Nawẹ Hiẹ Sọgan Sinyẹnlin to Lizọnyizọn lọ mẹ Gbọn? — WESẸDOTẸN INTẸNẸT JI TỌN Watchtower Tọn

Nawẹ Hiẹ Sọgan Sinyẹnlin to Lizọnyizọn lọ mẹ Gbọn?

BE HIẸ ko tindo numọtolanmẹ gbigbọjọ tọn pọ́n sọmọ bọ hiẹ masọ jlo na zindonukọn to yẹwhehodidọ mẹ wẹ ya? Nukundiọsọmẹ sinsinyẹn, magbọjẹ, agbasamalo, kọgbidinamẹ hagbẹ lẹ tọn, kavi kọdetọn dagbe matindo to lizọnyizọn lọ mẹ sọgan whle linsinsinyẹn mítọn pọ́n. Ṣigba lẹnnupọndo apajlẹ Jesu tọn ji. “Na ayajẹ he yè ze do nukọn etọn wutu,” e doakọnna whlepọn he sinyẹn hugan lẹ. (Heb. 12:2) E yọnẹn dọ emi na hẹn homẹ Jehovah tọn hùn, eyin emi dohia dọ owhẹ̀ he yin sisadokọna Jiwheyẹwhe lẹ ma tindo dodonu depope.—Howh. 27:11.

Hiẹ lọsu sọgan hẹn homẹ Jehovah tọn hùn eyin a nọ sinyẹnlin to lizọnyizọn lọ mẹ. Ṣigba, eyin e ka taidi dọ aliglọnnamẹnu delẹ jlo na dekanpona zohunhun towe to lizọnyizọn lọ mẹ lo? Krystyna, he owhe etọn ko sẹyì bo masọ tindo agbasalilo dagbe yigbe dọ: “Onú nọ yawu ṣikọna mi bọ n’nọ yawu mọ apọ̀. Nuhahun yọnhowhe tọn ṣie lẹ, taidi agbasamalo po tuklajẹ egbesọegbesọ tọn lẹ po, sọgan dekanpona zohunhun ṣie na ojlẹ de.” Nawẹ hiẹ sọgan sinyẹnlin to lizọnyizọn lọ mẹ mahopọnna aliglọnnamẹnu mọnkọtọn lẹ gbọn?

Hodo Apajlẹ Yẹwhegán lẹ Tọn

Eyin wẹnlatọ Ahọluduta lọ tọn lẹ na sinyẹnlin to azọ́n yẹwhehodidọ tọn lọ mẹ, yé dona dovivẹnu nado tindo pọndohlan he nkọtọn yẹwhegán hohowhenu tọn lẹ tindo. Jẹlemia yin dopo to yé mẹ. To whenuena Jiwheyẹwhe de e taidi yẹwhegán, e whleawu to tintan whenu. Etomọṣo, na nuhe hugan owhe 40, Jẹlemia penugo nado sinyẹnlin to azọ́ndenamẹ sinsinyẹn etọn mẹ na e plọn nado deji mlẹnmlẹn do Jehovah go wutu.—Jẹl. 1:6; 20:7-11.

Apajlẹ Jẹlemia tọn na tuli Henryk. E dọmọ: “To nuhe hugan owhe 70 he n’yizan to lizọnyizọn lọ mẹ lẹ gblamẹ, nuyiwahẹmẹ agọ̀ po ojlo matindo gbẹtọ lẹ tọn po nọ hẹn mi gbọjọ to whedelẹnu. To ojlẹ mọnkọtọn lẹ mẹ, n’nọ flin apajlẹ Jẹlemia tọn. Owanyi he e tindo na Jehovah po haṣinṣan dagbe he e tindo hẹ ẹ po na ẹn huhlọn nado zindonukọn to dọdai Jiwheyẹwhe tọn didọ mẹ.” (Jẹl. 1:17) Apajlẹ Jẹlemia tọn sọ whàn Rafał lọsu ga. E dọmọ: “Jẹlemia dejido Jiwheyẹwhe go kakati nado ze ayidonugo do ede po numọtolanmẹ edetiti tọn lẹ po ji. E zindonukọn madibu mahopọnna dọ mẹsusu gbẹwanna ẹn. N’nọ tẹnpọn nado hẹn enẹ do ayiha mẹ.”

Yẹwhegán devo he apajlẹ etọn gọalọna mẹsusu nado sinyẹnlin to lizọnyizọn lọ mẹ wẹ Isaia. Jiwheyẹwhe dọna ẹn dọ tòmẹnu etọn titi lẹ ma na dotoaina ẹn. “Hẹn ayiha omẹ helẹ tọn tliji, bo hẹn otó yetọn pẹ̀n,” wẹ Jehovah dọ. Be ehe dohia dọ Isaia na gboawupo wẹ ya? Lala, pọndohlan Jiwheyẹwhe tọn ma niyẹn! Whenue Jiwheyẹwhe deazọ́nna ẹn taidi yẹwhegán de, e dọmọ: “Yẹn die; do mi hlan.” (Isa. 6:8-10) Isaia ma gbẹkọ azọ́ndenamẹ etọn go. Be pọndohlan dopolọ wẹ hiẹ lọsu tindo gando gbedide lọ nado dọyẹwheho go ya?

Nado sinyẹnlin to lizọnyizọn mítọn mẹ dile Isaia wà do mahopọnna ojlo matindo gbẹtọ lẹ tọn, mí ma dona ze ayiha do nuyiwahẹmẹ agọ̀ he mí nọ pehẹ lẹ ji. Lehe Rafał duto gbigbọjọ ji gbọn die: “N’nọ tẹnpọn ma nado ze ayidonugo do hogbe mẹṣanko tọn lẹ ji. Mẹhe n’nọ dọyẹwheho na lẹ tindo jlọjẹ nado dọ nuhe jlo yé.” Anna lọsu dọmọ: “N’ma nọ jlo na ze ayiha do nudepope he na hẹn awugble wá kavi hẹnmẹ gbọjọ lẹ ji. Odẹ̀ po dogbigbapọnna wefọ egbesọ tọn po whẹpo do tọ́nyi lizọnyizọn lọ mẹ wẹ nọ gọalọna mi nado wà enẹ. Mọwiwà nọ gọalọna mi nado yawu de ayiha sọn linlẹn agọ̀ lẹ ji.”

Yẹwhegán Ezekiẹli wadevizọn to Juvi tasinyẹntọ he tin to kanlinmọgbenu to Babilọni lẹ ṣẹnṣẹn. (Ezek. 2:6) Eyin Ezekiẹli gboawupo nado dọ ohó Jiwheyẹwhe tọn na gbẹtọ lẹ bọ mẹylankan de ma sè avase lọ bo kú, ewọ wẹ na ko dogbè. Jehovah dọna Ezekiẹli dọmọ: “Ohùn etọn wẹ yẹn na kanbiọ to alọ towe mẹ.”—Ezek. 3:17, 18.

Henryk tẹnpọn nado tindo pọndohlan Ezekiẹli tọn nkọ, na e dọmọ: “Yẹn jlo na wé sọn ohùn gbẹtọ lẹpo tọn mẹ. Ogbẹ̀ họakuẹ gbẹtọ lẹ tọn tin to owù mẹ.” (Owalọ 20:26, 27) Zbigniew he tindo numọtolanmẹ dopolọ dọmọ: “Ezekiẹli zindonukọn mahopọnna nuhe mẹdevo lẹ lẹn. Ehe gọalọna mi nado tindo pọndohlan Mẹdatọ lọ tọn gando azọ́n yẹwhehodidọ tọn lọ go.”

Hiẹ Ma Tin Dewe Ṣo

Hiẹ ma tin dewe ṣo to whenue a to mahẹ tindo to azọ́n yẹwhehodidọ tọn lọ mẹ. Taidi apọsteli Paulu, mí sọgan dọmọ: “Azọ́nyiwahẹmẹtọ dopọ hẹ Jiwheyẹwhe wẹ míwlẹ.” (1 Kọl. 3:9) Krystyna, he yigbe dọ emi nọ mọ apọ̀ to whedelẹnu dọmọ: “Enẹwutu wẹ n’do nọ vẹ̀ Jehovah nado na mi huhlọn. E ma dowinyan mi pọ́n gbede.” Mọwẹ, mí tindo nuhudo godonọnamẹ gbigbọ Jiwheyẹwhe tọn to lizọnyizọn mítọn mẹ!—Zek. 4:6.

Whenuena mí to mahẹ tindo to lizọnyizọn lọ mẹ, gbigbọ wiwe sọ nọ gọalọna mí nado do jẹhẹnu ṣinẹnẹ he wleawuna “sinsẹ́n gbigbọ tọn” hia. (Gal. 5:22, 23) Taidi kọdetọn de, enẹ nọ gọalọna mí nado sinyẹnlin to azọ́n yẹwhehodidọ tọn lọ mẹ, mahopọnna nudepope he to jijọ. Henryk doayi e go dọ: “Mahẹ tintindo to sinsẹ̀nzọn kunnudegbe tọn mẹ nọ gọalọna mi nado hẹn gbẹtọ-yinyin ṣie pọnte. N’plọn nado nọ fahomẹ bo nọ hò mẹdevo lẹ tọn pọ́n bo masọ nọ yawu gbọjọ.” Eyin mí nọ sinyẹnlin to lizọnyizọn lọ mẹ mahopọnna aliglọnnamẹnu voovo lẹ, enẹ sọgan gọalọna mí nado wleawuna sinsẹ́n gbigbọ tọn, etlẹ yin hugan Henryk.

Jehovah nọ yí angẹli etọn lẹ zan nado deanana azọ́n vonọtaun ehe. (Osọhia 14:6) Biblu dohia mí dọ nudida gbigbọnọ mọnkọtọn “fọtọ́n ao whla fọtọ́n ao, po fọtọ́n fọtọ́n lẹ . . . po” wẹ tin. (Osọhia 5:11) To anademẹ Jesu tọn glọ, angẹli lẹ nọ nọgodona devizọnwatọ Jiwheyẹwhe tọn lẹ to aigba ji. Be hiẹ nọ hẹn enẹ do ayiha mẹ to whedepopenu he a tin to lizọnyizọn lọ mẹ ya?

Anna dọmọ: “Eyin n’flindọ angẹli lẹ tin po mí po to lizọnyizọn lọ mẹ, enẹ nọ na mi tuli. N’nọ yọ́n pinpẹn alọgọ he yé nọ na mí to anademẹ Jehovah po Jesu po tọn glọ tọn.” Lẹblanulọkẹyi vonọtaun tẹ die nado wazọ́n dopọ hẹ angẹli nugbonọ lẹ!

Nawẹ azọ́nwiwa hẹ wẹnlatọ devo lẹ sọgan gọalọna mí nado sinyẹnlin gbọn? Mí tindo lẹblanulọkẹyi lọ nado jẹakọ hẹ Kunnudetọ nugbonọ susu. Matin ayihaawe, hiẹ ko tindo numimọ nugbo-yinyin howhinwhẹn Biblu tọn lọ tọn he dọmọ: “Ogàn na gàn ogàn: mọ wẹ sunnu nọ gàn nukunmẹ họntọn etọn tọn.”—Howh. 27:17.

Azọ́nwiwa hẹ mẹdevo lẹ to lizọnyizọn lọ mẹ nọ hùn dotẹnmẹ dagbe dotena mí nado doayi aliho mẹpinplọn tọn kọdetọn dagbenọ he mí ma jẹakọ hẹ lẹ go. Elżbieta dọmọ: “Azọ́nwiwa hẹ wẹnlatọ voovo lẹ nọ hùn dotẹnmẹ dotena mi nado do owanyi hia yisenọ hatọ ṣie lẹ po mẹhe mí dukosọ hẹ lẹ po.” Nọ tẹnpọn nado wazọ́n hẹ wẹnlatọ voovo lẹ to lizọnyizọn lọ mẹ. Enẹ na zọ́n bọ hiẹ na duvivi lizọnyizọn towe tọn.

Nọ Penukundo Dewe Go Ganji

Eyin mí na hẹn zohunhun mítọn go to lizọnyizọn lọ mẹ, mí dona basi tito dagbe, tindo aṣa oplọn mẹdetiti tọn dagbe de, bosọ nọ gbọjẹ ganji. To hogbe devo mẹ, mí dona penukundo mídelẹ go ganji to gbigbọ-liho podọ to agbasa-liho.

Biblu dọmọ: “Linlẹn tuklajẹtọ tọn hlan susu mẹ wẹ.” (Howh. 21:5) Zygmunt he tindo owhe 88 todin dọmọ: “Tito lizọnyizọn tọn dagbe de tintindo nọ gọalọna mi nado tindo kọdetọn dagbe. N’nọ yí sọwhiwhe do basi tito na whenu ṣie nado sọgan yí whenu susu zan to lizọnyizọn lọ mẹ.”

Oyọnẹn he pegan Owe-wiwe tọn tintindo nọ na mí huhlọn bo nọ hẹn mí pegan na lizọnyizọn lọ. Kẹdẹdile mí dona dùnú to agbasa-liho nado nọgbẹ̀ do, mọ wẹ mí dona dù núdùdù gbigbọmẹ tọn to gbesisọ mẹ nado zindonukọn to azọ́n yẹwhehodidọ tọn lọ mẹ do niyẹn. Ohó Jiwheyẹwhe tọn pinplọn egbesọegbesọ podọ nado nọ dù “núdùdù [gbigbọmẹ tọn] to osaa sisọ mẹ” sọgan na mí huhlọn to lizọnyizọn lọ mẹ.—Mat. 24:45-47.

Elżbieta basi diọdo tangan lẹ to nuwiwa egbesọegbesọ tọn etọn lẹ mẹ nado hẹn lizọnyizọn etọn pọnte. E dọmọ: “N’ko de whenu he n’nọ yizan nado pọ́n televiziọn pò taun nado sọgan mọ whenu susu do wleawuna lizọnyizọn lọ. Eyin n’to Biblu hia to whèjai lẹ, n’nọ lẹnnupọndo mẹhe n’dukosọ hẹ to lizọnyizọn lọ mẹ lẹ ji. N’nọ dín wefọ po hosọ he sọgan gọalọna yé lẹ po.”

Eyin hiẹ nọ gbọjẹ ganji, enẹ na zọ́n bọ onú ma na yawu ṣikọna we bọ hiẹ na penugo nado nọ tindo mahẹ gigọ́ to lizọnyizọn lọ mẹ. To alọ devo mẹ, ayididedai zẹjlẹgo sọgan yinuwado lizọnyizọn towe ji to aliho agọ̀ mẹ. Andrzej, wẹnlatọ zohunhunnọ de doayi e go dọ: “Eyin mẹde ma gbọjẹ ganji, enẹ na zọ́n bọ onú na ṣikọna ẹn zẹjlẹgo, podọ finẹ wẹ gbigbọjọ nọ bẹsọn. N’nọ wà nuhe go n’pé lẹpo nado dapana enẹ.”—Yẹwh. 4:6.

Mahopọnna vivẹnu vẹkuvẹku he mí nọ do, omẹ vude poun wẹ nọ kẹalọyi wẹndagbe lọ. Ṣigba Jehovah ma na wọn azọ́n mítọn pọ́n gbede. (Heb. 6:10) Eyin mẹsusu ma tlẹ jlo na sè ohó mítọn, yé sọgan dọho gando dlapọn mítọn go whenue mí ko yì godo. Kọdetọn lọ sọgan taidi nuhe mí hia gando Ezekiẹli go dọ: Gbẹtọ lẹ “na yọnẹn dọ yẹwhegán de ko tin to yé ṣẹnṣẹn.” (Ezek. 2:5) Nado dọ hójọhó, lizọnyizọn mítọn ma bọawu, ṣigba míwlẹ po mẹhe sè owẹ̀n mítọn lẹ po nọ mọ ale nujọnu tọn yí sọn e mẹ.

“Mahẹ tintindo to lizọnyizọn lọ mẹ nọ gọalọna mí nado ze gbẹtọ-yinyin yọyọ lọ dogo, podọ enẹ nọ gọalọna mí nado do owanyi hia Jiwheyẹwhe po kọmẹnu mítọn lẹ po,” wẹ Zygmunt dọ. Andrzej yidogọ dọ: “Lẹblanulọkẹyi de wẹ e yin nado tindo mahẹ to azọ́n gbẹwhlẹngán tọn ehe mẹ. Azọ́n ehe ma na yin vivọ́wa to obá ehe mẹ kavi to ninọmẹ dopolọ mẹ pọ́n gbede ba.” Hiẹ lọsu sọgan mọ dona susu yí to egbehe, eyin a nọ sinyẹnlin to lizọnyizọn lọ mẹ.—2 Kọl. 4:1, 2.

[Yẹdide to weda 31]

Nukunpipedo nuhudo gbigbọ po agbasa po tọn go nọ gọalọna mí nado sinyẹnlin to lizọnyizọn lọ mẹ