Plọn Ovi Towe lẹ Nado Nọ Na Gblọndo

PERLA he wá sọn Mexique flin dọ to whenuena ewọ gbẹ́ yin viyọnnu pẹvi de, onọ̀ etọn nọ gọalọna ẹn nado wleawuna gblọndo kleunkleun lẹ na Oplọn Atọ̀họ̀-Nuhihọ́ Lọ Tọn. Todin Perla tindo visunnu owhe atọ́n mẹvi de. Nawẹ e nọ gọalọna ẹn gbọn? “Jẹnukọn whẹ́, yẹn dona wleawu. To ehe wiwà godo, yẹn nọ dín hukan he visunnu ṣie sọgan mọnukunnujẹemẹ, dehe e sọgan basi zẹẹmẹ etọn po hogbe edetiti tọn lẹ po. Enẹgodo mí nọ wleawuna nuhe e nọ ylọdọ ‘hukan ṣie.’ Yẹn nọ biọ to e si nado basi zẹẹmẹ etọn gbọn apajlẹ paa lẹ yiyizan dali. Enẹgodo mí nọ basi zepọn gblọndo lọ tọn whlasusu. Mí nọ yí nuhe taidi miklo de zan na e nido sọgan yọ́n lehe e na hẹn e go do to whenuena e to gblọndo lọ na. Homẹ ṣie hùn dọ e nọ na gblọndo kavi ze alọ janwẹ to opli lẹpo ji. Whlasusu, e nọ yì mọ anademẹtọ lọ jẹnukọnna opli bo nọ do hukan etọn hia ẹ.”

Jens, mẹho agun tọn de he nọ sẹ̀n to kándo he nọ dó Hindi-gbè de mẹ, tindo visunnu awe he tindo owhe awe po ẹnẹ po. Eyin ewọ po asi etọn po to awuwlena opli hẹ ovi yetọn lẹ, yé nọ yí aliho he Jens plọn sọn mẹjitọ etọn lẹ dè zan. Jens dọmọ: “Mí nọ dín adà nudọnamẹ lọ tọn he ovi lẹ sọgan mọnukunnujẹemẹ. Enẹgodo mí nọ tẹnpọn nado basi bladopọ hosọ lọ tọn kavi nuagokun tangan hosọ lọ tọn lẹ, bo nọ wá kàn kanbiọ he mí jlo dọ yé ni na gblọndo etọn to opli ji sè yé. Whlasusu aliho he mẹ yé nọ na gblọndo lẹ po hogbe yetọn titi lẹ po te nọ paṣa mí. Na nugbo tọn, hodidọ yetọn nọ do nuhe mẹ yé mọnukunnujẹ hia. Taidi kọdetọn de, gblọndo yetọn lẹ nọ pagigona Jehovah bosọ nọ do yise yetọn hia.”