Mọwẹ, Hiẹ Sọgan Tindo Ayajẹ

AYAJẸ nujọnu tọn he dẹn-to-aimẹ nọ vẹawu mimọ to whedelẹnu. Nuhe zọ́n taun lọ wẹ yindọ mẹsusu nọ lẹhlan asisa agọ̀ lẹ dè to vivẹnudido vẹkuvẹku yetọn nado mọ ayajẹ mẹ. Lehe e na pọnte do sọ eyin yé tindo họntọn dejidego he pegan de he sọgan do aliho he sọgbe lọ hia yé!

Anademẹ he nuhudo etọn tin enẹ sọgan yin mimọ to Biblu mẹ. Lẹnnupọndo owe etọn dopo poun, yèdọ Psalm lẹ ji. Owe ehe yin bladopọ ohàn wiwe 150 lẹ tọn dohlan Jehovah Jiwheyẹwhe, ehe diblayi madoawe yetọn yin pipà gbọn Ahọlu Davidi Islaeli hohowhenu tọn dali. Ṣigba nuhe yin nujọnu hugan wekantọ lọ lẹ yinyọnẹn wẹ nado yọnẹn dọ owe ehe yin kinkàn to gbọdo Họntọn daho hugan gbẹtọ tọn, yèdọ Jehovah tọn glọ. Enẹwutu, mí sọgan deji dọ e bẹ anademẹ Jehovah tọn lẹ hẹn na dagbe mítọn bosọ do aliho he nọ planmẹ yì ayajẹ kọ̀n hia.

Mẹhe kàn owe Psalm tọn lẹ kudeji dọ haṣinṣan dagbe de tintindo hẹ Jiwheyẹwhe wẹ nọ hẹn ayajẹ wá. Psalm-kàntọ wlan dọmọ: “Donanọ [kavi ayajẹnọ] wẹ mẹhe dibusi OKLUNỌ.” (Psalm 112:1) Haṣinṣan gbẹtọvi tọn, nutindo agbasa tọn, kavi nuwadotana mẹdetiti tọn depope ma sọgan hẹn ayajẹ wá sọ dehe nọ wá sọn yinyin apadewhe ‘mẹhe Jiwheyẹwhe yetọn yin Jehovah’ lẹ tọn mẹ gba. (Psalm 144:15) Gbẹzan devizọnwatọ Jiwheyẹwhe tọn egbezangbe tọn susu lẹ tọn wẹ do kunnudenu ehe tọn hia.

Susanne he ko tindo owhe kande linlán yin apajlẹ dopo.a E dọmọ: “To egbehe, mẹsusu wẹ nọ kọnawudopọ hẹ pipli delẹ nado jẹ yanwle dopolọ lẹ kọ̀n kavi nado doafọna nujlomẹ dopolọ lẹ. Ṣigba, to pipli lọ mẹ yé ma nọ saba pọ́n mẹlẹpo hlan taidi họntọn gba. Omẹ Jehovah tọn lẹ gbọnvo to enẹ mẹ. Owanyi mítọn na Jehovah nọ hẹn mí tindo owanyi na ode awetọ. Mí nọ voawu mahopọnna fidepope he mí tin te to omẹ Jiwheyẹwhe tọn lẹ ṣẹnṣẹn. Pọninọ ehe nọ hẹn gbẹzan mítọn pọnte tlala. Mẹdevo tẹlẹ wẹ sọgan sọalọakọ́n dọ emi tindo họntọn lẹ sọn pipli voovo lẹ, ninọmẹ voovo lẹ podọ akọ̀ voovo susu lẹ mẹ? N’sọgan dọ po nujikudo po dọ tintin to omẹ Jehovah tọn lẹ mẹ wẹ nọ dekọtọn do ayajẹ mẹ.”

Maree, he yin jiji to Écosse, lọsu mọ dọ haṣinṣan dagbe de tintindo hẹ Jehovah yin nujọnu eyin mẹde jlo na tindo ayajẹ. E dọmọ: “Whẹpo n’do plọn nugbo Biblu tọn, n’nọ duvivi sinimoto he dobu lẹ pinpọn tọn. Ṣigba amlọn nọ gbẹ́ mi to zánmẹ bọ n’nọ hẹn satin de do alọmẹ nado yàn kúvìtọ po obló he susu yẹdide lọ lẹ tọn nọ bẹhẹn lẹ po dolá. Ṣigba, to whenuena n’mọ nugbo bo doalọtena yẹdide mọnkọtọn lẹ pinpọn, haṣinṣan ṣie hẹ Jehovah hẹn ẹn yọnbasi na mi nado nọ damlọn madibu, po ayajẹ lọ po nado sẹ̀n Jiwheyẹwhe he dohuhlọn hugan aovi lẹ kavi nuhe yè lẹn nado yin obló lẹ.”

Jidide do Jehovah go Nọ Dekọtọn do Ayajẹ Mẹ

Mí ma tindo whẹwhinwhẹ́n depope nado tindo ayihaawe gando huhlọn Mẹdatọ lọ tọn po nuyọnẹn mado-dogbó etọn po go gba. Na Davidi yọnẹn dọ emi sọgan deji mlẹnmlẹn do Jehovah go bo dín fibẹtado to Ewọ mẹ wutu, e wlan dọmọ: ‘Ayajẹnọ wẹ sunnu lọ he yí OKLUNỌ do basi tudonu etọn.’—Psalm 40:4.

Maria dọmọ: “Numimọ he n’tindo to Espagne po fidevo lẹ po hẹn mi yọnẹn dọ eyin mí yí nulẹ wà to aliho Jehovah tọn mẹ, mahopọnna dọ numọtolanmẹ mítọn lẹ sọgan whàn mí ma nado wàmọ, mí nọ tindo kọdetọn dagbe hugan he mẹde sọgan tindo lẹ. Ehe nọ hẹn ayajẹ wá, na aliho Jehovah tọn wẹ yọ́n hugan to whepoponu.”

Andreas, he yin Klistiani mẹho agun tọn de he ko sẹ̀n to otò Europe tọn susu mẹ, lọsu yọnẹn sọn numimọ etọn titi mẹ dọ mí sọgan ze jidide mítọn do Jehovah mẹ. E dọmọ: “Mẹdaho ṣie sunnu, he ma kẹalọyi nuyise ṣie yinuwado ji e sinsinyẹn to jọja whenu ṣie, bo nọ to tuli na mi nado doafọna agbasazọ́n he pekuẹ ganji de. E jẹflumẹ pete to whenuena n’bẹ lizọnyizọn whenu-gigọ́ tọn jẹeji bo ma ganjẹ hihọ́ he mẹsusu lẹndọ tito sunzankuẹ gbọjẹ gaa tọn nọ hẹnwa go. To sinsẹ̀nzọn whenu-gigọ́ tọn ṣie mẹ, n’ma ko jẹdò nude tọn pọ́n gbede, podọ n’ko mọ dona susu he mẹdevo lẹ nọ kúdlọ etọn poun lẹ yí.”

To 1993, Felix yin oylọ-basina nado wá gọalọ to azọ́n hẹngblodeji alahọ Kunnudetọ Jehovah tọn lẹ tọn mẹ to Selters, Allemagne. To whenuena azọ́n lọ wá tadona kọ̀n, e yin oylọ basina nado lẹzun apadewhe hagbẹ whẹndo Bẹtẹli tọn to finẹ. Nawẹ e yinuwa gbọn? “N’kẹalọyi oylọ-basinamẹ lọ po ayihaawe po. Ṣigba todin e ko diblayi owhe ao he n’tin tofi, bọ n’sọ tindo nujikudo dọ Jehovah sè odẹ̀ ṣie lẹ. E yọ́n nuhe yin dagbe hugan na mi. Gbọn jidide mlẹnmlẹn tintindo to ewọ mẹ po dotẹnmẹ nina ẹn nado deanana mi po dali, n’jotẹnna ẹn nado do nuhe e jlo dọ yẹn ni wà hia mi.”

Susanne, he yin nùdego wayi, jlo na sẹ̀n taidi lizọnyizọnwatọ whenu-gigọ́ tọn kavi gbehosọnalitọ de, ṣigba e vẹawuna ẹn nado mọ agbasazọ́n whenu-gli tọn de. To teninọ na owhe dopo godo, e yinuwa po jidide do Jehovah go po. E dọmọ: “Yẹn ze alọdowemẹwe ṣie jo nado lẹzun gbehosọnalitọ whepoponu tọn. N’ko sẹ̀ akuẹ do he na pé nado penukundo akuẹzinzan ṣie lẹ go na nudi osun dopo. Podọ osun ayajẹ tọn nankọ die ehe wá sọawuhia nado yin! Lizọnyizọn ṣie yin asisa ayajẹ daho tọn, ṣigba hokansemẹ azọ́n dindin tọn lẹpo wẹ dekọtọn do ovọ́ mẹ. Nalete, dile Jehovah ko dopagbe etọn do, e ma gbẹkọ go e gba. To azán godo tọn osun lọ tọn, n’penugo bo doalọ azọ́nmẹbiọwema de mẹ. N’yọnẹn todin dọ n’sọgan deji do Jehovah go nugbonugbo! Numimọ tintan ehe to sinsẹ̀nzọn whenu-gigọ́ tọn mẹ ko hẹn mi tindo gbẹzan ayajẹ po pekọ tọn po.”

Alọkikẹyi Ayinamẹ Jiwheyẹwhe Tọn Nọ Yidogọna Ayajẹ

Ahọlu Davidi basi nuṣiwa sinsinyẹn delẹ. To whedelẹnu, e nọ tindo nuhudo ayinamẹ nuyọnẹn tọn. Be mí nọ jlo nado kẹalọyi ayinamẹ po anademẹ po dile Davidi basi do ya?

Aida, sọn France, doayi e go to ojlẹ de mẹ wayi dọ emi ko basi nuṣiwa sinsinyẹn de. E dọmọ: “Nuhe yin ahunmẹdunamẹnu ṣie taun wẹ nado vọ́ haṣinṣan ṣie hẹ Jehovah jlado. E masọ hugan mọ.” E dọnsẹpọ Klistiani mẹho agun tọn lẹ na alọgọ. E wá dọ todin to hugan owhe 14 yiyizan taidi lizọnyizọnwatọ whenu-gigọ́ tọn godo dọmọ: “Homẹhunnu nankọ die nado yọnẹn dọ Jehovah ko jo ylando ṣie na mi!”

Alọkikẹyi ayinamẹ Jiwheyẹwhe tọn lẹ sọgan whlẹn mí sọn nuṣiwa mẹ. Judith basi zẹẹmẹ dọmọ: “To whenuena n’yin owhe 20-mẹvi, n’tindo owanyi zogbe na ajọwatọ-gbẹ́ ṣie Allemagne-nu de, he wà nuhe go e pé lẹpo nado fọnjlodotena mi. Mẹhe tindo osi de wẹ e yin, he tindo kọdetọn dagbe taun to agbasazọ́n etọn mẹ bo ko sọ wlealọ! N’yọnẹn dọ n’dona basi nudide dopo to tonusisena osẹ́n Jehovah tọn lẹ po gbigbẹ́ Ẹ dai mlẹnmlẹn po ṣẹnṣẹn. N’dọ homẹ na mẹjitọ ṣie lẹ. Otọ́ ṣie flinnu mi madoadudẹ́ji gando nuhe Jehovah to jijlo sọn dè e go. E dọ hójọhó na mi—yèdọ nuhe n’tindo nuhudo etọn pẹpẹ! Etomọṣo, ayiha ṣie gbẹ́ pò to whẹjijọ dín. Na osẹ lẹ onọ̀ ṣie nọ yí whèjai lẹ zan nado dọho hẹ mi gando lehe osẹ́n Jiwheyẹwhe tọn lẹ yin nujọnu bo nọ whlẹn ogbẹ̀ gán do sọ go. N’dopẹ́ tlala dọ ayiha ṣie wá dọnsẹpọ Jehovah vudevude. Mẹplọnlọ po nuplọnmẹ po mimọyi sọn ewọ dè ko hẹn ayajẹ daho wá na mi bọ yẹn duvivi owhe ayajẹ tọn susu to lizọnyizọn whenu-gigọ́ tọn mẹ bosọ tindo alọwlemẹ Klistiani dagbedagbe de he yiwanna mi bosọ yiwanna Jehovah po ahun lẹpo po.”

Numimọ enẹlẹ zinnudo nugbo-yinyin ohó Davidi tọn ji hezeheze dọmọ: “[Ayajẹnọ] wẹ ewọ tasinyẹn mẹhe tọn yin jijona, ylando mẹhe tọn yin nuṣinyọndo. [Ayajẹnọ] wẹ dawe lọ mẹhe OKLUNỌ ma hia ylanwiwa dokọna.”—Psalm 32:1, 2.

Ayajẹ Mimọyi sọn Mẹdevo lẹ Tọn Hihopọn Mẹ

‘Ayajẹnọ wẹ yé he to madogánnọ lẹ tọn lẹnpọn,’ wẹ Davidi wlan. E zindonukọn dọmọ: ‘OKLUNỌ na whlẹn ẹn to nukunbia whenu. OKLUNỌ na sọ ẹ whlá, bo sọ hẹn ẹn do ogbẹ̀; e nasọ yin ayajẹnọ.’ (Psalm 41:1, 2) Mẹtọnhopọn owanyinọ he Davidi dohia Mẹfiboṣẹti, he yin visunnu sẹkunọ họntọn vivẹ etọn Jonatani tọn, yin apajlẹ walọ dagbe tọn gando madogánnọ kavi agbátọnọ lẹ go.—2 Samuẹli 9:1-13.

Marlies, he yin mẹdehlan sọn owhe 47 die, tindo lẹblanulọkẹyi lọ nado dekunnu to mẹhe họ̀n sọn lẹdo hunyanhunyan Aflika, Asie, po Whèzẹtẹn-waji Europe tọn po mẹ lẹ ṣẹnṣẹn. E dọmọ: “Yé tindo nuhahun voovo lẹ bosọ nọ tindo numọtolanmẹ lọ to paa mẹ dọ yé nọ yin pinpọnhlan taidi jonọ bosọ nọ yin kinklan dovo. Alọgigọna omẹ mọnkọtọn lẹ nọ hẹn ayajẹ wá to whepoponu.”

Marina he owhe etọn ko lán to kande ji wlan dọmọ: “Taidi tlẹnnọ de, n’yọ́n nuhe e nọ zẹẹmẹdo eyin mẹdevo lẹ tin to finẹ nado gọalọnamẹ. Ehe nọ whàn mi nado na tuli gbẹtọ lẹ gbọn alokan yiylọ kavi wekinkan hlan yé dali. Mẹsusu ko do pinpẹn-nutọn-yinyọnẹn yetọn hia na ehe. Alọgigọna mẹdevo lẹ nọ hẹn ayajẹ wá na mi.”

Dimitar he tin to owhe 20 etọn lẹ mẹ dọmọ: “Onọ̀ ṣie pọ́n go e whẹ́n ede ṣokẹdẹ. To whenuena n’tin to ovu, homẹ ṣie hùn nado tindo nugopọntọ Oplọn Agunwe tọn de he nọ plan mi hẹn godo to osẹ lẹpo mẹ nado plọnazọ́n mi to lizọnyizọn lọ mẹ. N’gbẹsọ yọ́n pinpẹn linsinsinyẹn etọn tọn. N’yọnẹn dọ e ma bọawu to whelẹponu nado dozolanmẹna mi.” Dimitar to alọgọna mẹdevo lẹ todin na pinpẹn-nutọn-yinyọnẹn na alọgọ he e mọyi wayi wutu. E dọmọ: “N’nọ tẹnpọn bo nọ plan yọpọvu de podọ ga mẹhomẹ de hẹn godo yì kunnudegbe e whè gbau whladopo to osun mẹ.”

Owe Psalm lẹ tọn sọ donù nuhe nọ hẹn ayajẹ wá devo lẹ go. Dopo wẹ nado yọ́n nujọnu-yinyin ginganjẹ huhlọn Jehovah tọn go tọn kakati nido yin mẹdetiti tọn. Mí hia dọmọ: ‘Ayajẹnọ wẹ omẹ lọ huhlọn mẹhe tọn tin to Jehovah dè.’—Psalm 84:5.

Corinna he sẹtẹn yì otò de mẹ fie nuhudo sù te to lizọnyizọn lọ mẹ sọgan dekunnu ehe tọn. E dọmọ: “N’pehẹ ogbè yọyọ, aṣa yọyọ, po aliho nulẹnpọn tọn yọyọ de po. E taidi dọ planẹti devo pete ji wẹ n’te nkọ. N’nọ dibu nado dọyẹwheho to lẹdo jonọ tọn de mẹ. N’biọ alọgọ Jehovah tọn, podọ to huhlọn etọn mẹ n’nọ penugo bo nọ dọyẹwheho to aigba-denamẹ he to olá de ji na azán dopo blebu. To godo mẹ, mọwiwà wá lẹzun jọwamọnu na mi. N’bẹ plọnmẹ Biblu susu jẹeji, bo gbẹsọ to vivi numimọ ehe tọn dù. N’mọ dọ po huhlọn Jehovah tọn po, mí sọgan duto aliglọnnamẹnu he tlẹ sẹhundaga lẹ ji.”

Mọwẹ, onú voovo lẹ wẹ nọ yidogọna ayajẹ, taidi họntọnjiji hẹ Jiwheyẹwhe po omẹ etọn lẹ po, jidide do Jehovah go mlẹnmlẹn, alọkikẹyi ayinamẹ etọn lẹ, podọ mẹdevo lẹ tọn hihopọn. Gbọn zọnlinzinzin to aliho Jehovah tọn lẹ mẹ po tonusisena osẹ́n etọn lẹ po dali, mí sọgan duvivi nukundagbe etọn tọn to ayajẹ mẹ.—Psalm 89:15; 106:3; 112:1; 128:1, 2.

[Nudọnamẹ Odò Tọn]

[Yẹdide to weda 12]

Maria

[Yẹdide lẹ to weda 13]

Maree

Susanne po

Andreas po

[Yẹdide lẹ to weda 15]

Corinna

Dimitar