‘Hiẹ Dona Yin Ayajẹnọ Patapata’

‘Hiẹ na nọ payi hùnwhẹ de go hlan OKLUNỌ lọ, hiẹ bo na yin ayajẹnọ patapata.’—DEUTELONOMI 16:15.

1. (a) Whẹho tẹlẹ wẹ Satani fọndote? (b) Dọdai tẹwẹ Jehovah dọ bọdo atẹṣiṣi Adam po Evi po tọn go?

WHENUENA Satani hẹn Adam po Evi po ṣiatẹ sọta Mẹdatọ yetọn, e fọ́n whẹho titengbe awe dote. Tintan, e diọnukunsọ nugbonọ-yinyin Jehovah tọn gọna gbesisọ-yinyin aliho gandudu etọn tọn. Awetọ, Satani de linlẹn lọ tọ́n dọ gbẹtọ lẹ na sẹ̀n Jiwheyẹwhe kiki na whẹwhinwhẹ́n ṣejannabi tọn lẹ wutu. Whẹho awetọ ehe yin didọtọn hezeheze to ojlẹ Job tọn mẹ. (Gẹnẹsisi 3:1-6; Job 1:9, 10; 2:4, 5) Etomọṣo, Jehovah yinuwa to niyaniya mẹ nado didẹ ninọmẹ lọ. To whenuena Adam po Evi po tlẹ gbẹ́ pò to jipa Edẹni tọn mẹ, Jehovah dọ dọdai gando lehe Ewọ na didẹ whẹho lọ lẹ do go. E dọ dọdai gando wiwá “okún” de tọn go, ehe to whenuena afọgbẹn etọn na ko yin sisó godo, na só ota Satani tọn mlẹnmlẹn.—Gẹnẹsisi 3:15.

2. Hinhọ́n tẹwẹ Jehovah tá do lehe e na hẹn dọdai Gẹnẹsisi 3:15 tọn lọ di do ji?

² Dile ojlẹ to yìyì, Jehovah tá hinhọ́n do dọdai enẹ ji vudevude, bo gbọnmọ dali dohia dọ e na wá mọ hẹndi dandan. Di apajlẹ, Jiwheyẹwhe dọna Ablaham dọ “okún” lọ na wá sọn kúnkan etọn lẹ mẹ. (Gẹnẹsisi 22:15-18) Ovivi Ablaham tọn Jakobu lẹzun otọ́ whẹndo 12 Islaeli tọn lẹ tọn. To 1513 J.W.M., whenuena whẹndo enẹlẹ lẹzun akọta de, Jehovah na yé todohukanji osẹ́n tọn de he bẹ hùnwhẹ whemẹwhemẹ tọn voovo lẹ hẹn. Apọsteli Paulu dọ dọ hùnwhẹ enẹlẹ yin “oyẹ̀ onú dagbe he ja lẹ tọn.” (Kọlọsinu lẹ 2:16, 17; Heblu lẹ 10:1) Yé bẹ numọdohlan-nukọn lẹ hẹn gando hẹndi lẹndai Jehovah tọn na Okún lọ go. Hùnwhẹ enẹlẹ bibasi nọ hẹn ayajẹ daho wá to Islaeli. Dogbigbapọnna yé to kleun mẹ na hẹn yise mítọn lodo to nugbo-yinyin opagbe Jehovah tọn lẹ tọn mẹ.

Okún lọ Sọawuhia

3. Mẹnu wẹ yin Okún dopagbe lọ, podọ nawẹ afọgbẹn etọn yin sisó gbọn?

³ Hugan owhe 4 000 to whenuena Jehovah dọ dọdai dowhenu tọn lọ godo, Okún dopagbe lọ sọawuhia—yèdọ Jesu. (Galatianu lẹ 3:16) Taidi gbẹtọ pipé de, Jesu hẹn tenọgli etọn go kakajẹ okú bo gbọnmọ dali do whẹsadokọnamẹ Satani tọn lẹ hia nado yin lalo. Humọ, to whenuena e yindọ Jesu ma tindo ylando depope, okú etọn yin avọ́sinsan he họakuẹ tlala de. Gbọn ehe gblamẹ, Jesu wleawuna tundote sọn ylando po okú po si na kúnkan nugbonọ Adam po Evi po tọn lẹ. Okú Jesu tọn to yatin ji wẹ nọtena ‘sisó afọgbẹn’ Okún dopagbe lọ tọn.—Heblu lẹ 9:11-14.

4. Nawẹ avọ́sinsan Jesu tọn yin tenọna gbọn?

⁴ Jesu kú to Nisan 14 owhe 33 W.M.a To Islaeli, Nisan 14 yin azán ayajẹ tọn he ji hùnwhẹ Juwayi tọn nọ yin bibasi te. To azán enẹ ji to owhe dopodopo mẹ, whẹndo lẹ nọ dù núdùdù he bẹ lẹngbọvu madoblọ de hẹn. To mọwiwà mẹ, yé nọ flin adà he ohùn lẹngbọvu tọn yiwà nado whlẹn plọnji Islaeli tọn lẹ gán to whenuena angẹli mẹvasudotọ lọ hù plọnji Egiptinu lẹ tọn sudo to Nisan 14 owhe 1513 J.W.M. (Eksọdusi 12:1-14) Lẹngbọvu Juwayi tọn lọ nọtena Jesu, mẹhe apọsteli Paulu dlẹnalọdo dọmọ: “Juwayi mítọn ko yin nudosanvọ́ na mí ga, yèdọ Klisti.” (1 Kọlintinu lẹ 5:7) Taidi ohùn lẹngbọvu Juwayi tọn lọ tọn, hùnsọndai Jesu tọn hùnali whlẹngán tọn dote na mẹsusu.—Johanu 3:16, 36.

‘Sinsẹ́n Tintan Oṣiọ lẹ Tọn’

5, 6. Whetẹnu wẹ Jesu fọnsọnku, podọ nawẹ nujijọ enẹ yin tenọna gbọn to Osẹ́n lọ mẹ? (b) Nawẹ hẹndi Gẹnẹsisi 3:15 tọn yin hinhẹn yọnbasi gbọn fọnsọnku Jesu tọn dali gbọn?

⁵ To azán atọ̀ntọ gbè, Jesu yin finfọn do ogbẹ̀ nado sọgan ze nuhọakuẹ-yinyin avọ́sinsan etọn tọn do nukọn na Otọ́ etọn. (Heblu lẹ 9:24) Fọnsọnku etọn yin didohia jẹnukọn to hùnwhẹ devo mẹ. Hùnwhẹ Akla Madotọ́n tọn nọ bẹjẹeji to azán he bọdo Nisan 14 lọ go. To wunkẹngbe etọn, to Nisan 16, Islaelivi lẹ nọ hẹn okọ̀ sinsẹ́n tintan jibẹwawhé balle tọn he yin ojijẹ tintan to Islaeli, wá yẹwhenọ lọ dè nado ze e hia to Jehovah nukọn. (Levitiku 23:6-14) Lehe e sọgbe do sọ dọ to azán enẹ pẹpẹ ji to owhe 33 W.M., Jehovah glọnalina vivẹnudido ylankan Satani tọn nado sukúndona “kunnudetọ dodonọ, nugbonọ” etọn kakadoi! To Nisan 16 owhe 33 W.M., Jehovah fọ́n Jesu sọn oṣiọ lẹ mẹ do ogbẹ̀ gbigbọ jọmaku tọn mẹ.—Osọhia 3:14; 1 Pita 3:18.

⁶ Jesu lẹzun “sinsẹ́n tintan yé he damlọn [to okú mẹ] lẹ tọn.” (1 Kọlintinu lẹ 15:20) To vogbingbọn mẹ na mẹhe ko yin finfọnsọnku jẹnukọnna ẹn lẹ, Jesu masọ kú to enẹgodo ba. Kakatimọ, e hẹji yì olọn mẹ to adusilọ Jehovah tọn mẹ, fihe e nọte te kakajẹ whenue e yin yíyí do doahọlu to Ahọluduta olọn mẹ tọn Jehovah tọn mẹ. (Psalm 110:1; Owalọ lẹ 2:32, 33; Heblu lẹ 10:12, 13) Sọn whenue gbọ́n Jesu ko yin yíyí do doahọlu, e tin to otẹn dagbe mẹ todin nado só ota kẹntọ daho lọ Satani tọn bo và okún etọn sudo kakadoi.—Osọhia 11:15, 18; 20:1-3, 10.

Hagbẹ Okún Ablaham Tọn Devo Lẹ

7. Etẹwẹ nọ yin Hùnwhẹ Osẹ lẹ tọn?

⁷ Jesu wẹ Okún he opagbe etọn yin dido to Edẹni mẹ lọ podọ mẹhe gblamẹ Jehovah na “gbà azọ́n [Lẹgba] tọn sudo” te. (1 Johanu 3:8) Ṣigba, to whenuena Jehovah dọhona Ablaham, E dohia ẹ dọ “okún” etọn ma na nọte do mẹdopo poun ji gba. E na tin “di sunwhlẹvu olọn tọn lẹ, podọ di tọkẹ́n he tin to huto.” (Gẹnẹsisi 22:17) Nugbo lọ dọ hagbẹ “okún” lọ tọn devo lẹ na sọawuhia yin tenọna gbọn hùnwhẹ ayajẹ tọn devo dali. Azán 50 sọn Nisan 16, Islaelivi lẹ nọ basi Hùnwhẹ Osẹ lẹ tọn. Osẹ́n he gando ehe go dọmọ: “Jẹ osọ to gbọjẹzan ṣinawetọ lọ godo wẹ mìwlẹ na yí-sọha na azán kandeao; mì bo nasọ yí avọ́nunina jinulili yọyọ de tọn na hlan OKLUNỌ lọ. Mìwlẹ na hẹn aklamimlin awe zehia tọn jẹgbonu sọn nọtẹn mìtọn lẹ mẹ wá sọn madoatọ awe efa dopo lọ tọn mẹ; yé na yin sọn linfin dagbedagbe mẹ, yè na yí otọ́n do sọ̀ yé, na sinsẹ́n tintan lẹ hlan OKLUNỌ lọ.”b—Levitiku 23:16, 17, 20.

8. Nujijọ ayidego tọn tẹwẹ wá aimẹ to Pẹntikọsti 33 W.M.?

⁸ To whenuena Jesu tin to aigba ji, Hùnwhẹ Osẹ lẹ tọn lọ nọ yin yiylọdọ Pẹntikọsti (sọn hogbe Glẹki tọn de mẹ he zẹẹmẹdo “kandeaotọ”). To Pẹntikọsti 33 W.M., Yẹwhenọ Daho hugan lọ, yèdọ Jesu Klisti he yin finfọnsọnku lọ, kọ̀n gbigbọ wiwe jẹgbonu do pipli pẹvi devi 120 he pli dopọ to Jelusalẹm lẹ tọn ji. Gbọnmọ dali, devi enẹlẹ lẹzun ovi yiamisisadode Jiwheyẹwhe tọn lẹ po mẹmẹsunnu Jesu Klisti tọn lẹ po. (Lomunu lẹ 8:15-17) Yé lẹzun akọta yọyọ de, yèdọ “Islaeli Jiwheyẹwhe tọn.” (Galatianu lẹ 6:16) Sọn sọha kleun ehe ji, akọta enẹ na wá bẹ gbẹtọ 144 000 hẹn to godo mẹ.—Osọhia 7:1-4.

9, 10. Nawẹ agun Klistiani yiamisisadode lẹ tọn nọ yin tenọna to Pẹntikọsti whenu gbọn?

⁹ Agun Klistiani yiamisisadode lẹ tọn yin tenọna gbọn aklamimlin awe he tindo otọ́n bo nọ yin zizedonukọnna Jehovah to Pẹntikọsti dopodopo whenu lọ lẹ dali. Otọ́n he tin to akla lọ lẹ mẹ dohia dọ Klistiani yiamisisadode lẹ gbẹsọ tindo otọ́n ylando he yé dugu etọn tọn. Etomọṣo, yé sọgan dọnsẹpọ Jehovah to dodonu avọ́sinsan ofligọ Jesu tọn ji. (Lomunu lẹ 5:1, 2) Naegbọn e do yin aklamimlin awe? Enẹ sọgan ko dlẹnalọdo nugbo lọ dọ ovi yiamisisadode Jiwheyẹwhe tọn lẹ na wá sọn pipli awe mẹ to godo mẹ—enẹ wẹ sọn Juvi-jiji lẹ mẹ to tintan whenu podọ sọn Kosi lẹ mẹ to nukọn mẹ.—Galatianu lẹ 3:26-29; Efesunu lẹ 2:13-18.

¹⁰ Aklamimlin awe he nọ yin nina to Pẹntikọsti whenu lọ lẹ nọ wá sọn sinsẹ́n tintan jibẹwawhé likun tọn lẹ mẹ. To aliho dopolọ mẹ, Klistiani yí gbigbọ do de lẹ yin yiylọdọ “sinsẹ́n tintan de to nudida etọn lẹ mẹ.” (Jakobu 1:18) Yewlẹ whẹwhẹ wẹ mọ jona ylando yetọn lẹ tọn yí to dodonu hùnsọndai Jesu tọn ji, podọ enẹ hẹn ẹn yọnbasi na yé nado mọ ogbẹ̀ jọmaku yí to olọn mẹ, fie yé na dugán hẹ Jesu te to Ahọluduta etọn mẹ. (1 Kọlintinu lẹ 15:53; Filippinu lẹ 3:20, 21; Osọhia 20:6) To madẹnmẹ, sọn otẹn enẹ mẹ, yé na “yí opò ogàn tọn do hẹn [akọta lẹ] sẹ̀n” bo nasọ mọ bọ ‘Satani na yin zinzindai to afọ yetọn glọ.’ (Osọhia 2:26, 27; Lomunu lẹ 16:20) Apọsteli Johanu dọmọ: “Ehelẹ wẹ nọ hodo Lẹngbọvu lọ to godo yì fidepope e jei. Ehelẹ wẹ yè fligọ sọn gbẹtọ lẹ mẹ, nado yin sinsẹ́n tintan hlan Jiwheyẹwhe podọ hlan Lẹngbọvu lọ.”—Osọhia 14:4.

Azán de He Zinnudo Whlẹngán Ji

11, 12. (a) Etẹwẹ nọ jọ to Azán Ovẹsè tọn gbè? (b) Ale tẹlẹ wẹ Islaelivi lẹ nọ mọyi sọn avọ́sinsan oyìnvu po gbọgbọẹ lẹ po tọn mẹ?

¹¹ To azán aotọ osun Ethanim (he wá yin yiylọdọ Tishri to godo mẹ)c tọn ji, Islaelivi lẹ nọ basi hùnwhẹ de he nọtena lehe ale avọ́sinsan ofligọ Jesu tọn na yin yiyizan do. To azán enẹ gbè, akọta lọ blebu nọ pli dopọ na Azán Ovẹsè tọn nado basi avọ́sinsan lẹ na desẹ ylando yetọn lẹ tọn.—Levitiku 16:29, 30.

¹² To Azán Ovẹsè tọn gbè, yẹwhenọ daho lọ nọ hù oyìnvu de, podọ to Fiwiwe Gbaugbau lọ mẹ, e nọ húnhún apadewhe ohùn etọn tọn whla ṣinawe to nùsu Aki lọ tọn nukọn, bo nọ gbọnmọ dali ze ohùn lọ donukọnna Jehovah to yẹhiadonu-liho. Avọ́nunina enẹ tin na ylando yẹwhenọ daho lọ po “owhé etọn” po tọn, yèdọ yẹwhenọ pẹvi lẹ po Levinu lẹ po. Enẹgodo yẹwhenọ daho lọ nọ yí gbọgbọẹ awe. E nọ hù dopo taidi avọ́nunina ylando tọn “na gbẹtọ lẹ lọ.” Apadewhe ohùn etọn tọn sọ nọ yin húnhúnhún do nùsu Aki lọ tọn nukọn to Fiwiwe Gbaugbau lọ. To godo mẹ, yẹwhenọ daho lọ nọ bẹ alọ etọn lẹ do ota gbọgbọẹ awetọ lọ tọn bo nọ yigbe ylanwa ovi Islaeli tọn lẹ tọn. Enẹgodo, e nọ do gbọgbọẹ lọ hlan zungbo mẹ nado ze ylando akọta lọ tọn lẹ yì to yẹhiadonu-liho.—Levitiku 16:3-16, 21, 22.

13. Nawẹ nujijọ he Azán Ovẹsè tọn bẹhẹn lẹ nọtena adà he Jesu yiwà gbọn?

¹³ Dile nuyiwa enẹlẹ dohia do, Yẹwhenọ Daho hugan lọ, Jesu, yí nuhọakuẹ-yinyin ohùn etọn titi tọn do hùnali jona ylando lẹ tọn dote. Tintan, nuhọakuẹ-yinyin ohùn etọn tọn yin yiyizan na “ohọ̀ gbigbọnọ” Klistiani yiamisisadode 144 000 lẹ tọn, bo hẹn yé penugo nado yin whẹsuna taidi dodonọ bo tindo teninọ wiwe de to Jehovah nukọn. (1 Pita 2:5; 1 Kọlintinu lẹ 6:11) Ehe wẹ yin tenọna gbọn avọ́sinsan oyìnsú tọn lọ dali. Gbọnmọ dali, dotẹnmẹ lọ hundote na yé nado mọ ogú olọn mẹ tọn yetọn yí. Awetọ, nuhọakuẹ-yinyin ohùn Jesu tọn yin yiyizan do gbẹtọ livi susu devo lẹ tamẹ he yise to Klisti mẹ, dile avọ́sinsan gbọgbọẹ tọn lọ dohia do. Omẹ ehelẹ na mọ dona ogbẹ̀ madopodo tọn yí tofi to aigba ji, yèdọ ogú he Adam po Evi po hẹnbu lọ. (Psalm 37:10, 11) To dodonu hùnsọndai etọn tọn ji, Jesu ze ylando gbẹtọvi lẹ tọn yì, kẹdẹdile gbọgbọẹ gbẹ̀te lọ nọ ze ylando Islaeli tọn lẹ yì zungbo mẹ to yẹhiadonu-liho do.—Isaia 53:4, 5.

Ayajijẹ to Jehovah Nukọn

14, 15. Etẹwẹ nọ jọ to Hùnwhẹ Gòhọtúntún tọn whenu, podọ etẹwẹ ehe nọ flin Islaelivi lẹ?

¹⁴ To Azán Ovẹsè tọn lọ godo, Islaelivi lẹ nọ basi Hùnwhẹ Gòhọtúntún tọn, he yin hùnwhẹ ayajẹnọ hugan to owhe Ju lẹ tọn mẹ. (Levitiku 23:34-43) Hùnwhẹ enẹ nọ wá aimẹ sọn azán 15tọ jẹ 21tọ osun Ethanim tọn bo nọ wá vivọnu po opli ayidego tọn de po to azán 22tọ osun lọ tọn ji. E nọ dohiagona vivọnu nubẹpli jibẹwawhé tọn bosọ yin ojlẹ pẹdido tọn de na dagbewà susugege Jiwheyẹwhe tọn. Enẹ wẹ zọ́n bọ Jehovah degbena hùnwhẹ basitọ lọ lẹ dọmọ: “OKLUNỌ lọ Jiwheyẹwhe towe na dona we to jideji towe lẹpo mẹ . . . , podọ to azọ́n alọ towe lẹ tọn lọ lẹpo mẹ, hiẹ bo na yin [ayajẹnọ] patapata.” (Deutelonomi 16:15) Ojlẹ ayajẹ tọn nankọ die enẹ na ko yin!

¹⁵ To hùnwhẹ enẹ whenu, Islaelivi lẹ nọ nọ̀ gòhọ lẹ mẹ na azán ṣinawe. Ehe nọ flinnu yé dọ yé ko nọ̀ gòhọ lẹ mẹ pọ́n to ojlẹ de mẹ wayi to zungbo mẹ. Hùnwhẹ lọ nọ hùn dotenmẹ dote na yé to gigọ́ mẹ nado lẹnnupọndo nukunpedomẹgo Jehovah tọn ji taidi otọ́ de. (Deutelonomi 8:15, 16) Podọ to whenuena e yindọ gòhọ wunmẹ dopolọ lẹ mẹ wẹ yemẹpo, yèdọ adọkunnọ po wamọnọ po nọ nọ̀, ehe nọ flinnu Islaelivi lẹ dọ to hùnwhẹ ehe whenu, nudopolọ wẹ yemẹpo yin.—Nẹhemia 8:14-16.

16. Etẹwẹ Hùnwhẹ Gòhọtúntún tọn lọ nọtena?

¹⁶ Hùnwhẹ Gòhọtúntún tọn yin hùnwhẹ jibẹwawhé tọn de, yèdọ nujijọ nubẹpli ayajẹ tọn de, podọ e nọtena nuyiwa ayajẹ tọn lọ nado bẹ mẹhe yise to Jesu Klisti mẹ lẹ pli. Nubẹpli lọ bẹjẹeji to Pẹntikọsti 33 W.M., to whenuena devi 120 Jesu tọn lẹ yin yiyiamisisadode nado lẹzun apadewhe “yẹwhenọduta wiwe” de tọn. Kẹdẹdile Islaelivi lẹ nọ nọ̀ gòhọ mẹ na azán vude do, mẹyiamisisadode lẹ yọnẹn dọ “wáṣinu” poun wẹ yé yin to aihọn ylankan ehe mẹ. Todido olọn mẹ tọn wẹ yé tindo. (1 Pita 2:5, 11) Bibẹpli Klistiani yiamisisadode lẹ tọn enẹ ko sẹpọ vivọnu to ‘azán godo tọn’ ehelẹ mẹ, dile adà godo tọn gbẹtọ 144 000 lọ lẹ tọn yin bibẹpli.—2 Timoti 3:1.

17, 18. (a) Etẹwẹ dohia dọ gbọnvona Klistiani yiamisisadode lẹ mẹdevo lẹ na mọaleyi sọn avọ́sinsan Jesu tọn mẹ? (b) Mẹnu lẹ wẹ to alemọyi sọn Hùnwhẹ Gòhọtúntún yẹhiadonu tọn lọ mẹ to egbehe, podọ whetẹnu wẹ hùnwhẹ ayajẹnọ hugan enẹ na mọ hẹndi pete etọn yí?

¹⁷ E jẹna ayidego dọ to hùnwhẹ hohowhenu tọn ehe whenu, oyìnsú 70 wẹ nọ yin yíyí do sanvọ́. (Osọha lẹ 29:12-34) Sọha lọ 70 nọtena onú 7 donu 10, yèdọ sọha lẹ he nọ yin yiyizan to Biblu mẹ nado dlẹnalọdo pipé-yinyin olọn mẹ tọn po aigba ji tọn po. Enẹwutu, avọ́sinsan Jesu tọn na hẹn ale wá na nugbonọ lẹ sọn whẹndo 70 gbẹtọvi he wá sọn kúnkan Noa tọn mẹ lẹpo. (Gẹnẹsisi 10:1-29) To kọndopọ mẹ hẹ enẹ, nubẹpli lọ ko gbloada dogọ to ojlẹ mítọn mẹ bo bẹ gbẹtọ lẹ hẹn sọn akọta lẹpo mẹ he yí Jesu sè bosọ tindo todido lọ nado nọgbẹ̀ to paladisi aigba ji tọn de mẹ.

¹⁸ Apọsteli Johanu mọ nubẹpli egbezangbe tọn ehe to numimọ mẹ. Jẹnukọn whẹ́ e sè bọ hiadogonamẹ adà godo tọn gbẹtọ 144 000 lọ lẹ tọn yin lilá. Enẹgodo e mọ “gbẹtọ susugege, he mẹdepope ma sọgan hia,” he ṣite to Jehovah po Jesu po nukọn, bọ “odéma sọ tin to alọ yetọn mẹ.” Omẹ ehelẹ “tọ́nsọn nukunbibia daho mẹ” biọ aihọn yọyọ lọ mẹ. Wáṣinu poun wẹ yelọsu yin todin to titonu hoho ehe mẹ, podọ yé yí jide do to nukọnpọnhlan ojlẹ lọ whenue “Lẹngbọvu lọ . . . na yin lẹngbọhọtọ yetọn, bo nasọ nọ plan yé jẹ fie asisa osin ogbẹ̀ tọn lẹ te.” To ojlẹ enẹ mẹ, “Jiwheyẹwhe na súnsún dasin lẹpo sẹ̀ sọn nukun yetọn lẹ mẹ.” (Osọhia 7:1-10, 14-17) Hùnwhẹ Gòhọtúntún yẹhiadonu tọn lọ na mọ hẹndi pete etọn yí to vivọnu Gandudu Owhe Fọtọ́n Klisti tọn godo whenuena yewlẹ po nugbonọ he yin finfọnsọnku lẹ po na mọ ogbẹ̀ madopodo yí.—Osọhia 20:5.

19. Nawẹ mí nọ mọaleyi sọn dogbigbapọnna hùnwhẹ he nọ yin bibasi to Islaeli lẹ mẹ gbọn?

¹⁹ Mílọsu sọgan yin ‘ayajẹnọ patapata’ eyin mí lẹnayihamẹpọn do zẹẹmẹ hùnwhẹ Ju hohowhenu tọn lẹ tọn ji. Homẹhunnu wẹ e yin nado mọ dọ Jehovah wleawuna numọdohlan-nukọn lẹ gando lehe dọdai he e dọ to Edẹni mẹ to whenẹnu na yin hinhẹndi do go, podọ ojlofọndotenamẹnu wẹ e yin nado doayi e go dọ e to hẹndi mọyi debọdo-dego. To egbehe, mí yọnẹn dọ Okún lọ ko sọawuhia podọ afọgbẹn etọn ko yin sisó. Todin, e to ahọludu to olọn mẹ. Humọ, suhugan gbẹtọ 144 000 lọ lẹ tọn ko hẹn nugbonọ-yinyin yetọn go kakajẹ okú. Etẹlẹ wẹ pò bo na yin wiwà? Whetẹnu wẹ dọdai lọ na mọ hẹndi to gigọ́ mẹ? Ehe na yin hodọdeji to hosọ he bọdego mẹ.

[Nudọnamẹ Odò Tọn]

Be Hiẹ Sọgan Basi Zẹẹmẹ Ya?

• Etẹwẹ lẹngbọvu Juwayi tọn lọ nọtena?

• Nubẹpli tẹwẹ Hùnwhẹ Pẹntikọsti tọn lọ nọtena?

• Nujijọ Azán Ovẹsè tọn tẹlẹ wẹ do aliho he mẹ avọ́sinsan ofligọ Jesu tọn na yin yiyizan te hia?

• Aliho tẹ mẹ wẹ Hùnwhẹ Gòhọtúntún tọn lọ nọtena bibẹpli Klistiani lẹ tọn te?

[Apotin to weda 22, 23]

(Nado mọ yẹdide ganji, pọ́n zinjẹgbonu)

Nujijọ: Nuhe E Nọtena:

↑

Azán 50

↓

[Yẹdide to weda 21]

Taidi ohùn lẹngbọvu Juwayi tọn lọ tọn, hùnsọndai Jesu tọn hùnali whlẹngán tọn dote na mẹsusu

[Yẹdide to weda 22]

Sinsẹ́n tintan jibẹwawhé balle tọn he nọ yin nina to Nisan 16 nọtena fọnsọnku Jesu tọn

[Yẹdide to weda 23]

Aklamimlin awe he nọ yin nina to Pẹntikọsti whenu lẹ nọtena agun Klistiani yiamisisadode lẹ tọn

[Yẹdide to weda 24]

Hùnwhẹ Gòhọtúntún tọn nọtena nuyiwa ayajẹ tọn lọ nado bẹ mẹyiamisisadode lẹ po “gbẹtọ susugege” lẹ po pli sọn akọta lẹpo mẹ