Kanbiọ lẹ sọn Wehiatọ lẹ Dè
Nawẹ mí wagbọn do yọnẹn dọ zẹẹmẹ heyin bibasi gando nuyọnẹn go to Howhinwhẹn lẹ 8:22-31 mẹ dlẹnalọdo Jesu Klisti jẹnukọnna gbẹninọ etọn taidi gbẹtọvi de?
Zẹẹmẹ gbọdo heyin bibasi gando nuyọnẹn go to owe Howhinwhẹn lẹ tọn mẹ dọmọ: “[Jehovah, NW ] ko tindo mi di to whẹwhẹwhenu aliho etọn tọn, jẹnukọnna azọ́n etọn hohowhenu tọn. . . . Whẹpo yè do yí osó lẹ hẹnai, whẹpo okọ́ta lẹ do jọ, yè ko ji mi. . . . Whenuena e to awu olọn tọn wle, yẹn tin to finẹ; . . . whenẹnu yẹn tin to e dè di azọ́nwatọgan de: yẹn sọ yin homẹhun etọn egbesọegbesọ, yẹn to ayajẹ whepoponu to nukọn etọn. . . . Bọ homẹhunhun ṣie sọ tin to ovi gbẹtọ tọn lẹ dè.”
Wefọ ehe ma sọgan to hodọ gando nuyọnẹn Jiwheyẹwhe tọn kavi nuyọnẹn to paa mẹ go poun gba. Naegbọn mí do dọ mọ? Na nuyọnẹn he yin hodọ gandego tofi yin dehe yè “tindo” kavi yin didá, jẹnukọnna bẹjẹeji azọ́n Jehovah tọn lẹ tọn. Jehovah Jiwheyẹwhe yin madopodo podọ nuyọnẹn etọn to ote tẹgbẹ. (Psalm 90:1, 2) Nuyọnẹn etọn ma tindo bẹjẹeji; mọjanwẹ e ma yin didá podọ e masọ yin ‘jiji.’ Humọ, e yin didọ dọ nuyọnẹn ehe to hodọ bosọ to nuyiwa, taidi gbẹtọ de.—Howhinwhẹn lẹ 8:1.
Owe Howhinwhẹn lẹ tọn dọ dọ to hohowhenu nuyọnẹn tin to adà Jehovah, Mẹdatọ lọ tọn mẹ, taidi “azọ́nwatọgan de.” E họnwun dọ Jesu wẹ hogbe enẹlẹ to alọdlẹndo. Na ojlẹ dindẹn jẹnukọnna aigba ji wiwá etọn, Jesu wazọn to pọmẹ pẹkipẹki hẹ Jehovah sọmọ bọ Ohó Jiwheyẹwhe tọn dọmọ: “E . . . tin jẹnukọnna onú popo, to ewọ mẹ wẹ yè hẹn nulẹpo plita do.”—Kọlọsinu lẹ 1:17; Osọhia 3:14.
E sọgbe nado dlẹnalọdo Ovi Jiwheyẹwhe tọn taidi nuyọnẹn, na Ewọ wẹ de lẹndai po nujinọtedo nuyọnẹn tọn Jehovah tọn lẹ po hia wutu. Jẹnukọnna gbẹninọ etọn taidi gbẹtọvi de, Jesu yin Ohó Jiwheyẹwhe tọn, kavi Hoyidọtọ etọn. (Johanu 1:1) Ewọ yin hodọ gandego taidi ‘huhlọn Jiwheyẹwhe tọn podọ nuyọnẹn Jiwheyẹwhe tọn.’ (1 Kọlintinu lẹ 1:24, 30) Zẹẹmẹ he fọnjlodotenamẹ nankọ die he yin bibasi gando Ovi Jiwheyẹwhe tọn go, mẹhe homẹhunhun he e tindo to gbẹtọvi lẹ mẹ whàn ẹn nado ze ogbẹ̀ etọn jo taidi ofligọ de do ota yetọn mẹ!—Johanu 3:16.
[Yẹdide to weda 31]
“Whẹpo yè do yí osó lẹ hẹnai . . . yè ko ji mi”