Dọnsẹpọ Jiwheyẹwhe

“Jiwheyẹwhe Homẹmimiọn Lẹpo Tọn”

2 Kọlintinu lẹ 1:3, 4

NUHAHUN susu—taidi yajiji, flumẹjijẹ po ṣokẹdẹninọ po—wẹ sọgan hẹn awubla, kavi todido matindo wá to gbẹ̀mẹ. To ojlẹ mọnkọtọn lẹ mẹ, hiẹ sọgan kanse dọ, ‘Fie wẹ n’sọgan lẹhlan na alọgọ?’ Hogbe apọsteli Paulu tọn he tin to 2 Kọlintinu lẹ 1:3, 4 mẹ lẹ dlẹnalọdo asisa homẹmimiọn tọn de, he ma nọ gboawupo—yèdọ Jehovah Jiwheyẹwhe.

To wefọ 3tọ mẹ, Jiwheyẹwhe yin yiylọdọ “Otọ́ lẹblanu lẹ tọn.” Etẹwẹ enẹ zẹẹmẹdo? Hogbe Glẹki tọn he yin lilẹdo “lẹblanu” tofi sọgan zẹẹmẹdo nado vẹawu mẹhe to yaji lẹ.a Owe he basi zẹẹmẹ do Biblu ji de dọ dọ hogbe ehe sọgan yin lilẹdo “nado tindo awubla” kavi “nado hò mẹde tọn pọ́n taun.” “Lẹblanu” Jiwheyẹwhe tọn nọ whàn ẹn nado yinuwa. Jẹhẹnu Jiwheyẹwhe tọn ehe yinyọnẹn nọ zọ́n bọ mí nọ jlo nado dọnsẹpọ ẹ, kavi e ma yin mọ wẹ?

Paulu sọ dlẹnalọdo Jehovah taidi “Jiwheyẹwhe homẹmimiọn lẹpo tọn.” Mẹdelẹ dọ dọ hogbe he Paulu yizan tofi sọgan bẹ “linlẹn lọ nado doalọakọ́nji na mẹhe to nuhahun kavi awubla mẹ de podọ linlẹn lọ nado yí nude wà nado gọalọ kavi na tuli mẹlọ” hẹn. The Interpreter’s Bible basi zẹẹmẹ dọ: “Mí nọ miọnhomẹna mẹhe to yaji de to whenuena mí na ẹn tuli nado doakọnna awufiẹsa etọn.”

Hiẹ sọgan kanse dọ, ‘Nawẹ Jiwheyẹwhe nọ miọnhomẹna mí bosọ nọ na tuli mí nado doakọnna awufiẹsa mítọn lẹ gbọn?’ Na taun tọn, e nọ wàmọ gbọn Ohó etọn, Biblu gblamẹ podọ gbọn odẹ̀ gblamẹ. Paulu dọna mí dọ Jiwheyẹwhe gbọn owanyi dali na mí Ohó Etọn na “míwlẹ gbọn homẹfa po homẹmiọn Owe-wiwe lẹ tọn po dali nido tindo otodo.” Humọ, gbọn odẹ̀ ahundopo tọn lẹ gblamẹ, mí sọgan tindo “jijọho Jiwheyẹwhe tọn he hú nuyọnẹn lẹpo.”—Lomunu lẹ 15:4; Filippinu lẹ 4:7.

Obá tẹ mẹ wẹ Jehovah nọ miọnhomẹna omẹ etọn lẹ jẹ? Paulu dọ dọ Jiwheyẹwhe nọ ‘miọnhomẹna mí to tukla mítọn lẹpo mẹ.’ (2 Kọlintinu lẹ 1:4) Mahopọnna kọgbidinamẹnu, awufiẹsa kavi yajiji he mí sọgan to pipehẹ, Jiwheyẹwhe sọgan na mí tuli bosọ na mí huhlọn he jẹ nado doakọnna. Be enẹ ma vọ́ jidenamẹ ya?

Homẹmiọnnamẹ Jiwheyẹwhe tọn ma nọ nọte do mẹhe ewọ to homẹmiọnna lọ kẹdẹ ji gba. Paulu zindonukọn dọ Jiwheyẹwhe nọ miọnhomẹna mí na “míwlẹ nido miọnhomẹna yé he tin to tukla depope mẹ lẹ, gbọn homẹmimiọn he mẹ yè miọnhomẹna mílọsu sọn Jiwheyẹwhe dè.” To whenuena mí mọ homẹmiọnnamẹ yí to tukla mítọn lẹ mẹ, enẹ nọ gọalọna mí nado vẹawu mẹdevo lẹ bo yin whinwhàn nado gọalọna mẹhe tin to nuhudo mẹ lẹ.

Taidi “Jiwheyẹwhe homẹmimiọn lẹpo tọn,” Jehovah ma nọ de nuhahun kavi awufiẹsa mítọn lẹ sẹ̀ dandan gba. Etomọṣo, mí sọgan deji dọ, eyin mí lẹhlan ẹn na homẹmimiọn, ewọ sọgan na mí huhlọn nado doakọnna awubla kavi nuhahun depope he mí sọgan pehẹ to gbẹ̀mẹ. Na jide tọn, Jiwheyẹwhe awuvẹmẹtọ mọnkọtọn jẹna pipà po sinsẹ̀n-bibasi mítọn po.

[Nudọnamẹ odò tọn]