Dọnsẹpọ Jiwheyẹwhe

Jehovah Do Ede Hia

Eksọdusi 34:6, 7

ZẸẸMẸ tẹwẹ hiẹ na basi gando jẹhẹnu Jiwheyẹwhe tọn lẹ po aliho he mẹ e nọ yinuwa te lẹ po go? Mí ni dọ dọ hiẹ sọgan kanhose Jiwheyẹwhe gando jẹhẹnu etọn lẹ go bọ a dotoai dile e to zẹẹmẹ yetọn basi na we. Numimọ mọnkọtọn pẹpẹ wẹ yẹwhegán Mose tindo. Homẹ mítọn hùn dọ e yin gbigbọdo nado kàn nuhe jọ lẹ dai.

Mose vẹ̀ Jehovah to Osó Sinai ji dọmọ: “Do gigo towe hia mi, yẹn vẹ̀ we.” (Eksọdusi 33:18) To wunkẹngbe, yẹwhegán lọ tindo lẹblanulọkẹyi nado mọ gigo Jiwheyẹwhe tọn to kleun mẹ.a Mose ma basi zẹẹmẹ gigọ́ gando nuhe e mọ to numimọ jiawu lọ mẹ go. Kakatimọ, e basi kandai nuhe yin nujọnu hugan mọ de tọn—enẹ wẹ nuhe Jiwheyẹwhe dọ. Mì gbọ mí ni gbadopọnna nuhe Jehovah dọ, dile e yin mimọ do to Eksọdusi 34:6, 7 mẹ.

Onú tintan he Jehovah dehia gando ede go wẹ yindọ ewọ yin ‘Jiwheyẹwhe lẹblanunọ podọ homẹdagbenọ.’ (Wefọ 6) Sọgbe hẹ nuhe wesetọ de dọ, hogbe Heblu tọn he yin lilẹdo ‘lẹblanunọ’ do “awuvẹmẹ sisosiso [Jiwheyẹwhe tọn hia], taidi dehe otọ́ de nọ dohia ovi etọn lẹ.” Hogbe he yin lilẹdo ‘homẹdagbenọ’ tindo kanṣiṣa hẹ hogbe de he “nọ dlẹnalọdo mẹhe yin whinwhàn sọn ahun mẹ nado gọalọna mẹhe tin to nuhudo mẹ de.” E họnwun dọ Jehovah jlo dọ mí ni yọnẹn dọ ewọ nọ penukundo sinsẹ̀n-basitọ etọn lẹ go kẹdẹdile mẹjitọ lẹ nọ penukundo ovi yetọn lẹ go do—po owanyi sisosiso po gọna mẹtọnhopọn ahundopo tọn.—Psalm 103:8, 13.

Enẹgodo, Jehovah dọ dọ emi nọ ‘whleawu nado sadi.’ (Wefọ 6) E ma nọ yawu gblehomẹ do devizọnwatọ etọn he tin to aigba ji lẹ go. Kakatimọ, e nọ sinyẹnlin hẹ yé bo nọ doakọnna awugbopo yetọn lẹ bosọ nọ jo whenu do na yé nado lẹnvọjọ sọn ylando yetọn lẹ mẹ.—2 Pita 3:9.

Jiwheyẹwhe zindonukọn dọ emi yin ‘susunọ to dagbewanyi po nugbo po mẹ.’ (Wefọ 6) Dagbewanyi kavi owanyi nugbo yin jẹhẹnu họakuẹ he Jehovah nọ yizan nado wleawuna kanṣiṣa dolido tẹgbẹ tọn de hẹ omẹ etọn lẹ. (Deutelonomi 7:9) Jehovah sọ yin asisa nugbo tọn. E ma sọgan klọmẹ mọjanwẹ mẹde ma sọgan klọ ẹ do niyẹn. Taidi “Jiwheyẹwhe nugbo tọn,” mí sọgan yí nuhe e dọ lẹpo sè gọna opagbe he e do gando sọgodo go lẹ.—Psalm 31:5.

Nugbo titengbe devo he Jehovah jlo dọ mí ni yọnẹn gando ede go wẹ yindọ e nọ jona “ylankan po ylanwiwa po po ylando po.” (Wefọ 7) E “wleawu nado jona” ylandonọ he lẹnvọjọ lẹ. (Psalm 86:5) To ojlẹ dopolọ mẹ, Jehovah ma nọ miyọnnukundo ylanwiwa gbede. E basi zẹẹmẹ dọ emi “ma na dike whẹgbledonọ to alọ depope mẹ ni yì ma jiya.” (Wefọ 7) Jiwheyẹwhe he yin wiwe podọ dodonọ ma na dike mẹhe waylando sọn ojlo mẹ wá lẹ ni dù dọ̀n. E yá wẹo kavi e dẹn wẹo, yé na gbẹ̀n nuhe yé do janwẹ.

Nuhe Jehovah dọ gando jẹhẹnu etọn lẹ go dohia hezeheze dọ ewọ jlo dọ mí ni yọ́n ẹn bo jẹakọ hẹ jẹhẹnu po aliho he mẹ e nọ yinuwa te lẹ po. Be ehe ma whàn we nado plọn nususu dogọ gando jẹhẹnu dagbe etọn lẹ go ya?

[Nudọnamẹ odò tọn]