Nuhe Jesu Plọn Mí

Gando Lehe Mí Dona Nọ Yinuwa hẹ Mẹdevo lẹ do Go

Naegbọn mí dona nọ do homẹdagbe hia?

Be hiẹ nọ do homẹdagbe hia eyin mẹdevo lẹ ma tlẹ nọ do homẹdagbe hia we ya? Eyin mí jlo na hodo apajlẹ Jesu tọn, mí dona nọ do homẹdagbe hia mẹdevo lẹ, etlẹ yin mẹhe gbẹwanna mí lẹ. Jesu dọmọ: “Eyin mì yiwanna yé he yiwanna mì, opẹ́ tẹwẹ mì do? Na ylandonọ lẹ nọ yiwanna yé he yiwanna yé lẹ ga. . . . Ṣigba mì ni yiwanna kẹntọ mìtọn lẹ . . . , podọ mì nasọ yin visunnu Gigogán tọn lẹ: na ewọ yin dagbenọ [kavi homẹdagbenọ] hlan mayọndagbenọ po mẹylankan po.”—Luku 6:32-36; 10:25-37.

Naegbọn mí dona nọ jonamẹ?

Eyin mí ṣinuwa, mí nọ jlo dọ Jiwheyẹwhe ni jona mí. Jesu plọn mí dọ nuhe sọgbe wẹ e yin nado nọ biọ jona ylando mítọn lẹ tọn Jiwheyẹwhe to odẹ̀ mẹ. (Matiu 6:12) Ṣigba, Jesu sọ dọ dọ Jiwheyẹwhe na jona mí kiki eyin mí nọ jona mẹdevo lẹ. E dọmọ: “Eyin mì jona gbẹtọ lẹ ylando yetọn lẹ, Otọ́ mìtọn olọn tọn nasọ jona mì ga: ṣigba eyin mì ma jona gbẹtọ lẹ, Otọ́ mìtọn ma na jona ylando mìtọn.”—Matiu 6:14, 15.

Nawẹ whẹndo lẹ sọgan tindo ayajẹ gbọn?

Dile etlẹ yindọ Jesu ma wlealọ pọ́n, mí sọgan plọn nususu sọn e dè gando lehe whẹndo de sọgan yin ayajẹnọ do go. To ohó po walọ etọn lẹ po mẹ, e ze apajlẹ dai na mí. Lẹnnupọndo nuagokun atọ̀n he bọdego ehelẹ ji:

1. Asu de dona yiwanna asi etọn taidi agbasa edetiti tọn. Jesu ze apajlẹ dai na asu lẹ. E dọna devi etọn lẹ dọmọ: “Osẹ́n yọyọ de wẹ yẹn na hlan mì, dọ mì ni yiwanna mìnọzo.” Jẹ obá tẹ mẹ? “Dile yẹn yiwanna mì [do],” wẹ e dọ. (Johanu 13:34) Biblu yí nunọwhinnusẹ́n ehe zan na asu lẹ bo dọmọ: “Mì asu lẹ emi, mì yiwanna asi mìtọn lẹ, yèdọ dile Klisti ga yiwanna agun lọ do, bosọ yí ede na ẹn . . . Mọkẹdẹ wẹ e jẹna asu lẹ ni nọ yiwanna asi yetọn lẹ kẹdẹdi agbasa yede tọn. Mẹhe yiwanna asi etọn, e yiwanna ede. Na mẹhe gbẹwanna agbasalan ede tọn de ma tin gbede; adavo ni to yìnyìn in, bosọ to yẹyiwlena ẹn, yèdọ dile Klisti ga nọ basi na agun do.”—Efesunu lẹ 5:25, 28, 29.

2. Alọwlemẹ lẹ dona yin nugbonọ na ode awetọ. Kọndopọ zanhẹmẹ tọn tintindo to gbonu alọwle tọn yin ylando de do Jiwheyẹwhe bosọ nọ gbà whẹndo lẹ kija. Jesu dọmọ: “Be mìwlẹ ma ko hia . . . Na ehe tọn wẹ sunnu na jo otọ́ po onọ̀ etọn po dai, bo na sẹbọdo asi etọn dè: yé omẹ awe lẹ nasọ lẹzun agbasalan dopo. Sọmọ yé masọ yin omẹ awe ba gba, adavo agbasalan dopo. Enẹwutu, nuhe Jiwheyẹwhe kọndopọ mì dike gbẹtọ klan ẹn blo. . . . Yẹn sọ dọ hlan, mì, Mẹdepope he na jo asi etọn dai, adavo na whẹho galilọ tọn, bosọ wlealọ hẹ devo, e deayọ.”—Matiu 19:4-9.

3. Ovi lẹ dona nọ litaina mẹjitọ yetọn lẹ. Dile etlẹ yindọ Jesu yin gbẹtọ pipé bọ mẹjitọ etọn lẹ yin mapenọ, e setonuna yé to whenuena e tin to ovu. Biblu dọ gando Jesu go to whenuena e tindo owhe 12 dọmọ: “E sọ jẹte hodo yé [mẹjitọ etọn lẹ] yì, bo wá Nazalẹti, bosọ whiwhẹ ede dai hlan yé.”—Luku 2:51; Efesunu lẹ 6:1-3.

Naegbọn mí dona nọ yí nunọwhinnusẹ́n ehelẹ do yizan mẹ?

Gando nuhe e plọn devi etọn lẹ go, Jesu dọmọ: “Eyin mì yọ́n onú helẹ, donanọ wẹ mì eyin mì basi yé.” (Johanu 13:17) Eyin mí na yin Klistiani nugbo de, mí dona nọ hodo ayinamẹ he Jesu na gando lehe mí dona nọ yinuwa hẹ mẹdevo lẹ do go. E dọmọ: “Gbọn ehe dali wẹ gbẹtọ lẹpo na yọnẹn dọ nuplọntọ ṣie wẹ mì, eyin mìwlẹ tindo owanyi hlan mìnọzo.”—Johanu 13:35.

Na nudọnamẹ dogọ, pọ́n weta 14 to owe lọ Etẹwẹ Biblu Plọn Mí Taun?a mẹ.

[Nudọnamẹ odò tọn]

[Yẹdide to weda 18, 19]

Oló Jesu tọn gando visunnu duvanọ lọ go plọn mí nujọnu-yinyin homẹdagbe didohia po jonamẹ po tọn.—Luku 15:11-32

[Yẹdide to weda 19]

Alọwlemẹ lẹ dona yin nugbonọ na ode awetọ