Etẹ Nkọ! Hinhọ́n lọ Jiawu!

EYIN hiẹ ko dla avì to zinvlu mẹ pọ́n, hiẹ na yọnẹn dọ e nọ hẹnmẹ jẹflumẹ. Lehe hinhọ́n nọ hẹn kọgbọ wá do sọ! Hiẹ sọgan ko sọ mọ dewe to ninọmẹ de mẹ he sọgan yin yiyijlẹdo zinvlu go. Vlavo ehe jọ to whenuena hiẹ ma mọ ali nado lùn nuhahun de tọ́n. Enẹgodo hiẹ jẹ hinhọ́n mọ ji vudevude bo mọ dọ pọngbọ de tin. Numimọ jiawu de wẹ e yin nado lùn zinvlu mọnkọtọn tọ́n biọ hinhọ́n mẹ.

To owhe kanweko tintan whenu, suhugan gbẹtọ lẹ tọn wẹ tin to zinvlu mẹ to gbigbọ-liho. Apọsteli Pita wlanwe hlan mẹhe jo nuyise yetọn hoho lẹ do bo lẹzun Klistiani lẹ dọmọ: “[Jiwheyẹwhe] . . . ylọ mì sọn zinvlu mẹ do hinhọ́n ablanọ etọn tọn mẹ.” (1 Pita 2:9) Na Klistiani enẹlẹ, e taidi tintọ́nsọn zinvlu gọ́ngọ́n de mẹ biọ hinhọ́n mẹ. Ninọmẹ yetọn sọgan sọ yin yiyijlẹdo mẹhe tin ede ṣo bo ma tindo todido ṣigba he wá lẹzun hagbẹ whẹndo he tindo sọgodo dejidego de tọn go.—Efesunu lẹ 2:1, 12.

“Hiẹ Ko Jo Owanyi Towe Tintan Dai”

Klistiani dowhenu tọn lẹ mọ “nugbo lọ”—yèdọ yise nugbo Klistiani tọn. (Johanu 18:37) Yé mọ hinhọ́n jiawu nugbo lọ tọn bo tọ́nsọn zinvlu gbigbọmẹ tọn mẹ biọ hinhọ́n he to wunhọ́n mẹ. Ṣigba, dile ojlẹ to yìyì, zohunhun he Klistiani delẹ tindo to bẹjẹeji miọn. Di apajlẹ, to vivọnu owhe kanweko tintan tọn, nuhahun sinsinyẹn de fọ́n to agun he tin to Efesu mẹ. Jesu Klisti he yin finfọnsọnku do nuhahun lọ hia dọmọ: “Yẹn tindo onú de do ogo we, na hiẹ ko jo owanyi towe tintan dai. Enẹwutu flin fie aijijẹ towe fọ́n sọn, na hiẹ ni lẹnvọjọ, bosọ wazọ́n tintan.” (Osọhia 2:4, 5) Klistiani he tin to Efesu lẹ dona vọ́ owanyi he yé tindo na Jiwheyẹwhe po nugbo lọ po fọndote.

Etẹwẹ dogbọn míwlẹ dali? Mílọsu ko tindo lẹblanulọkẹyi lọ nado mọ hinhọ́n, yèdọ nado wá yọ́n nugbo jiawu Ohó Jiwheyẹwhe tọn tọn. Mí yiwanna nugbo lọ. Ṣigba, nuhahun egbesọegbesọ tọn lẹ sọgan dekanpona owanyi he mí tindo na nugbo lọ. Podọ nuhahun ‘azán godo tọn’ tọn lẹ sọgan yidogọna ehe. Mí to gbẹnọ to aihọn de mẹ he yin zẹẹmẹ basina taidi “ojlẹ awusinyẹn tọn lẹ”—yèdọ aihọn he mẹ gbẹtọ lẹ yin “owanyi na yede tọ́, nukunkẹnnọ, awagundotọ, saklanọ, nùzantọ, tolivẹtọ do mẹjitọ go, mayọndagbenọ, mawenọ.” (2 Timoti 3:1, 2) Nuyiwadomẹji yetọn sọgan de zohunhun mítọn pò bo hẹn owanyi he mí tindo na Jehovah miọn.

Eyin mí ko hẹn owanyi mítọn tintan bu, mí dona ‘flin fie aijijẹ mítọn fọ́n sọn bo lẹnvọjọ.’ Mí dona gọ̀ jẹ ninọmẹ gbigbọmẹ tọn mítọn dowhenu tọn mẹ. Humọ, mí dona payi ma nado dike pinpẹn-nutọn-yinyọnẹn mítọn na nugbo lọ ni depò. Lehe e yin nujọnu do sọ dọ mímẹpo ni tindo pọndohlan dagbe ayajẹ tọn bo hẹn owanyi mítọn na Jiwheyẹwhe podọ na nugbo etọn dogbẹ̀!

‘Nugbo He Hẹn Mí Jẹ Mẹdekannu’

Hinhọ́n nugbo Owe-wiwe tọn jiawu na Biblu na gblọndo kanbiọ titengbe he ko hẹn gbẹtọvi lẹ jẹflumẹ na owhe fọtọ́n susu lẹ tọn. Delẹ to kanbiọ mọnkọtọn lẹ mẹ wẹ: Naegbọn mí do tin tofi? Etẹwẹ yin lẹndai ogbẹ̀ tọn? Naegbọn onú ylankan lẹ do nọ jọ? Be gbẹtọ nọ nọgbẹ̀ zọnmii to okú godo wẹ ya? Jehovah ko tá hinhọ́n do nugbo jiawu sinsẹ̀n-nuplọnmẹ tọn lẹ ji na mí. Na nugbo tọn, be e ma jẹ dọ mí ni dopẹ́ ya? Mì ma dike mí ni yí nukun pẹvi do pọ́n nuhe mí ko plọn lẹ gbede blo!

Jesu dọna devi etọn lẹ dọmọ: “Mìwlẹ nasọ yọ́n nugbo, nugbo lọ nasọ hẹn mì jẹ mẹdekannu.” (Johanu 8:32) Avọ́sinsan ofligọ Jesu tọn ko tún mí dote sọn ylando po okú po si. Humọ, nugbo họakuẹ Biblu tọn ehelẹ ko sọ tún mí dote sọn wunvi po flumẹjijẹ aihọn he tin to zinvlu mẹ ehe tọn po si. Ayihamẹlinlẹnpọn po pinpẹn-nutọn-yinyọnẹn po do nuhe mí ko plọn lẹ ji na gọalọna mí nado hẹn owanyi he mí tindo na Jehovah po Ohó etọn po siso dogọ.

Apọsteli Paulu wlanwe hlan Klistiani he tin to Tẹsalonika lẹ dọmọ: “Whenuena mì yí ohó Jiwheyẹwhe tọn, ehe mì sè sọn mí dè, mì ma yí i di ohó gbẹtọ tọn gba, ṣigba le e te to nugbo mẹ, ohó Jiwheyẹwhe tọn he to azọ́nwa tlala to mì he yise lẹ mẹ ga.” (1 Tẹsalonikanu lẹ 2:13) Tẹsalonikanu lẹ sè bo “yí ohó [Jiwheyẹwhe tọn] po ayajijẹ” po. Yé ma tin “to zinvlu mẹ” ba. Kakatimọ, yé ko lẹzun “ovi hinhọ́n tọn” lẹ. (1 Tẹsalonikanu lẹ 1:4-7; 5:4, 5) Klistiani enẹlẹ wá mọnukunnujẹemẹ dọ Jehovah wẹ Mẹdatọ lọ bosọ yin ganhunupotọ, nuyọnẹntọ, owanyinọ, podọ lẹblanunọ. Taidi hodotọ Klisti tọn devo lẹ, yé sọ yọnẹn dọ Jehovah basi tito nado súnsún ylando yetọn lẹ gbọn avọ́sinsan ofligọ Ovi etọn, Jesu Klisti tọn gblamẹ.—Owalọ lẹ 3:19-21.

Dile etlẹ yindọ Tẹsalonikanu lẹ ma tindo nukunnumọjẹnumẹ gigọ́ nugbo lọ tọn, yé yọ́n asisa oyọnẹn he pegan lọ tọn. Owe-wiwe gbọdo lọ sọgan hẹn omẹ Jiwheyẹwhe tọn ‘pegan, bo hẹn ẹn sọgbe mlẹnmlẹn hlan azọ́n dagbe lẹpo.’ (2 Timoti 3:16, 17) Klistiani he tin to Tẹsalonika lẹ sọgan zindonukọn to nupinplọn mẹ, bo mọ whlasusu na yede dọ hinhọ́n he wá sọn Jiwheyẹwhe dè jiawu nugbonugbo. Yé tindo whẹwhinwhẹ́n nado jaya to whepoponu. (1 Tẹsalonikanu lẹ 5:16) Nudopolọ wẹ gando mílọsu go.

Hinhọ́n Hlan Omọ́-Liho Mítọn

Psalm-kàntọ lọ dọ nuhewutu hinhọ́n lọ do jiawu bo jihàn dọmọ: “Ohó towe wẹ zògbán de hlan afọ ṣie, hinhọ́n hlan omọ́-liho ṣie.” (Psalm 119:105) Anademẹ he mí nọ mọyi sọn Ohó Jiwheyẹwhe tọn mẹ sọgan gọalọna mí nado deali dagbe bo duvivi gbẹzan he tindo zẹẹmẹ tọn. Mí ma dona taidi bato he buali de gba. Nugbo lọ yinyọnẹn po yíyí i do yizan mẹ po nọ basi hihọ́na mí ma nado lẹzun mẹhe yè na nọ “do yigọyigọ na, bọ yè na yí jẹhọn oplọn tọn lẹpo do nọ hẹn dánpe.”—Efesunu lẹ 4:14.

Biblu dọmọ: “Mì dotudo ahọvi lẹ go blo, kavi do ovi gbẹtọ tọn go, mẹhe mẹ whlẹngán depope ma tin te.” E sọ dọmọ: “Donanọ wẹ ewọ he tindo Jiwheyẹwhe Jakobu tọn na alọgọ etọn, gbandọnpọnmẹ mẹhe tọn tin to OKLUNỌ Jiwheyẹwhe etọn mẹ.” (Psalm 146:3, 5) Humọ, jidide do Jehovah go nọ gọalọna mí nado duto obu po ayimajai po ji. Apọsteli Paulu wlan dọmọ: “Mì jẹtukla nudepope tọn blo; ṣigba to odẹ̀ mẹ to ovẹ̀ mẹ po pẹdido po mẹ, mì nọ yí kanbiọ mìtọn hia Jiwheyẹwhe to onú popo mẹ. Jijọho Jiwheyẹwhe tọn he hú nuyọnẹn lẹpo na whlá ayiha mìtọn po linlẹn mìtọn lẹ po [to] Klisti Jesu mẹ.” (Filippinu lẹ 4:6, 7) Na nugbo tọn, mí nọ mọaleyi sọn anademẹ hinhọ́n Ohó Jiwheyẹwhe tọn tọn mẹ.

Mì Gbọ Mí Ni to Wunhọ́n di Hinhọ́n to Aihọn Mẹ

Whẹwhinwhẹ́n devo he wutu hinhọ́n Ohó Jiwheyẹwhe tọn do jiawu wẹ yindọ e nọ hùn dotẹnmẹ dote nado mọ azọ́ndenamẹ gigonọ hugan he tin-to-aimẹ na gbẹtọvi lẹ yí. Jesu dọna hodotọ etọn lẹ dọmọ: “Mì yì, bo hẹn akọta lẹpo zun nuplọntọ, bosọ nọ baptizi yé do oyín Otọ́ tọn, po Ovi tọn po, po [gbigbọ wiwe] tọn po mẹ: na mì nisọ nọ plọn yé nado nọ doayi onú lẹpo go, nudepope he yẹn degbena mì: bo pọ́n, yẹn tin to mì dè to whepoponu, kakajẹ opodo aihọn tọn.” E bẹ gbedide lọ jẹeji po hodidọ lọ po dọmọ: “Aṣẹ lẹpo wẹ yè ko jo hlan mi to olọn mẹ podọ to aigba ji.”—Matiu 28:18-20.

Lẹnnupọndo mẹhe to godonọna Klistiani nugbo lẹ to azọ́n yẹwhehodidọ wẹndagbe lọ tọn po nugbo Biblu tọn pinplọn gbẹtọ akọta lẹpo tọn po mẹ ji. Jesu dopagbe na hodotọ etọn lẹ dọ ewọ na tin po yé po. Na nugbo tọn, e ko to alọgọna yé bosọ to godonọna yé to lizọnyizọn yetọn mẹ dile ‘hinhọ́n yetọn to wunhọ́n’ to aliho ehe mẹ podọ to “azọ́n dagbe” devo lẹ mẹ. (Matiu 5:14-16) Angẹli lẹ lọsu to mahẹ tindo to azọ́n wẹndagbe-jijlá tọn ehe mẹ. (Osọhia 14:6) Podọ etẹwẹ dogbọn Jehovah Jiwheyẹwhe dali? Apọsteli Paulu wlan dọmọ: “Yẹn dó, Apọlo húsinna: ṣigba Jiwheyẹwhe wẹ to jideji na omẹ.” Lẹblanulọkẹyi nankọtọn die nado tin to “azọ́nyiwahẹmẹtọ dopọ hẹ Jiwheyẹwhe” lẹ mẹ!—1 Kọlintinu lẹ 3:6, 9.

Sọ lẹnnupọndo lehe vivẹnudido mítọn lẹ nọ yin didona to azọ́n he Jiwheyẹwhe dena mí ehe mẹ do ji. Nudevo de ma tin he sọgan yin yiyijlẹdo lẹblanulọkẹyi he Jiwheyẹwhe na mí nado ‘to wunhọ́n di hinhọ́n to aihọn mẹ’ go. Gbọn hinhọ́n Ohó Jiwheyẹwhe tọn didohia to ohó po walọ mítọn lẹ po mẹ dali, mí nọ penugo nado gọalọna gbẹtọ ahunjijlọnọ lẹ. (Filippinu lẹ 2:15) Podọ mí sọgan jaya dile mí yí zohunhun do to yẹwhehodọ bo to mẹplọn, ‘na Jiwheyẹwhe ma yin mawadodonọ nado wọn azọ́n mítọn po tukla owanyi mítọn tọn po, he mí ko sọhia gbọn oyín etọn dali.’—Heblu lẹ 6:10.

‘Họ̀ Nusisá bo Sá Do Nukun Towe’

Jesu dọ to wẹ̀ndomẹ etọn hlan agun owhe kanweko tintan tọn he tin to Laodikea mẹ dọmọ: ‘Họ̀ nusisá sọn dè e bo sá do nukun towe, na hiẹ nido mọnú. Yé omẹ sọha he yẹn yiwanna, wẹ yẹn nọ wọhẹ, bosọ nọ hò.’ (Osọhia 3:18, 19) ‘Nusisá nukun tọn’—yèdọ mẹplọnlọ po nuplọnmẹ Jesu tọn lẹ po wẹ pọngbọ dejidego lọ na nukuntintọ́n gbigbọmẹ tọn. Eyin mí jlo na hẹn pọndohlan gbigbọmẹ tọn dagbe de go, mí dona kẹalọyi ayinamẹ etọn bo hodo anademẹ Biblu tọn lẹpo. Mí sọ dona tindo ayiha kavi pọndohlan he taidi Klisti tọn bo hodo apajlẹ etọn. (Filippinu lẹ 2:5; 1 Pita 2:21) Nusisá nukun tọn lọ ma yin vọnu gba. Jesu dọmọ: “Họ̀ [ẹ] sọn dè e.” Akuẹ etọn bẹ whenu po vivẹnudido mítọn lẹ po hẹn.

Eyin mí tọ́nsọn lẹdo he dózin de bo biọ abò he họ́n ganji de mẹ, e sọgan yí whenu na nukun mítọn nido diọada sọgbe hẹ hinhọ́n lọ. Mọdopolọ, e nọ biọ whenu nado plọn Ohó Jiwheyẹwhe tọn bo mọ hinhọ́n nugbo lọ tọn. E nọ biọ whenu nado lẹnayihamẹpọn do nuhe mí plọn ji podọ nado lẹnnupọndo lehe nugbo lọ họakuẹ do ji. Ṣigba, avọ́sinsan lọ ma sù zẹjlẹgo gba. Etẹwutu? Na hinhọ́n lọ jiawu!

[Yẹdide to weda 14]

‘Họ̀ nusisá sọn dè e bo sá do nukun towe, na hiẹ nido mọnú’