Zinzọnlin Gbọn Gbigbọ Dali Nado Nọgbẹ̀ Sọgbe hẹ Klandowiwe Towe
“Mì to zọnlinzin gbọn gbigbọ dali zọnmii, mì masọ to na hẹn ojlo agbasalan tọn depope di ba.”—Gal. 5:16.
1. Baptẹm tẹlẹ wẹ yin bibasi to azán Pẹntikọsti tọn gbè?
TO WHENUENA hodotọ Jesu tọn lẹ yin bibaptizi po gbigbọ wiwe po to azán Pẹntikọsti 33 W.M. gbè godo, yé penugo nado dọho to ogbè voovo mẹ. Yé do nunina jiawu gbigbọ tọn de hia. (1 Kọl. 12:4-10) Kọdetọn tẹwẹ nunina ehe po hodidọ apọsteli Pita tọn po tindo? Mẹsusu yin nuyiwadeji “yì ahun mẹ.” Yé lẹnvọjọ bo yin bibaptizi, dile Pita dotuhomẹna yé do. Kandai lọ dọmọ: “Mẹhe kẹalọyi ohó etọn sọn ahun mẹ wá lẹ yin bibaptizi, podọ nudi alindọn foo-fọtọ́n wẹ yin yiyidogọ to azán enẹ gbè.” (Owalọ 2:22, 36-41) Dile Jesu degbè etọn do, yé na ko yin bibaptizi to osin mẹ to oyín Otọ́ tọn, Visunnu tọn po gbigbọ wiwe tọn po mẹ.—Mat. 28:19.
2, 3. (a) Be nado yin bibaptizi po gbigbọ wiwe po gbọnvo na baptẹm yíyí to oyín gbigbọ wiwe tọn mẹ wẹ ya? (b) Naegbọn mẹhe jlo na lẹzun Klistiani nugbo to egbehe lẹpo dona yin bibaptizi to osin mẹ?
2 Ṣigba, be nado yin bibaptizi po gbigbọ wiwe po gbọnvo na baptẹm yíyí to oyín gbigbọ wiwe tọn mẹ wẹ ya? Mọwẹ. Mẹhe yin bibaptizi po gbigbọ wiwe po lẹ nọ yin vivọji taidi visunnu Jiwheyẹwhe tọn he yin dide gbọn gbigbọ dali. (Joh. 3:3) Yé yin yiyiamisisadode taidi gandutọgbẹ́ po yẹwhenọ pẹvi sọgodo tọn lẹ po to Ahọluduta olọn mẹ tọn Jiwheyẹwhe tọn mẹ, podọ yé yin apadewhe agbasa gbigbọmẹ tọn Klisti tọn. (1 Kọl. 12:13; Gal. 3:27; Osọ. 20:6) Enẹwutu baptẹm ehe—yèdọ nado yin bibaptizi po gbigbọ wiwe po—wẹ Jehovah basi to whenuena e de mẹhe na yin whédutọgbẹ́ hẹ Klisti lẹ to azán Pẹntikọsti tọn gbè podọ to enẹgodo. (Lom. 8:15-17) Ṣigba etẹwẹ dogbọn baptẹm yíyí to osin mẹ to oyín gbigbọ wiwe tọn mẹ, he omẹ Jehovah tọn lẹ nọ basi whẹwhẹ to plidopọ yetọn lẹ ji to egbehe dali?
3 Baptẹm osin tọn yin afọdide de he Klistiani nugbo lẹ nọ de nado do mẹdezejo mlẹnmlẹn yetọn na Jehovah Jiwheyẹwhe hia. Mẹhe mọ oylọ olọn mẹ tọn yí lẹ nọ de afọdide ehe. Ṣigba sunnu po yọnnu livi susu he tindo todido gbẹninọ kakadoi to aigba ji tọn to egbehe lẹ po sọ dona wàmọ ga. Mahopọnna todido he mẹde tindo, dandannu wẹ e yin dọ e ni yin bibaptizi to osin mẹ to oyín Otọ́ tọn, Visunnu tọn, po gbigbọ wiwe tọn po mẹ nado sọgan yin alọkẹyi gbọn Jiwheyẹwhe dali. Klistiani he yin bibaptizi to aliho ehe mẹ lẹpo dona “to zọnlinzin gbọn gbigbọ dali zọnmii.” (Hia Galatianu lẹ 5:16.) Be hiẹ to zọnlinzin gbọn gbigbọ dali nado sọgan nọgbẹ̀ sọgbe hẹ klandowiwe towe ya?
Nuhe ‘Zọnlinzinzin Gbọn Gbigbọ Dali’ Zẹẹmẹdo
4. Etẹwẹ ‘zọnlinzinzin gbọn gbigbọ dali’ zẹẹmẹdo na taun tọn?
4 ‘Zọnlinzinzin gbọn gbigbọ dali’ zẹẹmẹdo nado kẹalọyi nuyiwa gbigbọ wiwe tọn to gbẹzan towe mẹ, bo na dotẹnmẹ gbigbọ wiwe nado yinuwado jiwe. To hogbe devo mẹ, e zẹẹmẹdo nado nọ yin anadena gbọn gbigbọ wiwe dali to nuwiwa egbesọegbesọ tọn towe lẹ mẹ. Galatianu lẹ weta 5 do vogbingbọn he tin to nuyiwadomẹji gbigbọ wiwe tọn po agbasalan tọn po ṣẹnṣẹn hia.—Hia Galatianu lẹ 5:17, 18.
5. Azọ́n tẹlẹ wẹ mẹhe tin to nuyiwadomẹji gbigbọ wiwe tọn glọ nọ họ̀nna?
5 Eyin hiẹ tin to nuyiwadomẹji gbigbọ wiwe tọn glọ, a na nọ tẹnpọn nado họ̀nna azọ́n agbasalan tọn lẹ. Ehelẹ bẹ onú delẹ hẹn taidi “galilọ, mawé, wantuntun, boṣiọ-sinsẹ̀n, afinyọnnuwiwa, okẹ̀n, avùn, awuwhàn, adánjijẹ whẹwhẹ, wiwọ́, kinklan, plọngiglọ, nuvẹun, ahànnu-zẹjlẹgo, paṣadudu.” (Gal. 5:19-21) To aliho de mẹ, mí sọgan dọ dọ hiẹ “nọ gbọn gbigbọ dali do hù azọ́n agbasalan tọn lẹ.” (Lom. 8:5, 13) Enẹ na gọalọna we nado ze ayiha towe do onú gbigbọ tọn lẹ ji bo kọngbedopọ hẹ anademẹ etọn, kakati nado dike ojlo agbasalan tọn lẹ ni deanana we.
6. Na apajlẹ de nado do nuhe yin dandannu nado sọgan de sinsẹ́n gbigbọ tọn tọ́n hia.
6 Dile gbigbọ wiwe to nuyiwa do jiwe, a na nọ do jẹhẹnu jijọ-di-Jiwheyẹwhe tọn lẹ hia, yèdọ “sinsẹ́n gbigbọ tọn.” (Gal. 5:22, 23) Ṣigba, hiẹ yọnẹn dọ ehe nọ biọ vivẹnudido. Di apajlẹ: Glesi de nọ pọ̀ ogle etọn. Nugbo wẹ dọ hinhọ́n owhè tọn po osin po yin dandannu; matin onú ehelẹ, e ma sọgan donukun jibẹwawhé. Mí sọgan yí gbigbọ wiwe jlẹdo hinhọ́n owhè tọn go. Mí tindo nuhudo gbigbọ wiwe tọn nado sọgan do sinsẹ́n gbigbọ tọn hia. Ṣogan, sinsẹ́n tẹwẹ aigba sọgan detọ́n eyin glesi lọ ma wazọ́n sinsinyẹn? (Howh. 10:4) Mọwẹ, lehe a wleawuna ahun towe sọ, mọ wẹ jẹhẹnu he sinsẹ́n gbigbọ wiwe tọn bẹhẹn lẹ na sù bosọ sọawuhia to nuyiwa towe lẹ mẹ do niyẹn. Enẹwutu, nọ kanse dewe dọ, ‘Be yẹn to dotẹnmẹ na gbigbọ wiwe nado de sinsẹ́n etọn tọ́n gbọn nuyiwa to kọndopọ mẹ hẹ ẹ dali ya?’
7. Naegbọn nupinplọn po ayihamẹlinlẹnpọn po do yin nujọnu sọmọ nado wleawuna sinsẹ́n gbigbọ wiwe tọn?
7 Eyin glesi de jlo dọ jinukun etọn ni yọ́n, e dona nọ húsinna ogle etọn. Nado sọgan wleawuna sinsẹ́n gbigbọ tọn, hiẹ tindo nuhudo osin nugbo tọn he tin to Biblu mẹ bo nọ yin hinhẹn tin-to-aimẹ to egbehe gbọn agun Klistiani tọn gblamẹ. (Isa. 55:1) Hiẹ sọgan ko hẹn ẹn họnwun na mẹsusu dọ Owe Wiwe lẹ yin kinkàn to anademẹ gbigbọ wiwe tọn glọ. (2 Tim. 3:16) Humọ, afanumẹ nugbonọ podọ nuyọnẹntọ lọ nọ na mí nukunnumọjẹnumẹ he mí tindo nuhudo etọn gando osin wiwe-ṣeke nugbo Biblu tọn go. (Mat. 24:45-47) Nuhe enẹ zẹẹmẹdo họnwun. Nado tin to nuyiwadomẹji gbigbọ wiwe tọn glọ, mí dona nọ hia bo lẹnayihamẹpọn do Ohó Jiwheyẹwhe tọn ji. Eyin hiẹ to mọwà, be a to apajlẹ dagbe yẹwhegán he basi “dogbapọnnanu sisosiso po dodinnanu sọwhiwhe tọn po” do nudọnamẹ he yé mọyi lẹ ji tọn hodo. E jẹna ayidego dọ angẹli lẹ lọsu ko do ojlo sisosiso hia to nugbo gbigbọmẹ tọn he gando Okún dopagbe lọ po agun Klistiani yiamisisadode lẹ tọn po go mẹ.—Hia 1 Pita 1:10-12.
Nawẹ Gbigbọ Nọ Yinuwado Mí Ji Gbọn?
8. Naegbọn e do yin dandannu nado nọ biọ gbigbọ Jehovah tọn?
8 E ma ko pé nado plọn Owe-wiwe bo lẹnayihamẹpọn deji gba. Hiẹ sọ dona zindonukọn nado nọ biọ alọgọ po anademẹ Jehovah tọn po. Ewọ sọgan “wà susu tlala hú nuhe mí biọ kavi lẹn lẹpo.” (Efe. 3:20; Luku 11:13) Ṣigba, gblọndo tẹwẹ hiẹ na na eyin mẹde kanse we dọ, “Eyin Jiwheyẹwhe ko yọ́n ‘nuhe n’tindo nuhudo etọn lẹ, yèdọ whẹpo n’tlẹ do biọ sọn e dè,’ naegbọn yẹn na zindonukọn nado to bibiọ?” (Mat. 6:8) Whẹwhinwhẹ́n dopo wẹ yindọ gbọn gbigbọ wiwe bibiọ to odẹ̀ mẹ dali, hiẹ to didohia dọ a ganjẹ Jehovah go. Di apajlẹ, eyin mẹde wá biọ alọgọ towe, hiẹ na wà nuhe go a pé lẹpo nado gọalọna ẹn, podọ dopo to nuhewutu hiẹ na wàmọ lẹ mẹ wẹ yindọ, e biọ to asiwe nado gọalọna ẹn bo gbọnmọ dali dohia dọ e dejido gowe. (Yijlẹdo Howhinwhẹn lẹ 3:27 go.) Mọdopolọ, homẹ Jehovah tọn nọ hùn eyin hiẹ biọ gbigbọ etọn, podọ e na na ẹn we.—Howh. 15:8.
9. Nawẹ opli Klistiani tọn lẹ yìyì sọgan gọalọna we nado ze dewe do nuyiwadomẹji gbigbọ Jiwheyẹwhe tọn glọ gbọn?
9 E ma na vẹawuna we nado mọnukunnujẹemẹ dọ aliho devo he mẹ hiẹ sọgan ze dewe do nuyiwadomẹji gbigbọ Jiwheyẹwhe tọn glọ te wẹ nado nọ yì opli po plidopọ lẹ po. Vivẹnudido nado tin to opli lẹ ji bo yí sọwhiwhe do dotoaina tito-to-whinnu lọ yin nujọnu taun. Mọwiwà na gọalọna we nado mọnukunnujẹ “onú sisosiso Jiwheyẹwhe tọn lẹ” mẹ. (1 Kọl. 2:10) Gblọndo nina whẹwhẹ to opli lẹ ji sọ nọ hẹn ale susu wá. Lẹnnupọndo opli he a yì to osẹ ẹnẹ he wayi lẹ gblamẹ ji. Whla nẹmu wẹ a zealọ nado na gblọndo bo gbọnmọ dali basi dohia yise towe tọn? Be hiẹ lẹndọ a dona basi vọjlado delẹ to adà ehe mẹ ya? Eyin mọ wẹ, magbe nuhe a na wà to osẹ he ja lẹ gblamẹ tọn. Jehovah na mọ ojlo he hiẹ tindo nado tindo mahẹ to opli lẹ mẹ bo na na we gbigbọ wiwe etọn, ehe na gọalọna we nado duale dogọ sọn opli he a nọ yì lẹ mẹ.
10. Oylọ tẹwẹ mẹhe to zọnlinzin gbọn gbigbọ dali nọ basina mẹdevo lẹ?
10 Zọnlinzinzin gbọn gbigbọ dali bẹ gbeyiyina oylọ he tin to Osọhia 22:17 mẹ hẹn dọmọ: “Gbigbọ po asiyọyọ po sọ to didọ mapote dọmọ: ‘Wá!’ Podọ gbọ mẹdepope he to sisè ni dọmọ: ‘Wá!’ Podọ gbọ mẹdepope he nugbla to hùhù ni wá; gbọ mẹdepope he jlo ni yí osin ogbẹ̀ tọn vọnu.” Gbigbọ, he to nuyiwa gbọn hagbẹ asiyọyọ yiamisisadode lọ tọn gblamẹ, to oylọ ehe basina gbẹtọ lẹ wá osin ogbẹ̀ tọn kọ̀n. Eyin hiẹ ko siọ oylọ lọ nado “wá!” janwẹ, be hiẹ lọsu ko magbe nado dọ, “Wá!” ya? Lẹblanulọkẹyi nankọ die nado tindo mahẹ to azọ́n gbẹwhlẹngán tọn ehe mẹ!
11, 12. Nawẹ gbigbọ wiwe nọ gọalọ to azọ́n yẹwhehodidọ tọn mẹ gbọn?
11 Azọ́n titengbe ehe to yinyin wiwà todin to anademẹ gbigbọ wiwe tọn glọ. Mí hia dogbọn lehe gbigbọ wiwe gọalọna mẹdehlan lẹ to owhe kanweko tintan whenu nado jẹ aigba-denamẹ yọyọ lẹ ji do dali. “Gbigbọ wiwe gbẹ́ na [Apọsteli Paulu po gbẹdohẹmẹtọ etọn lẹ po] ma nado dọ ohó lọ to agbegbe Asia tọn ji”; mọjanwẹ yé masọ yin dotẹnmẹna nado yì Bitinia do niyẹn. Mí ma yọ́n lehe gbigbọ lọ glọnalina yé nado yì awà enẹlẹ ji do taun gba, ṣigba nuhe họnwun wẹ yindọ gbigbọ deanana Paulu yì aigba-denamẹ daho Europe tọn ji. E mọ numimọ dawe Makedonianu de tọn he to vivẹ ẹ nado wá gọalọ.—Owalọ 16:6-10.
12 Mọdopolọ to egbehe, gbigbọ Jehovah tọn to anadena azọ́n yẹwhehodidọ tọn lọ lẹdo aihọn pé. Numimọ jiawu depope ma nọ yin yiyizan nado deanana azọ́n lọ; kakatimọ, Jehovah nọ deanana mẹyiamisisadode lẹ gbọn gbigbọ wiwe gblamẹ. Podọ gbigbọ lọ nọ whàn mẹmẹsunnu po mẹmẹyọnnu lẹ po nado wà nuhe go yé pé lẹpo to azọ́n yẹwhehodidọ po mẹpinplọn tọn po mẹ. Matin ayihaawe, hiẹ ko to mahẹ tindo to azọ́n titengbe ehe mẹ. Be hiẹ sọgan hẹn ayajẹ towe sudeji to azọ́n ojlofọndotenamẹ tọn ehe mẹ ya?
13. Nawẹ hiẹ sọgan jo dewe na anademẹ gbigbọ wiwe tọn gbọn? Na apajlẹ.
13 Hiẹ sọgan jo dewe na anademẹ gbigbọ wiwe tọn gbọn nudọnamẹ he nọ yin awuwlena na omẹ Jiwheyẹwhe tọn lẹ yíyí do yizan mẹ dali. Lẹnnupọndo apajlẹ Mihoko tọn ji, yèdọ jọja de he nọ nọ̀ Japon. Taidi gbehosọnalitọ yọyọ de, e nọ mọdọ emi ma pegan nado basi gọyìpọn lẹ; e nọ lẹndọ emi ma yọ́n lehe yè sọgan fọnjlodotena whétọ de do. To ojlẹ enẹ mẹ, ayinamẹ yọ́n-na-yizan lẹ yin nina to Lizọnyizọn Ahọluduta Tọn Mítọn mẹ gando lehe gọyìpọn kleunkleun lẹ sọgan yin bibasi do go. Enẹgodo, alọnuwe lọ Une vie pleinement satisfaisante: Comment? yin didetọn. Alọnuwe ehe yọ́n-na-yizan taun to Japon. Mihoko yí ayinamẹ he yin nina gando aliho he mẹ alọnuwe lọ sọgan yin yiyizan te go lẹ zan, titengbe dehe gando gọyìpọn kleunkleun lẹ bibasi go. E ma dẹn bọ e bẹ plọnmẹ Biblu jẹeji hẹ mẹhe sọgan ko gbẹ́ nupinplọn to ojlẹ de mẹ wayi lẹ. E dọmọ: “Oplọn ṣie lẹ sù—yèdọ kaka yì 12 to ojlẹ de mẹ—sọmọ bọ n’dona biọ to mẹdelẹ si nado nọte whẹ́!” Na nugbo tọn, eyin hiẹ nọ zinzọnlin gbọn gbigbọ dali, bo nọ yí anademẹ he yin nina devizọnwatọ Jehovah tọn lẹ do yizan mẹ, a na mọ dona susu yí.
Nọ Ganjẹ Gbigbọ Jiwheyẹwhe Tọn Go
14, 15. (a) Nawẹ gbẹtọvi mapenọ lẹ sọgan nọgbẹ̀ sọgbe hẹ klandowiwe yetọn gbọn? (b) Nawẹ hiẹ sọgan jihọntọn dagbe lẹ gbọn?
14 Taidi lizọnyizọnwatọ dide Jiwheyẹwhe tọn, hiẹ tindo lizọnyizọn de nado hẹndi. (Lom. 10:14) Hiẹ sọgan tindo numọtolanmẹ lọ dọ a ma pegan ganji nado hẹn azọngban ehe di. Ṣigba, dile e yin do na mẹyiamisisadode lẹ, Jiwheyẹwhe wẹ to hinhẹn we pegan. (Hia 2 Kọlintinu lẹ 3:5.) Hiẹ sọgan nọgbẹ̀ sọgbe hẹ klandowiwe towe eyin a nọ wà nuhe go a pé lẹpo bo nọ ganjẹ gbigbọ Jiwheyẹwhe tọn go.
15 Nugbo wẹ dọ, e ma nọ bọawuna mí gbẹtọvi mapenọ lẹ nado nọgbẹ̀ sọgbe hẹ klandowiwe mítọn hlan Jiwheyẹwhe mítọn, Jehovah he yin pipé. Dopo to nuhe nọ hẹn nulọ vẹawu lẹ mẹ wẹ yindọ aliho gbẹninọ tọn yọyọ he hiẹ de sọgan paṣa delẹ to mẹhe hiẹ ko nọ dogbẹ́ hẹ dai lẹ mẹ bọ yé na nọ ‘zùn we mapote.’ (1 Pita 4:4) Ṣogan, ma wọnji dọ hiẹ ko jihọntọn yọyọ devo lẹ blo, titengbe hẹ Jehovah po Jesu Klisti po. (Hia Jakọbu 2:21-23.) Nujọnu wẹ e sọ yin nado jẹakọ hẹ mẹmẹsunnu po mẹmẹyọnnu he to agun towe mẹ lẹ po, he yin apadewhe “pipli mẹmẹsunnu lẹ tọn pete” lẹdo aihọn pé. (1 Pita 2:17; Howh. 17:17) Jehovah na gọalọna we gbọn gbigbọ etọn gblamẹ nado jihọntọn he na zindonukọn nado nọ tindo nuyiwadomẹji dagbe do jiwe lẹ.
16. Taidi Paulu, naegbọn ‘homẹ sọgan nọ hùn we to madogán lẹ mẹ’?
16 Eyin họntọn dagbe lẹ tlẹ lẹdo we to agun mẹ, e sọgan gbẹ́ vẹawuna we nado duto avùnnukundiọsọmẹnu egbesọegbesọ tọn lẹ ji. Nuhe hiẹ dona pehẹ lẹ sọgan nọ hẹn nuṣikọna we to whedelẹnu, taidi dọ nuhahun towe lẹ ma na vọ̀ gbede wẹ nkọ. Ojlẹ enẹ mẹ taun wẹ hiẹ dona lẹhlan Jehovah bo biọ gbigbọ wiwe etọn. Apọsteli Paulu wlan dọmọ: “Whenue yẹn yin madogánnọ, whenẹnu wẹ yẹn yin huhlọnnọ.” (Hia 2 Kọlintinu lẹ 4:7-10; 12:10.) Paulu yọnẹn dọ gbigbọ Jiwheyẹwhe tọn sọgan súdo madogán gbẹtọvi tọn depope. Enẹwutu, huhlọn-yido-wazọ́n Jiwheyẹwhe tọn sọgan na we huhlọn whedepopenu he a gbọjọ bo tindo nuhudo alọgọ tọn. Paulu wlan dọ: “Homẹ nọ hùn mi to madogán lẹ mẹ.” Whenue e yin madogánnọ wẹ e nọ mọ ohia nuyiwadomẹji gbigbọ wiwe tọn. Hiẹ lọsu sọgan tindo numọtolanmẹ dopolọ!—Lom. 15:13.
17. Nawẹ gbigbọ wiwe sọgan gọalọna we nado yì fie a jei gbọn?
17 Mí tindo nuhudo gbigbọ Jiwheyẹwhe tọn nado sọgan zan gbẹzan he sọgbe hẹ klandowiwe he mí basi hlan ẹn. Nọ pọ́n dewe hlan taidi bato-kùntọ de. Yanwle towe wẹ nado sẹ̀n Jehovah kakadoi. Gbigbọ wiwe taidi jẹhọn he na deanana we nado yì fie a jei awuyẹyẹ-afọyẹyẹ. Ayihaawe ma tin dọ hiẹ ma jlo dọ gbigbọ aihọn Satani tọn ni hẹn we dánpe. (1 Kọl. 2:12) Hiẹ dona yọ́n fie jẹhọn dagbe lọ to yìnyìn yì bo dike e ni deanana we. Enẹ wẹ gbigbọ wiwe. Gbọn Ohó Jiwheyẹwhe tọn po titobasinanu he gbigbọ etọn nọ deanana lọ po gblamẹ, gbigbọ wiwe na deanana we yì fie jẹ.
18. Etẹwẹ yin gbemima towe todin, podọ etẹwutu?
18 Eyin hiẹ ko to nuplọn hẹ Kunnudetọ Jehovah tọn lẹ, bo ko to vivi gbẹdido gbigbọmẹ tọn dù hẹ yé, ṣigba bo ma ko de afọdide titengbe klandowiwe po baptẹm po tọn, kanse dewe dọ, ‘Etẹwutu n’do to awuwhle?’ Eyin hiẹ mọnukunnujẹ adà he gbigbọ wiwe to yiyiwà to ojlo Jehovah tọn hinhẹndi to egbehe mẹ bo yọ́n pinpẹn nuyiwa etọn tọn, to whelọnu lo, de afọdide he a yọnẹn dọ e sọgbe lọ. Jehovah na dona we susugege. E na na we gbigbọ wiwe etọn to gigọ́ mẹ. Eyin hiẹ ko yí baptẹm sọn owhe susu die, ayihaawe ma tin dọ hiẹ ko mọ nuyiwadomẹji gbigbọ wiwe tọn to gbẹzan towe mẹ. Hiẹ ko mọ lehe Jiwheyẹwhe sọgan hẹn we lodo gbọn gbigbọ etọn gblamẹ do. Enẹ sọgan zindonukọn domọ—yèdọ kakadoi. Enẹwutu, magbe nado to zọnlinzin gbọn gbigbọ wiwe dali zọnmii.
Be Hiẹ Flin Ya?
• Etẹwẹ e zẹẹmẹdo nado ‘zinzọnlin gbọn gbigbọ dali’?
• Etẹwẹ sọgan gọalọna we nado “to zọnlinzin gbọn gbigbọ dali zọnmii”?
• Nawẹ hiẹ sọgan nọgbẹ̀ sọgbe hẹ klandowiwe towe gbọn?
[Yẹdide to weda 15]
E nọ biọ vivẹnudido nado wleawuna ahun mítọn
[Yẹdide lẹ to weda 16, 17]
Be gbigbọ Jiwheyẹwhe tọn to nuyiwa do jiwe ya?