Ze Yanwle Jlẹkaji Tọn lẹ Donukọnna Dewe, bo Mọ Ayajẹ

“N’KO sọ gboawupo devo!” Whla nẹmu wẹ a ko yí hogbe mọnkọtọn lẹ zan na a ma penugo nado jẹ yanwle he a zedonukọnna dewe de kọ̀n wutu? Onọ̀ Klistiani jọja de sọgan tindo numọtolanmẹ mọnkọtọn na e to apọ̀ mọ na ayidonugo he viyẹyẹ etọn nọ to bibiọ gbọzangbọzan wutu, podọ na e to vivẹna ẹn dọ e ma nọ penugo nado na ayidonugo gbigbọnu lẹ sọmọ ba. Klistiani devo sọgan tindo numọtolanmẹ nugomape tọn na aliho he mẹ e yin pinplọn whẹ́n te wutu bo nọ lẹndọ emi ma tlẹ nọ pé nujọnu de go bo nọ wà to agun lọ mẹ. Mẹmẹyọnnu yọnhonọ de sọgan blawu dọ emi ma nọ penugo nado tindo mahẹ gigọ́ to nuwiwa Klistiani tọn lẹ mẹ dile emi nọ wà do to whenuena ogán gbẹ́ pò to emi go. Christiane he ninọmẹ whẹndo etọn tọn to aliglọnna ẹn nado wà nususu to sinsẹ̀nzọn Jehovah tọn mẹ dile e na ko jlo do dọmọ: “Hodidọ he na tuli gbehosọnalitọ bibasi de poun ko pé nado hẹn avi sọ́ mi.”

Nawẹ mí sọgan duto numọtolanmẹ mọnkọtọn lẹ ji gbọn? Nawẹ Klistiani delẹ ko penugo nado tindo pọndohlan jlẹkaji tọn gando ninọmẹ yetọn lẹ go gbọn? Ale tẹlẹ wẹ yanwle jlẹkaji tọn lẹ zizedonukọnna míde nọ hẹnwa?

Yin Lẹnpọn Dagbenọ

Apọsteli Paulu na mí ayinamẹ dagbe do lehe mí sọgan hẹn ayajẹ mítọn go gbọn ji, to whenuena e dọmọ: “Mì nọ jaya to Oklunọ mẹ whepoponu: yẹn sọ vọ́ dọ, Mì jaya. Mì gbọ homẹmimiọn [lẹnpọn dagbe, NW ] mìtọn ni zun yinyọnẹn hlan omẹ popo.” (Flp. 4:4, 5) Nado sọgan mọ ayajẹ po pekọ po to sinsẹ̀nzọn mítọn hlan Jiwheyẹwhe mẹ, mí dona ze yanwle jlẹkaji tọn lẹ donukọnna míde sọgbe hẹ nugopipe po ninọmẹ mítọn lẹ po. Eyin mí to tintẹnpọn nado jẹ yanwle he hugan mí lẹ kọ̀n mahopọnna nudepope he e sọgan biọ to mí si, mí na nọ do magbọjẹ he ma yin dandan na míde. To alọ devo mẹ, mí dona payi ma nado nọ vẹawu míde zẹjlẹgo bo nọ pọ́n do numadinu lẹ go nado dekanpona nuhe mí nọ wà to lizọnyizọn Klistiani tọn mẹ eyin e ma tlẹ biọ domọ.

Mahopọnna ninọmẹ mítọn lẹ, Jehovah nọ donukun dọ mí ni na ẹn dagbe hugan mítọn—enẹ wẹ nado nọ yí alindọn po ahun lẹpo po do sẹ̀n ẹn. (Kọl. 3:23, 24) Eyin mí gboawupo nado na dagbe hugan mítọn Jehovah, be mí ma to gbẹnọ sọgbe hẹ klandowiwe mítọn niyẹn. (Lom. 12:1) Humọ, mí na sú ali pekọ nujọnu tọn, ayajẹ daho, po dona susu devo he nọ wá sọn sinsẹ̀nzọn alindọn lẹpo tọn mẹ lẹ po tọn do míde.—Howh. 10:22.

Hogbe he yin lilẹdo “lẹnpọn dagbe” to Biblu mẹ bẹ linlẹn mẹtọnhopọn po awujonanu po tọn hẹn. Hogbe lọ sọ zẹẹmẹdo ma nado yin hẹngogonọ. Enẹwutu, eyin mí yin lẹnpọn dagbenọ, mí na penugo nado nọ tindo pọndohlan jlẹkaji tọn gando ninọmẹ mítọn lẹ go. Be enẹ vẹawu nado wà wẹ ya? E nọ vẹawuna mẹdelẹ, mahopọnna dọ yé nọ penugo nado hò mẹdevo lẹ tọn pọ́n. Di apajlẹ, eyin agbọ́ to pipé họntọn vivẹ mítọn de na e to ede yizan zẹjlẹgo wutu, be mí ma na tẹnpọn bo gọalọna ẹn nado mọdọ nuyọnẹnnu wẹ e na yin nado basi diọdo delẹ to gbẹzan etọn mẹ ya? Mọdopolọ, mí dona plọn nado nọ doayi ohia he sọgan hẹn mí yọnẹn dọ mí ko to dogbó mítọn go zẹ̀ lẹ go.—Howh. 11:17.

E sọgan sọ vẹawuna mí dogọ nado tindo pọndohlan jlẹkaji tọn gando nugopipe mítọn lẹ go eyin mẹjitọ hẹngogonọ lẹ wẹ plọn mí whẹ́n. Mẹdelẹ nọ tindo numọtolanmẹ lọ to ovu whenu yetọn dọ yé dona nọ wà susu dogọ kavi pọnte dogọ nado sọgan mọ owanyi mẹjitọ yetọn lẹ tọn. Eyin mọ wẹ ninọmẹ mítọn te do, mí sọgan tindo linlẹn agọ̀ gando nukun he Jehovah nọ yí do pọ́n mí go. Jehovah yiwanna mí na aliho he mẹ mí nọ yí ahun lẹpo do wà sinsẹ̀nzọn na ẹn te. Ohó Jiwheyẹwhe tọn na mí jide dọ Jehovah “yọ́n didá mítọn; e sọ flindọ kọ́gudu wẹ mí.” (Ps. 103:14) E yọ́n nugopipe mítọn lẹ podọ e nọ yiwanna mí eyin mí sẹ̀n ẹn po zohunhun po mahopọnna madogán mítọn lẹ. Eyin mí nọ flin dọ Jiwheyẹwhe mítọn ma taidi azọ́ngán hẹngogonọ de, enẹ na gọalọna mí nado yọ́n dogbó mítọn lẹ bo ma nọ donukun nususu sọn míde si zẹjlẹgo.—Mika 6:8.

Ṣogan, e nọ vẹawuna mẹdelẹ nado wleawuna pọndohlan jlẹkaji tọn mọnkọtọn. Eyin mọ wẹ e te na we, naegbọn hiẹ ma na dín alọgọ Klistiani numimọnọ he yọ́n we ganji de tọn? (Howh. 27:9) Di apajlẹ, be e nọ jlo we nado sẹ̀n taidi gbehosọnalitọ whepoponu tọn ya? Yanwle dagbe de wẹ enẹ yin! Be e vẹawuna we nado jẹ e kọ̀n wẹ ya? Vlavo hiẹ tindo nuhudo alọgọ tọn nado hẹn gbẹzan towe bọawu. Kavi họntọn dejidego towe he yin Klistiani de sọgan dọho hẹ we nado pọ́n eyin e sọgbe hẹ lẹnpọn dagbe dọ hiẹ ni doafọna yanwle gbehosọnalitọ whepoponu tọn po azọngban whẹndo tọn susu he a tindo lẹ po. Ewọ sọgan gọalọna we nado yọnẹn eyin azọngban he enẹ na bẹhẹn lẹ na pà we kavi nado yọ́n diọdo he sọgan gọalọna we nado wà susu dogọ. Asu de sọ tin to otẹn dagbe mẹ nado gọalọna asi etọn nado nọ nọ̀ jlẹkaji sọgbe hẹ nugopipe etọn lẹ. Di apajlẹ, e sọgan na ẹn ayinamẹ nado gbọjẹ ganji whẹpo do bẹ osun yọyọ he gọ́ na nuwiwa susu de jẹeji. Ehe sọgan gọalọna ẹn nado gọ̀ huhlọn mọyi bo hẹn ayajẹ etọn go to lizọnyizọn lọ mẹ.

Nọ Lẹnnupọndo Nuhe Hiẹ Sọgan Wà lẹ Ji

Yọnhowhe kavi azọ̀n sọgan de nuhe mí nọ penugo nado wà to sinsẹ̀nzọn Jehovah tọn mẹ pò. Eyin mẹjitọ de wẹ hiẹ yin, hiẹ sọgan tindo numọtolanmẹ lọ dọ a ma nọ mọaleyi sọmọ sọn oplọn mẹdetiti tọn po opli Klistiani tọn lẹ po mẹ na ovi towe lẹ nọ dù whenu na we bo ma nọ na we agbọ́ wutu. Ṣigba, be e sọgan yindọ ayidonugo zizedo dogbó towe lẹ ji zẹjlẹgo nọ glọnalina we to whedelẹnu nado mọ yanwle he kọ̀n a gbẹ́ sọgan jẹ lẹ wẹ ya?

To owhe fọtọ́n susu die wayi, Levinu de do ojlo hia to yanwle he kọ̀n e ma sọgan jẹ de mẹ. E tindo lẹblanulọkẹyi lọ nado nọ wadevizọn na osẹ awe to tẹmpli mẹ to whemẹwhemẹ. Ṣigba, e do ojlo dagbe lọ hia nado nọ nọ̀ agbà tẹmpli lọ tọn kọ̀n whepoponu. (Ps. 84:1-3) Etẹwẹ gọalọna Levinu nugbonọ ehe nado mọ pekọ? E mọnukunnujẹemẹ dọ azán dopo tata yiyizan to awánu tẹmpli lọ tọn lẹ mẹ ko yin lẹblanulọkẹyi vonọtaun de. (Ps. 84:4, 5, 10) Mọdopolọ, kakati nado nọ ze ayidonugo do dogbó mítọn lẹ ji, mí dona tẹnpọn nado nọ doayi yanwle he kọ̀n mí sọgan jẹ lẹ go bo nọ dopẹ́.

Pọ́n apajlẹ Nerlande tọn, mẹmẹyọnnu de to Canada. Kẹkẹ sẹkunọ lẹ tọn mẹ wẹ e nọ nọ̀ podọ e nọ mọdọ emi ma sọgan wà susu to lizọnyizọn lọ mẹ. Ṣigba, e diọ pọndohlan etọn gbọn nusatẹn he sẹpọ ẹ de yíyí do basi aigba-denamẹ etọn dali. E basi zẹẹmẹ dọ: “N’nọ sinai to kẹkẹ ṣie mẹ sẹpọ oján gaa nusatẹn lọ tọn de. Homẹ ṣie nọ hùn nado dekunnuna mẹhe wá sinai do oján lọ ji nado gbọjẹ lẹ.” Mahẹ tintindo to adà titengbe lizọnyizọn lọ tọn ehe mẹ nọ hẹn pekọ susu wá na Nerlande.

Basi Vọjlado lẹ Eyin E Biọ Domọ

Tọjihun de sọgan to yìyì po wezun po dile jẹhọn to alavọ etọn lẹ mẹ biọ. Ṣigba, eyin húnkùntọ he to anadena tọjihun lọ pehẹ yujẹhọn sinsinyẹn de, e nọ zun dandan na ẹn nado vọ́ alavọ lọ lẹ jlado. E ma sọgan deanana yujẹhọn lọ, ṣigba gbọn vọjlado delẹ bibasi dali, e sọgan gbẹ́ deanana tọjihun etọn. To aliho dopolọ mẹ, e ma nọ saba yọnbasi na mí nado deanana ninọmẹ sinsinyẹn he taidi yujẹhọn he mí nọ pehẹ to gbẹ̀mẹ lẹ. Ṣigba mí sọgan deanana gbẹzan mítọn jẹ obá de mẹ gbọn diọdo delẹ bibasi to aliho he mẹ mí nọ yí nugopipe agbasa, apọ̀nmẹ, po numọtolanmẹ tọn mítọn lẹ po zan te dali. Eyin mí nọ ze ninọmẹ yọyọ he mẹ mí mọ míde te lẹ do lẹnpọn mẹ, e na gọalọna mí nado hẹn pekọ po ayajẹ mítọn po go to sinsẹ̀nzọn Jiwheyẹwhe tọn mẹ.—Howh. 11:2.

Lẹnnupọndo apajlẹ delẹ ji. Eyin ogán ma pò to mí go sọmọ, mí sọgan mọ ẹn taidi nuhe sọgbe nado dapana azọ́n sinsinyẹn wiwà to azán de ji nado sọgan mọ huhlọn nado yì opli Klistiani tọn de to whèjai. Ehe na gọalọna mí nado mọaleyi to gigọ́ mẹ sọn gbẹdido hẹ Klistiani hatọ lẹ mẹ. Kavi eyin mẹmẹyọnnu de ma penugo nado tindo mahẹ to lizọnyizọn whédegbè jẹ whédegbè tọn mẹ na ovi etọn to azọ̀njẹ wutu, e sọgan yọ́n dọ e ni basi oylọna mẹmẹyọnnu devo po plọnmẹ Biblu etọn lẹ po wá owhé etọn gbè nado sọgan tindo mahẹ to hodọdopọ lọ mẹ to whenuena ovi etọn to amlọndọ.

Eyin ninọmẹ towe lẹ ma nọ hẹn ẹn yọnbasi na we nado plọn hosọ he na yin dogbapọnna to opli agun tọn ji lẹpo jẹnukọn lo? Hiẹ sọgan de dehe a na penugo nado wleawuna lẹ bo wleawuna yé ganji dile e sọgan yọnbasi do. Gbọn yanwle tintan mítọn lẹ vivọjlado dali, mí sọgan hẹn zohunhun po ayajẹ mítọn po go.

E sọgan biọ gbemima po vivẹnudido po nado vọ́ yanwle mítọn lẹ jlado. Serge po Agnès po, asu po asi po Flansenu de to dandannu glọ nado basi diọdo titengbe de. “Whenuena Agnès mọhò, mí mọdọ mí ma sọgan sọ jẹ yanwle mítọn nado lẹzun mẹdehlan kọ̀n ba,” wẹ Serge dọ. Todin he e ko tindo viyọnnu dagbedagbe awe, Serge basi zẹẹmẹ lehe yé ze yanwle yọyọ de donukọnna yede do tọn. E dọmọ: “To whenuena e yindọ mí ma sọgan sẹ̀n to tògodo ba, mí magbe nado yin ‘mẹdehlan’ to otò mítọn titi mẹ. Mí kọnawudopọ hẹ kándo he nọ do jonọgbè de.” Be yé mọaleyi sọn yanwle yọyọ ehe mẹ ya? Serge dọmọ: “Mí mọdọ mí yọ́n-na-yizan taun to agun lọ mẹ.”

Odile, mẹmẹyọnnu Flansenu he ko tindo owhe 70 linlán bosọ to azọ̀n húdu tọn jẹ de ma sọgan nọ nọte na ojlẹ dindẹn. Apọ̀ nọ ṣì i dọ nuhahun agbasalilo tọn etọn glọnalina ẹn nado tindo mahẹ to lizọnyizọn whédegbè jẹ whédegbè tọn mẹ. Ṣigba, e ma gbọjọ. E basi vọjlado to nuwiwa etọn lẹ mẹ bo nọ dekunnu to alokan ji. E dọmọ: “E bọawu bosọ vivi hugan lehe n’lẹn do!” Aliho yẹwhehodidọ tọn ehe vọ́ zodolanmẹna ẹn to lizọnyizọn lọ mẹ.

Yanwle Jlẹkaji Tọn lẹ Nọ Hẹn Dona Susu Wá

Pọndohlan jlẹkaji tọn tintindo gando nuhe mí sọgan wà lẹ go na de mí sọn flumẹjijẹ susu mẹ. Eyin mí nọ ze yanwle jlẹkaji tọn lẹ donukọnna míde, mí na tindo numọtolanmẹ nuwadotana tọn mahopọnna madogán mítọn lẹ. Gbọnmọ dali, mí na mọ ayajẹ to nuhe mí penugo nado wadotana mẹ, eyin etlẹ whè.—Gal. 6:4.

Eyin mí yin jlẹkajinọ to nuhe mí nọ donukun sọn míde si mẹ, enẹ na gọalọna mí nado nọ hò Klistiani hatọ mítọn lẹ tọn pọ́n dogọ. Madogán yetọn lẹ yinyọnẹn na hẹn mí penugo nado nọ yọ́n pinpẹn nuhe yé wà na mí lẹ tọn to whepoponu. Eyin mí nọ yọ́n pinpẹn alọgọ depope he mí mọyi tọn, mí na yidogọna gbigbọ gbekọndopọ tọn bo nọ mọnukunnujẹ ninọmẹ ode awetọ tọn mẹ. (1 Pita 3:8) Flindọ, taidi Otọ́ owanyinọ de, Jehovah ma nọ biọ nususu to mí si hugan nuhe mí sọgan wà pọ́n gbede. Podọ eyin mí tindo pọndohlan jlẹkaji tọn bo nọ ze yanwle he sọgbe hẹ lẹnpọn dagbe lẹ donukọnna míde, nuwiwa gbigbọmẹ tọn mítọn lẹ na hẹn pekọ po ayajẹ po wá na mí dogọ.

[Blurb on page 29]

Nado sọgan mọ ayajẹ po pekọ po to sinsẹ̀nzọn mítọn hlan Jiwheyẹwhe mẹ, mí dona ze yanwle jlẹkaji tọn lẹ donukọnna míde sọgbe hẹ nugopipe po ninọmẹ mítọn lẹ po

[Yẹdide to weda 30]

Nerlande nọ mọ ayajẹ gbọn nuhe go e pé wiwà to lizọnyizọn lọ mẹ dali

[Yẹdide to weda 31]

Plọn nado nọ “jla alavọ towe do”

[Asisa Yẹdide tọn]

© Wave Royalty Free/age fotostock

[Yẹdide to weda 32]

Serge po Agnès po mọaleyi sọn yanwle yọyọ yetọn lẹ mẹ