Jesu Klisti​—Lehe Nuplọnmẹ Etọn Gando Gowe Do

“Yẹn wá na yé nido tindo ogbẹ̀ podọ nado sọgan tindo e to gigọ́ mẹ.”—JOHANU 10:10.

JESU KLISTI wá aigba ji titengbe nado namẹ, e ma yin nado mọyi. Gbọn lizọnyizọn etọn gblamẹ, e na nunina họakuẹ de gbẹtọvi lẹ—yèdọ nuplọnmẹ de he do nugbo lọ hia gando Jiwheyẹwhe po ojlo Etọn po go. Mẹhe kẹalọyi nuplọnmẹ enẹ lẹ sọgan hẹn gbẹzan yetọn pọnte todin, kẹdẹdile Klistiani nugbo livi susu sọgan dekunnu etọn do.a Ṣigba adọ̀ nuplọnmẹ Jesu tọn wẹ nunina he họakuẹ hugan lọ—enẹ wẹ ogbẹ̀ pipé he e zejo do ota mítọn mẹ. Sọgodo madopodo mítọn sinai do aliho he mẹ mí kẹalọyi adà tangan nuplọnmẹ etọn tọn ehe te ji.

Nuhe Jiwheyẹwhe po Klisti po namẹ Jesu yọnẹn dọ emi na kú okú awufiẹsa tọn to alọ kẹntọ emitọn lẹ tọn mẹ. (Matiu 20:17-19) Ṣogan, to hodidọ etọn he mẹsusu jẹakọ hẹ ganji he tin to Johanu 3:16 mẹ, e dọmọ: “Jiwheyẹwhe yiwanna aihọn lọ sọmọ bọ e namẹ Visunnu detọ́n dopo akàn etọn, na mẹdepope he do yise hia to ewọ mẹ ma nado yin vivasudo adavo nado tindo ogbẹ̀ madopodo.” Jesu sọ dọ dọ ewọ wá nado “ze alindọn [kavi ogbẹ̀] etọn jo taidi ofligọ de do ota mẹsusu tọn mẹ.” (Matiu 20:28) Naegbọn e do dọ dọ ogbẹ̀ emitọn yin ninamẹ kavi yin zizejo kakati nido yin hihòyi?

Owanyi madodògbo Jiwheyẹwhe tọn whàn ẹn nado wleawudaina gbẹtọvi lẹ na yé nido yin whinwhlẹngán sọn ylando he yé dugu etọn po kọdetọn ylankan etọn lẹ po si—yèdọ mape po okú po. Jiwheyẹwhe wà ehe gbọn Visunnu detọ́n dopo akàn etọn didohlan aigba ji nado kú okú avọ́sinsan tọn dali. Jesu yigbena avọ́sinsan ehe bo ze ogbẹ̀ gbẹtọvi pipé tọn etọn jo do ota mítọn mẹ. Awuwledainanu ehe, he nọ yin yiylọdọ ofligọ, wẹ nunina daho hugan he Jiwheyẹwhe na gbẹtọvi lẹ.b Nunina ehe wẹ sọgan hẹnmẹ tindo ogbẹ̀ madopodo.

Nuhe hiẹ dona wà Be ofligọ lọ yin nina do ota hiẹ lọsu tọn mẹ tlọlọ ya? Enẹ pò to hiẹ lọsu si. Di apajlẹ: Mí ni dọ dọ mẹde na we nunina biblá de. Na nugbo tọn, nunina ehe ma na lẹzun towe eyin a ma kẹ̀ alọ bo yí i. Mọdopolọ, Jehovah ze ofligọ lọ donukọnna we, ṣigba nunina ehe ma na lẹzun towe titi eyin a ma kẹ̀ alọ bo yí i. Gbọnna?

Jesu dọ dọ mẹhe “do yise hia” to ewọ mẹ lẹ wẹ na mọ ogbẹ̀ madopodo. Aliho he mẹ hiẹ nọ zan gbẹzan towe te wẹ na dohia dọ a tindo yise. (Jakọbu 2:26) Yise didohia to Jesu mẹ zẹẹmẹdo nado hẹn gbẹzan towe tin to kọndopọ mẹ hẹ nuhe e dọ bosọ wà lẹ. Nado wàmọ, hiẹ dona yọ́n Jesu po Otọ́ etọn po ganji. Jesu dọmọ: “Ehe wẹ ogbẹ̀ madopodo, dọ yé ni to vivẹnudo zọnmii nado yọ́n hiẹ Jiwheyẹwhe nugbo dopo kẹdẹ lọ, podọ mẹhe hiẹ dohlan, yèdọ Jesu Klisti.”—Johanu 17:3.

Nudi owhe 2000 die wayi, Jesu Klisti lá owẹ̀n he diọ gbẹzan gbẹtọ livi susu tọn lẹdo aihọn pé. Be hiẹ na jlo nado yọ́n nususu dogọ gando owẹ̀n enẹ go gọna lehe hiẹ po mẹyiwanna towe lẹ po sọgan mọaleyi sọn e mẹ todin podọ kakadoi do ya? Homẹ na hùn Kunnudetọ Jehovah tọn lẹ nado gọalọna we.

Hosọ he bọdego lẹ na gọalọna we nado yọ́n Jesu Klisti dogọ, yèdọ dawe lọ he nuplọnmẹ etọn sọgan diọ gbẹzan towe kakadoi.

[Nudọnamẹ odò tọn lẹ]