Dọnsẹpọ Jiwheyẹwhe
Lẹngbọhọtọ He Nọ Hò Towe Pọ́n
‘BE JIWHEYẸWHE nọ hò ṣie pọ́n ya?’ Eyin hiẹ ko kàn kanbiọ enẹ sè dewe pọ́n, yọnẹn dọ mẹsusu lẹ wẹ ko wàmọ ga. Susu mítọn lẹ wẹ ko pehẹ nuhahun lẹ, podọ to whedelẹnu mí nọ kanse vlavo eyin Mẹdatọ wẹkẹ gblagada ehe tọn nọ doayi nuhe pehẹ mí te lẹ go. Nuhe mí dona kanse wẹ yindọ, Be Jehovah Jiwheyẹwhe nọ hò dopodopo mítọn tọn pọ́n ya? Whenuena Jesu he yọ́n Jehovah hugan tin to aigba ji, e yí oló de zan do na gblọndo homẹmiọnnamẹ tọn na kanbiọ enẹ.
To nukunpedomẹgo Jehovah tọn yiyijlẹdo lẹngbọhọtọ de tọn go mẹ, Jesu dọmọ: “Eyin mẹde tindo lẹngbọ kanweko, bọ dopo danbú to yé mẹ, be e ma na jo kanwe-fọtọ̀n-nukunẹnẹ he pò dai, bo na yì osó lẹ ji, bo yì dín ehe danbú mọ? Podọ eyin e sọ dín in mọ, nugbo wẹ yẹn dọ hlan mì, e jaya to lẹngbọ lọ ji, hú to kanwe-fọtọ̀n-nukunẹnẹ he ma danbú yì lẹ ji. Yèdọ mọkẹdẹ wẹ e ma yin nujijlo de to Otọ́ mìtọn he tin to olọn mẹ nukọn, dọ dopo to pẹvi helẹ de mẹ ni dọ̀n.” (Matiu 18:12-14) Mì gbọ mí ni pọ́n lehe Jesu basi zẹẹmẹ awuvẹmẹ sisosiso Jehovah tọn na sinsẹ̀n-basitọ Etọn lẹ dopodopo do.
Azọngban lẹngbọhọtọ de tọn wẹ nado penukundo lẹngbọ etọn lẹ dopodopo go. Eyin lẹngbọ de danbú sọn yé mẹ, e na yọ́n dehe bu lọ. E yọ́n lẹngbọ dopodopo po yinkọ he e ko do na ẹn po. (Johanu 10:3) Lẹngbọhọtọ lọ ma na vò kakajẹ whenue dehe bu lọ lẹkọwa apó lọ mẹ. To whenuena e yì nado dín lẹngbọ he bu lọ, e ma na jo 99 he pò lẹ do matin hihọ́ depope gba. Lẹngbọhọtọ lẹ nọ saba nọpọ́ bo nọ dike lẹngbọ yetọn lẹ ni ján biọ yedelẹ mẹ.a Gbọnmọ dali, mẹhe yì nado yì dín lẹngbọ he bu lọ sọgan jo lẹngbọ etọn he pò lẹ do alọ lẹngbọhọtọ hatọ etọn lẹ tọn mẹ na ojlẹ kleun de. To whenuena e mọ lẹngbọ he bu lọ bosọ mọdọ e ma gbleawu, homẹ lẹngbọhọtọ lọ tọn nọ hùn. E na ze lẹngbọ he to budi lọ do abọji bo hẹn ẹn wá apó mẹ fie e na mọ hihọ́ te.—Luku 15:5, 6.
To zẹẹmẹ bibasi do oló ehe ji whenu, Jesu dọ dọ Jiwheyẹwhe ma jlo dọ “dopo to pẹvi helẹ de mẹ ni dọ̀n.” Jesu ko gbẹnuna devi etọn lẹ jẹnukọn ma nado hẹn ‘dopo to yọpọvu he yí ì sè’ lẹ mẹ dahli. (Matiu 18:6) To whelọnu lo, etẹwẹ oló Jesu tọn plọn mí gando Jehovah go? E plọn mí dọ Jehovah yin Lẹngbọhọtọ he nọ hò dopodopo lẹngbọ etọn lẹ tọn pọ́n sisosiso kakajẹ “yọpọvu”—he ma yin nude to nukun gbẹtọ lẹ tọn mẹ to aihọn lọ mẹ lẹ ji. Mọwẹ, dopodopo sinsẹ̀n-basitọ Jiwheyẹwhe tọn lẹ tọn wẹ yin nujọnu bosọ họakuẹ to nukun etọn mẹ.
Eyin hiẹ jlo na vọ́ jide tindo dọ a yin nuhọakuẹ to nukun Jiwheyẹwhe tọn mẹ, naegbọn hiẹ ma nado plọnnu dogọ gando Lẹngbọhọtọ Daho lọ, Jehovah Jiwheyẹwhe go bosọ plọn lehe hiẹ sọgan dọnsẹpọ ẹ do? Eyin hiẹ wàmọ, e yọnbasi dọ hiẹ ni tindo jide taidi apọsteli Pita, mẹhe ayihaawe ma tin dọ e tin to finẹ bo sè oló Jesu tọn gando lẹngbọ he bu lọ go. Pita wlan to godo mẹ dọmọ: “Mì bẹ magbọjẹ mìtọn lẹpo do alọ [Jiwheyẹwhe tọn] mẹ; na ewọ to tukla mìtọn jẹ wutu.”—1 Pita 5:7.
[Nudọnamẹ odò tọn]
a Nado klan lẹngbọ lẹ sọn yede go ma vẹawu gba, na dopodopo lẹngbọ lẹ tọn nọ yọ́n ogbè klunọ etọn tọn.—Johanu 10:4.