Mọ Kọfanamẹ to Nuwiwa Gbigbọmẹ Tọn lẹ Mẹ
“Mì yí zẹgẹ ṣie do okọ̀ mìtọn . . . , mìwlẹ nasọ mọ kọfanamẹ na alindọn mìtọn lẹ.”—MAT. 11:29.
1. Tito tẹwẹ Jiwheyẹwhe zedai to Osó Sinai kọ̀n, podọ etẹwutu?
TO WHENUE alẹnu Osẹ́n lọ tọn yin zizedai to Osó Sinai kọ̀n, e bẹ tito Gbọjẹzan sẹmẹsẹmẹ tọn hihodo hẹn. Gbọn hoyidọtọ etọn Mose gblamẹ, Jehovah degbena akọta Islaeli tọn dọmọ: “Azán ṣidopo hiẹ na wà azọ́n towe họ̀, podọ to azán ṣinawetọ gbè hiẹ na gbọjẹ: na oyìn towe po kẹtẹkẹtẹ towe po nido tindo gbọjẹ, podọ visunnu deviyọnnu towe tọn, po jonọ lọ po, nido yin awumiọnnọ.” (Eks. 23:12) Mọwẹ, na Jehovah yí nukun nujọnu tọn do pọ́n mẹhe tin to Osẹ́n lọ glọ lẹ wutu, e gbọn owanyi dali de azán de dovo na omẹ etọn lẹ nido nọ gbọjẹ bo “yin awumiọnnọ” kavi mọ kọfanamẹ.
2. Nawẹ Islaelivi lẹ mọaleyi sọn Gbọjẹzan lọ yìnyìn mẹ gbọn?
2 Be azán Gbọjẹzan tọn lọ tin na gbọjẹyíyí kẹdẹ wẹ ya? Lala, adà titengbe de wẹ e yin to sinsẹ̀n-bibasi Islaelivi lẹ tọn mẹ na Jehovah. Gbọjẹzan lọ yìnyìn nọ hùn dotẹnmẹ dotena tatọ́ whẹndo tọn lẹ nado plọnnu whẹndo yetọn nado “nọ doayi aliho OKLUNỌ tọn go, nado nọ wà dodo.” (Gẹn. 18:19) E sọ nọ hùn dotẹnmẹ dotena whẹndo po họntọn lẹ po nado kọnawudopọ bo lẹnnupọndo nuhe Jehovah ko wà lẹ ji bo duvivi gbẹdido ayajẹ tọn. (Isa. 58:13, 14) Onú titengbe hugan lọ wẹ yindọ, to dọdai-liho, Gbọjẹzan lọ nọtena ojlẹ he mẹ kọfanamẹ nujọnu tọn na wá tin-to-aimẹ gbọn Gandudu Owhe Fọtọ́n Klisti tọn gblamẹ. (Lom. 8:21) Ṣigba, to egbehe lo? Nawẹ Klistiani nugbo he tindo ojlo to aliho Jehovah tọn mẹ lẹ sọgan mọ kọfanamẹ mọnkọtọn gbọn, podọ to fie?
Mọ Kọfanamẹ Gbọn Gbẹdido Klistiani lẹ Tọn Dali
3. Aliho tẹ mẹ wẹ Klistiani owhe kanweko tintan tọn lẹ nọgodona ode awetọ te, podọ etẹwẹ yin kọdetọn lọ?
3 Apọsteli Paulu basi zẹẹmẹ agun Klistiani tọn taidi “dòtin podọ alọgọ nugbo lọ tọn.” (1 Tim. 3:15) Klistiani dowhenu tọn lẹ mọ godonọnamẹ susu yí gbọn tulinina ode awetọ po ode awetọ hinhẹn lodo po dali. (Efe. 4:11, 12, 16) To whenuena Paulu tin to Efesu, e mọ dlapọn tulinamẹ tọn yí gbọn hagbẹ agun Kọlinti tọn lẹ dali. Doayi nuyiwadomẹji he enẹ tindo go: “Yẹn jaya na tintin tofi Stefana, Fọltunatu po Akaiku po tọn,” wẹ Paulu dọ, “na yé ko fakọna gbigbọ ṣie.” (1 Kọl. 16:17, 18) Mọdopolọ, to whenue Titu yì Kọlinti nado yilizọn na mẹmẹsunnu he tin to finẹ lẹ, Paulu gọ̀ owe wlan hlan agun lọ dọmọ: “Gbigbọ etọn ko yin kọfana gbọn mìmẹpo dali.” (2 Kọl. 7:13) Mọdopolọ to egbehe, Kunnudetọ Jehovah tọn lẹ nọ mọ kọfanamẹ sọn gbẹdido mẹjlọdote tọn Klistiani lẹ tọn mẹ.
4. Nawẹ opli agun tọn lẹ nọ fakọna mí gbọn?
4 Dopodopo mítọn wẹ yọnẹn sọn numimọ mẹ dọ opli agun tọn lẹ yin asisa ayajẹ daho tọn de. To finẹ mí nọ mọ ‘tulinamẹ ode awetọ tọn, mẹdopodopo gbọn ode awetọ dali.’ (Lom. 1:12) Mẹmẹsunnu po mẹmẹyọnnu mítọn lẹ po ma yin mẹyinyọnẹn poun lẹ kavi mẹhe mí nọ tindo haṣinṣan mọmọ tọn hẹ lẹ gba. Họntọn nugbo lẹ wẹ yé yin, yèdọ mẹhe mí yiwanna bo nọ na sisi lẹ. Mí nọ mọ ayajẹ po homẹmimiọn susu po yí gbọn awukinkọndopọ hẹ yé to opli agun tọn lẹ ji to gbesisọ mẹ dali.—File. 7.
5. Nawẹ mí sọgan fakọna ode awetọ to plidopọ agbegbe po lẹdo tọn lẹ po whenu gbọn?
5 Asisa kọfanamẹ tọn mítọn devo wẹ plidopọ agbegbe po lẹdo tọn mítọn lẹ po. Gbọnvona dọ pipli daho ehelẹ nọ ze osin gbẹnamẹ tọn he tin to Ohó Jiwheyẹwhe tọn, Biblu mẹ donukọnna mí, yé nọ hùn dotẹnmẹ dotena mí nado “hùndonuvo” to gbẹdido mítọn lẹ mẹ. (2 Kọl. 6:12, 13) Ṣigba, etẹwẹ mí sọgan wà eyin e nọ vẹawuna mí nado jẹakọ hẹ mẹdevo lẹ? Dopo to aliho he mẹ mí sọgan jẹakọ hẹ mẹmẹsunnu po mẹmẹyọnnu mítọn lẹ po te mẹ wẹ nado nọ ze míde jo nado gọalọ to plidopọ lẹ whenu. To whenue mẹmẹyọnnu de ze ede jo nado gọalọ to plidopọ akọjọpli tọn de whenu godo, e dọmọ: “N’ma yọ́n mẹsusu to finẹ, adavo hagbẹ whẹndo ṣie tọn po họntọn delẹ po. Ṣigba to whenue n’gọalọ nado penukundo wiwejininọ go, n’jẹakọ hẹ mẹmẹsunnu po mẹmẹyọnnu susu po! Awuvivinu daho de wẹ e yin!”
6. Etẹwẹ yin dopo to aliho he mẹ mí sọgan mọ kọfanamẹ te to gbọjẹ whenu lẹ mẹ?
6 Aṣa Islaelivi lẹ tọn wẹ e yin nado nọ zingbejizọnlin yì Jelusalẹm whla atọ̀n na sinsẹ̀n-bibasi to whemẹwhemẹ. (Eks. 34:23) Ehe nọ saba biọ dọ yé ni jo ogle po nusatẹn yetọn lẹ po do bo zingbejizọnlin po afọ po na azán atọ̀n gbọn aliho he gọ́ na afínfín lẹ ji. Etomọṣo, tẹmpli mẹ yìyì nọ hẹn “homẹhun daho” wá na yé dile mẹhe wá lẹ nọ to ‘gigopana Jehovah.’ (2 Otan. 30:21) Mọdopolọ to egbehe, susu devizọnwatọ Jehovah tọn lẹ tọn nọ mọdọ whẹ̀ntintọ́n po hagbẹ whẹndo yetọn tọn po nado yì dla Bẹtẹli, alahọ Kunnudetọ Jehovah tọn lẹ tọn he tin to yakẹ de pọ́n nọ hẹn ayajẹ daho wá na yé. Be hiẹ sọgan ze dlapọn mọnkọtọn de do tito gbọjẹyíyí whẹndo towe tọn he na bọdego mẹ ya?
7. (a) Nawẹ ayidedai pọmẹ tọn lẹ sọgan yin alenu gbọn? (b) Etẹwẹ sọgan yidogọna nuwiwa mẹjlọdote tọn he na yin finflin de?
7 Awukinkọndopọ hẹ hagbẹ whẹndo tọn po họntọn lẹ po na ayidedai pọmẹ tọn lẹ sọ sọgan yin tulinamẹnu. Ahọlu Sọlomọni nuyọnẹntọ lọ dọmọ: “Nude ma yọ́n na gbẹtọ hú ni dù, bosọ nù, podọ e ni hẹn ayiha etọn duvivi onú dagbe tọn to magbọjẹ etọn mẹ.” (Yẹwh. 2:24) E ma yin kọfanamẹ kẹdẹ wẹ ayidedai pọmẹ tọn nọ hẹnwa gba, ṣigba e sọ nọ hẹn haṣinṣan owanyi tọn mítọn hẹ Klistiani hatọ lẹ lodo dile mí to akọjẹhẹ yé dogọ. Eyin mí na gọalọ nado yidogọna nuwiwa mẹjlọdote tọn he na yin finflin de, nuhe yọ́n hugan wẹ nado nọ hẹn ayidedai pọmẹ tọn lẹ do jlẹkaji bo hẹn ẹn diun dọ yé yin anadena ganji, titengbe eyin ahàn sinsinyẹn na yin zizedonukọnnamẹ.
Lizọnyizọn lọ Nọ Hẹn Kọfanamẹ Wá
8, 9. (a) Vogbingbọn tẹwẹ tin to owẹ̀n Jesu tọn gọna wekantọ po Falesi lẹ po tọn ṣẹnṣẹn? (b) Nawẹ mí nọ mọaleyi gbọn nugbo Biblu tọn lẹ mimá dali gbọn?
8 Jesu yin zohunhunnọ to lizọnyizọn lọ mẹ, podọ e na tuli devi etọn lẹ nado wà nudopolọ. Ehe họnwun to ohó etọn mẹ dọmọ: “Ojijẹ lọ sù, ṣigba azọ́nwatọ lẹ ma sù. Enẹwutu, mì vẹ̀ Ogán jibẹwawhé lọ tọn nado do azọ́nwatọ lẹ hlan ojijẹ etọn mẹ.” (Mat. 9:37, 38) Na nugbo tọn, owẹ̀n he Jesu zedonukọnnamẹ lọ hẹn kọfanamẹ wá; “wẹndagbe” wẹ. (Mat. 4:23; 24:14) Ehe gbọnvo pete na osẹ́n hẹngogo tọn lẹ he Falesi lẹ zedo gbẹtọ lẹ ji.—Hia Matiu 23:4, 23, 24.
9 To whenuena mí to owẹ̀n Ahọluduta lọ tọn lá na mẹdevo lẹ, mí nọ fakọna yé to gbigbọ-liho podọ to ojlẹ dopolọ mẹ, mí nọ hẹn nukunnumọjẹnumẹ po pinpẹn-nutọn-yinyọnẹn mítọn na nugbo họakuẹ Biblu tọn lẹ po jideji. Psalm-kantọ lọ gbọn gbesisọ dali dọmọ: “Hallelujah. Na yinyọ́n wẹ nado nọ jihàn pipà lẹ hlan Jiwheyẹwhe mítọn; na e vivi.” (Psalm 147:1) Be hiẹ sọgan hẹn ayajẹ he a nọ mọ to gigopipana Jehovah to kọmẹnu towe lẹ dè mẹ jideji ya?
10. Be kọdetọn dagbe he mí nọ tindo to lizọnyizọn lọ mẹ sinai do lehe gbẹtọ lẹ kẹalọyi wẹndagbe lọ do ji wẹ ya? Basi zẹẹmẹ.
10 Nugbo wẹ dọ, to aigba-denamẹ delẹ ji gbẹtọ lẹ nọ kẹalọyi wẹndagbe lọ hugan fidevo lẹ. (Hia Owalọ lẹ 18:1, 5-8.) Eyin hiẹ nọ nọ̀ lẹdo he gbẹtọ lẹ ma nọ kẹalọyi owẹ̀n Ahọluduta lọ tọn sọmọ te mẹ, tẹnpọn nado nọ ze ayidonugo do dagbe he wà a te to lizọnyizọn lọ mẹ ji. Flindọ vivẹnudido towe nado lá oyín Jehovah tọn zọnmii ma yin to ovọ́ mẹ gba. (1 Kọl. 15:58) Humọ, kọdetọn dagbe he mí nọ tindo to lizọnyizọn lọ mẹ ma nọ sinai do lehe gbẹtọ lẹ kẹalọyi wẹndagbe lọ do ji gba. Mí sọgan deji dọ Jehovah na hẹn ẹn diun dọ gbẹtọ ahunjijlọnọ lẹ na mọ dotẹnmẹ hundote lọ nado kẹalọyi owẹ̀n Ahọluduta lọ tọn.—Joh. 6:44.
Sinsẹ̀n-Bibasi Whẹndo Tọn Nọ Hẹn Kọfanamẹ Wá
11. Azọngban tẹwẹ Jehovah dena mẹjitọ lẹ, podọ nawẹ yé sọgan hẹn ẹn di gbọn?
11 Mẹjitọ he nọ dibusi Jiwheyẹwhe lẹ tindo azọngban lọ nado plọn ovi yetọn lẹ gando Jehovah po aliho etọn lẹ po go. (Deut. 11:18, 19) Eyin hiẹ yin mẹjitọ de, be hiẹ nọ de whenu dovo nado plọnnu ovi towe lẹ gando Otọ́ owanyinọ olọn mẹ tọn mítọn go ya? Nado gọalọna we na hiẹ nido hẹn azọngban titengbe ehe di bo penukundo nuhudo whẹndo towe tọn lẹ go, Jehovah wleawu núdùdù gbigbọmẹ tọn susugege he nọ fakọnamẹ lẹ gbọn owe, linlinnamẹwe, video, po nuyidokanji ladio tọn lẹ po gblamẹ.
12, 13. (a) Nawẹ whẹndo lẹ sọgan mọaleyi sọn Sinsẹ̀n-Bibasi Whẹndo tọn mẹ to whèjai gbọn? (b) Nawẹ mẹjitọ lẹ sọgan hẹn ẹn diun dọ sinsẹ̀n-bibasi whẹndo yetọn tọn yin asisa kọfanamẹ tọn de gbọn?
12 To yidogọ mẹ, pipli afanumẹ nugbonọ podọ nuyọnẹntọ lọ tọn ko ze tito Sinsẹ̀n-Bibasi Whẹndo tọn to whèjai dai. Ehe wẹ whèjai de he yin didedovo na Biblu pinplọn whẹndo tọn to sẹmẹsẹmẹ. Mẹsusu wẹ ko doayi e go dọ tito ehe gọalọna yé nado hẹn owanyi he yé tindo na ode awetọ jideji bo hẹn haṣinṣan yetọn hẹ Jehovah lodo. Ṣigba, nawẹ mẹjitọ lẹ sọgan hẹn ẹn diun dọ sinsẹ̀n-bibasi whẹndo tọn yetọn yin asisa kọfanamẹ gbigbọmẹ tọn de gbọn?
13 Sinsẹ̀n-Bibasi Whẹndo tọn to whèjai ma dona yin nuwiwa he nọ hẹn apọṣimẹ kavi ma nọ hẹnmẹ voawu de gba. To popolẹpo mẹ, “Jiwheyẹwhe ayajẹnọ lọ” wẹ mí to sinsẹ̀n, podọ ewọ jlo dọ mí ni yin ayajẹnọ to sinsẹ̀n-bibasi mítọn mẹ. (1 Tim. 1:11; Flp. 4:4) Na taun tọn, dona de wẹ e yin nado de whèjai de dovo nado nọ dọhodo nugbo họakuẹ Biblu tọn lẹ ji. Mẹjitọ lẹ sọgan hẹn aliho mẹpinplọn tọn yetọn bọawu gbọn nulẹnpọn sisosiso po wuntuntun yiyizan po dali. Di apajlẹ, whẹndo de na dotẹnmẹ visunnu yetọn Brandon, he tindo owhe ao nado ze azọ́n de donukọnna yé he hosọ etọn yin, “Naegbọn Jehovah Yí Satani Jlẹdo Odàn Go?” Whẹho ehe ko duahunmẹna Brandon na e yiwanna odàn lẹ, podọ e nọ vẹna ẹn dọ Satani yin yiyijlẹdo yé go. To whedelẹnu, whẹndo delẹ ko basi wadohia nuhe jọ to Biblu mẹ lẹ tọn, bọ hagbẹ whẹndo lọ tọn dopodopo nọ nọtena mẹhe yin nùdego to Biblu mẹ de bo nọ hia adà etọn sọn Biblu mẹ, kavi basi wadohia ninọmẹ de tọn. Gbọnvona dọ aliho mẹpinplọn tọn ehelẹ nọ hẹn ayajẹ wá, yé sọgan hẹn ovi towe lẹ nado tindo mahẹ to nuwiwa lọ mẹ, na nunọwhinnusẹ́n Biblu tọn lẹ nido sọgan yinuwado ahun yetọn ji.a
Dapana Nuhe Sọgan Hẹn We Gbọjọ Lẹ
14, 15. (a) Nawẹ kọgbidinamẹ po hihọ́ matindo po ko jideji to azán godo tọn lẹ mẹ gbọn? (b) Kọgbidinamẹ devo tẹlẹ wẹ mí sọgan pehẹ?
14 Kọgbidinamẹ po hihọ́ matindo po ko jideji to azán godo tọn aihọn ylankan ehe tọn lẹ mẹ. Azọ́nmamọwà po nuhahun akuẹzinzan tọn devo lẹ po to nuyiwa do gbẹtọ livi susu ji. Mẹhe tlẹ tindo agbasazọ́n lẹ nọ saba tindo numọtolanmẹ lọ dọ azọ́nkuẹ yetọn nọ yawu vọ̀ taidi dọ apò tintọ́n mẹ wẹ yé nọ bẹ akuẹ lọ do nkọ, bọ ale vude poun wẹ yé nọ hẹnwa na whẹndo yetọn. (Yijlẹdo Hagai 1:4-6 go.) E nọ taidi dọ tonudọtọ lẹ po gandutọ devo lẹ po ma pé nude go na yé lọsu to pipehẹ nuyiwa nukunbianamẹtọ lẹ tọn po ninọmẹ ylankan devo lẹ po. Mẹsusu wẹ nọ gbọjọ na awugbopo yetọn titi lẹ wutu.—Ps. 38:4.
15 Klistiani nugbo lẹ lọsu nọ pehẹ nuhahun po kọgbidinamẹ he nọ wá sọn aihọn Satani tọn dè lẹ po. (1 Joh. 5:19) To ninọmẹ delẹ mẹ, devi Klisti tọn lẹ sọgan pehẹ kọgbidinamẹ devo lẹ dogọ dile yé to vivẹnudo nado gbọṣi nugbonọ-yinyin mẹ na Jehovah. Jesu dọmọ: “Eyin yé ko dohomẹkẹn mi, yé na dohomẹkẹn mì ga.” (Joh. 15:20) Etomọṣo, etlẹ yin to whenue ‘mí yin homẹkẹndo, mí ma nọ yin gbigbẹdai.’ (2 Kọl. 4:9) Naegbọn e do yinmọ?
16. Etẹwẹ sọgan gọalọna mí nado hẹn ayajẹ mítọn go?
16 Jesu dọmọ: “Mì wá dè e, mì mẹhe tin to magbọjẹ mẹ bọ yè doagban pinpẹn na lẹpo, yẹn nasọ fakọna mì.” (Mat. 11:28) Gbọn yise mlẹnmlẹn tintindo to awuwledainanu ofligọ Klisti tọn mẹ dali, mí nọ ze mídelẹ do alọ Jehovah tọn mẹ to yẹhiadonu-liho. Gbọnmọ dali, mí nọ mọ “huhlọn he hú jọwamọ tọn” yí. (2 Kọl. 4:7) “Alọgọtọ lọ,” yèdọ gbigbọ wiwe Jiwheyẹwhe tọn nọ hẹn yise mítọn lodo to aliho ayidego tọn mẹ na mí nido sọgan doakọnna whlepọn po nukunbianamẹ he mí nọ pehẹ lẹ po bosọ hẹn ayajẹ mítọn go.—Joh. 14:26; Jak. 1:2-4.
17, 18. (a) Gbigbọ tẹwẹ mí dona họ́ míde sọta? (b) Etẹwẹ sọgan jọ eyin mí na ayidonugo ayidedai ovọ́ lẹ?
17 To egbehe, Klistiani nugbo lẹ dona tin to aṣeji ma nado dike gbigbọ gbẹdudu tọn he ko do tadu aihọn lọ ni yinuwado yé ji. (Hia Efesunu lẹ 2:2-5.) Ni e ma yinmọ, mí sọgan yin yẹdoklọ gbọn “ojlo agbasalan tọn, ojlo nukun tọn, po nutindo gbẹ̀mẹ tọn mẹtọn lẹ jijlá po” dali. (1 Joh. 2:16) Kavi mí sọgan gbọn nuṣiwa dali lẹndọ awujijona ojlo agbasalan tọn lẹ na hẹn kọfanamẹ wá na mí. (Lom. 8:6) Di apajlẹ, mẹdelẹ ko joawuna amasin adinọ, ahàn sinsinyẹn ṣiṣizan, yẹdide fẹnnuwiwa tọn pinpọn, ayidedai lanmẹyiya tọn, kavi nuyiwa ylankan voovo lẹ nado sọgan mọ awuvivi. “Ayiha wintinwintin” Satani tọn lẹ yin awuwlena nado doyẹklọmẹ gbọn linlẹn agọ̀ zizedonukọnnamẹ gando kọfanamẹ mimọyi go dali.—Efe. 6:11.
18 Na nugbo tọn, nude ma ylan to dùdù, nùnù, po mahẹ tintindo to ayidedai mẹjlọdote tọn lẹ po mẹ eyin yé yin bibasi do jlẹkaji. Etomọṣo, mí ma nọ dike onú mọnkọtọn lẹ ni lẹzun yanwle tintan to gbẹzan mítọn mẹ. Jlẹkajininọ po mawazẹjlẹgo po yin dandannu, titengbe na ojlẹ he mẹ mí to gbẹnọ te wutu. Yanwle mẹdetiti tọn lẹ sọgan yinuwado mí ji sọmọ bọ mí na lẹzun mẹhe “gbọjọ kavi yin mẹhe ma tindo sinsẹ́n gando oyọnẹn he pegan Oklunọ mítọn Jesu Klisti tọn go.”—2 Pita 1:8.
19, 20. Nawẹ mẹde sọgan mọ kọfanamẹ nujọnu tọn gbọn?
19 Eyin mí hẹn linlẹn mítọn tin to kọndopọ mẹ hẹ nubiọtomẹsi Jehovah tọn lẹ, mí nọ mọdọ gbẹdudu depope he aihọn ehe nọ zedonukọnnamẹ lẹ ma na dẹn-to-aimẹ. Mose mọnukunnujẹ ehe mẹ, podọ mílọsu lẹ ga. (Heb. 11:25) Nugbo lọ wẹ yindọ, kọfanamẹ nujọnu tọn he nọ hẹn numọtolanmẹ sisosiso ayajẹ po pekọ dẹn-to-aimẹ po tọn wá, nọ wá sọn ojlo Otọ́ olọn mẹ tọn mítọn tọn wiwà mẹ.—Mat. 5:6.
20 Mì gbọ mí ni zindonukọn nado nọ mọ kọfanamẹ to nuwiwa gbigbọmẹ tọn lẹ mẹ. Gbọn mọwiwà dali, mí na “gbẹ́ jijọ-madi-Jiwheyẹwhe po ojlo aihọn tọn lẹ po dai . . . dile mí to tepọn todido jiawu gọna awusọhia gigonọ Jiwheyẹwhe daho lọ tọn podọ Mẹwhlẹngántọ mítọn, yèdọ Klisti Jesu tọn.” (Titu 2:12, 13) Enẹwutu, mì gbọ mí ni magbe nado gbọṣi zẹgẹ Jesu tọn glọ gbọn taliliaina aṣẹpipa etọn po anademẹ etọn po dali. Gbọnmọ dali, mí na mọ ayajẹ po kọfanamẹ nujọnu tọn po!
[Nudọnamẹ odò tọn]
a Nado mọ nudọnamẹ dogọ gando aliho he mẹ oplọn whẹndo tọn sọgan yin awuvivinu bo gọ́ na nupinplọn te go, pọ́n Lizọnyizọn Ahọluduta Tọn Mítọn [flansegbe] décembre 1990, weda 1 po 8tọ po.
Nawẹ Hiẹ Na Na Gblọndo Gbọn?
• Nawẹ omẹ Jehovah tọn lẹ nọ mọ kọfanamẹ to egbehe gbọn?
• Aliho tẹlẹ mẹ wẹ lizọnyizọn lọ nọ fakọna mí po mẹhe mí nọ dọhona lẹ po te?
• Etẹwẹ tatọ́ whẹndo tọn lẹ sọgan wà nado hẹn ẹn diun dọ sinsẹ̀n-bibasi whẹndo yetọn tọn nọ fakọnamẹ?
• Etẹlẹ wẹ nọ hẹn mí gbọjọ to gbigbọ-liho?
[Yẹdide to weda 26]
Mí nọ mọ asisa kọfanamẹ tọn susu, eyin mí kẹalọyi zẹgẹ Jesu tọn