Nuhe Jesu Plọnmẹ Gando Ahọluduta Jiwheyẹwhe Tọn Go

“E zingbejizọnlin sọn tòdaho de mẹ jẹ tòdaho de mẹ podọ sọn gbétatò de mẹ jẹ gbétatò de mẹ, bo to . . . wẹndagbe ahọluduta Jiwheyẹwhe tọn lá.”—LUKU 8:1.

MÍ NỌ yiwanna nado dọhodo nuhe vivi na mí, yèdọ nuhe yin nujọnu to nukun mítọn mẹ lẹ ji. Dile Jesu lọsu dọ do, “sọn susugege nuhe tin to ahun mẹ lẹ tọn mẹ wẹ onù nọ dọtọ́n.” (Matiu 12:34) Eyin mí lẹnnupọndo nuhe ji Jesu dọhodo to lizọnyizọn etọn whenu lẹ ji, mí sọgan wá tadona kọ̀n dọ Ahọluduta Jiwheyẹwhe tọn yin nujọnu to nukun etọn mẹ.

Etẹwẹ Ahọluduta Jiwheyẹwhe tọn yin? Gandudu he nọ yin anadena gbọn ahọlu de dali wẹ nọ yin yiylọdọ ahọluduta. Enẹwutu Ahọluduta Jiwheyẹwhe tọn yin gandudu de he Jiwheyẹwhe doai. Jesu dọho taun gando Ahọluduta Jiwheyẹwhe tọn go bo tlẹ yí i do basi hosọ nuplọnmẹ etọn tọn. Owe Wẹndagbe tọn ẹnẹ lẹ donù Ahọluduta enẹ go hugan whla 110. Ṣigba Jesu ma plọnmẹ po onù po poun gba. Nuyiwa etọn lẹ sọ plọn nususu mí gando Ahọluduta Jiwheyẹwhe tọn po nuhe e na wà lẹ po go.

Mẹnu wẹ yin Ahọlu lọ? E ma yin gbọn vòbibla gbẹtọvi lẹ tọn dali wẹ Ahọlu Ahọluduta Jiwheyẹwhe tọn yin dide do gánzinpo ji gba. Kakatimọ, Jiwheyẹwhe lọsu wẹ de Gandutọ ehe. To nuplọnmẹ etọn mẹ, Jesu dohia dọ ewọ wẹ Jiwheyẹwhe de taidi Ahọlu.

Jesu yọnẹn dọ dọdai Biblu tọn lẹ ko dohia jẹnukọn dọ Mẹssia dopagbe lọ na dugán do Ahọluduta madopodo de ji. (2 Samuẹli 7:12-14; Daniẹli 7:13, 14; Matiu 26:63, 64) Flindọ Jesu lọsu dọ tlọlọ dọ emi wẹ Mẹssia dopagbe lọ. Gbọnmọ dali Jesu yigbe dọ emi wẹ Ahọlu he Jiwheyẹwhe de lọ. (Johanu 4:25, 26) Abajọ Jesu do yí hogbe lọ “ahọluduta ṣie” zan whlasusu.—Johanu 18:36.

Jesu sọ plọnmẹ dọ mẹdevo lẹ na dugán hẹ ẹ to Ahọluduta lọ mẹ. (Luku 22:28-30) E ylọ gandutọgbẹ́ enẹlẹ dọ “lẹngbọpa pẹvi,” na sọha yetọn na whè wutu. E dọ gando yé go dọmọ: “Otọ́ mìtọn mọdọ e jẹ nado na mì ahọluduta lọ.” (Luku 12:32) Owe he gbọngodo to Biblu mẹ dohia dọ gbẹtọ 144000 wẹ na tindo lẹblanulọkẹyi lọ nado dugán hẹ Klisti.—Osọhia 5:9, 10; 14:1.

Fie wẹ Ahọluduta lọ tin te? “Ahọluduta ṣie ma yin apadewhe aihọn ehe tọn,” wẹ Jesu dọna gandutọ Lomu tọn Pọntiu Pilati. (Johanu 18:36) Ahọluduta Jiwheyẹwhe tọn he tin to anademẹ Klisti tọn glọ ma na dugán gbọn gbẹtọvi lẹ gblamẹ gba. Jesu dlẹnalọdo Ahọluduta Jiwheyẹwhe tọn whlasusu taidi “ahọluduta olọn tọn.”a (Matiu 4:17; 5:3, 10, 19, 20) Enẹwutu, gandudu olọn mẹ tọn de wẹ Ahọluduta Jiwheyẹwhe tọn yin.

Jesu yọnẹn ganji dọ emi na wá lẹkọyi olọn mẹ to aigba ji ninọ na ojlẹ de godo. E dọ dọ emi na “wleawu otẹn de tọn” to dọ́n, na gandutọgbẹ́ emitọn lẹ nido sọgan kọnawudopọ hẹ emi.—Johanu 14:2, 3.

Etẹwẹ Ahọluduta lọ na wadotana? Jesu plọn hosetọ etọn lẹ nado nọ hodẹ̀ hlan Jiwheyẹwhe dọmọ: “Na ahọluduta towe ni wá. Na ojlo towe ni yin wiwà, kẹdẹdi to olọn mẹ, mọdopolọ to aigba ji.” (Matiu 6:9, 10) Ojlo Jiwheyẹwhe tọn ko to yinyin wiwà to olọn mẹ. Gbọn Ahọluduta lọ gblamẹ wẹ lẹndai Jiwheyẹwhe tọn na aigba na yin hinhẹndi. Nado wà enẹ dotana, Ahọluduta lọ na hẹn diọdo ayidego tọn lẹ wá aigba ehe ji.

Etẹwẹ Ahọluduta lọ na wà na aigba? Jesu plọnmẹ dọ Ahọluduta Jiwheyẹwhe tọn na de oylan sẹ̀ gbọn mẹhe yí ylanwiwa do do aṣa lẹ sinsánsẹ dali. (Matiu 25:31-34, 46) Enẹ na hẹn walọ gblezọn po kanyinylan wunmẹ lẹpo po wá opodo. Jesu plọnmẹ dọ aigba na gọ́ na gbẹtọ “homẹmimiọnnọ,” dodonọ, lẹblanunọ, he “wé-ṣeke to ahun mẹ” bosọ yin jijọho-dintọ lẹ.—Matiu 5:5-9.

Be nugbonọ ehelẹ na to dandannu glọ nado nọgbẹ̀ to aigba he yin hinhẹnflu ehe ji wẹ ya? Paali! Jesu dopagbe dọ to Ahọluduta Jiwheyẹwhe tọn glọ, aigba na yin vivọjlado to aliho jiawu de mẹ. Dawe he dona yin hùhù to apá Jesu tọn de dọna ẹn dọmọ: “Jesu, flin mi whenue hiẹ biọ ahọluduta towe mẹ.” Jesu gblọnna ẹn dọmọ: “Nugbo wẹ yẹn dọna we to egbé, Hiẹ na tin hẹ mi to Paladisi mẹ.” (Luku 23:42, 43) Mọwẹ, Ahọluduta Jiwheyẹwhe tọn na diọ aigba ehe zun paladisi lẹdo aihọn pé tọn de—pẹpẹ taidi dehe tin dai to jipa Edẹni tọn mẹ.

Nudevo tẹwẹ Ahọluduta lọ na wà na gbẹtọvi lẹ? Jesu ma dopagbe gando nuhe Ahọluduta Jiwheyẹwhe tọn na wà go poun gba. E sọ do nuhe Ahọluduta lọ na wà lẹ hia. Jesu hẹnazọ̀ngbọna mẹsusu to azọ́njiawu-liho bo gbọnmọ dali do nuhe e na wà to gigọ́ mẹ to sọgodo to gandudu Ahọluduta etọn tọn whenu hia jẹ obá de mẹ. Kandai gbọdo owe Wẹndagbe tọn dọ gando Jesu go dọmọ: “E to yìyì lẹdo Galili lẹpo pé, bo to mẹplọn to sinagọgu yetọn lẹ mẹ bosọ to yẹwheho wẹndagbe ahọluduta lọ tọn dọ bo to azọ̀n wunmẹ lẹpo po madogán wunmẹ lẹpo po hẹngbọ to gbẹtọ lẹ ṣẹnṣẹn.”—Matiu 4:23.

Jesu hẹn azọ̀n wunmẹwunmẹ lẹ gbọ. E “hùn nukun mẹhe yin jiji di nukuntọ́nnọ de tọn.” (Johanu 9:1-7, 32, 33) Jesu hẹnazọ̀ngbọna dawe he pozọ̀n ylankan de to yasana gbọn alọdido e go po owanyi po dali. (Malku 1:40-42) Whenue “dawe tókunọ he ma sọgan nọ dọho de” yin hinhẹnwa e dè, Jesu dohia dọ ewọ sọgan “hẹn tókunọ lẹ nado sènu podọ unbọpẹnnọ lẹ nado dọho.”—Malku 7:31-37.

Okú lọsu ma tlẹ sọgan hẹnalọdotena Ahọlu dide Jiwheyẹwhe tọn. To kandai owe Wẹndagbe tọn lẹ mẹ, whla atọ̀n wẹ Jesu fọ́n oṣiọ sọnku. E fọ́n visunnu dopo akàn asuṣiọsi de tọn, viyọnnu owhe 12 mẹvi de po họntọn vivẹ etọn Lazalọsi po.—Luku 7:11-15; 8:41-55; Johanu 11:38-44.

To whenue Jesu to zẹẹmẹ basi do sọgodo jiawu he to tepọn mẹjidugando Ahọluduta Jiwheyẹwhe tọn lẹ ji, e dọ dọdai gbọn apọsteli Johanu gblamẹ dọmọ: “Mì pọ́n! Gòhọ Jiwheyẹwhe tọn tin to gbẹtọvi lẹ dè, ewọ nasọ nọhẹ yé, yé nasọ yin omẹ etọn lẹ. Podọ Jiwheyẹwhe lọsu na tin po yé po. Ewọ nasọ súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba. Onú hoho lẹ ko juwayi.” (Osọhia 1:1; 21:3, 4) Yí nukun homẹ tọn do pọ́n—aihọn de matin avi awubla tọn, awufiẹsa po okú po! To whelọnu lo, odẹ̀ lọ dọ ojlo Jiwheyẹwhe tọn ni yin wiwà to aigba ji kẹdẹdi to olọn mẹ na mọ hẹndi mlẹnmlẹn.

Whetẹnu wẹ Ahọluduta Jiwheyẹwhe tọn na wá? Jesu plọnmẹ dọ bẹjẹeji gandudu etọn tọn taidi ahọlu na jẹ do ojlẹ ayidego tọn de mẹ he e ylọdọ “tintin tofi” etọn. Jesu dọ dọdai he bẹ nudọnamẹ gigọ́ hẹn de nado do ojlẹ he mẹ tintin tofi etọn to huhlọn ahọluduta tọn mẹ na bẹjẹeji te hia. Ojlẹ ehe na yin hiadogona gbọn hunyanhunyan lẹdo aihọn pé tọn lẹ dali, ehe bẹ awhàn, huvẹ, aigba sisọsisọ, azọ̀nylankan po jideji sẹnhẹngba tọn po hẹn. (Matiu 24:3, 7-12; Luku 21:10, 11) Ohia ehelẹ po devo he Jesu dọ dọdai yetọn lẹ po ko họnwun titengbe sọn 1914, yèdọ owhe he mẹ Wẹkẹ-Whàn I gbajẹgbonu. Enẹ dohia dọ Jesu ko to gandu todin taidi Ahọlu. To madẹnmẹ, ojlẹ na sọ̀ bọ Ahọluduta lọ na wá bo hẹn ojlo Jiwheyẹwhe tọn yin wiwà to aigba ji.b

Etẹwẹ wiwá Ahọluduta Jiwheyẹwhe tọn na zẹẹmẹdo na we? Ehe sinai do aliho he mẹ hiẹ de nado kẹalọyi nuplọnmẹ Jesu tọn te ji.

[Nudọnamẹ odò tọn lẹ]