Whenuena Mẹyiwanna de Gbẹ́ Jehovah Dai

MARK po Louise po yin Kunnudetọ Jehovah tọn lẹ.a Yé ko yí owanyi po mẹtọnhopọn po do plọn Owe-wiwe ovi yetọn lẹ, dile Biblu dotuhomẹna mẹjitọ Klistiani lẹ nado nọ wà do. (Howhinwhẹn lẹ 22:6; 2 Timoti 3:15) Ṣigba e blawu dọ, ovi yetọn lẹpo ma zindonukọn nado to Jehovah sẹ̀n to whenuena yé whẹ́n gba. “E nọ vẹna mi yì ahun mẹ dọ ovi ṣie delẹ buali,” wẹ Louise dọ. “Nawẹ n’sọgan whlá gbọn dọ e nọ hẹn mi jẹflumẹ taun egbesọegbesọ? Eyin mẹdevo lẹ to ovi yetọn lẹ hodọ, ahun ṣie nọ hò bọ dasin nọ dibla wayi do mi.”

Na nugbo tọn, eyin mẹde de nado gbẹ́ Jehovah po aliho gbẹninọ tọn he yin titodohukanji to Owe-wiwe mẹ po dai, hagbẹ nugbonọ whẹndo etọn tọn lẹ nọ sè vivẹ taun to jọwamọ-liho. “N’yiwanna mẹdaho ṣie yọnnu taun,” wẹ Irene dọ. “N’na wà nulẹpo nado mọ dọ e lẹkọ do Jehovah dè!” Maria, he nọvisunnu etọn jo Jehovah do nado doafọna gbẹzan fẹnnuwiwa tọn, dọmọ: “E vẹawu na mi nado doakọnna ehe na to ninọmẹ he pò lẹpo mẹ, e ko sọawuhia nado yin nọvisunnu vivẹ de na mi. Na taun tọn, n’nọ jẹdò etọn eyin e wá jẹ nuwiwa whẹndo tọn dahodaho lẹ whenu.”

Naegbọn E Nọ Vẹawu Sọmọ?

Naegbọn ovi kavi mẹyiwanna devo de hinhẹnbu to gbigbọ-liho nọ hẹn ayimajai sinsinyẹn wá na hẹnnumẹ Klistiani lẹ sọmọ? Na yé yọnẹn dọ Owe-wiwe dopagbe ogbẹ̀ madopodo to paladisi aigba ji tọn mẹ tọn na mẹhe gbọṣi nugbonọ-yinyin mẹ na Jehovah lẹ. (Psalm 37:29; 2 Pita 3:13; Osọhia 21:3-5) Nukundido yetọn wẹ nado duvivi dona ehelẹ tọn to pọmẹ hẹ alọwlemẹ, ovi, mẹjitọ, nọvi, po ovivi yetọn lẹ po. Lehe e nọ vẹna yé do sọ nado mọ dọ dotẹnmẹ ehe sọgan gbọ̀ mẹyiwanna yetọn he ko doalọtena Jehovah sinsẹ̀n lẹ go! Etlẹ yin to gbẹzan dintọn mẹ, Klistiani lẹ yọnẹn dọ osẹ́n po nunọwhinnusẹ́n Jehovah tọn lẹ po nọ hẹn ale wá na yé. Enẹwutu, Klistiani lẹ nọ blawu tlala nado mọ dọ mẹyiwanna yetọn lẹ to nuyiwa to aliho de mẹ bọ yé na gbẹ̀n kọdetọn vẹadi lẹ dandan.—Isaia 48:17, 18; Galatianu lẹ 6:7, 8.

E sọgan vẹawu na mẹhe ma ko tindo numimọ nuhẹnbu mọnkọtọn tọn pọ́n lẹ nado yọ́n obá he mẹ e sọgan yinuwadomẹji jẹ. Diblayin adà gbẹzan tọn lẹpo go wẹ e nọ gando. “E nọ vẹawu na mi taun nado sinai to opli Klistiani tọn lẹ ji bo mọ mẹjitọ lẹ to nuko bosọ to hodọ hẹ ovi yetọn lẹ,” wẹ Louise dọ. “To nujijọ ayajẹ tọn depope whenu, n’nọ tindo numọtolanmẹ awubla tọn na mẹyiwanna ṣie he ma tin to otẹn lọ mẹ lẹ wutu.” Mẹho Klistiani de flin nuhe jọ to whenuena viyọnnu asi etọn tọn sánkanna gbẹdido etọn hẹ yé na owhe ẹnẹ. E dọmọ: “ojlẹ ayajẹ tọn lẹ lọsu nọ saba dekọtọn do awubla mẹ. Eyin n’na nude asi ṣie kavi plan ẹn yì ofi dagbedagbe de to sẹfifo, e nọ jẹ avivi ji eyin e flindọ ovi etọn ma to ayajẹ hẹ mí.”

Be Klistiani ehelẹ ko to numọtolanmẹ dohia zẹjlẹgo wẹ ya? E ma yinmọ dandan gba. Na nugbo tọn, jẹhẹnu Jehovah he dá mí to apajlẹ etọn mẹ tọn lẹ hodo wẹ yé na ko te jẹ obá de mẹ. (Gẹnẹsisi 1:26, 27) Etẹwẹ ehe zẹẹmẹdo? Eyọn, etẹwẹ yin numọtolanmẹ Jehovah tọn to whenuena omẹ etọn Islaelivi lẹ ṣiatẹ sọta ẹ? To Psalm 78:38-41 mẹ, mí mọ dọ nuyiwa yetọn hẹn homẹgble Jehovah bosọ hẹn awusinyẹn ẹn. Ṣogan, e yí homẹfa do na avase yé bo domẹplọnlọ yé go, bosọ jona yé pludopludo to whenue yé do lẹnvọjọ hia. E họnwun dọ, Jehovah tindo owanyi sisosiso na nudida etọn lẹ, yèdọ ‘azọ́n alọ etọn lẹ tọn,’ bo ma nọ gbẹkọ yé go aplà. (Job 14:15; Jona 4:10, 11) E ko dó nugopipe owanyi sisosiso tọn dopolọ do ahun mẹ na gbẹtọvi lẹ, podọ na taun tọn haṣinṣan he tin to hagbẹ whẹndo tọn lẹ ṣẹnṣẹn sọgan sinyẹn taun. Enẹwutu, e ma yin nupaṣamẹ dọ gbẹtọvi lẹ nọ blawu to whenuena yé hẹn hẹnnumẹ yiwanna de bu to gbigbọ-liho.

Na nugbo tọn, dopo to whlepọn sinsinyẹn hugan he sinsẹ̀n-basitọ nugbo lẹ nọ pehẹ lẹ mẹ wẹ mẹyiwanna de hinhẹnbu to gbigbọ-liho. (Owalọ lẹ 14:22) Jesu dọ dọ alọkikẹyi owẹ̀n etọn na hẹn kinklan wá to whẹndo delẹ mẹ. (Matiu 10:34-38) E ma yindọ owẹ̀n Biblu tọn lọsu na ede nọ hẹn kinklan whẹndo tọn wá wẹ gba. Kakatimọ, hagbẹ whẹndo tọn mayisenọ lẹ kavi dehe ma yin nugbonọ lẹ wẹ nọ hẹn kinklan wá gbọn gbigbẹ́ aliho Klistiani tọn dai dali kavi etlẹ yin gbọn nukundidiọsọ ẹ dali. Ṣigba, mí sọgan dopẹ́ dọ Jehovah ma jo nugbonọ etọn lẹ do matin alọgọ nado pehẹ whlepọn he yé nọ pannukọn lẹ gba. Eyin hiẹ tin to awubla mẹ to alọnu din na mẹyiwanna de hinhẹnbu to gbigbọ-liho wutu, nunọwhinnusẹ́n Biblu tọn tẹlẹ wẹ sọgan gọalọna we nado doakọnna awufiẹsa lọ bo mọ ayajẹ po pekọ po jẹ obá de mẹ?

Lehe Hiẹ Sọgan Dudeji Gbọn

‘Mì hẹn mìde dote bo yí mìde whlá to owanyi Jiwheyẹwhe tọn mẹ.’ (Juda 20, 21) Sọgbe hẹ ninọmẹ towe lẹ, e sọgan yindọ nudepope ma tin he hiẹ sọgan wà to alọnu din nado gọalọna hagbẹ whẹndo tọn he ko doalọtena Jehovah sinsẹ̀n de. Etomọṣo, hiẹ sọgan jlọ dewe dote gọna hagbẹ whẹndo towe tọn he gbẹ́ pò to nugbonọ yin lẹ podọ hiẹ dona wàmọ. Veronica, he awe to visunnu etọn atọ̀n lẹ mẹ jo nugbo do, dọmọ: “Yẹn po asu ṣie po mọ ayinamẹ homẹdagbe tọn lọ yí dọ eyin mí hẹn dolilo gbigbọmẹ tọn mítọn go, mí na tin to ninọmẹ dagbe hugan lọ mẹ nado dokuavọna visunnu mítọn lẹ to whenuena yé na wá gọ̀ biọ yede mẹ. Fie wẹ visunnu duvanọ lọ na ko yì eyin otọ́ etọn ma ko tin to ninọmẹ dagbe mẹ nado kẹalọyi i whladopo dogọ?”

Nado hẹn dolilo towe go, hẹn alọnu ján to nuwiwa gbigbọmẹ tọn lẹ mẹ. Ehe bẹ tito-to-whinnu de hẹn na Biblu pinplọn sisosiso po opli Klistiani tọn lẹ yìyì po. Nọ hẹn dewe tin-to-aimẹ nado gọalọna mẹdevo lẹ to agun mẹ to obá he mẹ ninọmẹ towe lẹ na we dotẹnmẹ jẹ. Nugbo wẹ dọ, to tintan whenu, hiẹ sọgan mọ nuwiwa mọnkọtọn lẹ taidi nuhe vẹawu. Veronica flin dọmọ: “Linlẹn ṣie tintan wẹ nado klan dee dovo taidi kanlin he gbleawu de. Ṣigba asu ṣie tẹkudeji dọ mí dona hẹn aṣa nuwiwa gbigbọmẹ tọn dagbe de go. E nọ hẹn ẹn diun dọ mí yì opli lẹ. To whenuena ojlẹ sọ̀ nado yì plidopọ de, yẹn tindo nuhudo adọgbigbo tọn taun nado sọgan biọ gbẹtọ lẹ mẹ. Ṣogan, tito-to-whinnu lọ dọ̀n mí sẹpọ Jehovah dogọ. Na taun tọn, plidopọ enẹ jlọ ovi mítọn he gbọṣi nugbonọ-yinyin mẹ lọ dote tlala.”

Maria, he yin nùdego jẹnukọn, mọ dọ alọgọnamẹnu daho wẹ e yin nado hẹn alọnu ján to lizọnyizọn kunnudegbe tọn mẹ, podọ to alọnu din e to alọgọna omẹ ẹnẹ nado plọn Biblu. Mọdopolọ, Laura dọmọ: “Dile etlẹ yindọ n’gbẹ́ nọ viavi egbesọegbesọ, n’dopẹ́ na Jehovah dọ eyin n’ma tlẹ tindo kọdetọn dagbe sọ mẹjitọ delẹ to ovi lẹ pinplọn mẹ, n’tindo owẹ̀n pipé Biblu tọn, he sọgan gọalọna whẹndo lẹ to azán godo tọn ehelẹ mẹ.” Ken po Eleanor po, he ovi yetọn mẹho lẹ ko jo agun do, basi tito nado sẹtẹn yì fie nuhudo wẹnlatọ Ahọluduta tọn sù hugan te de podọ nado bẹ lizọnyizọn whenu-gigọ́ tọn jẹeji. Ehe ko gọalọna yé nado hẹn pọndohlan dagbe go podọ ma nado dike awubla ni tlọ yé pete.

Ma Hẹn Todido bu blo. Owanyi “nọ doto onú lẹpo.” (1 Kọlintinu lẹ 13:7) Ken, he yin nùdego to aga, dọmọ: “To whenuena ovi mítọn lẹ gbẹ́ aliho nugbo tọn dai, to nukun ṣie mẹ, e taidi dọ yé ko kú wẹ nkọ. Ṣigba to okú nọviyọnnu ṣie tọn godo, pọndohlan ṣie diọ. Homẹ ṣie hùn dọ ovi ṣie lẹ ma ko kú to agbasa-liho podọ Jehovah gbẹ́ jo ali donuvo na yé nado lẹkọwa e dè.” Na nugbo tọn, numimọ lẹ ko dohia dọ susu mẹhe jo nugbo do lẹ tọn wẹ nọ lẹkọwa to godo mẹ.—Luku 15:11-24.

Nọavunte sọta whẹgbledo-mẹdetiti. Titengbe mẹjitọ lẹ sọgan tindo ayilinlẹn lọ nado nọ lẹnnu hlan godo bọ e na nọ vẹna yé dọ emi ma ko penukundo ninọmẹ delẹ go to aliho he gbọnvo mẹ. Ṣigba, linlẹn tangan he yin nùzindeji to Ezekiẹli 18:20 mẹ wẹ yindọ ylanwatọ lọ wẹ dona dogbè nudide agọ̀ etọn tọn to Jehovah nukọn, e ma yin mẹjitọ etọn lẹ gba. E jẹna ayidego dọ, dile etlẹ yindọ owe Howhinwhẹn lẹ tọn basi zẹẹmẹ susu gando azọngban mẹjitọ lẹ tọn nado plọn ovi yetọn lẹ whẹ́n to aliho he sọgbe mẹ go, ayinamẹ he e na jọja lẹ nado dotoai bo setonuna mẹjitọ yetọn lẹ yí whla ẹnẹ do hugan dehe mẹjitọ lẹ mọyi. Mọwẹ, ovi lẹ tindo azọngban lọ nado kẹalọyi oplọn sinai do Biblu ji he yé mọyi sọn mẹjitọ mapenọ yetọn lẹ dè. Vlavo dagbe hugan he hiẹ sọgan ko wà to whenẹnu wẹ a ko wà nado penukundo whẹho lẹ go. Ṣogan, eyin hiẹ tlẹ lẹndọ a ko ṣì onú delẹ wà podọ dọ awugbopo towe wẹ ehelẹ tlẹ yin, enẹ ma zẹẹmẹdo dandan dọ nuṣiwa towe lẹ wẹ zọ́n bọ mẹyiwanna towe do jo nugbo do gba. Depope he whẹho lọ yin, hiẹ ma sọgan jla nudepope do gbọn whẹsadokọna dewe dali dọ, “eyin n’ko yọnẹn wẹ.” Plọnnu sọn nuṣiwa towe lẹ mẹ, magbe ma nado vọ́ yé wà, bo biọ jona Jehovah tọn to odẹ̀ mẹ. (Psalm 103:8-14; Isaia 55:7) Enẹgodo, ze ayidonugo do sọgodo ji, e ma yin do nuhe ko jọ wayi lẹ ji gba.

Nọ fahomẹ hẹ mẹdevo lẹ. E sọgan vẹawu na mẹdelẹ nado yọ́n lehe yé sọgan na we tuli kavi miọnhomẹna we do, titengbe eyin yelọsu ma ko jugbọn ninọmẹ mọnkọtọn mẹ pọ́n. Humọ, gbẹtọ lẹ gbọnvo to nuhe yé nọ pọnhlan taidi tulinamẹnu kavi homẹmiọnnamẹnu mẹ. Enẹwutu, eyin mẹde dọ nude he gblehomẹna we, yí ayinamẹ apọsteli Paulu tọn he tin to Kọlọsinu lẹ 3:13 mẹ do yizan mẹ dọmọ: “Mì . . . nọ sinyẹnlin hẹ mìnọzo, mì nọ jona mìnọzo, eyin mẹde tindo wiwọ́ do mẹde go.”

Nọ na sisi tito mẹplọnlọ-domẹgo Jehovah tọn. Eyin hẹnnumẹ towe de ko mọ mẹplọnlọ yí to agun mẹ, flindọ apadewhe tito Jehovah tọn wẹ ehe yin, bosọ nọ hẹn ale wá na mẹlẹpo, gọna ylanwatọ lọ lọsu. (Heblu lẹ 12:11) Enẹwutu, nọavunte sọta ayilinlẹn lọ nado mọhodọdo mẹho he penukundo whẹho lọ go lẹ kavi nudide he yé basi lẹ go. Flindọ, nuyiwa to aliho Jehovah tọn mẹ wẹ nọ hẹn kọdetọn dagbe hugan lẹ wá, to whenuena nukundidiọsọ tito Jehovah tọn ma sọgan hẹn nudevo wá hugan nado yidogọna apọ̀ mítọn.

To tundote Islaeli tọn sọn Egipti godo, whlasusu wẹ Mose yinuwa taidi whẹdatọ. (Eksọdusi 18:13-16) To whenuena e yindọ to whẹdida mẹ, eyin owhẹ̀ mẹde tọn whẹ́n, e yọnbasi dọ omẹ awetọ tọn ma na whẹ́n, e bọawu nado yí nukun homẹ tọn do pọ́n dọ mẹdelẹ na ko gblehomẹ do nudide Mose tọn lẹ go. Vlavo homọdọdo whẹdida Mose tọn lẹ go wẹ dekọtọn do atẹṣiṣi sọta nukọntọ-yinyin etọn mẹ to nujijọ delẹ mẹ. Ṣigba, Jehovah wẹ to Mose yizan nado deanana omẹ Etọn lẹ, podọ atẹṣitọ lọ lẹ po whẹndo yetọn he nọgodona yé lẹ po wẹ E sayana, kakati nido yin Mose. (Osọha lẹ 16:31-35) Mí sọgan plọnnu sọn ehe mẹ gbọn vivẹnudido nado na sisi bo kọngbedopọ hẹ nudide he mẹhe tindo aṣẹpipa to yẹwhehọluduta-liho to egbehe lẹ basi lẹ dali.

To whẹho ehe mẹ, Delores flin lehe e vẹawu na ẹn do nado hẹn pọndohlan jlẹkaji tọn go to whenue viyọnnu etọn mọ mẹplọnlọ yí to agun mẹ. E dọmọ: “Nuhe gọalọna mi wẹ nado nọ hia hosọ he dọhodo lehe tito Jehovah tọn lẹ gọ́ na lẹnpọn dagbe do ji lẹ gbọzangbọzan. N’tindo kandai-wema vonọtaun de na nuagokun lẹ sọn hodidọ po hosọ lẹ po mẹ he na gọalọna mi nado doakọnna bo zindonukọn.” Ehe hẹn mí jẹ onú titengbe devo he nọ gọalọna mí nado dudeji kọ̀n.

Nọ dọ numọtolanmẹ towe lẹ tọ́n. Hiẹ sọgan mọ dọ alọgọnamẹnu wẹ e yin nado dọ homẹ na họntọn dejidego dopo kavi awe. To mọwiwà mẹ, de họntọn he na gọalọna we nado hẹn pọndohlan dagbe go lẹ. Na nugbo tọn, hiẹ na tindo kọdetọn dagbe hugan eyin a “kọ̀n ayiha [towe] jẹgbonu” hlan Jehovah to odẹ̀ mẹ.b (Psalm 62:7, 8) Naegbọn mí do dọ mọ? Na e nọ mọnukunnujẹ numọtolanmẹ towe lẹ mẹ to gigọ́mẹ wutu. Di apajlẹ, a sọgan lẹndọ e ma sọgbe dọ hiẹ ni jiya awufiẹsa numọtolanmẹ tọn mọnkọtọn gba. To popolẹpo mẹ, e ma yin hiẹ wẹ jo Jehovah do. Dọ numọtolanmẹ towe lẹ na Jehovah, bo biọ to e si nado gọalọna we nado pọ́n ninọmẹ lọ hlan to aliho he na de awufiẹsa towe pò mẹ.—Psalm 37:5.

Dile ojlẹ to yìyì, e yọnbasi dọ hiẹ na wá penugo dogọ nado deanana numọtolanmẹ towe lẹ. Todin whẹ́, ma jogbe to vivẹnudido towe lẹ mẹ nado nọ hẹn homẹhun Otọ́ olọn mẹ tọn towe blo, bo masọ lẹn gbede blo dọ osin-bado-pápá-nẹgbé wẹ vivẹnudido ehelẹ yin. (Galatianu lẹ 6:9) Flindọ, eyin mí jo Jehovah do, nuhahun lẹ ma na dẹ́n gba. To alọ devo mẹ, eyin mí gbọṣi nugbonọ-yinyin mẹ hlan ẹn, mí nọ mọ alọgọ etọn yí to whlepọn lẹ whenu. Enẹwutu, deji dọ Jehovah yọ́n ninọmẹ towe to gigọ́mẹ bo nasọ zindonukọn nado to huhlọn he hiẹ tindo nuhudo etọn na we to ojlẹ sisọ mẹ.—2 Kọlintinu lẹ 4:7; Filippinu lẹ 4:13; Heblu lẹ 4:16.

[Nudọnamẹ Odò Tọn]

[Apotin to weda 19]

Lehe Hiẹ Sọgan Dudeji Gbọn

◆ ‘Mì hẹn mìde dote bo yí mìde whlá to owanyi Jiwheyẹwhe tọn mẹ.’—Juda 20, 21.

◆ Ma Hẹn Todido bu blo.—1 Kọlintinu lẹ 13:7.

◆ Nọavunte sọta whẹgbledo-mẹdetiti.—Ezekiẹli 18:20.

◆ Nọ fahomẹ hẹ mẹdevo lẹ.—Kọlọsinu lẹ 3:13.

◆ Nọ na sisi tito mẹplọnlọ-domẹgo Jehovah tọn.—Heblu lẹ 12:11.

◆ Nọ dọ numọtolanmẹ towe lẹ tọ́n.—Psalm 62:7, 8.

[Apotin/Yẹdide to weda 21]

Be Hiẹ Ko Gbẹ́ Jehovah Dai Wẹ Ya?

Eyin mọ wẹ, depope he whẹwhinwhẹ́n lọ yin, haṣinṣan towe hẹ Jehovah po nukundido mavọmavọ towe lẹ po tin to owù mẹ. Vlavo hiẹ to linlẹn nado lẹkọ do Jehovah dè. Be hiẹ to vivẹnudo vẹkuvẹku nado jẹ yanwle ehe kọ̀n todin ya? Kavi be hiẹ to sisisẹ ẹ hlan nukọn kakajẹ ojlẹ he a lẹn nado yin “dagbe hugan lọ” mẹ wẹ ya? Flindọ, aslọ yujẹhọn Amagẹdọni tọn lẹ to sisẹpọ po awuyiya po. Humọ, ogbẹ̀ whègli to aihọn ehe mẹ bosọ gọ́ na jide-matindo. Hiẹ ma tlẹ sọgan yọnẹn eyin a na gbẹ́ pò to ogbẹ̀ jẹ osọ. (Psalm 102:3; Jakobu 4:13, 14) Dawe de he dodinnanu dotowhé tọn dohia dọ e ko bẹ azọ̀n jẹmagbọ de dọmọ: “N’bẹ azọ̀n ehe to whenue n’to sinsẹ̀nzọn whenu-gigọ́ tọn wà hlan Jehovah, podọ n’ma ko wà nudepope do nuglọ he to tuklado ayihadawhẹnamẹnu ṣie. Podọ homẹmiọnnamẹnu wẹ nado tindo numọtolanmẹ mọnkọtọn todin.” Ṣigba, yí nukun homẹ tọn do pọ́n numọtolanmẹ he e na ko tindo eyin linlẹn etọn to whenuena e bẹ azọ̀n ehe wẹ yindọ, “N’na wá lẹkọ do Jehovah dè to gbèdopo!” Eyin hiẹ ko gbẹ́ Jehovah dai janwẹ, ojlẹ dagbe hugan lọ die nado lẹkọ.

[Yẹdide to weda 18]

Alọnu hinhẹn ján to nuwiwa gbigbọmẹ tọn lẹ mẹ sọgan gọalọna we nado hẹn pọndohlan dagbe go