‘Mì Ko Sè Akọ́ndonanu Job Tọn’
‘Mì ko sè akọ́ndonanu Job tọn, bosọ mọ opodo Jehovah tọn; dọ awuvẹmẹtọ wẹ Jehovah, lẹblanu etọn sọ bọ.’—JAKOBU 5:11.
1, 2. Whlepọn tẹwẹ asu po asi po Pologne-nu de pehẹ?
HARALD ABT lẹzun dopo to Kunnudetọ Jehovah tọn lẹ mẹ na nuhe ma pé owhe dopo to whenuena awhànpa Hitler tọn yí Danzig to agewaji Pologne tọn. Enẹgodo ninọmẹ onú lẹ tọn jẹ sinsinyẹn ji, bo tlẹ sọ ylan deji na Klistiani nugbo he to finẹ lẹ. Ponọ Gestapo lẹ tẹnpọn nado hẹn Harald po huhlọn po nado mọ́n yise etọn gbọn alọdido owe de mẹ dali, ṣigba ewọ gbẹ́. To ganpamẹ ninọ̀ na osẹ delẹ godo, Harald yin didohlan osla yasanamẹ Sachsenhausen tọn mẹ, fie ewọ yin budona bosọ yin hihò whlasusu te. Ponọ de dlẹnalọdo fihe azọ̀ mẹhe nọ yin mimẹ̀ to zòhọ osla lọ tọn mẹ lẹ nọ gbọ̀n tọ́n bo dọna Harald dọ, “Hiẹ na gbọ̀n finẹ yì Jehovah towe dè to azán 14 gblamẹ eyin hiẹ gbẹ́ tẹdo yise towe go.”
2 To whenuena Harald yin wiwle, asi etọn, Elsa, pò to anọ́ na viyọnnu osun ao mẹvi yetọn. Ṣigba ponọ Gestapo lẹ ma wọnji Elsa go gba. Azán de ma yì, viyẹyẹ etọn yin yíyí sọn e si bọ ewọ lọsu yin didohlan osla mẹhuhu tọn mẹ to Auschwitz. Ṣogan, ewọ po Harald po luntọ́n. To Atọ̀họ̀-Nuhihọ́ Lọ Tọn [Flansegbe] 15 juillet 1980 mẹ, hiẹ sọgan hia nususu dogbọn lehe yé doakọnnanu do dali. Harald wlan dọmọ: “To lẹndopọ mẹ, yẹn ko yí owhe 14 zan to osla yasanamẹ tọn po ganpa lẹ po mẹ na yise ṣie to Jiwheyẹwhe mẹ wutu. ‘Be asi towe ko gọalọna we nado doakọnna ehe lẹpo ya?’ wẹ yin kinkanse mi to ojlẹ de mẹ wayi. Matin ayihaawe, ewọ wàmọ! Yẹn yọnẹn sọn bẹjẹeji dọ ewọ ma na jogbe gbede, podọ ehe yinyọnẹn gọalọna mi nado hẹn tenọgligo. N’yọnẹn dọ ewọ na jlo nado mọ dọ yẹn hẹn nugbonọ-yinyin ṣie go kakajẹ okú kakati nado jogbe bo yin tuntundote. . . . Elsa doakọnna ninọmẹ sinsinyẹn susu to owhe he e yizan to osla yasanamẹ Allemagne tọn lẹ mẹ lẹ whenu.”
3, 4. (a) Apajlẹ mẹnu lẹ tọn wẹ sọgan gọalọna Klistiani lẹ nado doakọnnanu? (b) Naegbọn Biblu dotuhomẹna mí nado gbadopọnna numimọ Job tọn?
3 Na nugbo tọn, akọndidona yajiji ma nọ bọawu dile Kunnudetọ susu sọgan yigbe etọn do. Enẹwutu, Biblu na ayinamẹ Klistiani lẹpo dọmọ: “Mì yí yẹwhegán he to hodọ to oyín [Jehovah] tọn mẹ lẹ do basi ohia oyaji tọn, po linsinsinyẹn tọn po.” (Jakobu 5:10) To whenuho gblamẹ, devizọnwatọ Jiwheyẹwhe tọn susu wẹ yin homẹkẹndo matin whẹwhinwhẹ́n depope. Apajlẹ he “aslọ kunnude tọn” susu ehelẹ zedai sọgan na tuli mí nado yí akọ́ndonanu do zindonukọn to alèwezun Klistiani tọn mítọn mẹ.—Heblu lẹ 11:32-38; 12:1.
4 To kandai Biblu tọn mẹ, Job yin ayidego taidi mẹhe ze apajlẹ akọ́ndonanu tọn dai. Jakobu wlan dọmọ: ‘Doayi e go, míwlẹ nọ hia yé he doakọnna lẹ di donanọ. Mì ko sè akọ́ndonanu Job tọn, bosọ mọ opodo Jehovah tọn; dọ awuvẹmẹtọ wẹ Jehovah, lẹblanu etọn sọ bọ.’ (Jakobu 5:11) Numimọ Job tọn gọalọna mí nado mọ ahọsumẹ he tin to sẹdotẹnmẹ na nugbonọ he Jehovah nọ dona lẹ to obá kleun de mẹ. Hú popolẹpo, e do nugbo he na hẹn ale wá na mí to ojlẹ whlepọn tọn lẹ mẹ hia. Owe Job tọn gọalọna mí nado mọ gblọndo na kanbiọ ehelẹ: To whenuena mí tin to whlepọn glọ, naegbọn mí dona tẹnpọn nado mọnukunnujẹ whẹho tangan he e bẹhẹn lẹ mẹ? Gbigbọ po jẹhẹnu tẹlẹ po wẹ na gọalọna mí nado doakọnnanu? Nawẹ mí sọgan hẹn Klistiani hatọ he to yaji lẹ lodo gbọn?
Nukunnumimọjẹ Whẹho lọ Lẹpo Mẹ
5. Whẹho tangan tẹwẹ mí dona hẹn do ayiha mẹ to whenuena mí tin to whlepọn glọ?
5 Nado hẹn jlẹkajininọ gbigbọmẹ tọn go to whlepọn glọ, mí dona mọnukunnujẹ whẹho he e bẹhẹn lẹpo mẹ. Eyin e ma yinmọ, nuhahun mẹdetiti tọn lẹ sọgan sú nukun gbigbọmẹ tọn mítọn lẹ. Whẹho nugbonọ-yinyin hlan Jiwheyẹwhe tọn wẹ yin nujọnu hugan. Otọ́ olọnmẹ tọn mítọn biọ nude to mí si ehe mí ma dona wọn to whenuena e dọmọ: “Ovi ṣie, yin nuyọnẹntọ, bosọ hẹn homẹ ṣie hùn; na yẹn nido gblọnhona ewọ he to vivlẹ mi.” (Howhinwhẹn lẹ 27:11) Lẹblanulọkẹyi vonọtaun nankọtọn die! Mahopọnna madogán po mape mítọn lẹ po, mí sọgan hẹn Mẹdatọ mítọn hùnhomẹ. Mí nọ wàmọ to whenuena owanyi mítọn na Jehovah hẹn mí penugo nado doakọnna whlepọn lẹ. Owanyi nugbo Klistiani tọn nọ doakọnna onú lẹpo. E ma nọ gbọ̀vọ́ gbede.—1 Kọlintinu lẹ 13:7, 8.
6. Nawẹ Satani vlẹ Jehovah gbọn, podọ jẹ obá tẹ mẹ?
6 Owe Job tọn do Satani hia hezeheze taidi omẹ lọ he to Jehovah vlẹ. E sọ do ayilinlẹn ylankan kẹntọ mayinukundomọ ehe tọn po ojlo etọn nado hẹn haṣinṣan mítọn hẹ Jiwheyẹwhe gble po hia. Na taun tọn, dile e yin didohia do to whẹho Job tọn mẹ, Satani sawhẹdokọna devizọnwatọ Jehovah tọn lẹpo dọ ṣejannabi wẹ nọ whàn yé nado sẹ̀n Jiwheyẹwhe podọ e to onú lẹpo wà nado dohia dọ owanyi yetọn na Jiwheyẹwhe sọgan miọn. E ko vlẹ Jiwheyẹwhe na owhe fọtọ́n susu. To whenuena Satani yin yinyan sọn olọn mẹ, ogbè de yin sisè sọn olọn mẹ he ylọ ẹ dọ “mẹslẹtọ mẹmẹsunnu mítọn lẹ tọn” bo dohia dọ e nọ to owhẹ̀ yetọn jẹ “to Jiwheyẹwhe mítọn nukọn to okle po ozán po.” (Osọhia 12:10) Eyin mí doakọnnanu po nugbonọ-yinyin po, mí sọgan dohia dọ whẹsadokọnamẹ etọn lẹ ma yin nugbo.
7. Nawẹ mí sọgan diahi hẹ madogán agbasa tọn po kọdetọn dagbe po gbọn?
7 Mí dona flin dọ Lẹgba sọgan yí nukunbibia depope he mí nọ pehẹ zan nado sọgan hẹn haṣinṣan mítọn hẹ Jehovah gble. Whetẹnu wẹ e whlé Jesu pọ́n? To whenuena huvẹ to Jesu hù to nùbibla na azán susu godo. (Luku 4:1-3) Ṣigba, huhlọn gbigbọmẹ tọn he Jesu tindo hẹn ẹn penugo nado nọavunte sọta whlepọn Lẹgba tọn lẹ. Lehe e yin onú titengbe do sọ nado yí huhlọn gbigbọmẹ tọn do diahi hẹ madogán agbasa tọn lẹpo, vlavo dehe yin hinhẹnwa gbọn azọ̀n kavi yọnhowhe dali! Eyin “gbẹtọ mítọn gbonu tọn [tlẹ] to dindọn,” mí ma nọ gbọjọ na “yè to gbẹtọ mítọn homẹ tọn hẹn jẹ yọyọ egbesọegbesọ” wutu.—2 Kọlintinu lẹ 4:16.
8. (a) Nawẹ numọtolanmẹ agọ̀ lẹ tintindo sọgan hẹn mí gbọjọ gbọn? (b) Ayilinlẹn tẹwẹ Jesu tindo?
8 To yidogọ mẹ, numọtolanmẹ agọ̀ lẹ sọgan hẹnmẹ gbọjọ to gbigbọ-liho. E sọgan paṣa mẹde dọ, ‘Naegbọn Jehovah do jotẹnna ninọmẹ ehe?’ Mẹhe yin nuyiwa hẹ to aliho agọ̀ mẹ de sọgan kanse ede dọ, ‘Naegbọn mẹmẹsunnu ṣie nado yinuwa hẹ mi dole?’ Numọtolanmẹ mọnkọtọn lẹ tintindo sọgan hẹn mí nado wọn whẹho tangan lọ lẹ bo ze ayidonugo mítọn lẹpo do ninọmẹ mítọn lẹ ji. E taidi dọ aliho he mẹ họntọn lalonọ atọ̀n Job tọn lẹ hẹn ẹn jẹflumẹ te gbleawuna ẹn tlala to numọtolanmẹ-liho hugan awufiẹsa agbasa tọn he azọ̀n hẹnwa na ẹn. (Job 16:20; 19:2) Mọdopolọ, apọsteli Paulu dohia dọ homẹgble he ma yin didava sọgan “na otẹn [kavi, hùn dotẹnmẹ dotena Lẹgba].” (Efesunu lẹ 4:26, 27) Kakati nado túntún adi kavi homẹgble do mẹdevo lẹ ji kavi ze ayidonugo glanglan do mawadodo ninọmẹ de tọn ji, Klistiani lẹ na wadagbe nado hodo apajlẹ Jesu tọn bo “jo [yede] hlan ewọ he nọ yí dodo do dawhẹ,” yèdọ Jehovah Jiwheyẹwhe. (1 Pita 2:21-23) “Nuyọnẹn” kavi ayilinlẹn Jesu tọn nkọ tintindo sọgan yin avùnhonu dagbe sọta mẹgbeyinyan Satani tọn lẹ.—1 Pita 4:1.
9. Jide tẹwẹ Jiwheyẹwhe na mí gando agbàn nuhahun depope he wá mí ji tọn kavi whlepọn he mí pehẹ lẹ go?
9 Hú popolẹpo, mí ma dona pọ́n nuhahun mítọn lẹ hlan gbede taidi ohia de dọ Jiwheyẹwhe ko gblehomẹ do mí go gba. Nukunnumamọjẹnumẹ mọnkọtọn sayana Job to whenuena hogbe fifiẹ họntọn he dona ko miọnhomẹna ẹn lẹ tọn to awugblena ẹn. (Job 19:21, 22) Biblu na mí jide po hogbe ehelẹ po dọmọ: “Yè ma sọgan yí oylan do whlé Jiwheyẹwhe pọ́n gba, mọ e ma sọ nọ whlé mẹdepope pọ́n.” (Jakobu 1:13) Kakatimọ, Jehovah dopagbe nado gọalọna mí nado doakọnna agbàn nuhahun depope he wá mí ji tọn bo whlẹn mí sọn whlepọn he mí sọgan pehẹ lẹpo mẹ. (Psalm 55:22; 1 Kọlintinu lẹ 10:13) Eyin mí dọnsẹpọ Jiwheyẹwhe pẹkipẹki to ojlẹ ayimajai tọn lẹ mẹ, mí na penugo nado tindo pọndohlan dagbe gando ninọmẹ lẹpo go bo gbawhàn Lẹgba tọn.—Jakobu 4:7, 8.
Nuhe Na Gọalọna Mí Nado Doakọnnanu Lẹ
10, 11. (a) Etẹwẹ gọalọna Job nado doakọnnanu? (b) Nawẹ ayihadawhẹnamẹnu dagbe tintindo gọalọna Job gbọn?
10 Mahopọnna ninọmẹ blawu Job tọn—he bẹ hogbe mẹhẹngbọjọ “homẹmiọnnamẹtọ” etọn lẹ tọn po flumẹjijẹ etọn do adọ̀ tangan nugbajẹmẹji etọn tọn ji po hẹn—Job gbẹsọ hẹn tenọgli etọn go. Etẹwẹ mí sọgan plọn sọn akọ́ndonanu etọn mẹ? Matin ayihaawe, nugbonọ-yinyin etọn hlan Jehovah wẹ onú tangan lọ he hẹn ẹn penugo nado doakọnnanu. ‘E dibusi Jiwheyẹwhe bosọ họnsi oylan.’ (Job 1:1) Aliho gbẹzan etọn tọn niyẹn. Job ma gbẹ́ Jehovah dai dile etlẹ yindọ e ma mọnukunnujẹ nuhewutu ninọmẹ onú lẹ tọn do diọ to ajiji mẹ. Job yọnẹn dọ ewọ dona sẹ̀n Jiwheyẹwhe to ninọmẹ dagbe po ylankan po mẹ.—Job 1:21; 2:10.
11 Ayihadawhẹnamẹnu dagbe tintindo sọ miọnhomẹna Job. To ojlẹ de mẹ he e taidi dọ gbẹzan etọn jei vivọnu, homẹmiọnnamẹnu wẹ e yin na ẹn dọ e ko wà nuhe go e pé lẹpo nado gọalọna mẹdevo lẹ, dọ e ko tẹdo nujinọtedo dodo Jehovah tọn lẹ go, bo ko sọ dapana sinsẹ̀n lalo wunmẹ lẹpo.—Job 31:4-11, 26-28.
12. Etẹwẹ yin nuyiwa Job tọn to whenuena Elihu gọalọna ẹn?
12 Na nugbo tọn, e họnwun dọ Job tindo nuhudo alọgọ tọn nado jla pọndohlan etọn do to onú delẹ mẹ. Podọ e yí whiwhẹ do kẹalọyi alọgọ lọ—yèdọ onú titengbe devo he gọalọna ẹn nado doakọnnanu. Job dotoaina ayinamẹ nuyọnẹn tọn he Elihu na ẹn po sọwhiwhe po, bosọ kẹalọyi anademẹ Jehovah tọn. E yigbe dọmọ: “Yẹn ko dogbè na ẹn he yẹn ma tunwun, . . . yẹn ṣì dee, bosọ lẹnvọjọ to kọ́gudu po afín po mẹ.” (Job 42:3, 6) Dile etlẹ yindọ azọ̀n lọ gbẹ́ to yasana Job, homẹ etọn hùn dọ pọndohlan etọn he yin vivọjlado gọalọna ẹn nado dọnsẹpọ Jiwheyẹwhe pẹkipẹki dogọ. “Yẹn yọnẹn dọ hiẹ [Jehovah] sọgan wà onú lẹpo,” wẹ Job dọ. (Job 42:2) Zẹẹmẹ he Jehovah basi do kiklo-yinyin Etọn ji gọalọna Job nado mọnukunnujẹemẹ hezeheze dọ ewọ ma sọtẹ́n to Mẹdatọ lọ nukọn gba.
13. Nawẹ lẹblanu didohia hẹn ale wá na Job gbọn?
13 To tadona mẹ, Job ze apajlẹ ayidego lẹblanu tọn dai. Homẹmiọnnamẹtọ lalonọ etọn lẹ gbleawuna ẹn tlala, ṣogan to whenuena Jehovah biọ to Job si nado hodẹ̀ do ota yetọn mẹ, e wàmọ. Enẹgodo, Jehovah hẹn Job jẹ gángán. (Job 42:8, 10) E họnwun dọ adidudu ma na gọalọna mí nado doakọnnanu, adavo owanyi po lẹblanu po. Mẹhẹndohomẹ jijodo nọ hẹn mí lodo to gbigbọ-liho, podọ nuyiwa mọnkọtọn wẹ Jehovah nọ dona.—Malku 11:25.
Ayinamẹtọ Nuyọnẹntọ He Nọ Gọalọna Mí Nado Doakọnnanu Lẹ
14, 15. (a) Jẹhẹnu tẹlẹ wẹ na hẹn ayinamẹtọ de penugo nado hẹn mẹdevo lẹ jẹ gángán? (b) Naegbọn Elihu tindo kọdetọn dagbe to alọgigọna Job mẹ?
14 Onú devo he mí sọgan plọn sọn kandai Job tọn mẹ wẹ nujọnu-yinyin ayinamẹtọ nuyọnẹntọ lẹ tọn. Omẹ mọnkọtọn lẹ yin mẹmẹsunnu he “yè ji na madodego” kavi na ojlẹ ayimajai tọn. (Howhinwhẹn lẹ 17:17) Ṣigba, dile numimọ Job tọn dohia do, ayinamẹtọ delẹ sọgan gbleawunamẹ kakati nado hẹnmẹ jẹ gángán. Ayinamẹtọ dagbe dona nọ do awuvẹmẹ, sisi, po homẹdagbe po hia, dile Elihu wà do. Mẹho agun tọn lẹ po Klistiani he whèwhín devo lẹ po sọgan tin to dandannu glọ nado jla nulẹnpọn mẹmẹsunnu he nuhahun lẹ ko doagbànna lẹ tọn do, podọ nado sọgan wà ehe, ayinamẹtọ mọnkọtọn lẹ sọgan plọn nususu sọn owe Job tọn mẹ.—Galatianu lẹ 6:1; Heblu lẹ 12:12, 13.
15 Nuhọakuẹ susu wẹ mí sọgan plọn sọn aliho he mẹ Elihu penukundo whẹho lọ go te. E dotoai na whenu susu whẹpo do dọhodo linlẹn agọ̀ họntọn atọ̀n Job tọn lẹ tọn ji. (Job 32:11; Howhinwhẹn lẹ 18:13) Elihu dọho hẹ Job kẹdẹdile mẹde na wà hẹ họntọn de do. (Job 33:1) To vogbingbọn mẹ na homẹmiọnnamẹtọ lalonọ atọ̀n lọ lẹ, Elihu ma mọ ede di mẹhe yiaga hú Job. “Yè dó yẹn ga sọn okò mẹ,” wẹ e dọ. E ma jlo na yidogọna awufiẹsa Job tọn lẹ gbọn hogbe lẹnpọn matindo tọn lẹ yiyizan dali. (Job 33:6, 7; Howhinwhẹn lẹ 12:18) Kakati nado mọhodọdo walọ he Job yizan wayi lẹ go, Elihu pà ẹ na dodowiwa etọn. (Job 33:32) Dehe tlẹ sọ yin nujọnu hugan, Elihu tindo pọndohlan Jiwheyẹwhe tọn do whẹho lẹ ji, podọ e gọalọna Job nado ze ayidonugo do nugbo lọ ji dọ Jehovah ma na yinuwa to aliho mawadodo tọn mẹ gbede. (Job 34:10-12) E na tuli Job nado nọtepọn Jehovah, kakati nado tẹnpọn bo suwhẹna dodonọ-yinyin edetiti tọn. (Job 35:2; 37:14, 23) Ayihaawe ma tin dọ mẹho agun tọn po Klistiani devo lẹ po na mọaleyi sọn nuplọnmẹ ehelẹ mẹ.
16. Nawẹ homẹmiọnnamẹtọ lalonọ atọ̀n Job tọn lẹ lẹzun azọ́nwanu de to alọ Satani tọn mẹ gbọn?
16 Ayinamẹ nuyọnẹn Elihu tọn gbọnvo pete na hodidọ whánsọmẹ Elifazi, Bildadi, po Zofali po tọn. “Mìwlẹ ma ko dọho nuhe yin jijlọ ṣie tọn de gba,” wẹ Jehovah dọna yé. (Job 42:7) Eyin yé tlẹ sọalọakọ́n dọ dagbe Job tọn dín wẹ emi te, yé yinuwa di azọ́nwanu to alọ Satani tọn mẹ kakati nido yin taidi gbẹdohẹmẹtọ nugbonọ lẹ. Yé omẹ atọ̀n lẹpo wẹ dohia sọn bẹjẹeji dọ Job lọsu wẹ hẹn nugbajẹmẹji lẹ wá ede ji. (Job 4:7, 8; 8:6; 20:22, 29) Sọgbe hẹ nuhe Elifazi dọ, Jiwheyẹwhe ma nọ dejido devizọnwatọ etọn lẹ go, podọ vlavo mí yin dodonọ kavi lala, enẹ ma nọ duahunmẹna Ẹn. (Job 15:15; 22:2, 3) Elifazi tlẹ sawhẹ oylan he Job ma wà lẹ tọn dokọna ẹn. (Job 22:5, 9) To vogbingbọn mẹ, Elihu gọalọna Job to gbigbọ-liho, yèdọ nuhe yin yanwle ayinamẹtọ owanyinọ de tọn to whepoponu.
17. Etẹwẹ mí dona hẹn do ayiha mẹ eyin mí tin to whlepọn glọ?
17 Mí sọgan mọ nudevo plọn gando akọ́ndonanu go to owe Job tọn mẹ. Jiwheyẹwhe owanyinọ mítọn nọ mọ ninọmẹ mítọn lẹ podọ e tindo ojlo bosọ penugo nado gọalọna mí to aliho voovo lẹ mẹ. Mí ko dọhodo numimọ Elsa Abt tọn ji wayi. Lẹnnupọndo tadona he kọ̀n e wá ji: “Whẹpo yẹn do yin wiwle, n’ko hia wekanhlanmẹ mẹmẹyọnnu de tọn he dohia dọ to whlepọn sinsinyẹn glọ gbigbọ Jehovah tọn nọ hẹnmẹ vò to ayiha mẹ. Linlẹn ṣie to whenẹnu wẹ yindọ hójlẹ wẹ e na ko te. Ṣigba to whenuena yẹnlọsu pehẹ whlepọn lẹ, n’mọdọ nugbo wẹ e dọ. Nuhe jọ lọ pẹpẹ niyẹn. E na vẹawu nado mọnukunnujẹemẹ eyin hiẹ lọsu ma ko jugbọn ninọmẹ mọnkọtọn mẹ. Na nugbo tọn e jọ do go e domọ. Jehovah nọ gọalọnamẹ.” Elsa ma to hodọ gando nuhe Jehovah sọgan wà kavi nuhe e wà to owhe fọtọ́n lẹ die wayi to azán Job tọn gbè go gba. Ojlẹ mítọn hodọ wẹ e te. Mọwẹ, “Jehovah nọ gọalọnamẹ”!
Donanọ Wẹ Dawe lọ He Doakọnnanu
18. Ale tẹlẹ wẹ Job mọyi na akọ́ndonanu etọn wutu?
18 Vude to mí mẹ wẹ na pehẹ nukunbibia sinsinyẹn he taidi Job tọn nkọ. Ṣigba whlepọn depope he aihọn ylankan ehe sọgan hẹnwa mí ji, mí tindo whẹwhinwhẹ́n dagbe lẹ nado hẹn tenọgligo, dile Job wà do. Na nugbo tọn, akọ́ndonanu hẹn gbẹzan Job tọn pọnte dogọ. E hẹn ẹn pegan, bo hẹn ẹn sọgbe. (Jakobu 1:2-4) Akọ́ndonanu sọ hẹn haṣinṣan etọn hẹ Jiwheyẹwhe lodo. “Yẹn ko sè linlin towe gbọn sisè otó tọn dali; ṣigba dinvie nukun ṣie ko mọ we,” wẹ Job dọ po nujikudo po. (Job 42:5) Satani yin didohia taidi lalonọ na e ma penugo nado hẹn tenọgli Job tọn gble. To owhe kanweko lẹ godo, Jehovah gbẹ́ dlẹnalọdo devizọnwatọ etọn Job taidi apajlẹ dodowiwa tọn. (Ezekiẹli 14:14) Kandai tenọgligo-hinhẹn po akọ́ndonanu etọn po tọn nọ dozolanmẹna omẹ Jiwheyẹwhe tọn lẹ kakajẹ egbehe.
19. Naegbọn hiẹ do lẹndọ akọ́ndonanu yin nujọnu?
19 To whenuena Jakobu kanwehlan Klistiani owhe kanweko tintan tọn lẹ gando akọ́ndonanu go, e donù pekọ he akọ́ndonanu nọ hẹnwa go. Podọ e yí apajlẹ Job tọn zan nado flinnu yé dọ Jehovah nọ suahọ devizọnwatọ nugbonọ etọn lẹ susugege. (Jakobu 5:11) Job 42:12 dọmọ: “Mọwẹ, OKLUNỌ dona ogbẹ̀ godo Job tọn sù hú whẹwhẹwhenu etọn.” Jiwheyẹwhe gọ̀ nuhe Job hẹnbu lẹ na ẹn do gbẹ́aweji, podọ e nọgbẹ̀ dẹn to ayajẹ mẹ. (Job 42:16, 17) Mọdopolọ, awufiẹsa, yajiji, kavi awubla depope he mí sọgan doakọnna to vivọnu aihọn ylankan ehe tọn, na yin didesẹ bo na yin winwọn to aihọn yọyọ Jiwheyẹwhe tọn mẹ. (Isaia 65:17; Osọhia 21:4) Mí ko sè akọ́ndonanu Job tọn, podọ gbemima mítọn wẹ nado hodo apajlẹ etọn po alọgọ Jehovah tọn po. Biblu dopagbe dọmọ: “Donanọ wẹ dawe lọ he doakọnna whlepọn: na whenuena yè tẹ́n ẹn pọ́n, e na yí jẹgbakun ogbẹ̀ tọn, he [Jehovah] ko dopagbe hlan yé he yiwanna ẹn lẹ.”—Jakobu 1:12.
Etẹwẹ Na Yin Gblọndo Towe?
• Nawẹ mí sọgan hẹn homẹhun Jehovah gbọn?
• Naegbọn mí ma dona pọ́n nuhahun mítọn lẹ hlan taidi ohia de dọ Jiwheyẹwhe ko gblehomẹ do mí go?
• Etẹlẹ wẹ gọalọna Job nado doakọnnanu?
• Nawẹ mí sọgan hodo apajlẹ Elihu tọn to yisenọ hatọ mítọn lẹ hinhẹn lodo mẹ gbọn?
[Yẹdide to weda 28]
Ayinamẹtọ dagbe nọ do awuvẹmẹ, sisi, po homẹdagbe po hia
[Yẹdide to weda 29]
Elsa po Harald Abt po