Be Akuẹ Wẹ Nọ Hẹn Ayajẹ Nujọnu Tọn Wá Ya?

SONIA yin jiji to Espagne. Whenue e to ovu, e nọ hodo onọ̀ etọn yì opli Kunnudetọ Jehovah tọn lẹ tọn. Ṣigba whenue e whẹ́n mẹho, e sẹtẹn yì Londres, to Angleterre, podọ to nukọn mẹ, e jẹ azọ́nwa ji to ajọwhé akuẹ tọn de.

Sonia yiwanna azọ́n etọn ganji. E nọ mọ akuẹ taun, podọ akuẹ he nọ gbọn alọ etọn mẹ sọn ahisinọ etọn lẹ dè sọ tli. E nọ duvivi azọ́n lọ tọn taun, podọ e nọ tindo kọdetọn dagbe to e mẹ. Sonia nọ saba wazọ́n na gànhiho 18 egbesọegbesọ, podọ to ozán delẹ mẹ, gànhiho awe kavi atọ̀n poun wẹ e do nọ damlọn. Gbẹzan etọn lẹpo pete wẹ e zejo na azọ́n etọn. Ṣigba nulẹ diọ to ajiji mẹ. Sonia bẹ azọ̀n asaku-awàku tọn sinsinyẹn de—vlavo na e ma nọ na gbọjẹ ede wutu. Owhe 30 poun wẹ e tindo to whenẹnu.

Apadopo agbasa Sonia tọn hò plibọ́, podọ doto lẹ ma yọnẹn eyin e na wá penugo nado dọho. Onọ̀ etọn yawu yì Angleterre nado yì penukundego. Whenue Sonia jẹ zọnlinzin ji, onọ̀ etọn dọna ẹn dọ, “N’jei opli, podọ e jlo mi dọ a ni hodo mi na n’ma gán jo hiẹ doponọ do whégbè.” Sonia yigbe nado hodo e yì. Etẹwẹ yin kọdetọn lọ?

“Nuhe n’sè lẹpo wẹ di nugbo to otó ṣie mẹ. E yọ́n taun,” wẹ Sonia dọ. “Homẹ ṣie hùn nado dike dopo to mẹsusu he dọnudo mi whla tintan he n’yì Plitẹnhọ Ahọluduta tọn mẹ lẹ ni plọn Biblu hẹ mi. Hagbẹ ṣie dai tọn lẹ ma sọ nọ wá pọ́n mi ba, ṣigba họntọn yọyọ he n’tindo lẹ nọ yawudo mi bo nọ vẹawu mi.”

Vudevude, Sonia jẹ hodọ ji, bosọ yawu yinukọn to gbigbọ-liho. To nuhe ma pé owhe dopo gblamẹ, e yí baptẹm. Susu to họntọn yọyọ etọn lẹ mẹ tin to lizọnyizọn whenu-gigọ́ tọn mẹ, podọ e nọ mọdọ yé tindo ayajẹ taun. ‘E jlo yẹnlọsu nado tindo ayajẹ,’ wẹ Sonia dọ. ‘N’jlo na wà nuhe go n’pé lẹpo nado sẹ̀n Jehovah Jiwheyẹwhe!’ Sonia to sinsẹ̀n todin taidi lizọnyizọnwatọ whenu-gigọ́ tọn de.

Etẹwẹ Sonia plọn sọn nuhe jọ do e go mẹ? “Dile etlẹ yindọ n’nọ mọ akuẹ susu, ayimajai po tukla azọ́n lọ tọn po nọ hẹn mi hanú podọ n’ma nọ tindo ayajẹ. N’ko wá yọnẹn todin dọ nuhe yin nujọnu hugan to gbẹ̀mẹ wẹ nado tindo haṣinṣan dagbe de hẹ Otọ́ olọn mẹ tọn ṣie, Jehovah. N’do ayajẹ nujọnu tọn todin.”

“Owanyi akuẹ tọn wẹ adọ̀ owalọ oylan lẹpo tọn,” wẹ apọsteli Paulu wlan. “Ehe whenuena gbẹtọ yí nukunkẹn do to dindin pé, yé buali sọn yise mẹ, bosọ yí homẹgble susu do sọwhán yede.” (1 Timoti 6:10) Sonia sọgan dekunnu dọ nugbo wẹ hogbe ehelẹ.