Nuhewutu Yajiji Lẹpo Na Doalọte To Madẹnmẹ
“Osé lọ, pipé wẹ azọ́n etọn.”—DEUTELONOMI 32:4.
1, 2. (a) Naegbọn hiẹ yọ́n pinpẹn todido ogbẹ̀ mavọmavọ tọn? (b) Etẹwẹ nọ glọnalina mẹsusu nado yí Jiwheyẹwhe he dopagbe jiawu lẹ na sọgodo sè?
BE E nọ jlo we nado lẹnnupọndo gbẹninọ to Paladisi mẹ ji ya? Vlavo hiẹ mọ dewe dile hiẹ to gbejizọnlinzin gbọ̀n planẹti jiawu ehe ji bo to nuplọn gando nutogbẹ̀ wunmẹ voovo susugege etọn lẹ go. Kavi vlavo hiẹ lẹnnupọndo awuvivi he hiẹ na tindo ji dile hiẹ to azọ́nwa hẹ mẹdevo lẹ nado penukundo aigba go bo diọ ẹ zun jipa de lẹdo aihọn pé. Kavi hiẹ sọgan lẹnnupọndo azọ́nyinyọnẹn he hiẹ na hẹn pọnte dogọ to anazọnwiwa, họgbigbá, nuhiho kavi yanwle devo lẹ he hiẹ ma tindo whenu na to gbẹzan jinjan egbehe tọn mẹ ji. Depope he whẹho lọ yin, hiẹ yọ́n pinpẹn todido lọ nado duvivi nuhe Biblu ylọdọ “ogbẹ̀ nugbonugbo” tọn—yèdọ ogbẹ̀ mavọmavọ sọgbe hẹ lẹndai he Jehovah tindo na mí.—1 Timoti 6:19.
2 Awuvivinu po lẹblanulọkẹyi họakuẹ po wẹ e yin nado má todido sinai do Biblu ji enẹ hẹ mẹdevo lẹ, kavi e ma yin mọ wẹ? Ṣigba, mẹsusu wẹ ma nọ kẹalọyi todido mọnkọtọn. Yé nọ pọ́n ẹn hlan taidi odlọ de poun, hodidọ oklọ tọn na gbẹtọ gúgútọ lẹ. Yé tlẹ sọgan mọ ẹn di nuhe vẹawu nado yí Jiwheyẹwhe he dopagbe ogbẹ̀ madopodo tọn to Paladisi mẹ sè. Etẹwutu? Na mẹdelẹ, nuhe nọ glọnalina yé wẹ danuwiwa he gbayipe. Yé mọdọ eyin Jiwheyẹwhe tin bo yin nupojipetọ bosọ yin owanyinọ, danuwiwa po yajiji he tin to aihọn mẹ po ma dona ko tin. Jiwheyẹwhe he nọ kẹalọyi danuwiwa ma sọgan tin, wẹ yé dọ—kavi eyin e tin janwẹ, vlavo e ma yin nupojipetọ kavi e ma nọ hò mẹtọn pọ́n. Mẹdelẹ mọ linlẹn mọnkọtọn taidi nuhe sọgbe hẹ lẹnpọn dagbe. Na jide tọn, Satani ko do ede hia taidi mẹhe bikan to nukuntintọ́n na nuyọnẹn gbẹtọ lẹ tọn mẹ.—2 Kọlintinu lẹ 4:4.
3. Kanbiọ he vẹawu tẹwẹ mí sọgan gọalọna gbẹtọ lẹ nado mọ gblọndo etọn, podọ naegbọn mí do tin to otẹn dagbe mẹ nado wàmọ?
3 Taidi Kunnudetọ Jehovah tọn lẹ, mí tin to otẹn dagbe mẹ nado gọalọna mẹhe to yinyin kiklọ gbọn Satani po nuyọnẹn aihọn ehe tọn po dali lẹ. (1 Kọlintinu lẹ 1:20; 3:19) Mí yọ́n nuhewutu mẹsusu ma do yí opagbe Biblu tọn lẹ sè. Onú lọ poun wẹ yindọ yé ma yọ́n Jehovah. Yé sọgan nọma yọ́n yinkọ etọn kavi zẹẹmẹ yinkọ lọ tọn, podọ vlavo yé ma yọ́n nudepope gando jẹhẹnu etọn lẹ kavi yinkọ he e ko basi na ede gbọn opagbe he e hẹndi wayi lẹ gblamẹ go. Mí tindo lẹblanulọkẹyi nado yọ́n onú mọnkọtọn lẹ. Sọn ojlẹ de mẹ jẹ devo mẹ, nuhe sọgbe wẹ e yin nado nọ gbadopọnna lehe mí sọgan gọalọna mẹhe ‘wuntuntun yetọn dozinvlu’ lẹ do nado mọ gblọndo na dopo to kanbiọ titengbe hugan he nọ duahunmẹna gbẹtọvi lẹ mẹ, yèdọ “Naegbọn Jiwheyẹwhe jotẹnna danuwiwa po yajiji po?” (Efesunu lẹ 4:18) Tintan whẹ́, mí na gbadopọnna lehe mí sọgan ze dodonu dai na gblọndo pekọhẹnwanamẹ tọn do. Enẹgodo, mí na dọhodo lehe jẹhẹnu Jehovah tọn lẹ sọawuhia to aliho he mẹ e penukundo whẹho danuwiwa tọn go te ji.
Dodonu Gblọndo lọ Tọn Zizedai
4, 5. Etẹwẹ e sọgan biọ dọ mí ni wà jẹnukọn eyin mẹde kàn nuhewutu Jiwheyẹwhe jotẹnna yajiji sè? Basi zẹẹmẹ.
4 Eyin mẹde kàn nuhewutu Jiwheyẹwhe jotẹnna yajiji sè, etẹwẹ mí na dọ? Mí sọgan yin whinwhàn nado basi zẹẹmẹ gigọ́ to afọdopolọji, sọn nuhe jọ to jipa Edẹni tọn mẹ ji. To whẹho delẹ mẹ, mọwiwà ma ylan. Ṣigba, hẹn ẹn do ayiha mẹ dọ nuhudo sọgan tin nado ze dodonu delẹ dai jẹnukọn. (Howhinwhẹn lẹ 25:11; Kọlọsinu lẹ 4:6) Mì gbọ mí ni gbadopọnna nuagokun atọ̀n he mí na yizan nado gọalọna mẹde whẹpo do na gblọndo kanbiọ lọ tọn.
5 Tintan whẹ́, eyin danuwiwa he gbayipe to aihọn lọ mẹ to tuklado mẹlọ taun, e yọnbasi dọ ewọ kavi mẹyiwanna etọn lẹ ko tindo numimọ danuwiwa tọn. Enẹwutu, e sọgan yọ́n hugan nado vẹawu mẹlọ jẹnukọn. Apọsteli Paulu na ayinamẹ Klistiani lẹ dọmọ: “Mì . . . nọ viavi hẹ yé he to avivi lẹ.” (Lomunu lẹ 12:15) ‘Awuvẹmẹ’ didohia sọgan yinuwado mẹlọ ji. (1 Pita 3:8) Eyin e mọdọ mí hò etọn pọ́n, e sọgan yin whinwhàn nado dotoaina nuhe mí jlo na dọ.
6, 7. Naegbọn mí dona pà ahundoponọ he kàn kanbiọ sinai do Biblu ji he to tuklado e de sè?
6 Awetọ, mí sọgan pà ahundoponọ lọ na kanbiọ etọn. Mẹdelẹ lẹndọ kanbiọ mọnkọtọn he nọ duahunmẹna yé lẹ dohia dọ yé ma yí Jiwheyẹwhe sè kavi tindo sisi na ẹn. Sinsẹ̀ngán de tlẹ sọgan ko dọ ehe na yé. Ṣigba, e ma yinmọ dandan gba. Na nugbo tọn, nugbonọ he nọgbẹ̀ to ojlẹ Biblu tọn mẹ lẹ kàn kanbiọ mọnkọtọn lẹ sè pọ́n. Di apajlẹ, psalm-kàntọ Davidi kanse dọmọ: “OKLUNỌ E, etẹwutu wẹ hiẹ do ṣite to olá boboe? Etẹwutu wẹ hiẹ sọ dewe whla to nukunbibia whenu?” (Psalm 10:1) Mọdopolọ, yẹwhegán Habbakuk kanse dọmọ: “OKLUNỌ E, nawẹ yẹn na dawhá dẹnsọ, bọ hiẹ ma na sè? Yẹn dawhá tọ́n hlan we sọn huhlọnnu mẹ, bọ hiẹ ma na whlẹngán gba. Etẹwutu wẹ hiẹ do ylanwa hia mi, bosọ hẹn mi nado pọ́n tasinyẹn? Na hẹngble po huhlọnnu po tin to nukọn ṣie: podọ nukọnwhlẹndomẹ tin finẹ, podọ nuwhlẹndomẹ sọ fọ́n daga.”—Habbakuk 1:2, 3.
7 Nugbonọ he tindo gbégbò daho na Jiwheyẹwhe wẹ sunnu ehelẹ yin. Be yé yin wiwọhẹ na kanbiọ he to ahunmẹduna yé mọnkọtọn lẹ kinkanse wutu wẹ ya? Lala. Kakatimọ, Jehovah hẹn ẹn diun dọ kanbiọ ahundopo tọn yetọn lẹ yin kinkàndai to Ohó etọn mẹ. To egbehe, mẹhe danuwiwa he gbayipe to tuklado taun de sọgan tin to huvẹ to gbigbọ-liho bo tindo ojlo vẹkuvẹku nado mọ gblọndo he sọgan yin mimọ to Biblu kẹdẹ mẹ lẹ. Flindọ Jesu pà mẹhe yin “wamọnọ lẹ to gbigbọ mẹ” kavi mẹhe nuhudo gbigbọmẹ tọn yetọn to ahunmẹduna lẹ. (Matiu 5:3) Lẹblanulọkẹyi nankọ die nado gọalọna omẹ mọnkọtọn lẹ nado mọ ayajẹ he Jesu dopagbe etọn!
8. Nuplọnmẹ agọ̀ tẹlẹ wẹ ko hẹn gbẹtọ lẹ yise dọ Jiwheyẹwhe wẹ hẹn yajiji wá, podọ nawẹ mí sọgan gọalọna yé gbọn?
8 Atọ̀ntọ, e sọgan biọ dọ mí ni gọalọna mẹlọ nado yọnẹn dọ e ma yin Jiwheyẹwhe wẹ hẹn danuwiwa he gbayipe to aihọn mẹ wá. Mẹsusu ko yin pinplọn dọ Jiwheyẹwhe wẹ to gandu do aihọn he mẹ mí tin te ehe ji, dọ Jiwheyẹwhe ko kàn nuhe to jijọ do mí go lẹpo dai jẹnukọn, podọ e tindo whẹwhinwhẹ́n dabla he doglẹ lẹ na awufiẹsa hinhẹnwa gbẹtọvi lẹ ji. Nuplọnmẹ ehelẹ ma sọgbe. Yé de yẹyi sọn Jiwheyẹwhe go bo do e hia taidi asisa danuwiwa po yajiji he tin to aihọn mẹ po tọn. Enẹwutu e sọgan biọ dọ mí ni yí Ohó Jiwheyẹwhe tọn zan nado didẹ whẹho mọnkọtọn lẹ. (2 Timoti 3:16) E ma yin Jehovah wẹ to gandu do aihọn he gblezọn ehe ji gba; Satani Lẹgba wẹ. (1 Johanu 5:19) Jehovah ma nọ kàn nuhe na jọ do nudida nuyọnẹntọ etọn lẹ go dai jẹnukọn gba; e na dopodopo yetọn mẹdekannujẹ po dotẹnmẹ hundote po nado de dagbe kavi oylan. (Deutelonomi 30:19) Podọ Jehovah ma yin asisa danuwiwa tọn pọ́n gbede; e gbẹwanna danuwiwa bosọ nọ hò mẹhe to oyà mawadodo tọn ji lẹ tọn pọ́n.—Job 34:10; Howhinwhẹn lẹ 6:16-19; 1 Pita 5:7.
9. Azọ́nwanu tẹlẹ wẹ “afanumẹ nugbonọ, nuyọnẹntọ” lọ ko wleawuna nado sọgan gọalọna gbẹtọ lẹ nado yọ́n nuhewutu Jehovah Jiwheyẹwhe jotẹnna yajiji?
9 To whenuena hiẹ ko ze dodonu mọnkọtọn lẹ dai, hiẹ sọgan mọdọ hosetọ towe ko wleawufo nado yọ́n nuhewutu Jiwheyẹwhe jotẹnna yajiji nado zindonukọn. Nado gọalọna we, “afanumẹ nugbonọ, nuyọnẹntọ” lọ ko wleawuna azọ́nwanu susu lẹ. (Matiu 24:45-47) Di dohia, to Plidopọ Agbegbe “Tonusisena Jiwheyẹwhe” 2005/06 tọn, alọnuwe pẹvi de he hosọ etọn yin Opodo Yajiji Lẹpo Tọn Ko Sẹpọ! yin didetọn. Mí na tuli we nado jẹakọ hẹ nuhe e bẹhẹn lẹ. Mọdopolọ, weta blebu dopo to owe lọ Etẹwẹ Biblu Plọn Mí Taun?, he tin-to-aimẹ todin to ogbè 157 mẹ, dọhodo kanbiọ titengbe ehe ji. Yí azọ́nwanu ehelẹ zan ganji. Yé basi zẹẹmẹ gigọ́ nujijọ voovo he hẹn whẹho nupojipetọ-yinyin wẹkẹ tọn he yin finfọndote to Edẹni mẹ wá tọn bo dọ nuhewutu Jehovah didẹ whẹho lọ dile e wà do sọgbe hẹ nuhe yin mimọ to Biblu mẹ. Sọ flindọ dile hiẹ to hodọdo whẹho ehe ji, hiẹ to oyọnẹn titengbe hugan he sọgan yin tintindo dohia hosetọ towe. Ehe wẹ oyọnẹn Jehovah tọn po jẹhẹnu jiawu etọn lẹ po tọn.
Zinnudo Jẹhẹnu Jehovah Tọn lẹ Ji
10. Etẹwẹ mẹsusu nọ mọ taidi nuhe vẹawu nado mọnukunnujẹemẹ gando nuhewutu Jiwheyẹwhe jotẹnna yajiji go, podọ oyọnẹn tẹwẹ sọgan gọalọna yé?
10 Dile hiẹ to alọgọna mẹdevo lẹ nado mọnukunnujẹ nuhewutu Jehovah jotẹnna gbẹtọ lẹ nado dugán do yede ji to anademẹ Satani tọn glọ mẹ, tẹnpọn nado dọ̀n ayidonugo wá jẹhẹnu jiawu Jehovah tọn lẹ ji. Mẹsusu yọnẹn dọ Jiwheyẹwhe tindo huhlọn na yé nọ sè bọ mẹdevo lẹ nọ ylọ ẹ dọ Jiwheyẹwhe Ganhunupotọ wutu. Ṣigba, yé sọgan mọ ẹn taidi nuhe vẹawu nado mọnukunnujẹ nuhewutu e ma yí huhlọn daho etọn zan nado doalọtena mawadodo po yajiji po to afọdopolọji mẹ. Vlavo ehe yinmọ na yé ma yọ́n jẹhẹnu Jehovah tọn devo lẹ, taidi wiwe-yinyin, whẹdida dodo, nuyọnẹn, po owanyi etọn po. Jehovah nọ do jẹhẹnu ehelẹ hia to aliho pipé he tin to jlẹkaji de mẹ. Abajọ Biblu dọmọ: “Pipé wẹ azọ́n etọn.” (Deutelonomi 32:4) Nawẹ hiẹ sọgan zinnudo jẹhẹnu ehelẹ ji to whenuena a to gblọndo na kanbiọ he nọ saba yin kinkanse do whẹho ehe ji lẹ gbọn? Mì gbọ mí ni gbadopọnna apajlẹ kleun delẹ.
11, 12. (a) Naegbọn Adam po Evi po ma sọgan yin jijona poun to whenuena yé waylando? (b) Naegbọn Jehovah ma na jotẹnna ylando nado zindonukọn kakadoi?
11 Be Jehovah sọgan ko jona Adam po Evi po poun wẹ ya? Yọnbasi jona tọn depope ma tin to whẹho ehe mẹ gba. Taidi gbẹtọ pipé lẹ, Adam po Evi po basi nudide sọn ojlo mẹ wá nado gbẹ́ nupojipetọ-yinyin Jehovah tọn dai bo kẹalọyi anademẹ Satani tọn. Abajọ atẹṣitọ lọ lẹ ma do lẹnvọjọ depope hia. Nalete, to whenuena gbẹtọ lẹ kàn nuhewutu yé ma do yin jijona sè, yé sọgan ko to nulẹnpọndo nuhewutu Jehovah ma de nubiọtomẹsi etọn lẹ pò bo kẹalọyi ylando po atẹṣiṣi po poun ji. Gblọndo lọ tindo kanṣiṣa hẹ jẹhẹnu de he nọ do omẹ nankọ he Jehovah yin hia—yèdọ wiwe-yinyin etọn.—Eksọdusi 28:36; 39:30.
12 Biblu zinnudo wiwe-yinyin Jehovah tọn ji whlasusu. Ṣigba e blawu dọ omẹ vude wẹ yọ́n jẹhẹnu enẹ to aihọn gblezọn ehe mẹ. Jehovah yin omẹ wiwe ṣeke he ma tindo dihó, podọ onú ylankan lẹpo wẹ dẹn do e. (Isaia 6:3; 59:2) Na nuhe dù ylando, e ko wleawu aliho de tọn nado basi ovẹsè na ẹn bo de e sẹ̀ mlẹnmlẹn; e ma na jotẹnna ylando nado zindonukọn kakadoi. Eyin Jehovah ma ko tindo linlẹn enẹ wẹ, mí ma na tindo todido depope na sọgodo. (Howhinwhẹn lẹ 14:12) To ojlẹ sisọ etọn mẹ, Jehovah na hẹn nudida etọn lẹpo gọwá ninọmẹ wiwe de mẹ. Ayihaawe ma tin gando enẹ go, na ojlo Omẹ Wiwe lọ tọn wẹ e yin.
13, 14. Naegbọn Jehovah de ma nado và atẹṣitọ lọ lẹ sudo to Edẹni?
13 Be Jehovah sọgan ko và atẹṣitọ lọ lẹ sudo poun to Edẹni bo dá mẹdevo lẹ ya? Na nugbo tọn, e tindo huhlọn nado wàmọ; to madẹnmẹ e na yí huhlọn enẹ zan nado và mẹylankan lẹpo sudo. Ṣigba mẹdelẹ sọgan kanse dọ, ‘Naegbọn e ma wàmọ to whenuena ylanwatọ atọ̀n poun tin to wẹkẹ lọ mẹ? Be ylanwiwa he gbayipe—podọ yajiji he mí nọ mọ to aihọn lọ mẹ lẹpo—ma na ko yin aliglọnna ya?’ Naegbọn Jehovah ma yinuwa to aliho enẹ mẹ? Deutelonomi 32:4 dọmọ: “Whẹdida [dodo] wẹ ali etọn lẹpo.” Whẹdida dodo nọ duahunmẹna Jehovah taun. Na nugbo tọn, “OKLUNỌ yiwanna whẹdida [dodo].” (Psalm 37:28) Na Jehovah yiwanna whẹdida dodo wutu, e de ma nado và atẹṣitọ lọ lẹ sudo to Edẹni. Etẹwutu?
14 Atẹṣiṣi Satani tọn fọ́n ayihaawe dote gando jlọjẹ Jiwheyẹwhe tọn nado yin nupojipetọ go. Whẹdida dodo Jehovah tọn biọ dọ avùnnukundiọsọmẹ Satani tọn ni yin gblọndona to aliho dodo tọn mẹ. Atẹṣitọ lọ lẹ hùhù to afọdopolọji, dile etlẹ yindọ nuhe yé jẹna niyẹn, ma na ko na gblọndo mọnkọtọn. Ehe wiwà na do kunnudenu hia yinukọn dogọ dọ huhlọn Jehovah tọn wẹ yiaga hugan, ṣigba whẹho lọ ma gando huhlọn etọn go gba. Humọ, Jehovah ko dọ lẹndai etọn na Adam po Evi po. Yé dona tindo ovi lẹ bo gọ́ aigba ji bosọ dugán do e ji, podọ nudida aigba ji tọn lẹpo dona tin to anademẹ yetọn glọ. (Gẹnẹsisi 1:28) Eyin Jehovah ko và Adam po Evi po sudo poun wẹ, lẹndai etọn he e dọ gando gbẹtọvi lẹ go na ko lẹzun osin-bado-pápá-nẹgbé. Whẹdida dodo Jehovah tọn ma na dike whẹho lọ ni yì domọ gbede, na lẹndai etọn nọ mọ hẹndi to whepoponu.—Isaia 55:10, 11.
15, 16. To whenuena gbẹtọ lẹ dọ aliho he yé lẹndọ e yọ́n hugan nado didẹ whẹho he fọndote to Edẹni, nawẹ mí sọgan penugo bo gọalọna yé gbọn?
15 Be mẹde tin to aihọn mẹ he sọgan didẹ whẹho lọ po nuyọnẹn po hugan Jehovah ya? Mẹdelẹ sọgan dọ linlẹn yetọn gando nuhe dona yin wiwà nado didẹ whẹho atẹṣiṣi tọn he wá aimẹ to Edẹni go. Nalete, be mọwiwà ma na dohia dọ yé sọgan dọ aliho dagbe hugan he mẹ whẹho lọ sọgan yin dididẹ te lẹ ya? Yé sọgan nọma wà ehe po mẹwhinwhàn ylankan po, ṣigba yé ma tindo nukunnumọjẹnumẹ gando Jehovah po nuyọnẹn jiawu etọn po go gba. To whenuena apọsteli Paulu to wekanhlan Klistiani he tin to Lomu lẹ, e basi zẹẹmẹ gigọ́ do nuyọnẹn Jiwheyẹwhe tọn ji, ehe bẹ “nudabla” kavi aṣli wiwe lọ hẹn gando lẹndai Jehovah tọn nado yí Ahọluduta Mẹssia tọn zan nado fli gbẹtọvi nugbonọ lẹ bo klan yinkọ gigonọ Etọn do wiwe go. Etẹwẹ yin numọtolanmẹ Paulu tọn gando nuyọnẹn Jiwheyẹwhe he wleawu lẹndai ehe tọn go? Apọsteli lọ dotana wekanhlanmẹ etọn po hogbe ehelẹ po dọmọ: “Hlan Jiwheyẹwhe nuyọnẹntọ dopo lọ, gbọn Jesu Klisti mẹ, mẹhe gigo tin hlan kakadoi. Niṣẹ.”—Lomunu lẹ 11:25; 16:25-27.
16 Paulu mọnukunnujẹemẹ dọ Jehovah wẹ “nuyọnẹntọ dopo lọ”—yèdọ nuyọnẹntọ daho hugan to wẹkẹ lọ mẹ. Gbẹtọ mapenọ tẹwẹ sọgan dọ aliho dagbe hugan he mẹ nude na yin dididẹ te—nẹmunẹmu wẹ avùnnukundiọsọmẹ sinsinyẹn he yin finfọndote sọta jlọjẹ Jiwheyẹwhe tọn nado yin nupojipetọ wẹkẹ lọ tọn? Enẹwutu, mí dona gọalọna gbẹtọ lẹ nado tindo numọtolanmẹ dopolọ he mí tindo na Jiwheyẹwhe he yin ‘nuyọnẹntọ to ayiha mẹ.’ (Job 9:4) Lehe mí mọnukunnujẹ nuyọnẹn Jehovah tọn mẹ sọ, mọ wẹ mí na deji mlẹnmlẹn dogọ do dọ aliho he mẹ ewọ nọ didẹ whẹho lẹ te wẹ yọ́n hugan.—Howhinwhẹn lẹ 3:5, 6.
Nukunnumimọjẹ Jẹhẹnu Titengbe Hugan Jehovah Tọn Mẹ
17. Nawẹ nukunnumimọjẹ owanyi Jehovah tọn mẹ sọgan gọalọna mẹhe nọ yin tuklado na dotẹnmẹ he Jiwheyẹwhe jodona yajiji wutu lẹ gbọn?
17 “Jiwheyẹwhe wẹ owanyi.” (1 Johanu 4:8) Po hogbe he whànmẹ enẹlẹ po, Biblu do jẹhẹnu titengbe hugan Jehovah tọn hia, yèdọ jẹhẹnu he fọnjlodotenamẹ hugan dehe pò lẹpo bosọ yin homẹmiọnnamẹnu hugan na mẹhe danuwiwa he gbayipe to tuklado lẹ. Jehovah ko do owanyi hia to aliho he mẹ e didẹ nugandomẹgo ylankan ylando tọn he yin hinhẹnwa nudida etọn ji te lẹpo. Owanyi whàn Jehovah nado na todido ovivi ylandonọ Adam po Evi po tọn lẹ bo hùn dotẹnmẹ dotena yé nado dọnsẹpọ Ẹ bo wleawuna haṣinṣan dagbe de hẹ Ẹ. Owanyi whàn Jiwheyẹwhe nado wleawuna ofligọ he na hẹn ẹn yọnbasi nado mọ jona ylando mítọn lẹ tọn yí bo duvivi ogbẹ̀ madopodo tọn to pipé mẹ. (Johanu 3:16) Podọ owanyi sọ whàn ẹn nado sinyẹnlin hẹ gbẹtọvi lẹ bo na dotẹnmẹ mẹsusu dile e sọgan yọnbasi do nado gbẹ́ Satani dai bo kẹalọyi Jehovah taidi Nupojipetọ yetọn.—2 Pita 3:9.
18. Nukunnumọjẹnumẹ tẹwẹ mí tindo lẹblanulọkẹyi nado tindo, podọ etẹwẹ mí na gbadopọnna to hosọ he bọdego mẹ?
18 To whenuena nukọntọ sinsẹ̀n tọn de to hodọna mẹhe plidopọ lẹ nado basi hùnwhẹ oflin nujijọ ylankan nukunbianamẹ tọn de, e dọmọ: “Mí ma yọ́n nuhewutu Jiwheyẹwhe jotẹnna danuwiwa po yajiji po nado zindonukọn gba.” Lehe e blawu do sọ! Be e ma yin ayajẹnu wẹ e yin dọ míwlẹ mọnukunnujẹ whẹho ehe mẹ ganji ya? (Deutelonomi 29:29) Podọ na Jehovah yin nuyọnẹntọ, dodonọ po owanyinọ po wutu, mí yọnẹn dọ ewọ na doalọtena yajiji lẹpo to madẹnmẹ. Na nugbo tọn, e ko dopagbe nado wàmọ. (Osọhia 21:3, 4) Ṣigba, todido tẹwẹ tin na mẹhe ko kú to whenuho gblamẹ lẹpo? Be aliho he mẹ Jehovah penukundo whẹho he fọ́n to Edẹni go te jo yé do matin todido depope wẹ ya? Lala. Owanyi ko whàn ẹn nado basi tito de na yelọsu ga—yèdọ fọnsọnku. Enẹ ji wẹ mí na dọhodo to hosọ he bọdego mẹ.
Nawẹ Hiẹ Na Na Gblọndo Gbọn?
• Etẹwẹ mí sọgan dọna mẹhe kàn nuhewutu Jiwheyẹwhe jotẹnna yajiji sè?
• Nawẹ aliho he mẹ Jehovah yinuwa hẹ atẹṣitọ lọ lẹ te to Edẹni do wiwe-yinyin po whẹdida dodo etọn po hia gbọn?
• Naegbọn mí dona gọalọna gbẹtọ lẹ nado tindo nukunnumọjẹnumẹ dagbe gando owanyi Jehovah tọn go?
[Yẹdide to weda 21]
Dín aliho nado gọalọna mẹhe yajiji he to aihọn lọ mẹ to tuklado lẹ
[Yẹdide to weda 23]
Davidi po Habbakuk po he yin nugbonọ kàn kanbiọ ahundopo tọn lẹ sè Jiwheyẹwhe