Yí Ayajẹ Do Nọtepọn Jehovah
BE HIẸ ko dù atin-sinsẹ́n agló de pọ́n ya? Matin ayihaawe, otọ́n etọn hẹn we jẹflumẹ. Atin-sinsẹ́n nọ yí whenu whẹpo do bia, podọ e họnwun dọ alenu wẹ e yin nado nọtepọn bibia etọn. Ninọmẹ devo lẹ sọ tin he mẹ teninọ nọ hẹn ale wá te. “Dagbe wẹ dọ omẹ de ni do todido bosọ yí abọẹnọ do nọte na whlẹngán OKLUNỌ tọn,” wẹ Biblu dọ. (Avigbè Jẹlemia Tọn 3:26; Titu 2:13) Aliho tẹlẹ mẹ wẹ Klistiani lẹ dona nọtepọn Jehovah te? Nawẹ mí sọgan mọaleyi sọn teninọpọn ẹn mẹ gbọn?
Etẹwẹ E Zẹẹmẹdo Nado Nọtepọn Jiwheyẹwhe?
Taidi Klistiani lẹ, mí to “nukundo, bosọ to mizọnmizọn ji hlan wiwá azán Jiwheyẹwhe tọn tọn.” Mí to nukọnpọnhlan kọgbọ to whenue e na hẹn “dindọn mẹylankan lẹ tọn” wá. (2 Pita 3:7, 12) Jehovah lọsu to jejeji nado hẹn ylanwiwa lẹpo wá opodo, ṣigba e to homẹfa yizan nado sọgan hẹn whlẹngán Klistiani lẹ tọn wá to aliho de mẹ he na pagigona yinkọ etọn. Biblu dọmọ: “[Dile etlẹ yindọ] Jiwheyẹwhe jlo nado do homẹgble etọn hia, podọ nado hẹn huhlọn etọn zun yinyọnẹn, . . . e miọnhomẹ do núzinzan homẹgble tọn go he yè do hlan hẹngble: podọ na ewọ nido hẹn adọkun gigo etọn tọn zun yinyọnẹn to núzinzan lẹblanu tọn lẹ ji.” (Lomunu lẹ 9:22, 23) Kẹdẹdile e wà do to azán Noa tọn gbè, Jehovah yọ́n ojlẹ dagbe hugan lọ nado whlẹn omẹ etọn lẹ to egbehe. (1 Pita 3:20) Enẹwutu, teninọpọn Jiwheyẹwhe zẹẹmẹdo nado nọtepọn ojlẹ sisọ etọn nado yinuwa.
Dile mí to tenọpọn azán Jehovah tọn, mí sọgan nọ gblehomẹ to whedelẹnu nado mọ dọ nujinọtedo walọ dagbe aihọn tọn lẹ fọ́n bo to doyi. To ojlẹ mọnkọtọn lẹ mẹ, e na yọ́n nado lẹnnupọndo hogbe yẹwhegán Jiwheyẹwhe tọn he yin Mika tọn lẹ ji, mẹhe wlan dọmọ: “Yè và homẹdagbenọ lẹ sudo sọn aigba lọ mẹ, podọ mẹde ma tin yin tenọglinọ to gbẹtọ lẹ ṣẹnṣẹn.” Enẹgodo e yidogọ dọmọ: “Na yẹn tọn, yẹn na nọ pọnhlan OKLUNỌ dè; yẹn na nọtepọn Jiwheyẹwhe whlẹngán ṣie tọn lọ.” (Mika 7:2, 7) ‘Gbigbọ teninọ tọn’ tẹwẹ mí dona wleawuna? To whenuena e yindọ teninọ nọ saba hẹnmẹ jẹflumẹ, nawẹ mí sọgan mọ ayajẹ dile mí to tenọpọn Jiwheyẹwhe gbọn?
Teninọ to Ayajẹ Mẹ
Mí sọgan plọn gbigbọ he sọgbe lọ sọn Jehovah dè. E ma ko doalọtena ‘Jiwheyẹwhe ayajẹnọ’ yinyin pọ́n gbede. (1 Timoti 1:11) E nọ jaya dile e to tenọ na e zindonukọn nado to azọ́nwa hlan hẹndi lẹndai etọn tọn nado hẹn mẹhe yiwanna ẹn lẹ wá pipé he e tindo to linlẹn mẹ to whenuena e dá gbẹtọvi lẹ kọ̀n. (Lomunu lẹ 5:12; 6:23) E nọ mọ kọdetọn dagbe azọ́n etọn tọn lẹ na gbẹtọ livi susu lẹ ko yin dindọn wá sinsẹ̀n-bibasi nugbo lọ mẹ. Jesu dọmọ: “Otọ́ ṣie wazọ́n kakajẹ dinvie, yẹn sọ wazọ́n.” (Johanu 5:17) Dagbe wiwà na mẹdevo lẹ yin dandannu nado tindo ayajẹ. (Owalọ lẹ 20:35) Mọdopolọ, Klistiani nugbo lẹ ma blá alọ dogo dile yé to tenọ gba. Kakatimọ, yé to azọ́nwa zọnmii nado gọalọna mẹdevo lẹ nado yọ́n lẹndai Jiwheyẹwhe tọn na gbẹtọvi lẹ.
Nugbonọ lẹ ko nọ yí ayajẹ do pà Jiwheyẹwhe to whepoponu dile yé to tenọpọn ojlẹ sisọ etọn nado yinuwa. Di apajlẹ lẹnnupọndo psalm-kàntọ Davidi ji. Davidi yin homẹkẹndo gbọn ahọlu etọn dali, bo yin didehia gbọn họntọn etọn vivẹ́ de dali, bosọ yin nukundiọsọ gbọn visunnu etọn dali. To ninọmẹ ehelẹ dopodopo mẹ, be Davidi sọgan yin ayajẹnọ dile e to tenọpọn kọgbọ nado wá to ojlẹ sisọ Jehovah tọn mẹ ya? Psalm 71, he na ko yin kinkàn gbọn Davidi dali, dọmọ: “Yẹn na to todo whepoponu; yẹn nasọ to pipà we janwẹ. Onù ṣie na nọ dọho dodo towe tọn, po whlẹngán towe tọn po to azán popo gbè.” (Psalm 71:14, 15) Kakati nado nọte to homẹgble mẹ, Davidi tindo ayajẹ na e hẹn alọnu ján nado to Jehovah pà bosọ na huhlọn mẹdevo lẹ to sinsẹ̀n-bibasi nugbo mẹ.—Psalm 71:23.
Teninọpọn Jehovah ma nọ hẹnmẹ mọ apọ̀ taidi teninọpọn ahihun he gbọwhenu de gba. E tin taidi teninọ ayajẹnọ mẹjitọ lẹ tọn dile ovi yetọn to whinwhẹ́n nado lẹzun mẹho he mẹ yé sọgan doawagun te de. Owhe lọ lẹpo wẹ nọ gọ́ na azọ́n—yèdọ nuplọnmẹ, anademẹ po mẹplọnlọ-domẹgo po—nado jẹ yanwle he yin nukundo lọ kọ̀n. Mọdopolọ, mí mẹhe to tenọpọn Jehovah lẹ nọ mọ ayajẹ to alọgigọna mẹdevo lẹ mẹ nado dọnsẹpọ Jiwheyẹwhe pẹkipẹki. Mílọsu jlo nado mọ nukundagbe Jiwheyẹwhe tọn po whlẹngán etọn po yí to godo mẹ.
Ma Hẹn Todido Bu Blo
Teninọpọn Jehovah zẹẹmẹdo nado yiwanna ẹn bosọ to sinsẹ̀n ẹn zọnmii ma hẹn todido bu. Ehe sọgan kàn dẹpẹ biọ. To egbehe, susu devizọnwatọ Jiwheyẹwhe tọn lẹ wẹ to gbẹnọ to lẹdo he mẹ gbẹtọ lẹ nọ ṣàn mẹdepope he nọ zan gbẹzan he sinai do yise tintindo to opagbe Jiwheyẹwhe tọn lẹ mẹ ji kò te. Ṣigba, lẹnnupọndo apajlẹ Islaelivi nugbonọ lẹ tọn ji he hẹn todido yetọn go to whenuena yé nọ̀ kanlinmọgbenu to Babilọni na owhe 70. Etẹwẹ gọalọna yé nado wàmọ? Matin ayihaawe, yé mọ huhlọn yí sọn psalm lẹ hihia mẹ. Psalm tulinamẹ tọn dopo he sọgan ko yin kinkàn to ojlẹ enẹ mẹ dọmọ: “Ohó etọn mẹ wẹ yẹn tindo todido te. Ayiha ṣie to OKLUNỌ dín na mọ, hú nuhọ́tọ lẹ to afọnnu dín na mọ; nugbo hugan nuhọ́tọ lẹ na afọnnu. Islaeli E, tindo todido to OKLUNỌ mẹ.”—Psalm 130:5-7.
Ju he hẹn todido yetọn go gbọn hihia po hodidọ gandego po dali lẹ yin ahọsuna to whenuena Babilọni wá jai jẹ alọ mẹgbeyantọ lẹ tọn mẹ to godo mẹ. Ju nugbonọ fọtọ́n susu lẹ yawu jẹ gbejizọnlin ji dedo Jelusalẹm. Gando ojlẹ enẹ go, e yin kinkàndai dọmọ: “Whenuena OKLUNỌ diọ mẹglọnọ Ziọni tọn, . . . whenẹnu wẹ onù mítọn gọ́ na nukiko.” (Psalm 126:1, 2) Ju enẹlẹ ma jogbe, ṣigba yé zindonukọn nado to yise yetọn hẹnlodo. Podọ yé ma doalọtena ohàn pipà Jehovah tọn jiji gba.
To aliho dopolọ mẹ, Klistiani nugbo he to tenọpọn Jiwheyẹwhe to ‘opodo titonu ehe tọn’ whenu lẹ nọ dovivẹnu to whepoponu nado hẹn yise yetọn dogbẹ̀. Yé nọ plọn Ohó Jiwheyẹwhe tọn, nọ na tuli ode awetọ yetọn, bosọ nọ to Jehovah pà zọnmii gbọn yẹwheho wẹndagbe Ahọluduta etọn tọn didọ dali.—Matiu 24:3, 14.
Teninọ Nado Mọaleyi sọn Mẹplọnlọ Mẹ
Dile e ko yin nùdego do jẹnukọn, yẹwhegán Jiwheyẹwhe tọn Jẹlemia wlan dọmọ: “Dagbe wẹ dọ mẹde ni do todido bosọ yí abọẹnọ do nọte na whlẹngán OKLUNỌ tọn.” (Avigbè Jẹlemia Tọn 3:26) Nuhe dọ Jẹlemia te wẹ yindọ e na yọ́n dọ omẹ Jiwheyẹwhe tọn lẹ ni ma wule gando aliho he mẹ Jehovah domẹplọnlọ yé go te blo, to whenuena e dike bọ Jelusalẹm yin vivasudo. Kakatimọ, yé dona mọaleyi sọn numimọ enẹ mẹ gbọn ayihamẹlinlẹnpọn do tolivivẹ yetọn po nuhudo lọ nado diọ gbigbọ yetọn po ji dali.—Avigbè Jẹlemia Tọn 3:40, 42.
Aliho he mẹ mẹplọnlọ Jehovah tọn nọ hẹn ale wá na mí te sọgan yin yiyijlẹdo lehe atin-sinsẹ́n de nọ whẹ́n do go. Gando mẹplọnlọ Jiwheyẹwhe tọn go, Biblu dọmọ: “E [nọ] jo sinsẹ́n jijọho gigọ́ dodo tọn hlan yé he yè zan gbọn e dali lẹ.” (Heblu lẹ 12:11) Kẹdẹdile atin-sinsẹ́n nọ yí whenu whẹpo do bia do, mọ wẹ mí tindo nuhudo whenu tọn nado diọ jijọ mítọn sọgbe hẹ nuplọnmẹ Jiwheyẹwhe tọn do niyẹn. Di apajlẹ, eyin nuṣiwa de zọ́n bọ mí dona hẹn lẹblanulọkẹyi delẹ bu to agun mẹ, ojlo mítọn nado nọtepọn Jiwheyẹwhe na glọnalina mí ma nado gbọjọ bo hònúpla. To ninọmẹ mọnkọtọn lẹ mẹ, mí sọgan mọ tulinamẹ yí sọn ohó gbọdo Davidi tọn lẹ mẹ dọmọ: “Na nukunwhiwhe dopo wẹ adi [Jiwheyẹwhe tọn] dẹ̀n; nukundagbe etọn mẹ wẹ ogbẹ̀ te: avi sọgan wá whégbè nado nọ̀hẹmẹ to tenu, ṣigba hàngbe lélé ayajijẹ tọn ja to afọnnu.” (Psalm 30:5) Eyin mí wleawuna gbigbọ teninọ tọn bo hodo ayinamẹ he mí nọ mọyi sọn Ohó po titobasinanu Jiwheyẹwhe tọn po mẹ, ojlẹ “hàngbe lélé ayajijẹ tọn” mítọn na wá.
Nukọnyiyi jẹ Whinwhẹ́n Kọ̀n Nọ Biọ Whenu
Eyin jọja de wẹ hiẹ yin kavi a ṣẹṣẹ yí baptẹm, hiẹ sọgan to jejeji nado mọ azọngban delẹ yí to agun Klistiani tọn mẹ. Ṣigba e nọ biọ whenu nado wleawuna whinwhẹ́n gbigbọmẹ tọn he yin dandannu nado hẹn azọngban mọnkọtọn lẹ di. Enẹwutu, yí dotẹnmẹ hundote owhe bẹjẹeji tọn towe lẹ zan nado whẹ́n to gbigbọ-liho. Di apajlẹ, jọja whenu yin ojlẹ dagbe de nado hia Biblu to blebu mẹ, nado wleawuna jẹhẹnu Klistiani tọn lẹ, podọ nado plọn azọ́n mẹhẹnzun devi tọn. (Yẹwhehodọtọ 12:1) Eyin a gbọn whiwhẹ dali do gbigbọ teninọ tọn hia, ojlẹ Jehovah tọn na sọ̀ na hiẹ nido mọ azọngban yí dogọ.
Azọ́n mẹhẹnzun devi tọn lọsu nọ biọ homẹfa. Dile glesi dona zindonukọn nado to sinhú kakajẹ whenue Jiwheyẹwhe na hẹn okún lọ whẹ́n do, mọ wẹ e sọ yin do gando azọ́n mẹhẹnzun devi tọn go. (1 Kọlintinu lẹ 3:7; Jakobu 5:7) Nado dó yise po pinpẹn-nutọn-yinyọnẹn na Jehovah po do ahun mẹdevo lẹ tọn mẹ, e nọ biọ osun kavi etlẹ yin owhe susu yiyizan nado plọn Biblu po sọwhiwhe po. Teninọpọn Jehovah nọ biọ linsinsinyẹn, eyin nuplọntọ lẹ ma tlẹ yinuwa sọgbe hẹ nuhe plọn yé te lẹ to tintan whenu. Eyin yé ko gbẹ́ do pinpẹn-nutọn-yinyọnẹn hia jẹ obá de mẹ, enẹ sọgan yin ohia de dọ yé to alọkẹyi gbigbọ Jehovah tọn. Po homẹfa po, hiẹ sọgan tindo ayajẹ lọ nado mọ bọ Jehovah na hẹn nuplọntọ towe whẹ́n taidi devi Klisti tọn de.—Matiu 28:20.
Owanyi Didohia Gbọn Teninọ Dali
Nado mọ lehe teninọ sọgan yin dohia owanyi po jidide po tọn do, lẹnnupọndo ninọmẹ mẹmẹyọnnu yọnhonọ de tọn ji he nọ nọ̀ lẹdo gbọgbé Andes tọn de mẹ to Amérique du Sud. Ewọ po mẹmẹyọnnu devo po kẹdẹ wẹ yin Kunnudetọ Jehovah tọn to gbétatò yetọn mẹ. Saa yí nukun homẹ tọn do pọ́n lehe yé na nọ yí jejejininọ do nọtepọn dlapọn Klistiani hatọ lẹ tọn do! To gbèdopo, dile nugopọntọ tomẹyitọ de to zọnlin ji nado yì dla yé pọ́n whla tintan, e buali. E to dandannu glọ bo lẹkọyi godo podọ enẹ zọ́n bọ e gbọwhenu na ganhiho susu. Zánhomẹ pete wẹ e wá mọ gbétatò lọ hlan sọn olá. To whenuena e yindọ miyọ́n lẹtliki tọn ma tin to lẹdo lọ mẹ, e paṣa ẹ nado mọ hinhọ́n de hlan. Lehe homẹ etọn hùn do sọ to whenue e wá biọ gbétatò lọ mẹ to godo mẹ bo mọ dọ alọnu-miyọ́ngbán he mẹmẹyọnnu yọnhonọ lọ hẹn daga wẹ tá hinhọ́n he e mọ hlan lọ! Mẹmẹyọnnu lọ yọnẹn dọ e na wá janwẹ, enẹwutu e nọtepọn ẹn.
Po homẹfa mọnkọtọn po, mí nọ yí ayajẹ do nọtepọn Jehovah. Mí deji dọ e na hẹn opagbe etọn lẹ di dandan. Podọ taidi nugopọntọ tomẹyitọ enẹ, mí nọ yọ́n pinpẹn mẹhe gbọn owanyi dali nọtepọn mí lẹ tọn. To whelọnu lo, e ma yin nupaṣamẹ dọ Jiwheyẹwhe nọ yọ́n pinpẹn mẹhe nọtepọn ẹn lẹ tọn. Biblu dọmọ: “OKLUNỌ tindo homẹhunhun . . . do yé he to todo to dagbewanyi etọn mẹ lẹ go.”—Psalm 147:11.
[Yẹdide to weda 18]
Mẹhe hẹn alọnu ján to Jiwheyẹwhe pipà mẹ lẹ nọ mọ ayajẹ to teninọpọn Jehovah mẹ