Wekanhlanmẹ de sọn République Dominicaine

“N’Ma Ko Mọ Owanyi Mọnkọtọn Pọ́n”

TINTAN niyẹn bọ Niurka ze hosọ Biblu tọn de donukọnnamẹ to agun mítọn mẹ to osẹ ehe mẹ. E yí nukinkan nukuntọ́nnọ lẹ tọn zan nado wleawuna nuhe e na dọ lẹ bo wá plọn yé do tamẹ. N’tin to oplò lọ ji po e po bo to adà mẹhe jlo na plọn nugbo Biblu tọn de tọn yiwà. Mahopọnna dọ e ma nọ sènu ganji, e ze hósenu (écouteur ) de do tómẹ he gọalọna ẹn nado sè ogbè ṣie sọn miklo mẹ. To whenuena mí fó, homẹhun mẹplidopọ lẹ bọ yé hopẹ́ sọmọ bọ e penugo nado sè pẹhiho yetọn. Nukiko yẹsẹ etọn do ayajẹ po homẹhunhun daho etọn po hia. Homẹhun yẹnlọsu ga. Ayajẹ nankọ die nado tin to sinsẹ̀nzọn mẹdehlan tọn mẹ!

N’flin whenue n’mọ Niurka to tintan whenu to owhe awe die wayi. To húnkùnkùn gbọn aliho afínfínnọ de ji na nukunwhiwhe 30 godo, n’sọnukunmọ ẹn whla tintan. E sinai to ohọ̀ kleun de nukọn he yin gbigbá po atin, bliki gọna họ̀gbápanu he jẹkò lẹ po. Owhé lọ gbè gọ́ na awhágbe podọ owan gbọgbọẹ, azui po avún lẹ po tọn. Niurka sinai bo dokọdò taidi mẹhe tin to ṣokẹdẹ bo to oyà apọṣimẹ tọn ji. E ma tlẹ taidi dọ owhe 34 poun wẹ e do.

N’zealọ do abọji na ẹn dẹẹdẹ, bọ e jlọkọ pọ́n mí po nukun etọn he masọ to numọ sọn owhe 11 die gbọ́n po. N’dọho do tómẹ na ẹn nado dọ mẹhe yẹn po gbẹdohẹmẹtọ ṣie po yin na ẹn. To nukọn mẹ, mí sè dọ azọ̀n syndrome de Marfan tọn jẹ wẹ Niurka te, yèdọ azọ̀n de he e dugu etọn, ehe nọ hẹn awufiẹsa susu wá na ẹn. Niurka sọ nọ jẹ azọ̀n adọ́-vivi tọn sinsinyẹn, ehe biọ dọ e ni nọ dà ohùn etọn whẹwhẹ.

Whenue n’ze Biblu do alọmẹ na ẹn, e yọnẹn dọ Biblu wẹ bo dọ dọ emi ko nọ duvivi Owe-wiwe lẹ hihia tọn dai whẹpo do ba nukunnu pò. Ṣigba nawẹ n’sọgan plọn nugbo homẹmiọnnamẹ tọn he tin to Ohó Jiwheyẹwhe tọn mẹ lẹ nawe wamọnọ, he to azọ̀njẹ bosọ tin to ṣokẹdẹ ehe gbọn? Na e ko yọ́n wekun lẹ wutu, n’jẹ wekun he yè yí lọba do basi lẹ zedo alọmẹ na ẹn ji. E ma dẹn bọ e penugo nado yọ́n wekun dopodopo gbọnvo. Enẹgodo, e nọ hẹn alọ ṣie lẹ go dile n’to hodọna ẹn po alọ po bo gbọnmọ dali plọn nado yọ́n wekun dopodopo to Ogbè Alọ-Yido-Dọho Amelika tọn mẹ. Vudevude, e plọn ohia alọ-yido-dọho tọn devo lẹ. To whenuena e yindọ yẹnlọsu ṣẹṣẹ jẹ ogbè lọ plọn ji to whenẹnu wẹ, n’dona nọ yí whenu susu zan nado wleawuna nupinplọn dopodopo. Etomọṣo, yẹn po Niurka po tindo ojlo taun, enẹwutu mí yawu yinukọn to ogbè alọ-yido-dọho tọn lọ yiyizan mẹ.

Niurka penugo nado yinukọn po awuyiya po to whenuena pipli gbẹtọ homẹdagbenọ delẹ tọn na ẹn nuyizan he nọ gọalọ nado sènu delẹ. Nugbo wẹ dọ nuyizan ehelẹ ma yin agọe tọn lẹ gba, ṣigba yé gọalọ taun. Na Niurka ko ba nukunnu pò bo ma nọ sènu ganji na owhe ao linlán wutu, e nọ ze ede whlá. Ṣigba gbigbọ Jehovah tọn fọ́n ayiha po ahun etọn po, bo hẹn ẹn tindo oyọnẹn, todido po owanyi po to gbẹzan etọn mẹ. To madẹnmẹ, gbọn opò de yiyizan dali, Niurka jẹ yìyì pé ji to okọ́ etọn mẹ bo nọ lá nugbo Biblu tọn na mẹdevo lẹ.

Niurka nọ plọn Biblu hẹ nafẹ etọn po nafẹ-vi etọn awe po. E nọ wleawu ganji, bo nọ plọn nupinplọn dopodopo do tamẹ jẹnukọn. Mẹhe e to nuplọn hẹ lẹ nọ hia hukan lọ, bọ Niurka nọ hia kanbiọ lọ sọn owe nukuntọ́nnọ lẹ tọn etọn mẹ. Gbẹdohẹmẹtọ de nọ dọ gblọndo nuplọntọ lọ tọn lẹ na Niurka, vlavo gbọn hodidọ do tómẹ na ẹn kavi alọ-yido-dọho nukuntọ́nnọ lẹ tọn yiyizan dali.

Agun lọ blebu wẹ nọ gọalọna Niurka bo nọ na ẹn tuli. Susu mẹmẹsunnu lẹ tọn wẹ nọ gọalọna ẹn nado yì opli po plidopọ lẹ po. Mẹdevo lẹ nọ plan ẹn yì lizọnyizọn lọ mẹ. Niurka dọna mi to agọe dọmọ: “N’ma ko mọ owanyi mọnkọtọn pọ́n.” E to linlẹn nado yí baptẹm to plidopọ agbegbe tọn mítọn he ja.

Dile mí wle ali he yì owhé Niurka tọn gbè, mí mọ ẹn to aisinsin to họntonu to owhè-nù bọ e jlọta po nukiko yẹsẹ de po. N’kàn nuhewutu e do to nuko sè e bọ e dọmọ: “N’to nulẹnpọndo sọgodo ji whenue aigba na lẹzun paladisi. N’sọ to pinpọn dee hlan taidi dọ n’ko tin to finẹ wẹ nkọ.”

[Yẹdide to weda 25]

Niurka po hagbẹ agun mítọn tọn delẹ po to Plitẹnhọ Ahọluduta tọn mítọn nukọn

[Yẹdide to weda 25]

Niurka to nuhe e plọn lẹ má hẹ mẹdevo lẹ