Hodo Apajlẹ Jesu Tọn—Sẹ̀n Jiwheyẹwhe to Aliho He Sọgbe Mẹ

Jiwheyẹwhe gbọn owanyi dali to oylọ basina gbẹtọ lẹ “sọn akọta lẹpo mẹ, sọn hẹnnu lẹpo mẹ, sọn gbẹtọ lẹpo mẹ, podọ sọn ogbè lẹpo mẹ” nado sẹ̀n ẹn. (Osọhia 7:9, 10; 15:3, 4) Mẹhe kẹalọyi oylọ-basinamẹ ehe lẹpo sọgan “nọ pọ́n whanpẹ OKLUNỌ tọn” hlan. (Ps. 27:4; 90:17) Taidi psalm-kàntọ lọ, yé nọ ze ogbè yetọn lẹ daga nado pà Jiwheyẹwhe dọmọ: “Mì gbọ mí ni dẹ́ bo sẹ̀n: mì gbọ mí ni jẹklo to OKLUNỌ Basitọ mítọn nukọn.”—Ps. 95:6.

Sinsẹ̀n-Bibasi He Jehovah Nọ Yí Nukun Nujọnu Tọn do Pọ́n

Taidi Ovi detọ́n dopo akàn Jiwheyẹwhe tọn, Jesu tindo dotẹnmẹ hundote susu nado plọn linlẹn, nunọwhinnusẹ́n po nujinọtedo Otọ́ etọn tọn lẹ po. Gbọnmọ dali, Jesu sọgan do aliho he sọgbe lọ nado sẹ̀n Jehovah hia po nujikudo po. E dọmọ: “Yẹn wẹ aliho lọ, nugbo, po ogbẹ̀ po; mẹde ma sọgan wá Otọ́ dè, adavo gbọn yẹn dali.”—Joh. 1:14; 14:6.

Jesu ze apajlẹ pipé dai na nuhe dù whiwhẹ yíyí do litaina Otọ́ etọn. E dọmọ: “Yẹn ma wà nude na dee; ṣigba le Otọ́ ṣie plọn mi do, wẹ yẹn to onú helẹ dọ.” E sọ yidogọ dọmọ: “Yẹn to nuhe yin homẹhun hlan ẹn lẹ wà to whepoponu.” (Joh. 8:28, 29) Aliho tẹlẹ mẹ wẹ Jesu hẹn homẹhun Otọ́ etọn te?

Aliho dopo wẹ yindọ, Jesu ze ede jo na Otọ́ etọn mlẹnmlẹn, podọ nuhe sinsẹ̀n-bibasi hlan Jiwheyẹwhe zẹẹmẹdo na taun tọn niyẹn. Jesu do haṣinṣan pẹkipẹki he e tindo hẹ Otọ́ etọn hia gbọn tonusisena Ẹn po ojlo Etọn wiwà po dali, eyin etlẹ vẹawuna ẹn tlala nado wàmọ. (Flp. 2:7, 8) Adà titengbe dopo to sinsẹ̀n-bibasi Jesu tọn mẹ wẹ yindọ e nọ tindo mahẹ gbesisọ tọn to azọ́n mẹhẹnzun devi tọn mẹ, jẹ obá lọ mẹ bọ mẹlẹpo, yèdọ yisenọ lẹ po mayisenọ lẹ po, nọ ylọ ẹ dọ Mẹplọntọ. (Mat. 22:23, 24; Joh. 3:2) Humọ, Jesu yí ede zan do mẹdevo lẹ tamẹ. Gbigbọ mẹde-yido-sanvọ́ tọn etọn zọ́n bọ e ma nọ mọ whenu na ede sọmọ, ṣigba homẹ etọn nọ hùn nado yilizọn na mẹdevo lẹ. (Mat. 14:13, 14; 20:28) Mahopọnna dọ alọnu Jesu tọn nọ ján, e nọ dín whenu nado dọhona Otọ́ olọn mẹ tọn etọn to odẹ̀ mẹ to whepoponu. (Luku 6:12) Lehe sinsẹ̀n-bibasi Jesu tọn họakuẹ to nukun Jiwheyẹwhe tọn mẹ do sọ!

Vivẹnudido Nado Hẹn Homẹ Jiwheyẹwhe Tọn Hùn

Jehovah doayi walọyizan Ovi etọn tọn go bosọ do alọkẹyi Etọn hia. (Mat. 17:5) Ṣigba, Satani Lẹgba lọsu doayi nugbonọ-yinyin Jesu tọn go. Enẹwutu, Satani jẹ ogbé etọn yàn ji klinkán-klinkán. Etẹwutu? Na gbẹtọvi depope ma ko penugo nado setonuna Jiwheyẹwhe mlẹnmlẹn, bo gbọnmọ dali sẹ̀n ẹn to gigọ́ mẹ pọ́n. Podọ Lẹgba jlo na glọnalina Jesu nado basi sinsẹ̀n he Jehovah kẹdẹ jẹna lọ hlan ẹn.—Osọhia 4:11.

To vivẹnudido mẹ nado hẹn Jesu dahli, Satani dọnsẹpọ ẹ po nuzedonukọnnamẹ yẹdoklọmẹ tọn de po. E plan Jesu yì “osó he yiaga de ji, bosọ do ahọluigba aihọn tọn lẹpo, po gigo yetọn po hia ẹ.” Enẹgodo e dọmọ: “Onú ehe lẹpo wẹ yẹn na na we, eyin hiẹ na jẹklo bo litaina mi.” Nawẹ Jesu yinuwa gbọn? E dọmọ: “Tọ́n sọn ofi, Satani: na yè wlanwe etọn dọ, Hiẹ na litaina [Jehovah] Jiwheyẹwhe towe, ewọ dopo kẹdẹ wẹ hiẹ na nọ sẹ̀n.” (Mat. 4:8-10) Mọwẹ, Jesu yọnẹn dọ boṣiọ-sinsẹ̀n wẹ e na yin nado litaina Satani mahopọnna ale depope he e sọgan taidi dọ enẹ na hẹnwa. E ma jlo na basi nuyiwa sinsẹ̀n tọn dopo tata na mẹdevo depope adavo Jehovah.

Na míwlẹ, Satani sọgan nọma ze ahọluduta aihọn tọn lẹ po gigo yetọn lẹpo po donukọnna mí nado mọ sinsẹ̀n-bibasi mítọn yí. Ṣigba, e gbẹ́ to vivẹnudo nado hẹn sinsẹ̀n-bibasi he Klistiani ahundoponọ lẹ nọ basi hlan Jiwheyẹwhe gblezọn. Ojlo Lẹgba tọn wẹ yindọ mí ni basi sinsẹ̀n hlan mẹdevo kavi nudevo.—2 Kọl. 4:4.

Klisti Jesu do ede hia nado yin nugbonọ kakajẹ okú. Gbọn tenọglinọ-yinyin etọn na Jiwheyẹwhe dali, Jesu pagigona Jehovah to aliho he mẹ gbẹtọvi de ma ko wàmọ te pọ́n. Na nuhe dù Klistiani nugbo lẹ to egbehe, mí nọ dovivẹnu nado hodo apajlẹ nugbonọ-yinyin Jesu tọn gbọn sinsẹ̀n-bibasi mítọn hlan Mẹdatọ lọ zizedo otẹn tintan mẹ hú nudevo depope dali. Na nugbo tọn, haṣinṣan dagbe mítọn hẹ Jiwheyẹwhe wẹ yin nutindo he họakuẹ na mí hugan.

Dona He Nọ Wá sọn Sinsẹ̀n-Bibasi He Sọgbe mẹ Lẹ

Godoninọna sinsẹ̀n-bibasi he Jiwheyẹwhe nọ pọnhlan taidi “wiwe magble” nọ hẹn dona susu wá. (Jak. 1:27) Di apajlẹ, mí to gbẹnọ to ojlẹ de mẹ whenue gbẹtọ lẹ fọ́n bo to lilẹzun “owanyi na yede tọ́, nukunkẹnnọ, awagundotọ” podọ “vivlẹtọ mẹdagbe lẹ tọn.” (2 Tim. 3:1-5) Ṣigba, to whédo Jiwheyẹwhe tọn mẹ, mí tindo lẹblanulọkẹyi lọ nado dogbẹ́ hẹ gbẹtọ wiwenọ podọ jijọ dagbenọ lẹ he nọ dovivẹnu nado tẹdo sinsẹ̀n-bibasi he Jiwheyẹwhe kẹalọyi go. Be enẹ ma yin homẹmiọnnamẹnu ya?

Eyin mí gbọṣi madodiho to aihọn ehe mẹ, dona devo he mí na mọyi wẹ ayihadawhẹnamẹnu wiwe de. Mí jlo na hẹn ayihadawhẹnamẹnu wiwe de go gbọn taliliaina nunọwhinnusẹ́n dodo Jiwheyẹwhe tọn lẹ dali, podọ gbọn tonusisena osẹ́n Sesali tọn he ma jẹagọdo osẹ́n Jiwheyẹwhe tọn lẹ dali.—Malku 12:17; Owalọ 5:27-29.

Sinsẹ̀n-bibasi po alindọn lẹpo po sọ nọ hẹn dona wunmẹ devo wá. Eyin mí ze ayidonugo do ojlo Jiwheyẹwhe tọn wiwà ji kakati ni yin mítọn titi, gbẹzan mítọn nọ tindo lẹndai bo nọ hẹn pekọ wá dogọ. Kakati nado nọ dọ dọ: “Mì gbọ mí ni to dùdù bo to nùnù, na osọ wẹ mí na kú,” mí tindo todido dejidego ogbẹ̀ madopodo tọn to paladisi aigba ji tọn de mẹ.—1 Kọl. 15:32.

Owe Osọhia tọn dlẹnalọdo ojlẹ de, whenue mẹhe hẹn teninọ wiwe de go to Jehovah nukọn lẹ na “tọ́n sọn nukunbibia daho mẹ.” Kandai lọ dọmọ: “Ewọ he sinai to ofìn ji nasọ dlẹn gòhọ etọn do yé ji.” (Osọhia 7:13-15) Mẹhe sinai to ofìn ji enẹ ma yin mẹdevo de gbọnvona Jehovah Jiwheyẹwhe, yèdọ Gigonọ hugan wẹkẹ lọ tọn. Yí nukun homẹ tọn do pọ́n ayajẹ he e na yin to whenue ewọ na yí we do gòhọ etọn mẹ taidi jonọ de, bo na basi hihọ́na we, na awugble depope nika wá jiwe! Podọ to alọnu din, mí tlẹ sọgan duvivi hihọ́ po nukunpedomẹgo etọn po tọn jẹ obá de mẹ.

Humọ, mẹhe nọ sẹ̀n Jiwheyẹwhe to aliho he sọgbe mẹ lẹpo yin alọdlẹndo taidi mẹhe to yinyin anadena yì “asisa osin ogbẹ̀ tọn lẹ” kọ̀n. Asisa awumiọnnamẹ tọn ehelẹ nọtena awuwledainanu Jehovah tọn lẹ nado hùn dotẹnmẹ ogbẹ̀ madopodo tọn dotena mí. Mọwẹ, gbọn ofligọ Klisti tọn gblamẹ, “Jiwheyẹwhe nasọ súnsún dasin lẹpo sẹ̀ sọn nukun yetọn lẹ mẹ.” (Osọhia 7:17) Gbẹtọvi lẹ na yin hinhẹn jẹ pipé kọ̀n, podọ enẹ na hẹn ayajẹ mayọnjlẹ wá na mẹhe tindo todido gbẹninọ kakadoi to aigba ji tọn lẹ. Etlẹ yin todin, sinsẹ̀n-basitọ ayajẹnọ Jiwheyẹwhe tọn lẹ nọ dawhá po homẹhunhun po, nado do pinpẹn-nutọn-yinyọnẹn ahundopo tọn yetọn hia Jehovah bo sẹ̀n ẹn to pọmẹ hẹ mẹhe to olọn mẹ lẹ he to hànji dọmọ: “Kiklo po nujiawu po wẹ azọ́n towe, [Jehovah] E Jiwheyẹwhe Ganhunupo; dodo po nugbo po wẹ ali towe, hiẹ Ahọlu mẹwiwe lẹ tọn. Mẹnu wẹ ma na dubusi we, [Jehovah] E, bo ma na pagigona oyín towe? Na hiẹ dopo kẹdẹ wẹ wiwe; na akọta lẹpo wẹ na wá bo litai to nukọn towe; na yè ko do whẹdida towe lẹ hia.”—Osọhia 15:3, 4.

[Yẹdide to weda 27]

Etẹwẹ Satani to zizedonukọnna mí nado mọ sinsẹ̀n-bibasi mítọn yí?