Sẹyì Hinhọ́n Nù

MIYỌNHỌ̀ he nọ deanana bato-kùntọ lẹ ko whlẹn ogbẹ̀ madosọha lẹ gán. Ṣigba, na gbejizọnlinzintọ he onú ko ṣikọna de, hinhọ́n he yin mimọ hlan olá nọ wà nususu hugan avase nina gando osé owùnọ he sọgan yin mimọ to tọji lẹ go poun. E sọ nọ dohia dọ e ko sẹpọ fihe e jei. Mọdopolọ to egbehe, Klistiani lẹ to sisẹpọ vivọnu gbejizọnlin gaa he yé ko zìn gbọ̀n aihọn owùnọ he dózin to gbigbọ-liho lọ mẹ. To Biblu mẹ, gbẹtọvi lẹ to paa mẹ—yèdọ mẹhe jẹla na Jiwheyẹwhe lẹ—yin yiyijlẹdo “ohù wuwlu [go], whenuena e ma sọgan gbọjẹ, ehe osin etọn to ogbọ̀n po dihó po tunjẹgbonu.” (Isaia 57:20) Omẹ mọnkọtọn lẹ ṣẹnṣẹn wẹ omẹ Jiwheyẹwhe tọn lẹ tin te. Etomọṣo, yé tindo todido ayajẹ tọn na whlẹngán he yin hinhọ́n yẹhiadonu tọn he go yé ganjẹ. (Mika 7:8) Na alọgọ Jehovah po Ohó etọn po tọn wutu, ‘hinhọ́n ko tá jẹgbonu na dodonọ lẹ, podọ homẹhun na tenọglinọ to ayiha mẹ lẹ.’—Psalm 97:11.a

Nalete, Klistiani delẹ ko na dotẹnmẹ ayihafẹsẹnamẹnu lẹ nado dọ̀n yé sọn hinhọ́n Jehovah tọn nù sọmọ bọ yise yetọn ko yin huhusudo taidi tọjihun he siọ to whenuena e gbà do nuhe mí sọgan yijlẹdo osé whiwhla lẹ go—enẹ wẹ ojlo agbasanu lẹ tọn, fẹnnuwiwa, kavi atẹṣiṣi. Mọwẹ, dile e jọ to owhe kanweko tintan whenu do, to egbehe ‘yise mẹdelẹ tọn ko yin huhusudo taidi tọjihun he siọ.’ (1 Timoti 1:19; 2 Pita 2:13-15, 20-22) Bato-glintẹn he mí jei lọ sọgan yin yiyijlẹdo aihọn yọyọ lọ go. Na mí ko tin to bẹbẹnu etọn wutu, nugbajẹmẹji nankọ die e na yin nado hẹn nukundagbe Jehovah tọn bu!

Dapana Húnsiọmẹ Gbigbọmẹ Tọn

To owhe kanweko he wayi lẹ gblamẹ, bato de sọgan zingbejizọnlin gbọ̀n ohù daho gblagada de ji awuyẹyẹ-afọyẹyẹ bo na wá gbà to whenuena e sẹpọ agé. Whlasusu, adà gbejizọnlin lọ tọn he gọ́ na owù hugan nọ sọawuhia dile bato lọ to sisẹpọ agé. Mọdopolọ na mẹsusu, ‘azán godo’ titonu ylankan ehe tọn lẹ wẹ ojlẹ he gọ́ na owù hugan to whenuho gbẹtọvi tọn mẹ. Po gbesisọ po, Biblu basi zẹẹmẹ ehelẹ tọn taidi ojlẹ “awusinyẹn” tọn lẹ, titengbe na Klistiani he ko klan yede do wiwe lẹ.—2 Timoti 3:1-5.

Naegbọn azán godo tọn ehelẹ sinyẹnawu sọmọ? Na Satani yọnẹn dọ “whenu gli de” wẹ pò na ẹn nado funawhàn sọta omẹ Jiwheyẹwhe tọn lẹ. Enẹwutu, e ko hẹn nujijla ylankan etọn sinyẹn deji nado hù yise yetọn sudo. (Osọhia 12:12, 17) Etomọṣo, mí ma nọma tindo alọgọtọ po anademẹtọ po. Jehovah gbẹ́ yin fibẹtado de na mẹhe nọ setonuna ayinamẹ etọn lẹ. (2 Samuẹli 22:31) E ko na mí apajlẹ avase tọn lẹ he hùngona ayiha wintinwintin ylankan Satani tọn lẹ. Todin, mì gbọ mí ni gbadopọnna apajlẹ mọnkọtọn awe gando akọta Islaeli tọn go dile yé dọnsẹpọ Aigba Pagbe tọn lọ.—1 Kọlintinu lẹ 10:11; 2 Kọlintinu lẹ 2:11.

Sẹpọ Aigba Pagbe Tọn

To anademẹ Mose tọn glọ, Islaelivi lẹ penugo nado tọ́nsọn Egipti. To ojlẹ vude godo, yé dọnsẹpọ dogbó hùwaji Aigba Pagbe lọ tọn. Todin Mose do sunnu 12 hlan nado bẹ̀ aigba lọ pọ́n. Amẹ́ ao he ma tindo yise lẹ hẹn linlin ylankan lẹkọ bo dọ dọ Islaeli ma sọgan gbawhàn Kenaninu lẹ tọn na yé yin omẹ he “klo bo tọ́nalùn” bosọ sinyẹn to awhàn mẹ wutu. Nawẹ enẹ yinuwado Islaelivi lẹ ji gbọn? Kandai lọ dọna mí dọ yé jẹ hùnhlún do Mose po Aalọn po go ji dọmọ: “Etẹwutu wẹ OKLUNỌ lọ hẹn mí wá jẹ aigba he ji, nado jai gbọn ohí lọ dali? Asi mítọn lẹ po omẹ flinflin mítọn lẹ po na yin ogblànnu de: . . . Mì gbọ mí ni basi awhàngán de, bo gbọ mí ni lẹgọ do Egipti.”—Osọha lẹ 13:1, 2, 28-32; 14:1-4.

Pọ́n bo! Omẹ ehelẹ dopolọ ko mọ bọ Jehovah dowinyan Egipti huhlọnnọ—yèdọ huhlọn aihọn tọn whenẹnu tọn—gbọn azọ̀nylankan mẹhusudo tọn ao po azọ́njiawu dobu lẹ po to Ohù Vẹẹ mẹ dali. Podọ yé ko to Aigba Pagbe tọn lọ pọnhlan, enẹwutu nuhe yé dona wà lẹpo ma hugan nado sẹ̀ jẹ finẹ kẹdẹdile bato de nọ sẹyì hinhọ́n he nọ dohiagona bato-glintẹn de nù do. Ṣogan, linlẹn yetọn wẹ yindọ Jehovah ma sọgan gbawhàn tòdaho flinflin Kenani tọn lẹ. Lehe nuyiwa yise matindo tọn ehe dona ko vẹna Jiwheyẹwhe gọna amẹ́ awe lọ lẹ, Jọṣua po Kalẹbu po he pọ́n Kenani hlan taidi “akla” na Islaeli do sọ! Yé omẹ awe lẹ tindo nudọnamẹ dejidego na yé ko zinzọnlin gbọ̀n aigba Kenani tọn blebu ji wutu. To whenuena akọta lọ ma biọ Aigba Pagbe tọn lọ mẹ, Jọṣua po Kalẹbu po lọsu dona salèlè na owhe susu lẹ to zungbo mẹ, ṣigba yé ma kú do finẹ to pọmẹ hẹ yise matindonọ lọ lẹ gba. Na nugbo tọn, Jọṣua po Kalẹbu po plan whẹndo he bọdego sọn zungbo lọ mẹ pànta Aigba Pagbe tọn lọ. (Osọha lẹ 14:9, 30) Todin, Islaeli na pehẹ whlepọn devo dile yé sọ dọnsẹpọ Aigba Pagbe tọn lọ. Nawẹ yé na yinuwa gbọn?

Balaki, Ahọlu Moabinu de tẹnpọn nado hodẹ̀do Islaeli gbọn Balaami he yin yẹwhegán lalo de gblamẹ. Ṣigba, Jehovah glọnalina sébibla lọ bo hẹn Balaami nado dona yé kakati nado hodẹ̀do yé. (Osọha lẹ 22:1-7; 24:10) Ehe ma hẹn Balaami gbọjọ gba, kakatimọ e wleawuna sébibla ylankan devo he na zọ́n bọ omẹ Jiwheyẹwhe tọn lẹ ma na penugo nado mọ aigba lọ yí. Gbọnna? Gbọn kiklọ yé biọ fẹnnuwiwa po sinsẹ̀n-bibasi Baali tọn po mẹ dali. Dile etlẹ yindọ sébibla gigẹdẹ ehe lọsu gboawupo to blebu mẹ, e doyẹklọ Islaelivi 24 000. Yé tindo kọndopọ zanhẹmẹ tọn hẹ yọnnu Moabi tọn lẹ bo kọnawudopọ to Baali-peọli sinsẹ̀n mẹ.—Osọha lẹ 25:1-9.

Lẹnnupọndo enẹ ji! Susu to Islaelivi enẹlẹ dopolọ mẹ ko mọ bọ Jehovah plan yé gbọ̀n “zungbo daho bosọ dobu” enẹ mẹ awuyẹyẹ-afọyẹyẹ. (Deutelonomi 1:19) Etomọṣo, to bẹbẹnu Aigba Pagbe tọn lọ ji, 24 000 sọn omẹ Jiwheyẹwhe tọn lẹ mẹ joawuna ojlo agbasalan tọn lẹ bo kú to alọ Jehovah tọn mẹ. Avase nankọ die ehe yin na devizọnwatọ Jiwheyẹwhe tọn lẹ to egbehe dile yé to dindọnsẹpọ Aigba Pagbe tọn he klohugan lọ!

To vivẹnudido godo tọn nado glọnalina devizọnwatọ egbezangbe tọn Jehovah tọn lẹ ma nado mọ ahọsumẹ yetọn yí mẹ, Satani ma tindo nuhudo ayiha wintinwintin yọyọ devo tọn lẹ gba. To nujijọ ayiha gigẹdẹ tọn he flin mí nuhe jọ to tintan whenu he Islaelivi lẹ dọnsẹpọ Aigba Pagbe tọn lọ mẹ, Satani nọ tẹnpọn whlasusu nado dobuna mí bo hẹn mí tindo ayihaawe, vlavo gbọn nukunvandomẹ, homẹkẹn kavi mẹṣanko dali. Klistiani delẹ ko joawuna obu mọnkọtọn. (Matiu 13:20, 21) Ayiha wintinwintin devo he e nọ saba yizan wẹ nado hẹn gbẹtọ lẹ gblezọn to walọyizan-liho. To whedelẹnu, mẹdelẹ he ko lìn biọ agun Klistiani tọn mẹ ko tẹnpọn nado hẹn mẹhe ma lodo to gbigbọ-liho, he ma to zọnlinzin po jide po to hinhọ́n Jiwheyẹwhe tọn mẹ lẹ gblezọn.—Juda 8, 12-16.

Na mẹhe whèwhín bosọ to aṣeji to gbigbọ-liho lẹ, walọyizan aihọn tọn he to doyi po awuyiya po yin kunnudenu huhlọnnọ gando todido matindo Satani tọn go. Mọwẹ, Satani yọnẹn dọ to madẹnmẹ alọ emitọn ma na plá devizọnwatọ nugbonọ Jiwheyẹwhe tọn lẹ ba. Enẹwutu, din wẹ ojlẹ lọ nado gbọṣi nukle to gbigbọ-liho sọta vivẹnudido Satani tọn lẹ.

Alọgọnamẹnu lẹ Nado Gbọṣi Nukle to Gbigbọ-Liho

Apọsteli Pita ylọ ohó dọdai Jiwheyẹwhe tọn dọ “miyọ́ngbán de he họ́n to ofi dózin de,” na e nọ gọalọna Klistiani lẹ nado mọnukunnujẹ hẹndi lẹndai Jiwheyẹwhe tọn tọn mẹ. (2 Pita 1:19-21) Mẹhe plọn nado yiwanna Ohó Jiwheyẹwhe tọn bo jo yede na ẹn nado to anadena yé zọnmii lẹ nọ mọdọ Jehovah na jlọ omọ́-liho yetọn. (Howhinwhẹn lẹ 3:5, 6) Pinpẹn-nutọn-yọnẹntọ mọnkọtọn lẹ nọ gọ́ na todido bo nọ “jihàn na homẹvivi ayiha tọn,” to whenuena mẹhe ma yọ́n Jehovah kavi he jo aliho etọn do lẹ nọ tindo “awubla ayiha tọn” bo nọ “wẹnhun na awubla gbigbọ tọn.” (Isaia 65:13, 14) Enẹwutu, gbọn Biblu pinplọn sọwhiwhe tọn po nuhe mí plọn lẹ yíyí do yizan mẹ po dali, mí sọgan zín nukun mítọn lẹ do todido dejidego mítọn ji gligli kakati nido yin do gbẹdudu ojlẹ gli aihọn ehe tọn lẹ ji.

Odẹ̀ nasọ gọalọna mí nado gbọṣi nukle to gbigbọ-liho. To whenuena Jesu to hodọ gando opodo aihọn ylankan ehe tọn go, e dọmọ: “Mì nọ họ́ mìde to osaa lẹpo, bo nọ basi ovẹvivẹ, na mì nido yínuglo nado họ̀ngán sọn onú helẹ pó mẹ he to na wá jọ, podọ nado ṣite to Ovi gbẹtọ tọn nukọn.” (Luku 21:34-36) Doayi hogbe lọ “ovẹvivẹ” he Jesu yizan go, yèdọ wunmẹ odẹ̀ ahundopo tọn de. Jesu yọnẹn dọ owù lọ tin to finẹ nado hẹn ogbẹ̀ mavọmavọ bu to ojlẹ awusinyẹn tọn ehe mẹ. Be odẹ̀ towe lẹ nọ do ojlo zogbe towe nado gbọṣi nukle ganji to gbigbọ-liho hia ya?

Mì dike mí wọn blo dọ adà gbejizọnlin mítọn tọn he gọ́ na owù hugan sọgan sọawuhia sẹpọ vivọnu gbejizọnlin lọ tọn. Enẹwutu, lehe e yin nujọnu ma nado de nukun sẹ̀ sọn hinhọ́n he sọgan plan mí yì whlẹngán kọ̀n do sọ.

Payi Hinhọ́n Oklọ Tọn lẹ Go

To ojlẹ de mẹ wayi he bato he yè nọ kẹ̀ alà na gbayipe te, owùnu tangan de nọ yin awuwlena gbọn danuwatọ he yiwanna zinvlu lẹ dali to whenuena e nọ vẹawuna bato-kùntọ lẹ nado mọ agé hlan. Danuwatọ ehelẹ sọgan tùn miyọ́ngbán lẹ do fie owù tin te gbọ̀n otọ̀ lọ tó nado sọgan klọ bato-kùntọ lẹ yì fihe ma jẹ. Taidi kọdetọn de, bato mẹhe yin kiklọ lẹ tọn sọgan gbà, agbàn yetọn sọgan yin finfin, podọ ogbẹ̀ lẹ sọgan yin hinhẹnbu.

Mọdopolọ, Satani he yin “angẹli hinhọ́n tọn” oklọ tọn jlo na hò haṣinṣan he omẹ Jiwheyẹwhe tọn lẹ tindo hẹ Ẹ yí. Lẹgba sọgan yí “apọsteli lalonọ” lẹ po “devizọnwatọ dodo tọn” atẹṣitọ lẹ po zan nado klọ mẹhe ma tin to aṣeji lẹ. (2 Kọlintinu lẹ 11:13-15) Ṣigba kẹdẹdile hinhọ́n oklọ tọn lẹ ma nọ yawu klọ bato-kùntọ numimọnọ he tin to aṣeji lẹ do, Klistiani “he gbọn linlẹn zinzan tọn dali yí nuyọnẹn yetọn do to dagbe po oylan po yọnẹn” lẹ ma nọ yin kiklọ gbọn mẹhe nọ ze nuplọnmẹ lalo po tamẹnuplọnmẹ ylankan lẹ po daga lẹ dali.—Heblu lẹ 5:14; Osọhia 2:2.

Bato-kùntọ lẹ nọ hẹn todohukanji miyọnhọ̀ he yé na mọ to aliji lẹ tọn. Todohukanji lọ nọ basi zẹẹmẹ nuhe dohiagona miyọnhọ̀ dopodopo po ohia vonọtaun etọn po tọn. Otanwe The World Book Encyclopedia dọmọ: “Bato-kùntọ lẹ nọ yọ́n miyọnhọ̀ wunmẹ he mọ hlan yé te—podọ fie yé tin te—gbọn ayidido nuhe dohiagona miyọnhọ̀ lọ go po todohukanji miyọnhọ̀ lẹ tọn pinpọ́n po dali.” Mọdopolọ, Ohó Jiwheyẹwhe tọn nọ gọalọna omẹ ahunjijlọnọ lẹ nado yọ́n sinsẹ̀n-bibasi nugbo lọ po mẹhe to afọdona ẹn lẹ po, titengbe to azán godo tọn ehelẹ mẹ whenuena Jehovah ko ze e yiaga tlala hú sinsẹ̀n lalo. (Isaia 2:2, 3; Malaki 3:18) Isaia 60:2, 3 do vogbingbọn he tin to sinsẹ̀n-bibasi nugbo po lalo po ṣẹnṣẹn hia hezeheze dọmọ: “Zinvlu ṣinyọ́n aigba ji, zinvlu gọ́ngọ́n ṣinyọ́n gbẹtọ lẹ: ṣigba OKLUNỌ na fọ́n to oji we, yè nasọ mọ gigo etọn to gowe. Kosi lẹ na wá hinhọ́n kọ̀n, podọ ahọlu lẹ do hinhọ́n zizẹ towe kọ̀n.”

Dile gbẹtọ livi susu sọn akọta lẹpo mẹ zindonukọn nado yin anadena gbọn hinhọ́n Jehovah tọn dali, yise yetọn ma na yin huhusudo sẹpọ adà vivọnu gbejizọnlin yetọn tọn gba. Kakatimọ, yé na zingbejizọnlin awuyẹyẹ-afọyẹyẹ gbọ̀n azán he pò na aihọn ylankan ehe lọ mẹ biọ bẹtẹn jijọho tọn aihọn yọyọ lọ tọn mẹ.

[Nudọnamẹ Odò Tọn]

[Yẹdide to weda 15]

Taidi bato-kùntọ lẹ, Klistiani lẹ nọ to aṣeji ma nado yin kiklọ gbọn hinhọ́n oklọ tọn lẹ dali