Dọnsẹpọ Jiwheyẹwhe
E Nọ Mọnukunnujẹ Awufiẹsa Mítọn lẹ Mẹ
“AWUVẸMẸ zẹẹmẹdo awufiẹsa towe to ahun ṣie mẹ.” Lehe mẹdehlan Kunnudetọ Jehovah tọn lẹ tọn mẹhomẹ de basi zẹẹmẹ jẹhẹnu họakuẹ ehe tọn do niyẹn. Jehovah Jiwheyẹwhe wẹ ze apajlẹ awuvẹmẹ tọn dai hugan. E nọ mọ awufiẹsa he omẹ etọn lẹ to oyà etọn ji to lanmẹ. Nawẹ mí sọgan kudeji gbọn dọ Jiwheyẹwhe nọ wàmọ? Awuvẹmẹ sisosiso Jehovah tọn sọawuhia mlẹnmlẹn to ohó po walọ Jesu tọn lẹ po mẹ to whenuena e tin to aigba ji. (Johanu 5:19) Di apajlẹ, lẹnnupọndo nujijọ he yin kinkàndai to Johanu 11:33-35 mẹ ji.
Whenuena họntọn Jesu tọn Lazalọsi wẹ́nkú, Jesu dedo gbétatò Lazalọsi tọn mẹ. Dile mí ko yọnẹn do, Malia po Malta po he yin nọviyọnnu Lazalọsi tọn lẹ gọ́ na awubla. Jesu yiwanna whẹndo ehe taun. (Johanu 11:5) Etẹwẹ Jesu na wà din? Kandai lọ dọmọ: “Whenuena Jesu mọ [Malia] to avihando, podọ Ju he wá po e po lẹ ga to avihando, [e wẹnhun, NW ] to gbigbọ mẹ, yè sọ hẹn ewlọsu jẹtukla. Bosọ dọmọ, Fie wẹ mì ko tẹ́ ẹ do? Yé dọ hlan ẹn, dọ, Oklunọ, wá pọ́n. Jesu viavi.” (Johanu 11:33-35) Naegbọn Jesu do viavi? Nugbo wẹ dọ họntọn vivẹ etọn Lazalọsi kú, ṣigba Jesu saa to linlẹn nado fọ́n ẹn. (Johanu 11:41-44) Eyin mọ wẹ, be nudevo wẹ sọ yinuwado Jesu ji ya?
Sọ vọ́ nulẹnpọndo wefọ he yin dide to aga lọ ji. Doayi e go dọ, whenuena Jesu mọ Malia po mẹhe lẹdo e lẹ po to avivi, e “wẹnhun” bọ “yè sọ hẹn ewlọsu jẹtukla.” Hogbe dowhenu tọn he yin yiyizan tofi lẹ dlẹnalọdo numọtolanmẹ sinsinyẹn.a Nuhe Jesu mọ whàn ẹn tlala. Dasin he wayi do e lẹ do numọtolanmẹ sinsinyẹn he e tindo hia. E họnwun dọ, awufiẹsa mẹdevo lẹ tọn biọlanmẹna Jesu. Be avi ko sọ́ wẹ pọ́n na mẹvivẹ towe de to avivi wutu ya?—Lomunu lẹ 12:15.
Awuvẹmẹ Jesu tọn plọn nususu mí gando jẹhẹnu po aliho nuyiwa Otọ́ etọn Jehovah tọn lẹ po go. Flindọ Jesu do jẹhẹnu Otọ́ etọn tọn lẹ hia to pipé mẹ sọmọ bọ e penugo nado dọ dọ: “Ewọ he ko mọ mi ko mọ Otọ́.” (Johanu 14:9) Enẹwutu, whenuena mí hia dọ Jesu “viavi,” mí sọgan deji dọ Jehovah nọ mọ awufiẹsa sinsẹ̀n-basitọ etọn lẹ tọn to lanmẹ. Na nugbo tọn, wekantọ Biblu tọn devo lẹ zinnudo ehe ji. (Isaia 63:9; Zekalia 2:8) Lehe Jehovah yin Jiwheyẹwhe awuvẹmẹtọ de do sọ!
Awuvẹmẹ nọ dọnmẹ. Whenuena mí gbọjọ kavi to apọ̀ mọ, nuyiwa mẹhe sọgan mọnukunnujẹ ninọmẹ mítọn mẹ bo vẹawu mí de tọn nọ dọ̀n mí. Nẹmunẹmu wẹ wá yin Jehovah tọn, yèdọ Jiwheyẹwhe awuvẹmẹtọ he nọ mọ awufiẹsa mítọn lẹ to lanmẹ bosọ nọ mọnukunnujẹ nuhewutu mí to avivi lẹ mẹ!—Psalm 56:8.
[Nudọnamẹ odò tọn]
a Hogbe Glẹki tọn he yin lilẹdo “viavi” tofi nọ saba zẹẹmẹdo “nado kùn dasin.” To vogbingbọn mẹ, hogbe he yin yiyizan nado dlẹnalọdo avi Malia po mẹdevo lẹ po tọn sọgan zẹẹmẹdo “nado viavi po awhá po, kavi nado doavigbe.”