Dọnsẹpọ Jiwheyẹwhe
Jiwheyẹwhe He Nọ Wleawufo Nado Jonamẹ
“HIẸ [Jehovah,] yin dagbe, bosọ nọ wleawu nado jona.” (Psalm 86:5) Po hogbe homẹmiọnnamẹ tọn enẹlẹ po, Biblu hẹn mí deji dọ jonamẹ Jehovah Jiwheyẹwhe tọn sù tlala. Numimọ he apọsteli Pita tindo to gbẹzan etọn mẹ de dohia hezeheze dọ Jehovah nọ jonamẹ “susugege.”—Isaia 55:7.
Pita yin dopo to gbẹdohẹmẹtọ Jesu tọn he sẹpọ ẹ hugan lẹ mẹ. Etomọṣo, to ozán godo tọn he Jesu yizan to aigba ji taidi gbẹtọvi de mẹ, Pita joawuna obu bo wà ylando sinsinyẹn de. To awánu de mẹ sẹpọ fie owhẹ̀ agọ̀ to yinyin didá na Jesu te, Pita gbẹ́ whla atọ̀n plipli to togunmẹ dọ emi ma yọ́n Jesu. To whenuena Pita mọ́n Jesu po nujikudo po whla atọ̀ntọ, Jesu “lẹgodo bo pọ́n Pita.” (Luku 22:55-61) Numọtolanmẹ tẹwẹ hiẹ lẹndọ Pita na ko tindo to whenuena nukun etọn dukosọ hẹ Jesu tọn? Pita mọ obá he mẹ ylando etọn sinyẹn jẹ, ehe hẹn ẹn blawu bọ e “ṣẹ avivi.” (Malku 14:72) Apọsteli he lẹnvọjọ lọ sọgan ko to nuhà dọ vlavo Jiwheyẹwhe ma na jona ẹn na e ko mọ́n Jesu whla atọ̀n wutu.
To fọnsọnku Jesu tọn godo, e tindo hodọdopọ de hẹ Pita, podọ ayihaawe ma tin dọ enẹ na ko na jide Pita dọ ewọ ko mọ jonamẹ yí. Jesu ma zan hogbe sinsinyẹn de na ẹn kavi gblewhẹdo e. Kakatimọ, e kanse Pita dọmọ: “Hiẹ yiwanna mi?” Pita sọ gblọn dọmọ: “Mọwẹ, Oklunọ; hiẹ yọnẹn dọ yẹn yiwanna we.” Jesu yidogọ dọmọ: “Yìn lẹngbọvu ṣie lẹ.” Jesu vọ́ kanbiọ lọ kanse whla awetọ, bọ Pita na gblọndo dopolọ, vlavo po nùzindonuji sinsinyẹn po. Jesu dọmọ: “Yìn lẹngbọ ṣie lẹ.” Enẹgodo e vọ́ kanbiọ dopolọ kanse whla atọ̀ntọ dọmọ: “Hiẹ yiwanna mi?” Todin, “Pita gblehomẹ” bo dọmọ: “Hiẹ yọ́n onú popo, Oklunọ; hiẹ yọnẹn dọ yẹn yiwanna we.” Jesu gblọn dọmọ: “Yìn lẹngbọ ṣie lẹ.”—Johanu 21:15-17.
Naegbọn Jesu do kàn kanbiọ ehelẹ sè to whenuena e ko yọ́n gblọndo yetọn? Jesu sọgan yọ́n nuhe tin to ahun gbẹtọ tọn mẹ, enẹwutu e yọnẹn dọ Pita yiwanna emi. (Malku 2:8) Gbọn kanbiọ enẹlẹ kinkanse dali, Jesu na dotẹnmẹ Pita nado vọ́ nùzindo owanyi he e tindo na Jesu ji whla atọ̀n. Hogbe he Jesu yizan lẹ dọ: “Yìn lẹngbọvu ṣie lẹ. . . . Yìn lẹngbọ ṣie lẹ. . . . Yìn lẹngbọ ṣie lẹ,” vọ́ jide na apọsteli he lẹnvọjọ lọ dọ Jesu gbẹ́ dejidego. Na nugbo tọn, Jesu to azọ́ndena Pita nado penukundo nutindo he họakuẹ tlala de go—yèdọ omẹ taidi lẹngbọ he yin hodotọ Jesu tọn vivẹ lẹ. (Johanu 10:14, 15) Matin ayihaawe, agbọ́ Pita tọn na ko jẹdò nado yọnẹn dọ Jesu gbẹ́ dejidego!
E họnwun dọ, Jesu jona apọsteli etọn he lẹnvọjọ lọ. To whenuena e yindọ Jesu nọ do jẹhẹnu po aliho nuyiwa Otọ́ etọn tọn lẹ po hia to pipé mẹ, mí sọgan wá tadona lọ kọ̀n po awubibọ po dọ Jehovah lọsu jona Pita. (Johanu 5:19) Jehovah ma nọ whleawu gbede nado jonamẹ, kakatimọ Jiwheyẹwhe lẹblanunọ de wẹ ewọ yin he nọ “wleawu nado jona” ylandonọ he lẹnvọjọ lẹ. Be e ma yin homẹmiọnnamẹnu de wẹ enẹ yin ya?