Nuhe Jesu Plọnmẹ Gando Jiwheyẹwhe Go

“Mẹde ma yọ́n mẹhe Otọ́ yin adavo Visunnu, po mẹhe Visunnu lọ jlo nado de e hia hlan lẹ po.”—LUKU 10:22.

WHẸPO Visunnu plọnji Jiwheyẹwhe tọn do wá aigba ji, e ko yí owhe madosọha lẹ zan to pọmẹ hẹ Otọ́ etọn. (Kọlọsinu lẹ 1:15) Enẹwutu, Visunnu lọ yọ́n linlẹn, numọtolanmẹ po aliho nuyiwa Otọ́ etọn tọn lẹ po. Whenue Visunnu ehe wá aigba ji to godo mẹ bo wá yin yinyọnẹn taidi Jesu, e plọn nugbo lọ gbẹtọ lẹ gando Otọ́ etọn go po jejejininọ po. Mí sọgan plọn nususu gando Jiwheyẹwhe go gbọn todidoai na nuhe Visunnu ehe dọ lẹ dali.

Oyín Jiwheyẹwhe tọn Oyín Jiwheyẹwhe tọn, Jehovah, yin nujọnu taun to nukun Jesu tọn mẹ. Visunnu yiwanna ehe jlo dọ mẹdevo lẹ ni yọ́n oyín Otọ́ etọn tọn bo nọ yí i zan. Oyín Jesu lọsu tọn zẹẹmẹdo “Jehovah wẹ Whlẹngán.” To ozán he jẹnukọnna okú etọn mẹ, Jesu hodẹ̀ hlan Jehovah dọmọ: “Yẹn ko . . . hẹn oyín towe zun yinyọnẹn.” (Johanu 17:26) E ma yin nupaṣamẹ dọ Jesu yí oyín Jiwheyẹwhe tọn zan bosọ hẹn ẹn zun yinyọnẹn na mẹdevo lẹ. To popolẹpo mẹ, nawẹ hosetọ Jesu tọn lẹ sọgan mọnukunnujẹ nugbo lọ mẹ gando Jehovah go eyin yé ma tlẹ yọ́n oyín Etọn po nuhe e zẹẹmẹdo po gbọn?a

Owanyi daho Jiwheyẹwhe tọn Jesu hodẹ̀ hlan Jiwheyẹwhe to gbèdopo dọmọ: “Otọ́ E, . . . hiẹ ko yiwanna mi jẹnukọnna didá aihọn tọn.” (Johanu 17:24) Na Jesu ko duvivi owanyi Jiwheyẹwhe tọn to olọn mẹ wutu, e tẹnpọn nado do adà dagbedagbe owanyi enẹ tọn lẹ hia to whenuena e tin to aigba ji.

Jesu dohia dọ owanyi Jehovah tọn gbloada taun. Jesu dọmọ: “Jiwheyẹwhe yiwanna aihọn lọ sọmọ bọ e namẹ Visunnu detọ́n dopo akàn etọn, na mẹdepope he do yise hia to ewọ mẹ ma nado yin vivasudo adavo nado tindo ogbẹ̀ madopodo.” (Johanu 3:16) Hogbe Glẹki tọn he yin lilẹdo “aihọn” ma zẹẹmẹdo “aigba.” Dile e yin yiyizan do tofi, e dlẹnalọdo gbẹtọvi lẹ—yèdọ gbẹtọvi lẹpo. Owanyi Jiwheyẹwhe tọn na gbẹtọvi lẹ klo sọmọ bọ e ze Visunnu he vẹna ẹn hugan lọ jo, na gbẹtọvi nugbonọ lẹ nido sọgan yin tuntundote sọn nuyiwadomẹji ylando po okú po tọn si bo tindo todido ogbẹ̀ madopodo tọn. Owanyi daho mọnkọtọn gbloada bosọ siso sọmọ bọ mí ma sọgan mọnukunnujẹemẹ to gigọ́ mẹ.—Lomunu lẹ 8:38, 39.

Jesu sọ zinnudo nugbo he vọ́ jidenamẹ taun de ji: Jehovah yiwanna dopodopo sinsẹ̀n-basitọ etọn lẹ tọn tlala. Jesu plọnmẹ dọ Jehovah taidi lẹngbọhọtọ de he nọ pọ́n lẹngbọ etọn dopodopo hlan taidi nuhọakuẹ. (Matiu 18:12-14) Jesu dọ dọ oblẹnọ dopo tata ma sọgan flẹ jẹ kọmẹ bọ Jehovah ma na yọnẹn. E yidogọ dọmọ: “Oda he to ota na mì lẹpo wẹ ko yin hihia.” (Matiu 10:29-31) Eyin Jehovah penugo nado doayi e go dọ oblẹnọ dopo tata whè to ohẹ̀-dọ́ de mẹ, nẹmunẹmu wẹ e na nọ doayi dopodopo gbẹtọvi he to sinsẹ̀n ẹn lẹ tọn go bo nọ penukundo yé go? Eyin Jehovah sọgan hia oda he to ota mítọn lẹpo bo doayi yé go, be adà gbẹzan mítọn tọn—yèdọ nuhudo, tuklajijẹ, kavi ahunmẹdunamẹnu mítọn—de tin bọ e ma sọgan yọnẹn ya?

Otọ́ olọn mẹ tọn Dile mí mọ to hosọ he wayi mẹ do, Jesu wẹ Visunnu detọ́n dopo akàn Jiwheyẹwhe tọn. Abajọ Visunnu yiwanna ehe nọ saba dọho Jehovah tọn bo nọ dlẹnalọdo E taidi “Otọ́” etọn. Na nugbo tọn, to ohó Jesu tọn tintan he yin kinkàndai lẹ mẹ, yèdọ ohó he e dọ to tẹmpli mẹ to whenuena e tindo owhe 12, e dlẹnalọdo Jehovah taidi “Otọ́ ṣie.” (Luku 2:49) Hogbe lọ “Otọ́” sọawuhia nudi whla 190 to owe Wẹndagbe tọn lẹ mẹ. Jesu dlẹnalọdo Jehovah po hogbe voovo lẹ po taidi “Otọ́ mìtọn,” “Otọ́ mítọn,” podọ “Otọ́ ṣie.” (Matiu 5:16; 6:9; 7:21) Gbọn hogbe ehe yiyizan po awuvivo po dali, Jesu dohia dọ e yọnbasi na gbẹtọvi mapenọ lẹ nado wleawuna haṣinṣan dagbe owanyi tọn de hẹ Jehovah.

E yin lẹblanunọ bo wleawufo nado jonamẹ Jesu yọnẹn dọ gbẹtọvi mapenọ lẹ tindo nuhudo lẹblanu susugege Jehovah tọn. To oló visunnu duvanọ lọ tọn mẹ, Jesu yí Jehovah jlẹdo otọ́ awuvẹmẹtọ he nọ jonamẹ de go, he nọ hùn alọ etọn lẹ nado kẹalọyi visunnu etọn he lẹnvọjọ de. (Luku 15:11-32) Hogbe Jesu tọn lẹ na mí jide dọ Jehovah nọ tẹnpọn nado mọ diọdo depope to ahun ylandonọ de tọn mẹ nado sọgan do lẹblanu hia ẹ. Jehovah nọ jlo vẹkuvẹku nado jona ylanwatọ he lẹnvọjọ de. Jesu basi zẹẹmẹ dọmọ: “Yẹn dọna mì dọ, mọdopolọ ayajẹ na sù humọ to olọn mẹ do ylandonọ dopo he lẹnvọjọ ji hugan do dodonọ kanwe-fọtọ̀n-nukunẹnẹ he ma tindo nuhudo lẹnvọjọ tọn lẹ ji.” (Luku 15:7) Mẹnu wẹ ma na jlo nado dọnsẹpọ Jiwheyẹwhe lẹblanunọ ehe?

E nọ sè odẹ̀ Whẹpo Jesu do wá aigba ji, e mọ po nukun po dọ Jehovah “nọ sè odẹ̀” bosọ nọ mọ awuvivi to odẹ̀ sinsẹ̀n-basitọ nugbonọ etọn lẹ tọn mẹ. (Psalm 65:2) Enẹwutu, to lizọnyizọn Jesu tọn whenu, e plọn hosetọ etọn lẹ lehe yé na nọ hodẹ̀ do podọ nuhe yé na nọ hodẹ̀ na lẹ. E na ayinamẹ dọ: “Mì dọ dọvọdọ onú dopolọ lẹ tọn . . . blo.” E sọ dotuhomẹna hosetọ etọn lẹ nado biọ dọ ojlo Jiwheyẹwhe tọn “ni yin wiwà, kẹdẹdi to olọn mẹ, mọdopolọ to aigba ji.” Mí sọ sọgan hodẹ̀ nado mọ núdùdù egbesọ tọn, nado mọ jona ylando mítọn lẹ tọn yí, bo nọavunte sọta whlepọn. (Matiu 6:5-13) Jesu plọnmẹ dọ Jehovah nọ sè odẹ̀ devizọnwatọ Etọn lẹ tọn taidi otọ́ de bo nọ na gblọndo na obiọ ahundopo tọn yetọn he yé basi to yise mẹ lẹ.—Matiu 7:7-11.

Na jide tọn, Jesu dovivẹnu nado plọnmẹ nugbo lọ gando Jehovah go bo do Jiwheyẹwhe wunmẹ he e yin hia. Ṣigba nudevo sọ tin gando Jehovah go he Jesu jlo vẹkuvẹku nado má hẹ mẹdevo lẹ—enẹ wẹ aliho he mẹ Jehovah na hẹn diọdo lẹdo aihọn pé tọn lẹ wá te nado hẹn lẹndai Etọn na aigba ehe po gbẹtọvi he tin to e ji lẹ po di. Na nugbo tọn, adà nuplọnmẹ Jesu tọn ehe wẹ hosọ yẹwhehodidọ etọn tọn.

[Nudọnamẹ odò tọn]