Jọja lẹ Emi—Mì Nọ Yinuwado Ahun Mẹjitọ Mìtọn lẹ Tọn Ji
“YẸN ma tindo ayajẹ daho de hú ehe gba, dọ yẹn ni to sisè dọ ovi ṣie lẹ to zọnlinzin to nugbo mẹ,” wẹ apọsteli yọnhonọ lọ Johanu wlan. (3 Johanu 4) Dile etlẹ yindọ devi Klistiani lẹ wẹ yin alọdlẹndo to wefọ Biblu tọn ehe mẹ taidi ovi lẹ, mẹjitọ budisi Jiwheyẹwhe tọ́ de sọgan mọnukunnujẹ numọtolanmẹ he Johanu dohia lẹ mẹ po awubibọ po. Kẹdẹdile mẹjitọ lẹ nọ yinuwa taun do gbẹzan ovi yetọn lẹ tọn ji do, ovi lẹ lọsu nọ yinuwado gbẹzan mẹjitọ yetọn lẹ tọn ji to aliho ayidego tọn mẹ.
Ahọlu Sọlọmọni Islaeli tọn doayi nuyiwadomẹji sisosiso he ovi lẹ sọgan tindo do mẹjitọ yetọn lẹ ji go. E wlan dọmọ: “Ovi nuyọnẹntọ basi homẹhun otọ́ etọn tọn: ṣigba ovi nulunọ wẹ awubla onọ̀ etọn tọn.” (Howhinwhẹn lẹ 10:1) Enẹwutu, ovi lẹpo—yèdọ mẹhe tlẹ ko whẹ́n mẹho lẹ lọsu—na wà dagbe nado lẹnnupọndo nugandomẹgo he nuyiwa yetọn lẹ na wá tindo do otọ́ po onọ̀ yetọn po ji. Naegbọn ehe do sọgbe?
Lẹnnupọndo tukla susu he mẹjitọ budisi Jiwheyẹwhe tọ́ towe lẹ ko jẹ nado pọ́n gowe whẹ́n ji! Yé ko jẹ towe hòpọn ji bo ko jẹ dẹ̀ho do ota towe mẹ ji na ojlẹ dindẹn whẹpo a do yin jiji. To whenuena a yin jiji godo, mẹjitọ towe awe lẹ duvivi kanṣiṣa pẹkipẹki de tọn hẹ we podọ vlavo yé dopẹna Jiwheyẹwhe na lẹblanulọkẹyi po azọngban jiawu mẹjitọ-yinyin tọn po, ehe hẹnmẹ lẹnnupọn taun. Viyẹyẹ pẹnyẹn-pẹnyẹn de tin to nukunpedomẹgo yetọn glọ todin, podọ taidi sinsẹ̀n-basitọ Jehovah tọn lẹ, yé nọ yí nukun nujọnu tọn do pọ́n azọngban ehe.
Na mẹjitọ towe lẹ yin Klistiani nugbo lẹ wutu, yé lẹhlan Biblu po owe sinai do Biblu ji lẹ po na anademẹ dejidego lẹ, podọ yé dín ayinamẹ sọn mẹhe ko pọ́n ovi go whẹ́n lẹ dè. Yé sọ zindonukọn nado to ahunmẹdunamẹnu yetọn lẹ zedonukọnna Jiwheyẹwhe to odẹ̀ mẹ. (Whẹdatọ 13:8) Dile a to whinwhẹ́n, mẹjitọ towe lẹ yọ́n jẹhẹnu dagbe towe lẹ ṣigba yé ma nọ miyọnnukundo madogán towe lẹ gba. (Job 1:5) Avùnnukundiọsọmẹnu yọyọ devo lẹ fọndote to whenuena a biọ owhe aflanmẹ tọn lẹ mẹ. Hiẹ sọgan ko yinuwa po tasinsinyẹn po to whedelẹnu, bọ mẹjitọ towe lẹ dona hodẹ̀, hiawe bosọ lẹnnupọn titengbe do lehe yé sọgan gọalọna we nado to Otọ́ towe olọn mẹ tọn, Jehovah, sẹ̀n zọnmii do ji.
Mẹjitọ towe lẹ ma doalọte nado to otọ́ po onọ̀ po yin na we gbede gba. Yé gbẹ́ nọ to dagbemẹninọ agbasa tọn, apọ̀nmẹ tọn, numọtolanmẹ-liho tọn po gbigbọmẹ tọn towe po hòpọn etlẹ yin to whenue hiẹ ko whẹ́n mẹho. Etomọṣo, to ojlẹ enẹ lẹpo mẹ, mẹjitọ lẹ ma nọ wọn dọ a vò nado basi nudide towe titi lẹ podọ mẹdepope ma sọgan dọ nuhe gbẹzan towe na wá yin taun. Yigodo yinukọn, hiẹ lọsu wẹ na de aliho nuyiwa tọn he a na hodo.
To whelọnu lo, be e ma sọgbe hẹ lẹnpọn dagbe nado dọ dọ, eyin mẹjitọ lẹ ma tindo “ayajẹ daho de hú” nado to sisè dọ ovi yetọn lẹ “to zọnlinzin to nugbo mẹ,” adà awetọ etọn lọsu sọ yin nugbo ya? Na nugbo tọn, ovi he nọ yinuwa to aliho nulú tọn mẹ lẹ nọ hẹn awubla wá na mẹjitọ yetọn lẹ. Sọlọmọni dọmọ: “Ovi nulunọ hlan homẹgble otọ́ etọn tọn wẹ, podọ vivẹ́ ayiha tọn hlan onọ̀ he jì i.” (Howhinwhẹn lẹ 17:25) Awubla daho nankọ die he mẹjitọ lẹ nọ tindo to whenuena ovi de gbẹkọ sinsẹ̀n-bibasi Jiwheyẹwhe nugbo lọ tọn go!
E họnwun dọ, mì ovi lẹ nọ tindo nuyiwadomẹji daho de to whẹndo mìtọn mẹ podọ zẹ̀ whẹndo mìtọn go. Walọyizan mìtọn nọ yinuwa sinsinyẹn do ahun mẹjitọ mìtọn lẹ tọn ji. Eyin mì gbẹkọ Jiwheyẹwhe po nunọwhinnusẹ́n etọn lẹ po go, mẹjitọ mìtọn lẹ na sè vivẹ́. Ṣigba, adà awetọ lọsu yin nugbo ga. Eyin mì gbọṣi nugbonọ-yinyin po tonusise po mẹ hlan Jehovah, mẹjitọ mìtọn lẹ na jaya. Mì magbe nado hẹn ahun mẹjitọ mìtọn lẹ tọn jaya! Nunina họakuẹ hugan tẹwẹ mì sọgan sọ na mẹhe pọ́n mì go whẹ́n, basi hihọ́na mì bosọ yiwanna mì lẹ?