Plọn Ovi Towe Lẹ

Samuẹli Zindonukọn Nado to Nuhe Sọgbe Wà

BE MẸDEVO lẹ ko wà nuhe ylan to nukun towe mẹ pọ́n ya?—a Samuẹli ko mọ onú mọnkọtọn pọ́n. Ewọ nọgbẹ̀ to fie hiẹ ma na lẹn gbede dọ onú mọnkọtọn lẹ na jọ te. Gòhọtúntún kavi nọtẹn sinsẹ̀n-bibasi Jiwheyẹwhe tọn mẹ wẹ enẹ jọ te, to tòdaho Ṣilo tọn mẹ. Gbọ mí ni pọ́n lehe gòhọtúntún lọ wá lẹzun fie Samuẹli nọ nọ̀ to nuhe hugan owhe 3 000 die wayi gbọn.

Whẹpo Samuẹli do yin jiji, onọ̀ etọn Hanna ko dín ovi kaka bo ma mọ. Whenue e yì gòhọtúntún lọ mẹ to gbèdopo, Hanna hodẹ̀ hlan Jiwheyẹwhe do whẹho enẹ ji. Ewọ to dẹ̀ho vẹkuvẹku sọmọ bọ nùflo etọn lẹ to whinwhàn. Ehe zọ́n bọ Eli, yẹwhenọ daho lọ lẹndọ ahàn wẹ e nùmú. Ṣigba, to whenuena e wá mọdọ awubla sinsinyẹn mẹ wẹ Hanna tin te kakati ni yindọ ahàn wẹ e nùmú, Eli dona ẹn po hogbe ehelẹ po dọmọ: “Jiwheyẹwhe Islaeli tọn ni sọ kanbiọ towe he hiẹ biọ sọn e si na we.”—1 Samuẹli 1:17.

Enẹgodo, Samuẹli yin jiji podọ enẹ hẹn homẹhun Hanna sọmọ bọ e dọna asu etọn Ẹlkana dọ: ‘Eyin yẹn deanọna Samuẹli tlolo, yẹn na hẹn ẹn yì gòhọtúntún mẹ na e nido nọ sẹ̀n Jiwheyẹwhe to finẹ.’ Podọ nuhe e wà lọ niyẹn! To whenẹnu, Samuẹli sọgan ko tindo owhe ẹnẹ kavi atọ́n.

Eli ko poyọnho, podọ visunnu etọn Họfini po Finehasi po ma to Jehovah sẹ̀n to aliho he sọgbe mẹ. Yé tlẹ nọ tindo kọndopọ zanhẹmẹ tọn hẹ yọnnu he nọ wá gòhọtúntún lọ mẹ lẹ! Etẹwẹ a lẹndọ otọ́ yetọn dona ko wà?— Mọwẹ, ewọ dona ko gbẹnuna yé ma nado wà nuhe ylan.

Gòhọtúntún mẹ wẹ Samuẹli whẹ́n te, podọ e yọnbasi dọ e ni ko yọnẹn dogbọn walọ ylankan visunnu Eli tọn lẹ dali. Be Samuẹli hodo apajlẹ ylankan yetọn wẹ ya?— Lala, e zindonukọn nado to nuhe sọgbe wà, kẹdẹdile mẹjitọ etọn lẹ plọn ẹn do. Ṣigba e ma paṣa mí dọ Jehovah gblehomẹ do Eli go. E tlẹ do yẹwhegán de hlan nado dọna Eli lehe E na sayana whẹndo etọn do, titengbe visunnu etọn lẹ.—1 Samuẹli 2:22-36.

Samuẹli zindonukọn nado to devizọnwa to gòhọtúntún lọ mẹ po Eli po. Ṣigba to zánmẹ gbèdopo, whenuena Samuẹli to amlọndọ, ogbè de ylọ oyín etọn. Enẹwutu, Samuẹli họ̀nwezun yì Eli dè, ṣigba Eli dọna ẹn dọ emi ma ylọ ẹ gba. E sọ vọ́ ogbè lọ sè, bo lẹkọyi Eli dè whla awetọ. Whenuena nudopolọ sọ jọ whla atọ̀ntọ, Eli dọna Samuẹli nado gblọn dọ, “To hodọ, OKLUNỌ; na devi towe to sisè.” Whenuena Samuẹli dọ mọ, Jehovah dọhona ẹn. Be a yọ́n nuhe Jehovah dọna Samuẹli ya?—

Jiwheyẹwhe sọ vọ́ linlẹn etọn nado sayana whẹndo Eli tọn dọna Samuẹli dile e ko dọna yẹwhegán lọ do. To wunkẹngbe, obu di Samuẹli nado dọ nuhe Jehovah dọna ẹn lọ na Eli. Ṣigba Eli vẹ̀ Samuẹli dọmọ: “Yẹn vẹ̀ we a sọ ẹ whlá do mi blo.” Enẹwutu, Samuẹli dọ nuhe Jehovah dọ emi na wà lẹpo na Eli, pẹpẹ dile yẹwhegán Etọn ko dọna ẹn do jẹnukọn. Eli gblọn dọmọ: “Gbọ e [Jehovah] ni wà nuhe sọawuhia dagbe na ẹn.” To godo mẹ, Họfini po Finehasi po yin hùhù, bọ Eli lọsu kú.—1 Samuẹli 3:1-18.

To ojlẹ enẹlẹ gblamẹ, “Samuẹli sọ whẹ́n, OKLUNỌ sọ tin po e po.” To whenẹnu, Samuẹli sọgan ko lẹzun aflanmẹ de, yèdọ ojlẹ titengbe de to gbẹzan jọja lẹ tọn mẹ. Be a lẹndọ e bọawuna Samuẹli nado to nuhe sọgbe wà mahopọnna dọ mẹdevo lẹ ma to mọ wà ya?— Dile e ma tlẹ bọawuna Samuẹli, e yí pipotọ gbẹzan etọn tọn do sẹ̀n Jehovah po nugbonọ-yinyin po.—1 Samuẹli 3:19-21.

Hiẹ lo? Be hiẹ na hodo apajlẹ Samuẹli tọn dile a to whinwhẹ́n ya? Be hiẹ na zindonukọn nado to nuhe sọgbe wà ya? Be hiẹ na gbẹ́ to tonusena nuplọnmẹ Biblu tọn lẹ po nuhe mẹjitọ towe lẹ nọ plọn we po ya? Eyin hiẹ wàmọ, hiẹ na hẹn homẹ Jehovah po mẹjitọ towe lẹ po tọn hùn.

[Nudọnamẹ odò tọn]

Kanbiọ Lẹ:

○ Nawẹ Samuẹli wá jẹ devizọnwa ji to gòhọtúntún Jehovah tọn mẹ gbọn?

○ Nuhahun tẹlẹ wẹ Samuẹli pehẹ to finẹ?

○ Apajlẹ tẹwẹ Samuẹli zedai na jọja lẹ?