Be Sinsẹ̀n He Hiẹ De Yin Nujọnu Ya?

SUHUGAN mítọn wẹ nọ yiwanna nado mọ nususu bo de dehe jlo mí to whenue mí jei nuhọ̀ gbé. Eyin atin-sinsẹ́n po omá voovo lẹ po tin to ahi de mẹ, mí sọgan de dehe mí yiwanna hugan he na wadagbe na whẹndo mítọn lẹ. Eyin avọ̀-satẹn de bẹ avọ̀ wunmẹ po sinmẹ voovo lẹ po hẹn he ma vẹakuẹ sọmọ, mí sọgan de dehe na yọ́n na mí hugan. Delẹ to nudide he mí nọ basi to gbẹ̀mẹ lẹ mẹ nọ yin whẹho nujlomẹ mẹdetiti tọn poun. Ṣigba, devo lẹ nọ gando dagbemẹninọ mítọn go, taidi dehe bẹ núdùdù hunsindagbe tọn kavi họntọn nuyọnẹntọ lẹ dide hẹn. Etẹwẹ lo, na nuhe dù nudide mítọn gando sinsẹ̀n go? Be whẹho nujlomẹ mẹdetiti tọn poun wẹ aliho sinsẹ̀n-bibasi tọn mítọn dona yin ya? Kavi whẹho de wẹ e yin he gando dagbemẹninọ mítọn go sinsinyẹn?

Sinsẹ̀n voovo lẹ wẹ tin he mẹ mí dona de dopo te. Otò susu wẹ yigbena mẹdekannujẹ sinsẹ̀n tọn todin podọ mẹhe nọ mọ dọ emi vò nado jo sinsẹ̀n mẹjitọ emitọn lẹ tọn do lẹ fọ́n bo to susudeji. Dodinnanu de to États-Unis dohia dọ Amelikanu 80 to kanweko ji “yise dọ e ma yin sinsẹ̀n dopo gee wẹ sọgan planmẹ yì whlẹngán kọ̀n.” Sọgbe hẹ dodinnanu enẹ dopolọ, “to mẹhe yin hokanse lẹ mẹ, mẹdopo to atọ́n ji dọ dọ emi ko diọ sinsẹ̀n to whenuena emi whẹ́n mẹho.” Sọhayinanú de to Brésil dohia dọ diblayi madoẹnẹ Brésil-nu lẹ tọn wẹ ko diọ sinsẹ̀n yetọn.

To ojlẹ de mẹ wayi, gbẹtọ lẹ nọ dọnnu sinsinyẹn do sinsẹ̀n-nuplọnmẹ he hẹn sinsẹ̀n de gbọnvo na devo lẹ ji. Todin pọndohlan he gbayipe lọ wẹ yindọ, ‘Nudide he a basi gando sinsẹ̀n go ma yin nujọnu.’ Ṣigba be mọ wẹ ya? Be nudide he hiẹ basi gando sinsẹ̀n go sọgan yinuwado jiwe ya?

Kẹdẹdile nuhọtọ nuyọnẹntọ lẹ nọ kàn kanbiọ lẹ sè gando fie nuhe yin zizedonukọnna yé lẹ wá sọn go do, nuyọnẹnnu wẹ e na yin nado kanse dewe dọ, ‘Nawẹ sinsẹ̀n voovo ehe lẹpo bẹjẹeji gbọn, podọ etẹwutu?’ Biblu basi zẹẹmẹ ehe tọn.

Nawẹ Sinsẹ̀n lẹ Bẹjẹeji Gbọn?

To Islaeli hohowhenu tọn mẹ, Ahọlu Jeloboami bẹ sinsẹ̀n yọyọ de jẹeji to nudi owhe fọtọ́n jẹnukọnna aigba ji wiwá Jesu tọn. Jeloboami wẹ yin ahọlu tintan ahọluduta agewaji Islaeli tọn he jẹ edekannu. E pannukọn avùnnukundiọsọmẹ lọ nado pli gbẹtọ lẹ do godo ede tọn. “Ahọlu yí hónamẹ bo basi oyìnvu awe sika tọn lẹ; e sọ dọhlan yé dọmọ, E tin sù gbau na mìwlẹ nado nọ hẹji yì Jelusalẹm; pọ́n [Jiwheyẹwhe mìtọn die], mì Islaeli emi.” (1 Ahọlu lẹ 12:28) E họnwun dọ, ahọlu lọ jlo na yí sinsẹ̀n zan nado gọkọna nugbonọ-yinyin gbẹtọ lẹ tọn sọn Jelusalẹm, fie yé ko nọ basi sinsẹ̀n te dai. Sinsẹ̀n he Jeloboami bẹjẹeji lọ nọ̀ aimẹ na owhe kanweko lẹ bo wá dekọtọn do vasudo mẹ na livi susu gbẹtọ lẹ tọn to whenuena Jiwheyẹwhe hẹn whẹdida ṣẹ do akọta atẹṣitọ Islaeli tọn enẹ ji to godo mẹ. Sinsẹ̀n Jeloboami tọn yin didoai nado mọaleyi to tonudidọ-liho. Delẹ to sinsẹ̀n Tohọluduta tọn he gbẹ́ zindonukọn kakajẹ egbé lẹ mẹ bẹjẹeji to aliho dopolọ mẹ to vivẹnudido mẹ nado na huhlọn aṣẹpipa tonudidọ tọn.

Apọsteli Paulu do mẹwhinwhàn devo he nọ sisẹ́ gbẹtọ lẹ nado bẹ sinsẹ̀n yọyọ de jẹeji hia to whenuena e dọmọ: “Yẹn yọ́n ehe dọ, to yìyì ṣie godo, ohla he dobu na biọ mì mẹ, ma pò apó yìnte. Podọ to mìlọsu mẹ wẹ sunnusi lẹ na fọ́n sọn bo na to onú agọ̀ dọ, nado dọ̀n nuplọntọ lẹ do godo yetọn.” (Owalọ lẹ 20:29, 30) Nukọntọ goyitọ lẹ nọ saba bẹ sinsẹ̀n lẹ jẹeji nado dọ̀n ayidonugo wá yedelẹ ji. Ṣọṣi he gbọn oklọ dali sọalọakọ́n nado yin Klistiani tọn lẹ ko klan do mimá voovo lẹ mẹ.

Mẹnu Wẹ Sinsẹ̀n lẹ Nọ Jlo Nado Hẹn Homẹhun?

Mẹdelẹ sọgan bẹ sinsẹ̀n yọyọ de jẹeji nado hẹn pekọ wá na nubiọtomẹsi gbẹtọ lẹ tọn. Di dohia, linlinwe Economist na linlin gando ṣọṣi he nọ yin pinpọnhlan taidi daho hugan États-Unis tọn lẹ go. Linlin lọ dọ dọ ṣọṣi ehelẹ to jijideji na yé “yin zize sinai do nunọwhinnusẹ́n dopolọ ji taidi ajọwiwa kọdetọn dagbenọ lẹpo wutu: enẹ wẹ ahisinọ lẹ tọn hihopọn jẹnukọn.” Delẹ to ṣọṣi lọ lẹ mẹ nọ ze “sinsẹ̀n-bibasi ayidedai tọn he bẹ video, wadohia po húnhiho egbezangbe tọn lẹ po hẹn” donukọnnamẹ. Sinsẹ̀ngán ṣọṣi ehelẹ tọn delẹ nọ sọalọakọ́n dọ yé nọ plọn hagbẹ yetọn lẹ nado yin “adọkunnọ, bo tindo agbasalilo bosọ vò sọn ayiha mẹ.” Linlinwe dopolọ dọ dọ dile etlẹ yindọ ṣọṣi enẹlẹ nọ yin homọdọdego dọ yé yin apadewhe azọ́nwhé ayidedai tọn kavi “tito alọgọna mẹdetiti tọn,” “nuhe wà yé te poun wẹ nado hẹn pekọ wá na nubiọtomẹsi hagbẹ yetọn lẹ tọn.” Linlin lọ dotana dọmọ: “Kọndopọ ajọwiwa po sinsẹ̀n po tọn ko tindo kọdetọn dagbe tlala.”

Dile etlẹ yindọ sinsẹ̀n devo lẹ sọgan nọma do yedelẹ hia tlọlọ taidi mẹhe to ajọwa, ṣọṣi he nọ “hẹn pekọ wá na nubiọtomẹsi” gbẹtọ lẹ tọn lẹ hẹn mí flin avase he Paulu na. E wlan dọmọ: “Ojlẹ de na wá, bọ nuplọnmẹ titengbe lọ masọ na yọ́nsè na gbẹtọ lẹ ba; ṣigba yé na hodo ojlo yelọsu titi tọn, bo na bẹ nuplọnmẹtọ susugege pli na yede, bọ yé na nọ dọ nuhe yọ́nsè na yé lẹ na yé. Yé na nọ dó tókúkú nugbo lọ mẹ bo na nọ doto otangblo lẹ.”—2 Timoti 4:3, 4 Alẹnuwema Yọyọ Fọngbe tọn.

To whenuena e yindọ sinsẹ̀n susu nọ bẹjẹeji na ojlo tintindo to aṣẹpipa tonudidọ tọn, yindidi, po nukundagbe gbẹtọ lẹ tọn mimọyi po mẹ wutu kakati nido yin nado hẹn homẹ Jiwheyẹwhe tọn hùn, e ma yin nupaṣamẹ dọ sinsẹ̀n nọ doalọ to ylanwiwa lẹ mẹ taidi ovivu lẹ zinzanhẹ, mẹhodu, awhàn, kavi nukunbianamẹ. Sinsẹ̀n nọ saba sọawuhia nado yin oklọ. Nawẹ hiẹ sọgan họ́ dewe ma nado yin kiklọ gbọn?

[Blurb on page 4]

Sinsẹ̀n susu nọ bẹjẹeji na ojlo tintindo to aṣẹpipa tonudidọ tọn, yindidi, po nukundagbe gbẹtọ lẹ tọn mimọyi po mẹ wutu kakati nido yin nado hẹn homẹ Jiwheyẹwhe tọn hùn