Lalo 1: Alindọn Ma Nọ Kú

Fie wẹ lalo lọ wá sọn? “Klistiani dowhenu tọn he yin tamẹnuplọnmẹtọ lẹ kẹalọyi pọndohlan Glẹkinu lẹ tọn dọ alindọn yin jọmaku podọ linlẹn yetọn wẹ yindọ Jiwheyẹwhe dá alindọn dovo bo wá ze e do agbasa gbẹtọ tọn mẹ.”​—The New Encyclopædia Britannica (1988), Bladopọ 11, weda 25.

Etẹwẹ Biblu plọn mí? “Alindọn he waylando, e na kú.”​—Ezekiẹli 18:4.

Biblu dọ gando aliho he mẹ alindọn gbẹtọ tọn tintan yin didá te go dọmọ: ‘OKLUNỌ Jiwheyẹwhe dó gbẹtọ sọn kọ́gudu aigba tọn mẹ; bo gbọ do awọ̀ntinslo etọn lẹ mẹ gbigbọ ogbẹ̀ tọn; gbẹtọ sọ lẹzun alindọn [Heblu, nefeṣ] gbẹ̀tenọ.’​—Gẹnẹsisi 2:7.

Hogbe Heblu tọn nefeṣ he yin lilẹdo “alindọn” zẹẹmẹdo ‘nudida he nọ gbọ.’ To whenue Jiwheyẹwhe dá sunnu tintan lọ, Adam, E ma ze alindọn jọmaku de do agbasa etọn mẹ gba, adavo huhlọn ogbẹ̀ tọn he nọ yin hinhẹndote gbọn nugopipe lọ nado gbọ dali. Enẹwutu to Biblu mẹ, “alindọn” nọ dlẹnalọdo nutogbẹ̀ de to blebu mẹ. Eyin alindọn de masọ tindo huhlọn ogbẹ̀ tọn he Jiwheyẹwhe yí do agbasa mẹ to dowhenu lọ ba, e nọ kú.—Gẹnẹsisi 3:19; Ezekiẹli 18:20.

Sinsẹ̀n-nuplọnmẹ jọmaku alindọn tọn fọ́n kanbiọ delẹ dote: Fie wẹ alindọn lẹ nọ yì to okú godo? Etẹwẹ nọ jọ do alindọn mẹylankan lẹ tọn go? Na mẹhe ylọ yede dọ Klistiani lẹ ko kẹalọyi lalo lọ dọ alindọn ma nọ kú wutu, ehe hẹn yé wá lalo devo kọ̀n—enẹ wẹ nuplọnmẹ olọnzomẹ tọn.

Sọ pọ́n wefọ ehelẹ: Yẹwhehodọtọ 3:19; Matiu 10:28, NW; Owalọ lẹ 3:23, NW

NUGBO LỌ DIE:

To okú godo, mẹde ma nọ nọgbẹ̀ ba