Be Hiẹ Nọ Pọ́n Mẹdevo lẹ Dile Jehovah Nọ Wà Do Ya?
“Na kinklan de ma nado tin to agbasa mẹ . . . awutugonu lẹ nido tindo tuklajẹ dopolọ na yenọzo.”—1 KỌL. 12:25.
1. Numọtolanmẹ tẹwẹ hiẹ tindo tlolo he a biọ paladisi gbigbọmẹ tọn lọ mẹ?
TLOLO he mí tọ́n sọn aihọn ylankan ehe mẹ bo jẹ gbẹdo hẹ omẹ Jehovah tọn lẹ ji, vlavo homẹ mítọn hùn taun nado mọ owanyi sisosiso po mẹtọnhopọn he tin to ṣẹnṣẹn yetọn po. Lehe yé gbọnvo na gbẹtọ hùnylantọ, wangbẹnamẹtọ, podọ nudọ̀ntọ he tin to anademẹ Satani tọn glọ lẹ do sọ! Mí wá mọ míde to paladisi gbigbọmẹ tọn he gọ́ na jijọho po pọninọ po de mẹ.—Isa. 48:17, 18; 60:18; 65:25.
2. (a) Etẹwẹ sọgan yinuwado pọndohlan mítọn gando mẹdevo lẹ go ji? (b) Etẹwẹ e sọgan biọ dọ mí ni wà?
2 Ṣigba, dile ojlẹ to yìyì, mí sọgan jẹ pọndohlan agọ̀ tindo ji gando mẹmẹsunnu mítọn lẹ go na mapenọ-yinyin mítọn wutu. Mapenọ-yinyin mítọn sọgan zọ́n bọ mí na nọ mọ awugbopo mẹmẹsunnu mítọn lẹ tọn taidi onú daho de kakati nado nọ ze ayidonugo do jẹhẹnu gbigbọmẹ tọn yetọn lẹpo ji. Do glido, mí nọ wọnji nado pọ́n yé dile Jehovah nọ wà do. Eyin ehe nọ jọ do mí go janwẹ, ojlẹ lọ die nado lẹnnupọndo pọndohlan mítọn ji bo hẹn ẹn sọgbe hẹ pọndohlan Jehovah tọn he họnwun.—Eks. 33:13.
Nukun He Jehovah do Nọ Pọ́n Mẹmẹsunnu Mítọn Lẹ
3. Etẹ go wẹ Biblu yí agun Klistiani tọn jlẹdo?
3 Dile e yin kinkàndai to 1 Kọlintinu lẹ 12:2-26 mẹ do, apọsteli Paulu yí agun Klistiani yiamisisadode lẹ tọn jlẹdo agbasa po “awutugonu susu” etọn lẹ po go. Kẹdẹdile awutugonu agbasa tọn lẹ nọ gbọnvo na ode awetọ do, hagbẹ agun lọ tọn lẹ nọ gbọnvo taun na nuhe dù gbẹtọ-yinyin po nugopipe yetọn lẹ po. Ṣogan, Jehovah nọ kẹalọyi vogbingbọn ehelẹ. E yiwanna hagbẹ agun lọ tọn dopodopo bosọ yọ́n pinpẹn yetọn. Enẹwutu, Paulu sọ na mí ayinamẹ dọ hagbẹ agun lọ tọn lẹ dona “tindo tuklajẹ dopolọ na yenọzo” kavi nọ hò ode awetọ tọn pọ́n. Ehe sọgan vẹawu, na gbẹtọ-yinyin mẹdevo lẹ tọn sọgan gbọnvo na mítọn.
4. Naegbọn e sọgan biọ dọ mí ni vọ́ pọndohlan he mí tindo gando mẹmẹsunnu mítọn lẹ go jlado?
4 Mí tlẹ sọgan tindo ayilinlẹn lọ nado nọ ze ayidonugo do awugbopo mẹmẹsunnu mítọn lẹ tọn ji. Eyin mí to mọwà, e na taidi dọ mí to ayidonugo zedo adà kleun yẹdide de tọn kẹdẹ ji. Ṣigba pọndohlan Jehovah tọn gbloada hugan, na e nọ pọ́n yẹdide lọ to blebu mẹ. Vlavo mí nọ saba ze ayidonugo do nuhe mí ma yiwanna to mẹdevo lẹ mẹ ji, to whenuena Jehovah nọ pọ́n yé hlan to blebu mẹ, bo nọ mọ jẹhẹnu dagbe he dopodopo yetọn tindo lẹpo. Lehe mí to vivẹnudo nado hodo apajlẹ Jehovah tọn sọ, mọ wẹ mí na penugo nado yidogọna gbigbọ owanyi po pọninọ po tọn to agun lọ mẹ do niyẹn.—Efe. 4:1-3; 5:1 2.
5. Naegbọn e ma sọgbe nado dawhẹna mẹdevo lẹ?
5 Jesu yọnẹn ganji dọ gbẹtọvi mapenọ lẹ nọ saba tindo ayilinlẹn lọ nado dawhẹnamẹ. E na ayinamẹ dọmọ: “Mì dawhẹ blo, na mì ma yin mẹdawhẹna . . . blo.” (Mat. 7:1) Doayi e go dọ to ogbè dowhenu tọn lọ mẹ, Jesu ma dọ poun dọ “Mì dawhẹ blo”; nuhe e dọ wẹ yindọ: “Mì sọ dawhẹnamẹ ba blo.” E yọnẹn dọ susu hosetọ etọn lẹ tọn ko tindo aṣa lọ nado nọ mọhodọdo mẹdevo lẹ go. Be vlavo mílọsu ko tindo aṣa enẹ wẹ ya? Eyin mí tindo ayilinlẹn mọnkọtọn janwẹ, mí dona dovivẹnu vẹkuvẹku nado diọ, na mí nikaa mọ whẹdida whẹgbledomẹ tọn yí. Na nugbo tọn, jlọjẹ tẹwẹ mí tindo nado dawhẹna mẹhe Jehovah to yiyizan to otẹn azọngban tọn mẹ de kavi nado dọ dọ e ma dona yin apadewhe agun lọ tọn? Mẹmẹsunnu de sọgan tindo awugbopo delẹ, ṣigba eyin Jehovah zindonukọn nado to alọkẹyi i, be e na sọgbe dọ míwlẹ ni gbẹ́ ẹ dai ya? (Joh. 6:44) Be mí yise nugbonugbo dọ Jehovah wẹ to anadena omẹ etọn lẹ bosọ yọnẹn dọ eyin nuhudo tin nado basi vọjlado, ewọ na yinuwa to ojlẹ sisọ etọn mẹ ya?—Hia Lomunu lẹ 14:1-4.
6. Nukun tẹwẹ Jehovah nọ yí do pọ́n devizọnwatọ etọn lẹ?
6 Nuhe jiawu gando Jehovah go wẹ yindọ e sọgan mọ hlan nukọn nuhe Klistiani dopodopo na wá penugo nado yin to whenuena yé jẹ pipé kọ̀n to aihọn yọyọ lọ mẹ. E sọ nọ yọ́n obá he mẹ yé ko yinukọn jẹ to gbigbọ-liho. Enẹwutu, e ma tindo nuhudo nado ze ayidonugo do awugbopo yetọn dopodopo ji. Mí hia to Psalm 103:12 mẹ dọmọ: “Dile whèzẹtẹn dẹn do whèyihọ do, dẹn sọmọ wẹ ewọ do ze sẹ́nmẹjẹ mítọn yì dẹn sọn mí dè.” Lehe dopodopo mítọn sọgan dopẹ́ na enẹ do sọ!—Ps. 130:3.
7. Etẹwẹ mí plọn sọn nukun he Jehovah yí do pọ́n Davidi mẹ?
7 Mí mọ kunnudenu lẹ to Owe-wiwe mẹ dọ Jehovah tindo nugopipe vonọtaun lọ nado ze ayidonugo do jẹhẹnu dagbe gbẹtọvi lẹ tọn ji. Jiwheyẹwhe ylọ Davidi dọ: “Davidi mẹmẹsi ṣie, mẹhe yìn gbedide ṣie lẹ, mẹhe yí ayiha etọn lẹpo do hodo mi, nado wà enẹ kẹdẹ he yin jlọjlọ to nukun ṣie lẹ mẹ.” (1 Ahọ. 14:8) Nugbo wẹ dọ mí yọnẹn dọ Davidi wà onú delẹ he ma sọgbe. Etomọṣo, Jehovah de nado ze ayidonugo do jẹhẹnu dagbe etọn lẹ ji na e yọnẹn dọ ahunjijlọnọ wẹ Davidi.—1 Otan. 29:17.
Nọ Pọ́n Mẹmẹsunnu Towe lẹ Dile Jehovah Nọ Wà Do
8, 9. (a) Aliho tẹ mẹ wẹ mí sọgan taidi Jehovah te? (b) Nawẹ mí sọgan basi dohia ehe tọn gbọn, podọ etẹwẹ mí plọn sọn e mẹ?
8 Jehovah sọgan mọ nuhe tin to ahun mẹ, ṣigba míwlẹ ma sọgan wàmọ. Ehe kẹdẹ ko pé, na mí nido gbọ whẹdana mẹdevo. Mí ma nọ yọ́n mẹwhinwhàn mẹdevo lẹ tọn to gigọ́ mẹ gba. Mí dona tẹnpọn nado hodo apajlẹ Jehovah tọn gbọn vivẹnudido ma nado nọ ze ayidonugo do mapenọ-yinyin gbẹtọvi tọn ji dali, na enẹ na busẹ to madẹnmẹ. Be e ma na yin yanwle dagbe de nado taidi ewọ to adà ehe mẹ ya? Mọwiwà na gọalọna mí nado tindo haṣinṣan jijọho tọn hẹ mẹmẹsunnu po mẹmẹyọnnu mítọn lẹ po.—Efe. 4:23, 24.
9 Di dohia, lẹnnupọndo ohọ̀ he to gbigble de ji—họta lọ to sinkùn, fleṣe lẹ to dide, podọ osin ko hẹn ozà lọ lọsu gble. Suhugan gbẹtọ lẹ tọn wẹ na mọ ohọ̀ enẹ bo wá tadona kọ̀n dọ e dona yin hihọliai na e ma yọ́npọ́n wutu. Ṣigba mẹde sọgan mọ ohọ̀ lọ bo tindo pọndohlan devo pete gandego. E sọgan penugo nado mọnú zẹ̀ nuhe gble to gbonu lọ lẹ go bo doayi e go dọ dodonu ohọ̀ lọ tọn gbẹ́ yọ́n bọ e sọgan yin vivọjlado. E họ̀ owhé lọ bo vọ́ nuhe gble to e go lẹ jlado nado hẹn awusọhia etọn pọnte. Enẹgodo, aligbọntọ lẹ mọ ohọ̀ lọ bo pà whanpẹ etọn. Be mí sọgan taidi mẹhe dovivẹnu nado vọ́ ohọ̀ lọ jlado ya? Kakati nado nọ ze ayidonugo do awugbopo mẹmẹsunnu mítọn lẹ tọn he nọ sọawuhia to gbangba lẹ ji, be mí sọgan nọ doayi jẹhẹnu dagbe yetọn lẹ go bo mọ lehe yé sọgan gbẹ́ yinukọn to gbigbọ-liho do hlan nukọn ya? Eyin mí wàmọ, mí na penugo nado yiwanna mẹmẹsunnu mítọn lẹ na jẹhẹnu gbigbọmẹ tọn yetọn lẹ, dile Jehovah nọ wà do.—Hia Heblu lẹ 6:10.
10. Nawẹ ayinamẹ he tin to Filippinu lẹ 2:3, 4 mẹ sọgan gọalọna mí gbọn?
10 Apọsteli Paulu na ayinamẹ delẹ he sọgan gọalọna mí to haṣinṣan mítọn hẹ hagbẹ agun lọ tọn lẹpo mẹ. E dotuhomẹna Klistiani lẹ dọmọ: “Mì yí avùn kavi goyiyi ovọ́ do wà nudepope blo, ṣigba to ayiha whiwhẹ mẹ dopodopo mìtọn ni nọ lẹn mẹdevo tọn hú ede tọn. Na mẹde pọ́n nuhe yin etọn kẹdẹ go blo, ṣigba na omẹ popo ni nọ pọ́n nuhe yin mẹdevo tọn go ga.” (Flp. 2:3, 4) Whiwhẹ na gọalọna mí nado tindo pọndohlan he sọgbe gando mẹdevo lẹ go. Eyin mí nọ tindo ojlo to mẹdevo lẹ mẹ bo nọ pọ́n jẹhẹnu dagbe yetọn lẹ, enẹ nasọ gọalọna mí nado nọ pọ́n yé dile Jehovah nọ wà do.
11. Diọdo tẹlẹ wẹ ko yinuwado agun delẹ ji?
11 To owhe agọe tọn lẹ mẹ, nujijọ aihọn tọn lẹ ko hẹn mẹsusu sẹtẹn. To tòdaho delẹ mẹ to egbehe, yè sọgan mọ mẹhe wá sọn otò voovo mẹ lẹ. Delẹ to mẹhe ṣẹṣẹ wá lẹdo mítọn mẹ lẹ mẹ ko do ojlo hia to nugbo Biblu tọn mẹ bo ko to awukọndopọ hẹ mí to sinsẹ̀n-bibasi Jehovah tọn mẹ. Omẹ ehelẹ wá “sọn akọta lẹpo mẹ, sọn hẹnnu lẹpo mẹ, sọn gbẹtọ lẹpo mẹ, podọ sọn ogbè lẹpo mẹ.” (Osọhia 7:9) Taidi kọdetọn de, susu agun mítọn lẹ tọn wẹ bẹ gbẹtọ lẹ hẹn sọn ofi voovo lẹ lẹdo aihọn pé.
12. Pọndohlan tẹwẹ mí dona tindo gando ode awetọ go, podọ naegbọn enẹ sọgan nọ vẹawu to whedelẹnu?
12 E sọgan biọ dọ mí ni dovivẹnu dogọ nado hẹn pọndohlan dagbe de go gando ode awetọ go to agun mítọn mẹ. Enẹ hẹn mí flindọ mí dona hẹn ayinamẹ apọsteli Pita tọn do ayiha mẹ nado tindo “owanyi mẹmẹsunnu tọn madoklọ” bosọ “nọ yiwanna [mínọzo] tlala po ayiha wiwe po.” (1 Pita 1:22) E sọgan vẹawu nado wleawuna owanyi nujọnu tọn to agun he bẹ mẹhe wá sọn ofi voovo lẹ hẹn de mẹ. Aṣa sinsẹ̀n-basitọ hatọ mítọn lẹ tọn sọgan gbọnvo tlala na mítọn, podọ nudopolọ sọgan gando wésise, ninọmẹ akuẹzinzan tọn, po akọ̀ he mẹ yé wá sọn po go. Be e nọ vẹawuna we nado mọnukunnujẹ linlẹn po nuyiwa mẹdelẹ tọn po mẹ wẹ? Yelọsu sọgan lẹn nudopolọ gando gowe. Etomọṣo, mímẹpo wẹ anademẹ lọ yin nina dọmọ: “Mì tindo owanyi na pipli mẹmẹsunnu lẹ tọn pete.”—1 Pita 2:17, NW.
13. Diọdo tẹlẹ wẹ e sọgan biọ dọ mí ni basi to nulẹnpọn mítọn mẹ?
13 E sọgan yin dandan nado basi diọdo delẹ to nulẹnpọn mítọn mẹ nado sọgan hùndonuvo to owanyi mítọn na mẹmẹsunnu lẹpo mẹ. (Hia 2 Kọlintinu lẹ 6:12, 13.) Be e ko jọ pọ́n bọ mí zan hogbe taidi ehelẹ, “E ma yin nuvẹun mọọ, ṣigba . . . ” bo jẹ jijọ ylankan he mí lẹndọ e gbayipe to mẹhe wá sọn akọ̀ devo mẹ lẹ ṣẹnṣẹn delẹ slẹ ji ya? Numọtolanmẹ mọnkọtọn lẹ sọgan dohia dọ mí dona de nuvẹun depope he gbẹ́ pò to ahun mítọn mẹ sẹ̀. Mí sọgan kanse míde dọ, ‘Be yẹn nọ dovivẹnu to whepoponu nado jẹakọ hẹ mẹhe aṣa yetọn gbọnvo na ṣie lẹ ya?’ Mẹdetiti gbigbejepọn mọnkọtọn sọgan gọalọna mí nado kẹalọyi mẹmẹsunnu mítọn he wá sọn ofi voovo lẹ bo yọ́n pinpẹn yetọn dogọ.
14, 15. (a) Na apajlẹ mẹdelẹ tọn he diọ pọndohlan yetọn gando mẹdevo lẹ go? (b) Nawẹ mí sọgan hodo apajlẹ yetọn gbọn?
14 Biblu na mí apajlẹ dagbe mẹhe basi diọdo mọnkọtọn delẹ tọn, he apọsteli Pita yin dopo to yé mẹ. Taidi Ju de, Pita ma na ko jlo nado biọ owhé Kosi de tọn gbè. Pọ́n numọtolanmẹ he e na ko tindo to whenuena e yin bibiọ to e si nado yì dla owhé Kosi whẹmagbonọ lọ Kọneliọsi tọn pọ́n! Pita diọ nulẹnpọn etọn, na e yọnẹn dọ ojlo Jiwheyẹwhe tọn wẹ dọ gbẹtọ akọta lẹpo tọn ni lẹzun apadewhe agun Klistiani tọn. (Owalọ 10:9-35) Saulu, he wá lẹzun apọsteli Paulu lọsu dona basi diọdo delẹ nado de nuvẹun sẹ̀ sọn ahun etọn mẹ. E yigbe dọ emi gbẹwanna Klistiani lẹ sọmọ bọ emi “dohomẹkẹn agun Jiwheyẹwhe tọn zẹjlẹgo . . . bosọ gbà ẹ do.” Etomọṣo, whenuena Oklunọ Jesu gbẹnuna Paulu, e basi diọdo ayidego tọn lẹ bo tlẹ jẹ alọkẹyi anademẹ mẹhe e ko dohomẹkẹn dai lẹ tọn ji.—Gal. 1:13-20.
15 Ayihaawe ma tin dọ mí sọgan diọ pọndohlan mítọn po alọgọ gbigbọ Jehovah tọn po. Eyin mí doayi e go dọ ohia nuvẹun tọn delẹ gbẹ́ pò to ahun mítọn mẹ, mì gbọ mí ni dovivẹnu nado de yé sẹ̀ mlẹnmlẹn bo “nọ hẹn [gbigbọ] do dopo to pọninọ jijọho tọn mẹ.” (Efe. 4:3-6) Biblu na tuli mí nado “ze owanyi dogo, ehe yin pọninọ gbesisọ tọn.”—Kọl. 3:14.
Apajlẹ Jehovah Tọn Hihodo to Lizọnyizọn Mítọn Mẹ
16. Etẹwẹ ojlo Jiwheyẹwhe tọn na gbẹtọvi lẹ?
16 “Mẹhòpọ́n gbẹtọ tọn ma tin to Jiwheyẹwhe dè,” wẹ apọsteli Paulu wlan. (Lom. 2:11) Lẹndai Jehovah tọn wẹ nado kọ̀n gbẹtọ akọta lẹpo tọn dopọ to sinsẹ̀n-bibasi etọn mẹ. (Hia 1 Timoti 2:3, 4.) Nado hẹn lẹndai enẹ di, e ko basi tito na “wẹndagbe madopodo” lọ nido yin lilá “hlan akọta lẹpo, hlan hẹnnu lẹpo, hlan ogbè lẹpo, hlan gbẹtọ lẹpo.” (Osọhia 14:6) Jesu dọ dọ, “Ogle [lọ] wẹ aihọn.” (Mat. 13:38) Etẹwẹ enẹ zẹẹmẹdo na hiẹ po whẹndo towe po?
17. Nawẹ mí sọgan gọalọna gbẹtọ wunmẹ lẹpo gbọn?
17 E ma yin mẹlẹpo wẹ sọgan sẹtẹn yì otò dindẹn lẹ mẹ nado hẹn wẹndagbe Ahọluduta tọn lọ yì na mẹdevo lẹ gba. Etomọṣo, mí sọgan penugo nado hẹn wẹndagbe lọ yì na mẹhe wá sọn awa voovo lẹ ji bo nọ nọ̀ aigba-denamẹ mítọn ji lẹ. Be mí nọ yí dotẹnmẹ hundote lẹpo zan nado dekunnuna gbẹtọ wunmẹ lẹpo, kakati nido yin mẹhe mí ko to yẹwhehodọ na sọn owhe susu die lẹ kẹdẹ ya? Naegbọn hiẹ ma na magbe nado jẹ mẹhe ma ko mọ kunnudide gigọ́ yí lẹ dè?—Lom. 15:20, 21.
18. Ojlo tẹwẹ Jesu dohia to gbẹtọ lẹ mẹ?
18 Jesu tindo ojlo vẹkuvẹku nado gọalọna gbẹtọ wunmẹ lẹpo. E ma dọyẹwheho to lẹdo dopo poun mẹ gba. Kandai Biblu tọn de dọna mí dọ, e “zinzọnlin yì tòdaho po gbéta lẹ po mẹ pé.” Podọ enẹgodo, “whenuena e mọ agundaho lẹ, e wàlẹblanu na yé” bo zinnudo nuhudo lọ ji nado gọalọna yé.—Mat. 9:35-37.
19, 20. Aliho tẹlẹ mẹ wẹ mí sọgan do ojlo he Jehovah po Jesu po tindo na gbẹtọ wunmẹ lẹpo hia te?
19 Aliho tẹlẹ mẹ wẹ hiẹ sọgan do gbigbọ dopolọ hia te? Mẹdelẹ ko yí do basi yanwle yetọn nado nọ dekunnu to adà aigba-denamẹ yetọn tọn he ma nọ yin azọ́nwadeji whẹwhẹ lẹ ji. Ehe sọgan bẹ ajọwatẹn, ayidedaitẹn po húnglintẹn lẹ po hẹn kavi to nukọn owhé he gbè e nọ vẹawu nado biọ lẹ tọn. Mẹdevo lẹ ko dovivẹnu nado plọn ogbè devo nado sọgan dọyẹwheho na mẹhe wá sọn akọ̀ devo lẹ mẹ bo nọ nọ̀ aigba-denamẹ yetọn ji lẹ kavi na mẹhe ma nọ saba yin didlapọn dai lẹ. Pinplọn nado nọ dọnudo omẹ mọnkọtọn lẹ to ogbè yetọn titi mẹ sọgan dohia dọ hiẹ tindo ojlo to dagbemẹninọ yetọn mẹ taun. Eyin mí ma penugo nado plọn ogbè devo janwẹ, be mí sọgan na tuli mẹhe to mọwà lẹ ya? Na nugbo tọn, mí ma na jlo nado mọhodọ kavi fọ́n ayihaawe dote gando nuhewutu mẹdevo lẹ to vivẹnu mọnkọtọn lẹ do nado dọyẹwheho na mẹhe wá sọn otò devo mẹ lẹ go. Ogbẹ̀ mẹlẹpo tọn wẹ họakuẹ to nukun Jiwheyẹwhe tọn mẹ, podọ pọndohlan dopolọ wẹ mílọsu jlo na tindo.—Kọl. 3:10, 11.
20 Pọndohlan Jiwheyẹwhe tọn tintindo gando gbẹtọ lẹ go sọ zẹẹmẹdo yẹwhehodidọ na gbẹtọ lẹpo mahopọnna ninọmẹ yetọn. Mẹdelẹ sọgan nọma tindo ohọ̀ to ota, bo ma fẹ́awu, kavi e sọgan họnwun dọ yé to gbẹzan fẹnnuwiwa tọn zan. Eyin mẹdelẹ ma tlẹ yí mí ganji, enẹ ma dona hẹn mí nado tindo pọndohlan agọ̀ gando mẹhe wá sọn otò kavi akọ̀ yetọn mẹ lẹpo go to pọmẹ. Mẹdelẹ yinuwa hẹ Paulu po kanyinylan po, ṣogan e ma dike enẹ ni hẹn ẹn nado nọma dọyẹwheho na mẹhe wá sọn lẹdo enẹ mẹ lẹ gba. (Owalọ 14:5-7, 19-22) E deji dọ omẹ dopodopo delẹ na kẹalọyi owẹ̀n lọ.
21. Nawẹ pọndohlan Jehovah tọn tintindo gando mẹdevo lẹ go na gọalọna we gbọn?
21 E họnwun todin hugan gbede pọ́n dọ dandannu wẹ e yin nado tindo pọndohlan he sọgbe—yèdọ pọndohlan Jehovah tọn—to nuyiwa hẹ mẹmẹsunnu agun mítọn tọn lẹ, mẹmẹsunnu mítọn lẹ lẹdo aihọn pé, po mẹhe mí nọ dukosọ hẹ to lizọnyizọn lọ mẹ lẹ po mẹ. Lehe mí dovivẹnu nado do pọndohlan Jehovah tọn hia sọ, mọ wẹ mí na penugo nado yidogọna jijọho po pọninọ po do niyẹn. Podọ mí na pegan dogọ nado gọalọna mẹdevo lẹ nado yọ́n Jehovah, yèdọ Jiwheyẹwhe he ma nọ “hò nukunta . . . pọ́n” ṣigba he nọ do owanyi hia mẹlẹpo, “na azọ́n alọ etọn lẹ tọn wẹ yemẹpo.”—Job 34:19.
Be Hiẹ Sọgan Na Gblọndo Ya?
• Pọndohlan tẹwẹ mí dona dovivẹnu nado dapana gando mẹmẹsunnu mítọn lẹ go?
• Nawẹ mí sọgan hodo apajlẹ Jehovah tọn na nuhe dù nukun he mí nọ yí do pọ́n mẹdevo lẹ gbọn?
• Etẹlẹ wẹ hiẹ plọn gando nukun he mí dona nọ yí do pọ́n mẹmẹsunnu mítọn lẹ lẹdo aihọn pé go?
• Nawẹ mí sọgan hodo apajlẹ pọndohlan Jehovah tọn gando gbẹtọ lẹ go to lizọnyizọn lọ mẹ gbọn?
[Yẹdide to weda 26]
Nawẹ hiẹ sọgan jẹakọ hẹ mẹhe wá sọn aṣa devo mẹ lẹ gbọn?
[Yẹdide to weda 28]
Nawẹ hiẹ sọgan hẹn wẹndagbe lọ jẹ mẹsusu dè dogọ gbọn?