọ he yin okú nọ hẹnwa na mí lẹ po ganji. Podọ nugbo Biblu tọn gando ninọmẹ oṣiọ lẹ tọn go dohia dọ oṣiọ lẹ ma nọ jiya to olọnzomẹ kavi to lẹwezomẹ gba, ṣigba yé to ninọmẹ nudemayọnẹn tọn mẹ to yọdò mẹ. Enẹwutu, mẹyiwanna mítọn he kú lẹ finflin ma dona nọ hẹn mí nado gbẹwanna Jiwheyẹwhe kavi dibu na mí ma yọ́n fie yé tin te wutu gba. Humọ, to Biblu mẹ, Jehovah miọnhomẹna mí dogọ.

Todido Nọ Hẹn Ayajẹ Wá

Wefọ he mí gbadopọnna wayi lẹ dohia dọ todido yin adà titengbe de nado sọgan tindo ayajẹ nujọnu tọn. Hogbe lọ “todido,” dile e yin yiyizan do to Biblu mẹ, bẹ linlẹn nukundido onú dagbe po jidide po tọn hẹn. Nado mọ lehe todido sọgan dekọtọn do ayajẹ mẹ gbọn todin, mì gbọ mí ni lẹkọyi kandai fọnsọnku Lazalọsi tọn gbọn Jesu dali ji.

E whè gbau whẹwhinwhẹ́n awe wẹ zọ́n bọ Jesu do wà azọ́njiawu enẹ. Dopo wẹ yin nado de awubla Malta, Malia, po họntọn he tin to aluẹmẹ lẹ tọn po sẹ̀. Whladopo dogọ, yé sọgan nọpọ́ hẹ mẹyiwanna yetọn. Ṣigba Jesu donù whẹwhinwhẹ́n awetọ de go na Malta, he yin nujọnu hugan: “Yẹn ma ko dọ hlan we, dọ, eyin hiẹ yise, hiẹ na mọ gigo Jiwheyẹwhe tọn?” (Johanu 11:40) The New Testament in Modern English, gbọn J. B. Phillips dali, lẹ́ adà vivọnu hodidọ lọ tọn do “nujiawu nuhe Jiwheyẹwhe sọgan wà tọn.” Gbọn Lazalọsi hinhẹngọwa ogbẹ̀ dali, Jesu na mí numọdohlan-nukọn nuhe Jehovah Jiwheyẹwhe sọgan wà po nuhe e na wá wà to sọgodo po tọn. Zẹẹmẹ gigọ́ devo lẹ die gando “nujiawu nuhe Jiwheyẹwhe sọgan wà tọn” ehe go.

To Johanu 5:28, 29 mẹ, Jesu dọmọ: “Avò vò mì na ehe wutu blo: na ojlẹ lọ ja, to ehe mẹ mẹhe tin to yọdò mẹ lẹpo na sè ogbè etọn, bo na tọnjẹgbonu.” Ehe zẹẹmẹdo dọ oṣiọ he tin to Ṣeol mẹ lẹpo, he bẹ mẹyiwanna mítọn lẹ hẹn, na gọwá ogbẹ̀. Owalọ lẹ 24:15 basi zẹẹmẹ yinukọn dogọ gando nujijọ titengbe ehe go dọmọ: “Fọnsọnku dodonọ lẹ tọn, po mawadodonọ lẹ po tọn de na tin.” Enẹwutu, etlẹ yin “mawadodonọ lẹ,” yèdọ mẹsusu he ma yọ́n Jehovah bo masọ sẹ̀n ẹn lẹ, na tindo dotẹnmẹ hundote to sọgodo nado mọ nukundagbe Jiwheyẹwhe tọn yí.

Fie wẹ fọnsọnku ehe na wá aimẹ te? Psalm 37:29 dọmọ: “Dodonọ wẹ na dugu aigba tọn, bo nasọ nọ nọ̀ e mẹ kakadoi.” Lẹnnupọndo nuhe enẹ zẹẹmẹdo ji! Whẹndo po họntọn he okú ko klan lẹ po na wá mọ yedelẹ whladopo dogọ to aigba ji fi. Dile hiẹ to nulẹnpọndo ojlẹ ayajẹ tọn he a na yizan hẹ mẹhe hiẹ yiwanna nado nọ dogbẹ́ hẹ dai lẹ ji, e sọgbe hẹ lẹnpọn dagbe dọ ahun towe ni gọ́ na ayajẹ.

Jehovah Jlo Dọ Hiẹ Ni Tindo Ayajẹ

Mí ko gbadopọnna aliho awe he mẹ Jehovah sọgan hẹn ayajẹ towe jideji te mahopọnna nuhahun towe lẹ. Tintan, gbọn Biblu gblamẹ, e wleawuna oyọnẹn po anademẹ lẹ po nado gọalọna we nado pehẹ nuhahun lẹ po kọdetọn dagbe po. Gbọnvona dọ ayinamẹ Biblu tọn nọ gọalọna mí nado duto awubla he okú nọ hẹnwa ji, e sọ sọgan gọalọna mí nado duto nuhahun akuẹzinzan po agbasalilo tọn lẹ po ji ga. E sọgan na we huhlọn nado doakọnna whẹdida mawadodo po hunyanhunyan tonudidọ tọn po. Podọ eyin a yí anademẹ etọn do yizan mẹ to gbẹzan towe mẹ, e sọgan gọalọna we nado duto nuhahun mẹdetiti tọn devo lẹ ji.

Awetọ, gbọn Biblu pinplọn dali, hiẹ tindo todido de he zẹ̀ nuhe gbẹtọvi depope sọgan namẹ lẹpo go. Fọnsọnku họntọn lẹ po hagbẹ whẹndo tọn lẹ po tọn yin apadewhe todido he Biblu dọhodeji tọn. Osọhia 21:3, 4 basi zẹẹmẹ dogọ dọmọ: “Jiwheyẹwhe lọsu nasọ nọhẹ [gbẹtọvi lẹ], bo nasọ yin Jiwheyẹwhe yetọn. Jiwheyẹwhe nasọ súnsún dasin lẹpo sẹ̀ sọn nukun yetọn mẹ; okú ma nasọ tin ba, kavi awubla, kavi avi, mọ awufiẹsa ma na tin ba: na onú tintan lẹ ko juwayi.” Ehe zẹẹmẹdo dọ nuhe nọ hẹn awubla wá na we to gbẹzan towe mẹ lẹpo na busẹ kakadoi to madẹnmẹ. Opagbe he Biblu dó lẹ na mọ hẹndi, podọ hiẹ sọgan duvivi hẹndi etọn tọn. Yinyọnẹn poun dọ sọgodo dagbe de to nukọn ja ko pé nado mọ kọgbọ. Nado yọnẹn dọ hiẹ ma na doakọnna yajiji kakadoi to okú godo yin whẹwhinwhẹ́n de nado tindo ayajẹ.

Di dohia: Owhe susu die wayi, Maria mọ bọ azọ̀n agbasa wiwọ̀ tọn sayana asu etọn vudevude kaka bo hù i. E ma tlẹ ko ví asu etọn pó ganji to whenuena nuhahun akuẹzinzan tọn lẹ hẹn ewọ po viyọnnu etọn atọ̀n lẹ po gánnugánnu nado jo owhe yetọn do. To owhe awe godo, Maria mọdọ ewọ lọsu to azọ̀n agbasa wiwọ̀ tọn jẹ. Whlaawe wẹ yè wà azọ́n mẹzizẹ tọn he gẹdẹ lẹ na ẹn, podọ e nọ doakọnna awufiẹsa sinsinyẹn lẹ egbesọegbesọ. Mahopọnna nuhahun ehelẹ, e hẹn pọndohlan dagbe go, podọ ehe nọ whàn ẹn nado na tuli mẹdevo lẹ. Nawẹ e hẹn ayajẹ etọn go gbọn?

Maria dọmọ: “Eyin yẹn tindo nuhahun de, n’nọ tẹnpọn ma nado lẹnnupọndo nuhahun ṣie ji glanglan. Yẹn nọ dapana kanbiọ lẹ taidi ehelẹ: ‘Naegbọn ehe do to jijọ do go e? Naegbọn n’dona jiya sọle? Naegbọn n’dona jẹazọ̀n?’ Linlẹn agọ̀ lẹ nọ de huhlọn mẹtọn pò. Kakatimọ, n’nọ yí huhlọn ṣie zan nado sẹ̀n Jehovah bo gọalọna mẹdevo lẹ. Enẹ nọ hẹn ayajẹ wá na mi.”

Nawẹ todido nọ gọalọna Maria to gbẹzan etọn mẹ gbọn? E ze ayidonugo etọn do sọgodo ji to whenuena Jehovah na de azọ̀n po nuhahun gbẹtọvi tọn devo lẹ po sẹ. Eyin e yì dotowhé nado yin nukunpedego, e nọ má todido enẹ hẹ mẹdevo lẹ he to azọ̀n agbasa wiwọ̀ tọn jẹ, he sọgan nọma tindo todido depope. Nawẹ todido yin nujọnu na Maria sọ? E dọmọ: “Yẹn nọ saba lẹnnupọndo nuhe Biblu dọ to Heblu lẹ 6:19 mẹ ji, fie Paulu basi zẹẹmẹ todido tọn taidi húnsingàn de na ayiha kavi alindọn te. Matin húnsingàn enẹ, hiẹ na to fuflupé taidi tọjihun de to yujẹhọn de mẹ. Ṣigba eyin hiẹ tẹdo húnsingàn enẹ go, hiẹ na tin to hihọ́ mẹ mahopọnna nuhahun sinsinyẹn he hiẹ to pipehẹ lẹ.” ‘Todido ogbẹ̀ madopodo tọn enẹ, he Jiwheyẹwhe, he ma nọ dolalo ko dopagbe etọn’ gọalọna Maria nado hẹn ayajẹ etọn go. E sọgan wà nudopolọ na hiẹ lọsu.—Titu 1:2.

Gbọn Biblu pinplọn dali, hiẹ sọgan tindo ayajẹ nujọnu tọn mahopọnna nuhahun towe lẹ. Ṣigba, hiẹ sọgan tindo kanbiọ lẹ gando lehe ehe yọn-na-yizan gbọn go. Kunnudetọ Jehovah tọn lẹ na hùnhomẹ nado do gblọndo Owe-wiwe tọn he hiẹ dona yọnẹn nado sọgan tindo ayajẹ nujọnu tọn lẹ hia we. Dile hiẹ to tepọn hẹndi todido he Jehovah zedonukọnna mí tọn, hiẹ sọgan tin to mẹhe yin alọdlẹndo to aliho ehe mẹ lẹ mẹ dọmọ: “Yé na mọ ayajijẹ po homẹhunhun po yí, nukunbibia po awubla po na họnyi.”—Isaia 35:10.

[Nudọnamẹ Odò Tọn]

[Yẹdide to weda 5]

Nugbo Biblu tọn kẹdẹ wẹ sọgan de awubla pò

[Yẹdide to weda 7]

Todido fọnsọnku tọn he tin to Biblu mẹ sọgan yidogọna ayajẹ