Sunnu po Yọnnu po Yin Didá Nado Hẹn Ode Awetọ Sọgbe

SUNNU po yọnnu po ko nọ tindo ojlo vẹkuvẹku nado nọpọ́ sọn dowhenu gbọ́n. Jiwheyẹwhe lọsu wẹ dá yé domọ. Jehovah mọ dọ e ma yọ́n na sunnu tintan lọ, Adam, nado nọ nọ̀ ewọ ṣokẹdẹ. Enẹwutu, Jiwheyẹwhe basi “alọgọtọ de he jẹ na” sunnu lọ.

Jehovah hẹn Adam nado damlọn yìkànmẹ, enẹgodo e yí dopo to adàjahú etọn lẹ mẹ bo ‘yí i do basi yọnnu bosọ hẹn ẹn wá sunnu lọ dè.’ Homẹ Adam tọn hùn whenuena e mọ nudida whanpẹnọ Jehovah tọn ehe sọmọ bọ e lá dọmọ: “Ehe wẹ dinvie ohú sọn ohú ṣie lẹ mẹ, podọ olàn sọn olàn ṣie mẹ.” Na nugbo tọn, e bọawu nado yiwanna Evi, yọnnu pipé lọ, na jẹhẹnu yọnnu-yinyin tọn etọn lẹ wutu. Podọ na yẹyi sunnu-yinyin tọn etọn wutu, Adam pipé lọ jẹna sisi. Yé yin didá nado hẹn ode awetọ sọgbe. Biblu dọmọ: “Enẹwutu wẹ sunnu na jo otọ́ po onọ̀ po do, bo na sẹbọdo asi etọn go: yé nasọ lẹzun olàn dopo.”—Gẹnẹsisi 2:18-24.

Ṣigba to egbehe, whẹndo lẹ to gbigbakija, podọ haṣinṣan he tin to sunnu po yọnnu po ṣẹnṣẹn nọ saba gọ́ na kanyinylan po ṣejannabi po. Gbigbọ agbàwhinwhlẹn tọn he tin to sunnu po yọnnu po ṣẹnṣẹn ko yidogọna avùn po nudindọn po. Ehe lẹpo jẹagọdo lẹndai he Jiwheyẹwhe tindo na sunnu po yọnnu po. Sunnu yin didá nado hẹn azọngban vonọtaun de di to aigba ji. Yọnnu yin didá nado yin alọgọtọ he jẹ na sunnu. Yé dona wazọ́n dopọ to kọndopọ mẹ. Sọn bẹjẹeji whenuho gbẹtọvi tọn gbọ́n, sunnu po yọnnu budisi Jiwheyẹwhe tọ lẹ po ko tẹnpọn nado hẹn azọngban he Jehovah na yé di po nugbonọ-yinyin po, podọ ehe ko yidogọna pekọ po ayajẹ yetọn po. Azọngban tẹlẹ wẹ, podọ nawẹ mí sọgan hẹn yé di gbọn?

[Yẹdide to weda 3]

Sunnu po yọnnu po yin didá nado hẹn azọngban yẹyinọ lẹ di to tito Jiwheyẹwhe tọn mẹ