Nọ Dindona “Onú Sisosiso Jiwheyẹwhe Tọn Lẹ”
“Gbigbọ wẹ to dodinna onú lẹpo, mọwẹ, onú sisosiso Jiwheyẹwhe tọn lẹ.”—1 KỌLINTINU LẸ 2:10.
1. Etẹwẹ yin delẹ to nugbo Biblu tọn lẹ mẹ he nọ hẹn ayajẹ wá na Biblu plọntọ yọyọ de?
SUHUGAN mítọn to agun Klistiani tọn mẹ wẹ sọgan flin ayajẹ he mí tindo to whenuena mí ṣẹṣẹ mọ nugbo. Mí mọ nuhewutu oyín Jehovah tọn yin nujọnu, nuhewutu ewọ jotẹnna yajiji, nuhewutu mẹdelẹ na yì olọn mẹ, podọ nuhe sọgodo bẹhẹn na gbẹtọvi nugbonọ lẹ to paa mẹ. Mí sọgan ko nọ hia Biblu jẹnukọnna enẹ, ṣigba onú ehelẹ whlá do mí dile e yin do na suhugan gbẹtọvi lẹ tọn. Mí tin taidi mẹde he to nukunván do ohù mẹ nado pọ́n aṣapán whanpẹnọ lẹ. Matin alọgọ nuyizan de tọn, e ma sọgan mọ whanpẹ onú susugege he tin to ohù glọ lẹ tọn ganji. Ṣigba, po alọgọ gànnukun he nọ mọnú to ohù glọ kavi nuyizan devo de tọn po, homẹ etọn hùn tlala nado mọ aṣapán po whèvi whanpẹnọ lẹ po gọna nudida jiawu ohù mẹ tọn devo he e ma ko mọ pọ́n lẹ. Mọdopolọ, eyin mẹde jẹ alọgọna mí ji nado mọnukunnujẹ Owe-wiwe mẹ, mí nọ jẹ “onú sisosiso Jiwheyẹwhe tọn” he mí ma ko yọnẹn pọ́n lẹ mọ ji.—1 Kọlintinu lẹ 2:8-10.
2. Naegbọn ayajẹ he nọ wá sọn Ohó Jiwheyẹwhe tọn pinplọn mẹ sọgan gbọṣi aimẹ kakadoi?
2 Be nukunnumimọjẹ nugbo Biblu tọn delẹ mẹ poun dona ko pé mí wẹ ya? Hodidọ lọ “onú sisosiso Jiwheyẹwhe tọn lẹ” bẹ nukunnumimọjẹ nuyọnẹn Jiwheyẹwhe tọn mẹ hẹn, ehe yin didehia Klistiani lẹ gbọn gbigbọ wiwe gblamẹ ṣigba whlá do mẹdevo lẹ. (1 Kọlintinu lẹ 2:7) Nuyọnẹn Jiwheyẹwhe tọn ma tindo dogbó podọ lehe dodindinna aliho etọn lẹ sọgan hẹn ayajẹ wá na mí do sọ! Mí ma na penugo gbede nado yọ́n nulẹpo gando nuyọnẹn aliho Jiwheyẹwhe tọn lẹ tọn go. Ayajẹ he mí tindo to whenuena mí plọn nugbo dodonu Biblu tọn lẹ to tintan whenu sọgan gbọṣi aimẹ kakadoi eyin mí zindonukọn nado to dodinna “onú sisosiso Jiwheyẹwhe tọn lẹ” matin nuṣikọ.
3. Naegbọn e do yin nujọnu dọ mí ni mọnukunnujẹ dodonu nuyise mítọn lẹ tọn mẹ ganji?
3 Naegbọn e do yin nujọnu dọ mí ni mọnukunnujẹ “onú sisosiso” enẹlẹ mẹ? E ma yin nuhe mí yise lẹ kẹdẹ wẹ mí dona yọnẹn gba, ṣigba mí sọ dona yọ́n nuhewutu mí do yí yé sè—yèdọ dodonu nuyise mítọn lẹ tọn—na ehe nọ hẹn yise po jidide mítọn po lodo. Owe-wiwe dotuhomẹna mí nado yí ‘huhlọn nulẹnpọn tọn’ mítọn zan nado ‘mọdona nuhe ojlo Jiwheyẹwhe tọn he yọ́n, alọkẹyi, bosọ sọgbe nẹ yin.’ (Lomunu lẹ 12:1, 2) Nukunnumimọjẹ nuhewutu Jehovah biọ to mí si nado zan gbẹzan mítọn to aliho tangan de mẹ nọ hẹn gbemima mítọn lodo nado setonuna ẹn. Enẹwutu, oyọnẹn “onú sisosiso” lẹ tọn sọgan na mí huhlọn nado nọavunte sọta mẹtẹnpọn he sọgan hẹn mí gbà osẹ́n Jiwheyẹwhe tọn lẹ bo whàn mí nado lẹzun “vivẹnudotọ azọ́n dagbe lẹ tọn.”—Titu 2:14.
4. Etẹwẹ Biblu pinplọn bẹhẹn?
4 Nado mọnukunnujẹ onú sisosiso lẹ mẹ, mí dona plọnnu. Ṣigba, nupinplọn ma zẹẹmẹdo wehihia poun gba. E nọ biọ dọ mí ni yí sọwhiwhe do gbadopọnna nudọnamẹ lẹ nado mọ lehe yé gando nuhe mí ko yọnẹn dai lẹ go do. (2 Timoti 1:13) E zẹẹmẹdo nado tunwun whẹwhinwhẹ́n he nọgodona nudọnamẹ lọ lẹ go. Biblu pinplọn dona bẹ ayihamẹlinlẹnpọn do lehe mí sọgan yí nuhe mí plọn lẹ zan do ji nado basi nudide nuyọnẹn tọn lẹ podọ nado gọalọna mẹdevo lẹ hẹn. Humọ, na ‘Owe-wiwe lẹpo yin gbingbọ́n sọn Jiwheyẹwhe dè bosọ yin alenọ’ wutu, nupinplọn mítọn dona bẹ “ohó he tọ́nsọn onù Jiwheyẹwhe tọn mẹ lẹpo” hẹn. (2 Timoti 3:16, 17; Matiu 4:4) Biblu pinplọn sọgan biọ vivẹnudido vẹkuvẹku! Ṣigba, e sọ sọgan yin awuvivinu, podọ nukunnumimọjẹ “onú sisosiso Jiwheyẹwhe tọn lẹ” mẹ ma vẹawu sọmọ.
Jehovah Nọ Gọalọna Homẹmimiọnnọ lẹ Nado Tindo Nukunnumọjẹnumẹ
5. Mẹnu lẹ wẹ sọgan mọnukunnujẹ “onú sisosiso Jiwheyẹwhe tọn lẹ” mẹ?
5 Eyin hiẹ ma tlẹ sewé sọmọ bo masọ tindo aṣa nupinplọn tọn, ma lẹndọ hiẹ ma sọgan mọnukunnujẹ “onú sisosiso Jiwheyẹwhe tọn lẹ” mẹ blo. To lizọnyizọn Jesu tọn whenu to aigba ji, Jehovah de nukunnumọjẹnumẹ lẹndai Etọn tọn hia, e ma yin hlan nuyọnẹntọ po zinzintọ lẹ po gba, ṣigba hlan gbẹtọ wunvinọ he gbọagba nupinplọn tọn bo whiwhẹ yede nado yin pinplọn gbọn devizọnwatọ etọn dali lẹ. Eyin mí yí yé jlẹdo wesetọ lẹ go, yé taidi ovivu lẹ. (Matiu 11:25; Owalọ lẹ 4:13) Apọsteli Paulu wlanwe hlan yisenọ hatọ etọn lẹ gando “nuhe Jiwheyẹwhe wleawu etọn lẹ na yé he yiwanna ẹn lẹ” go dọmọ: “Jiwheyẹwhe ko de yé hia hlan míwlẹ gbọn [gbigbọ] etọn mẹ: na [gbigbọ] wẹ to dodinna onú lẹpo, mọwẹ, onú sisosiso Jiwheyẹwhe tọn lẹ.”—1 Kọlintinu lẹ 2:9, 10.
6. Etẹwẹ hogbe 1 Kọlintinu lẹ 2:10 tọn lẹ zẹẹmẹdo?
6 Nawẹ gbigbọ Jiwheyẹwhe tọn nọ dindona “onú lẹpo, [yèdọ] onú sisosiso Jiwheyẹwhe tọn lẹ” gbọn? Kakati nado de nugbo lọ hia Klistiani dopodopo, Jehovah nọ yí gbigbọ etọn zan nado deanana titobasinanu etọn, he nọ gọalọna omẹ Jiwheyẹwhe tọn he tin to kọndopọ mẹ lẹ nado mọnukunnujẹ Biblu mẹ. (Owalọ lẹ 20:28; Efesunu lẹ 4:3-6) Lẹdo aihọn pé, agun lẹpo nọ mọaleyi sọn tito-to-whinnu Biblu pinplọn tọn dopolọ mẹ. To owhe lẹ gblamẹ, yé nọ gbadopọnna nuplọnmẹ Biblu tọn lẹpo to gigọ́ mẹ. Gbigbọ wiwe nọ yinuwa gbọn agun lọ gblamẹ nado gọalọna gbẹtọ lẹ na yé nido wleawuna jẹhẹnu he yin dandan nado mọnukunnujẹ “onú sisosiso Jiwheyẹwhe tọn lẹ” mẹ.—Owalọ lẹ 5:32.
Nuhe “Onú Sisosiso Jiwheyẹwhe Tọn lẹ” Bẹhẹn
7. Naegbọn mẹsusu ma nọ mọnukunnujẹ “onú sisosiso Jiwheyẹwhe tọn lẹ” mẹ?
7 Mí ma dona lẹndọ nuhe vẹawu lẹ wẹ nọ yin yiylọdọ “onú sisosiso” lẹ dandan gba. Oyọnẹn “onú sisosiso Jiwheyẹwhe tọn lẹ” tọn dózin do suhugan gbẹtọ lẹ tọn, e ma yin na nuyọnẹn Jiwheyẹwhe tọn vẹawu nado mọnukunnujẹemẹ wutu wẹ gba, ṣigba na Satani nọ klọ gbẹtọ lẹ nado gbẹ́ alọgọ he Jehovah wleawuna gbọn titobasinanu Etọn gblamẹ dai wutu.—2 Kọlintinu lẹ 4:3, 4.
8. To wekanhlanmẹ etọn hlan Efesunu lẹ mẹ, onú sisosiso tẹlẹ wẹ Paulu dlẹnalọdo to weta atọ̀ntọ mẹ?
8 Weta atọ̀ntọ wekanhlanmẹ Paulu tọn hlan Efesunu lẹ dohia dọ “onú sisosiso Jiwheyẹwhe tọn lẹ” bẹ nugbo susu he suhugan omẹ Jehovah tọn lẹ tọn mọnukunnujẹemẹ ganji lẹ hẹn, taidi mẹhe yin Okún dopagbe lọ, lehe todido olọn mẹ tọn yin nina mẹdelẹ sọn gbẹtọvi lẹ mẹ do, po Ahọluduta Mẹssia tọn po. Paulu wlan dọmọ: “Yè ma ko sọ [aṣli ehe] hia ovi gbẹtọ tọn lẹ gbede to [whẹndo] devo lẹ mẹ, kẹdẹdile yè sọ yé hia dinvie hlan apọsteli etọn wiwe lẹ po yẹwhegán lẹ po to [gbigbọ] mẹ; na Kosi lẹ nido yin whédutọgbẹ́ po agbasa dopolọ tọn po, podọ mahẹtọ opagbe etọn tọn to Klisti mẹ.” Paulu dọ dọ emi yin azọ́ndena “nado hẹn gbẹtọ lẹpo mọ etẹwẹ kọndopọ nudabla tọn lọ, ehe yè sọ whlá to Jiwheyẹwhe . . . mẹ, sọn whenu lẹpo mẹ.”—Efesunu lẹ 3:5-9.
9. Etẹwutu e do yin lẹblanulọkẹyi de nado mọnukunnujẹ “onú sisosiso Jiwheyẹwhe tọn lẹ” mẹ?
9 Paulu zindonukọn nado basi zẹẹmẹ dọ ojlo Jiwheyẹwhe tọn sọ wẹ nado “hẹn nuyọnẹn hunkọhunkọ susugege Jiwheyẹwhe tọn zun yinyọnẹn . . . to otẹn olọn tọn lẹ . . . mẹ gbọn agun lọ mẹ.” (Efesunu lẹ 3:10) Angẹli lẹ nọ plọnnu sọn ayidido po nukunnumimọjẹ nuyọnẹn he tin to nuyiwa Jehovah tọn hẹ agun Klistiani tọn lẹ po mẹ. Lẹblanulọkẹyi nankọ die nado mọnukunnujẹ nuhe angẹli lẹ lọsu tlẹ tindo ojlona lẹ mẹ! (1 Pita 1:10-12) Enẹgodo, Paulu dọ dọ mí dona dovivẹnu nado “tunwun hẹ mẹwiwe lẹpo . . . nuhe gbigblo, tedidi, sisosiso po jiyiyi” yise Klistiani tọn po yin. (Efesunu lẹ 3:11, 18) Todin, mì gbọ mí ni lẹnnupọndo apajlẹ onú sisosiso tọn delẹ ji he sọgan yidogọna nukunnumọjẹnumẹ mítọn.
Apajlẹ Onú Sisosiso Delẹ Tọn
10, 11. Sọgbe hẹ Owe-wiwe, whetẹnu wẹ Jesu lẹzun adà tintan “okún” “yọnnu” olọnmẹ tọn Jiwheyẹwhe tọn?
10 Mí yọnẹn dọ Jesu wẹ adà tintan “okún” “yọnnu” olọnmẹ tọn Jiwheyẹwhe tọn he yin alọdlẹndo to Gẹnẹsisi 3:15 mẹ. Nado hẹn nukunnumọjẹnumẹ mítọn siso deji, mí sọgan kanse dọ: ‘Whetẹnu wẹ Jesu lẹzun Okún dopagbe lọ? Be jẹnukọnna aigba ji wiwá etọn wẹ ya, kavi jiji etọn whenu, baptẹm etọn whenu, kavi to fọnsọnku etọn godo?’
11 Jiwheyẹwhe dopagbe dọ adà olọnmẹ tọn titobasinanu etọn tọn, he yin alọdlẹndo to dọdai-liho taidi “yọnnu” etọn, na de okún de tọ́n he na só ota odàn lọ tọn. Ṣigba, owhe fọtọ́n susu juwayi bọ yọnnu Jiwheyẹwhe tọn ma de okún depope tọ́n he penugo nado và Satani po azọ́n etọn lẹ po sudo. Enẹwutu, dọdai Isaia tọn ylọ yọnnu lọ dọ “wẹnsinọ” podọ mẹhe “yè hẹn homẹgblena to gbigbọ mẹ.” (Isaia 54:1, 5, 6) To godo mẹ, Jesu yin jiji to Bẹtlẹhẹm. Ṣigba, kiki to baptẹm etọn godo, whenuena e yin dide gbọn gbigbọ dali nado lẹzun ovi gbigbọmẹ tọn Jiwheyẹwhe tọn, wẹ Jehovah lá dọmọ: “Ehe wẹ Visunnu ṣie.” (Matiu 3:17; Johanu 3:3) Adà tintan “okún” yọnnu lọ tọn ko sọawuhia lo. Enẹgodo, hodotọ Jesu tọn lẹ lọsu yin dide gbọn gbigbọ wiwe dali bo lẹzun ovi Jiwheyẹwhe tọn lẹ. “Yọnnu” Jehovah tọn, he ko mọ ede na ojlẹ dindẹn taidi yọnnu “he ma ji gbede,” sọgan “jihàn” ayajẹ tọn todin.—Isaia 54:1; Galatianu lẹ 3:29.
12, 13. Wefọ tẹlẹ wẹ dohia dọ Klistiani yiamisisadode lẹpo to aigba ji wẹ nọpọ́ bo yin “afanumẹ nugbonọ, nuyọnẹntọ” lọ?
12 Apajlẹ onú sisosiso lẹ tọn devo he ko yin didehia mí wẹ dehe gando lẹndai Jiwheyẹwhe tọn nado de omẹ 144 000 sọn gbẹtọvi lẹ mẹ go. (Osọhia 14:1, 4) Mí kẹalọyi nuplọnmẹ lọ dọ mẹyiamisisadode he to gbẹnọ to ojlẹ tangan de mẹ to aigba ji lẹpo wẹ nọpọ́ do yin “afanumẹ nugbonọ, nuyọnẹntọ” he Jesu dọ dọ e na na “núdùdù” whédo etọn to osaa sisọ mẹ. (Matiu 24:45) Wefọ Biblu tọn tẹlẹ wẹ dohia dọ nukunnumọjẹnumẹ ehe sọgbe? Be e sọgan ko yindọ Klistiani depope he nọ yí núdùdù gbigbọmẹ tọn do jlọ mẹmẹsunnu etọn lẹ dote wẹ Jesu to alọdlẹndo to paa mẹ ya?
13 Jiwheyẹwhe dọna akọta Islaeli tọn dọmọ: “Mìwlẹ wẹ kunnudetọ ṣie . . . devi ṣie he yẹn ko de.” (Isaia 43:10) Ṣigba, to Nisan 11 owhe 33 W.M., Jesu dọna nukọntọ Islaeli tọn lẹ dọ Jiwheyẹwhe ko gbẹ́ akọta yetọn dai taidi devizọnwatọ Etọn. E dọmọ: ‘Yè na yí ahọludu Jiwheyẹwhe tọn sọn mì dè, yè nasọ yí na akọta de he na de sinsẹ́n etọn jẹgbonu.’ Jesu dọna gbẹtọgun lẹ dọmọ: “Pọ́n, yè jo owhé mìtọn dai hlan mì ovọ́.” (Matiu 21:43; 23:38) Taidi afanumẹ Jehovah tọn, owhé Islaeli tọn ma yin nugbonọ kavi nuyọnẹntọ gba. (Isaia 29:13, 14) To godo mẹ, whenuena Jesu kanse to azán enẹ dopolọ gbè dọ: “Mẹnu wẹ afanumẹ nugbonọ, nuyọnẹntọ” lọ?, nuhe kanse e te na taun tọn wẹ yindọ, ‘Akọta nuyọnẹntọ tẹwẹ na diọtẹnna Islaeli nado yin afanumẹ nugbonọ Jiwheyẹwhe tọn?’ Apọsteli Pita na gblọndo lọ to whenuena e dọna agun Klistiani yiamisisadode lẹ tọn dọmọ: ‘Mì wẹ . . . akọta wiwe, gbẹtọ na nudido Jiwheyẹwhe tọn titi.’ (1 Pita 1:4; 2:9) Akọta gbigbọmẹ tọn enẹ, yèdọ “Islaeli Jiwheyẹwhe tọn,” lẹzun afanumẹ yọyọ Jehovah tọn. (Galatianu lẹ 6:16) Kẹdẹdile hagbẹ Islaeli hohowhenu tọn lẹpo nọpọ́ bo yin “devi” dopo do, mọkẹdẹ wẹ Klistiani yiamisisadode he tin to aigba ji to ojlẹ tangan de mẹ lẹpo nọ nọpọ́ bo yin “afanumẹ nugbonọ, nuyọnẹntọ” dopo do niyẹn. Lẹblanulọkẹyi nankọ die mí tindo nado nọ mọ “núdùdù” yí gbọn afanumẹ Jiwheyẹwhe tọn gblamẹ!
Hiẹ Sọgan Duvivi Oplọn Mẹdetiti Tọn
14. Naegbọn Biblu pinplọn, kakati nado nọ hia ẹ poun, nọ hẹn ayajẹ wá?
14 Eyin nukunnumọjẹnumẹ Owe-wiwe tọn yọyọ de yin didehia mí, be aliho he mẹ e nọ hẹn yise mítọn lodo te ma nọ hẹn homẹhun mí ya? Nuhe zọ́n niyẹn bọ Biblu pinplọn, kakati nado nọ hia ẹ poun, sọgan hẹn ayajẹ susu wá. Enẹwutu, whenuena hiẹ to owe Klistiani tọn lẹ hia, nọ kanse dewe dọ: ‘Kanṣiṣa tẹwẹ zẹẹmẹ he yin bibasi do hosọ ehe ji tindo hẹ nukunnumọjẹnumẹ he n’ko tindo dai? Wefọ kavi whẹwhinwhẹ́n devo tẹlẹ ji wẹ yẹn sọgan lẹnnupọndo he na nọgodona tadona he kọ̀n hosọ ehe wá yinukọn dogọ?’ Eyin e biọ dọ hiẹ ni basi dodinnanu dogọ, basi kandai kanbiọ he hiẹ na jlo nado mọ gblọndo na lọ tọn bo yí ì do basi hosọ nupinplọn towe he na bọdego tọn.
15. Hosọ tẹlẹ pinplọn wẹ sọgan hẹn ayajẹ wá, podọ nawẹ yé sọgan hẹn ale dẹn-to-aimẹ wá gbọn?
15 Hosọ tẹlẹ pinplọn wẹ sọgan hẹn we tindo ayajẹ po nukunnumọjẹnumẹ yọyọ po? Di apajlẹ, hiẹ sọgan hẹn nukunnumọjẹnumẹ towe siso deji gbọn dogbapọnnanu kitokito bibasi do alẹnu voovo he Jiwheyẹwhe basi na alemọyi gbẹtọvi lẹ tọn ji dali. A sọgan hẹn yise towe lodo gbọn nupinplọn dogbọn dọdai he dlẹnalọdo Jesu Klisti lẹ dali kavi gbọn dogbigbapọnna wefọ debọdo-dego owe dọdai Biblu tọn de dali. Onú devo he sọ nọ hẹn yise lodo wẹ nado gbadopọnna otàn Kunnudetọ Jehovah tọn egbezangbe tọn lẹ tọn gbọn owe lọ Les Témoins de Jéhovah: Prédicateurs du Royaume de Dieu yiyizan dali, eyin e tin-to-aimẹ to ogbè he a sè de mẹ.a Podọ ayihaawe ma tin dọ dogbigbapọnna “Kanbiọ lẹ sọn Wehiatọ lẹ Dè” to Atọ̀họ̀-Nuhihọ́ Lọ Tọn he wayi lẹ mẹ na hẹn we mọnukunnujẹ wefọ delẹ mẹ ganji dogọ. Nọ na ayidonugo vonọtaun whẹwhinwhẹ́n Owe-wiwe tọn he yin nina nado wá tadona zẹẹmẹ lẹ tọn kọ̀n. Ehe na gọalọna we nado plọn ‘huhlọn nulẹnpọn tọn’ towe podọ nado wleawuna wuntuntun. (Heblu lẹ 5:14) Dile hiẹ to nuplọn, nọ basi kandai, vlavo do Biblu towe mẹ kavi do wema de ji na nupinplọn towe nido sọgan hẹn ale dẹn-to-aimẹ wá na we podọ na mẹhe a na penugo nado gọalọna lẹ.
Nọ Gọalọna Jọja lẹ Nado Duvivi Biblu Pinplọn Tọn
16. Nawẹ hiẹ sọgan gọalọna jọja lẹ nado duvivi Biblu pinplọn tọn gbọn?
16 Mẹjitọ lẹ sọgan wà nususu nado fọ́n ojlo ovi yetọn lẹ tọn dote to gbigbọnu lẹ mẹ. A yí nukunpẹvi do pọ́n nugopipe ovi lẹ tọn nado mọnukunnujẹ onú sisosiso lẹ mẹ blo. Eyin hiẹ deazọ́nna ovi lẹ nado basi dodinnanu do hosọ de ji to awuwiwle mẹ na oplọn whẹndo tọn, a sọgan kanhose yé do nuhe yé plọn lẹ ji. Oplọn whẹndo tọn sọ sọgan bẹ zepọn lẹ bibasi hẹn nado plọn ovi lẹ lehe yé sọgan yiavunlọna yise yetọn bo dohia dọ nuhe yé plọn lẹ yin nugbo gbọn. Humọ, hiẹ sọgan yí alọnuwe lọ “Voyez le bon pays”b zan nado plọnnu yé do otò Biblu tọn lẹ ji podọ nado tá hinhọ́n do nuhe mì hia to Biblu hihia osẹ lọ mẹ tọn lẹ mẹ ji.
17. Naegbọn mí dona tin to jlẹkaji to tito Biblu pinplọn mẹdetiti tọn mítọn mẹ?
17 Biblu pinplọn mẹdetiti tọn sọgan hẹn awuvivi wá bo jlọ yise dote, ṣigba payi ma nado dike e ni yitẹn to awuwiwlena opli agun tọn lẹ si. Opli lẹ yin aliho devo he mẹ Jehovah nọ plọn mí te gbọn “afanumẹ nugbonọ, nuyọnẹntọ” lọ gblamẹ. Etomọṣo, dodinnanu bibasi yinukọn dogọ sọgan gọalọna we nado na gblọndo he tindo zẹẹmẹ lẹ to opli lẹ ji—di apajlẹ to Oplọn Agunwe tẹnmẹ kavi to nuagokun Biblu hihia sẹmẹsẹmẹ Wehọmẹ Lizọnyizọn Yẹwhehọluduta tọn whenu.
18. Naegbọn vivẹnudido he e nọ biọ nado plọn “onú sisosiso Jiwheyẹwhe tọn lẹ” do tindo ale?
18 Ohó Jiwheyẹwhe tọn pinplọn to aliho he siso mẹ sọgan gọalọna we nado dọnsẹpọ Jehovah. Nado do nujọnu-yinyin oplọn mọnkọtọn tọn hia, Biblu dọmọ: “Agbó wẹ nuyọnẹn, yèdọ dile akuẹ yin agbó do: ṣigba ale zinzin tọn wẹ dọ, nuyọnẹn na ogbẹ̀ yé he tindo e lẹ.” (Yẹwhehodọtọ 7:12) Enẹwutu, vivẹnudido he e nọ biọ nado hẹn nukunnumọjẹnumẹ towe siso gando gbigbọnu lẹ go tindo ale. Biblu dopagbe na mẹhe zindonukọn nado nọ dindonanu lẹ dọ yé na “mọ oyọnẹn Jiwheyẹwhe tọn.”—Howhinwhẹn lẹ 2:4, 5.
[Nudọnamẹ Odò Tọn]
a He Kunnudetọ Jehovah tọn lẹ zinjẹgbonu.
b He Kunnudetọ Jehovah tọn lẹ zinjẹgbonu.
Be Hiẹ Sọgan Na Gblọndo Ya?
• Etẹwẹ yin “onú sisosiso Jiwheyẹwhe tọn lẹ”?
• Naegbọn mí ma dona doalọtena onú sisosiso lẹ pinplọn gbede?
• Naegbọn mí sọgan dọ dọ ayajẹ he nọ wá sọn nukunnumimọjẹ “onú sisosiso Jiwheyẹwhe tọn lẹ” mẹ hùndonuvo na Klistiani lẹpo?
• Nawẹ hiẹ sọgan mọaleyi dogọ sọn “onú sisosiso Jiwheyẹwhe tọn lẹ” mẹ gbọn?
[Yẹdide to weda 28]
Whetẹnu wẹ Jesu lẹzun Okún dopagbe lọ?
[Yẹdide to weda 31]
Mẹjitọ lẹ sọgan de hosọ delẹ na ovi yetọn lẹ nado basi dodinnanu to awuwiwle mẹ na oplọn whẹndo tọn