Afọdidona Gbigbọnọ-Yinyin

TO YẸWHEHODIDỌ diyin Osó ji tọn etọn mẹ, Jesu dọmọ: “Ayajẹnọ wẹ mẹhe yọnẹn dọ yé tindo nuhudo gbigbọmẹ tọn lẹ.” (Matiu 5:3, Traduction du monde nouveau) Vlavo hiẹ kọngbedopọ hẹ hodidọ enẹ. Gbẹtọ lẹ to filẹpo wẹ yọnẹn dọ yé tindo nuhudo gbigbọnọ-yinyin tọn to gbẹzan yetọn mẹ bo nọ lẹndọ eyin yé ko gbẹ́ jẹ e kọ̀n, e na hẹn ayajẹ wá na yé. Ṣigba etẹwẹ hogbe lọ “gbigbọnọ-yinyin” zẹẹmẹdo?

Wezẹhomẹ dopo basi zẹẹmẹ gbigbọnọ-yinyin tọn taidi “numọtolanmẹ tintindo na nujinọtedo sinsẹ̀n tọn lẹ kavi titẹdo yé go” podọ “jẹhẹnu kavi ninọmẹ mẹhe yin gbigbọnọ tọn.” To hogbe devo mẹ, mẹhe tindo ojlo vẹkuvẹku na nujinọtedo gbigbọmẹ tọn lẹ kavi na yanwle sinsẹ̀n tọn lẹ wẹ nọ yin yiylọ dọ gbẹtọ gbigbọnọ.

To whelọnu lo, nawẹ mí sọgan jẹ gbigbọnọ-yinyin nujọnu tọn kọ̀n gbọn? Nalete, diblayin sinsẹ̀n lẹpo wẹ nọ sọalọakọ́n nado yọ́n lehe mẹde sọgan yin gbigbọnọ do. Ṣigba, lehe sinsẹ̀n lẹ sù sọ mọ wẹ anademẹ yetọn lẹ sù bosọ gbọnvo do niyẹn. Mẹhe yin Plọtẹstant nọ sọalọakọ́n dọ emi na mọ whlẹngán gbọn opli zodolanmẹnamẹ tọn de yìyì dali. Mẹhe yin Katoliki nọ dín haṣinṣan pẹkipẹki hẹ Jiwheyẹwhe gbọn Amísa yìyì dali. Bouddha-sẹ̀ntọ nọ doafọna nukunnumọjẹnumẹ gbọn ayihamẹlinlẹnpọn dali. Sinsẹ̀nnọ Hindou de nọ tẹnpọn nado mọ tundote yí sọn vọji mapote mẹ gbọn mẹdetiti-mimọ́n dali. Be anademẹ ehe lẹpo wẹ nọ planmẹ jẹ gbigbọnọ-yinyin nujọnu tọn kọ̀n ya? Be depope to yé mẹ tlẹ nọ hẹnmẹ jẹ e kọ̀n ya?

Na mẹsusu, gblọndo na kanbiọ enẹlẹ wẹ lala. Linlẹn yetọn wẹ yindọ gbigbọnọ-yinyin zẹẹmẹdo nado yise to yẹwhe de mẹ ganṣo bo ma yin apadewhe ṣọṣi de tọn. Mẹdevo lẹ nọ dọ dọ gbigbọnọ-yinyin ma dlẹnalọdo numimọ sinsẹ̀n tọn gba, adavo ojlo lọ nado tindo jijọho ahun mẹ tọn gọna lẹndai to gbẹ̀mẹ. Yé nọ sọalọakọ́n dọ e ma yin dandan nado lẹhlan sinsẹ̀n whẹpo do yin gbigbọnọ. Kakatimọ, nuhe yin dandannu lọ poun wẹ nado yọ́n gbẹtọ-yinyin homẹ tọn yetọn, yèdọ numọtolanmẹ sisosiso yetọn lẹ. Wekantọ de dọmọ: “Gbigbọnọ-yinyin nugbo yin nude he tin to ohò mẹde tọn mẹ dọ́n. Aliho he mẹ hiẹ nọ do owanyi hia bo nọ kẹalọyi bosọ nọ yinuwa hẹ aihọn po mẹhe lẹdo we lẹ po te wẹ e yin. E ma sọgan yin mimọ to ṣọṣi de mẹ kavi gbọn yise tintindo to nuplọnmẹ sinsẹ̀n de tọn mẹ dali gba.”

E họnwun dọ pọndohlan voovo wẹ gbẹtọ lẹ tindo gando gbigbọnọ-yinyin go. Owe fọtọ́n susu lẹ wẹ nọ sọalọakọ́n nado do aliho he hẹnmẹ yì gbigbọnọ-yinyin kọ̀n hia, ṣogan yé nọ saba dọ̀n wehiatọ lẹ biọ bẹwlu mẹ bo ma nọ hẹn pekọwana yé. Ṣigba, owe de tin he bẹ anademẹ dejidego lẹ hẹn gando gbigbọnu lẹ go. Owe he do ede hia nado yin gbingbọ́n sọn Jiwheyẹwhe dè lọ wẹ. (2 Timoti 3:16) Mì gbọ mí ni gbadopọnna nuhe owe enẹ, yèdọ Biblu dọ gando zẹẹmẹ po ale gbigbọnọ-yinyin tọn po go.

[Asisa Yẹdide tọn to weda 2]

COVER: Background: © Mark Hamblin/age fotostock