Odẹ̀
3 Nawẹ Mí Dona Nọ Hodẹ̀ Gbọn?
NA NUHE dù dẹ̀hiho, sinsẹ̀n susu wẹ nọ zinnudo lehe mẹde dona nọ do hodẹ̀, hogbe he yè dona zan, gọna aṣa dẹ̀hiho tọn he dona yin hihodo lẹ ji. Ṣigba, Biblu gọalọna mí nado de ayiha sọn whẹho he ma yin nujọnu enẹlẹ ji, bo na ayidonugo adà titengbe hugan kanbiọ lọ “Nawẹ mí dona nọ hodẹ̀ gbọn?” tọn lẹ.
Biblu dohia dọ devizọnwatọ nugbonọ Jiwheyẹwhe tọn lẹ nọ nọ̀ ninọmẹ voovo mẹ do hodẹ̀ podọ to ofi voovo lẹ. Yé nọ hodẹ̀ do odò kavi do aga sọgbe hẹ ninọmẹ lẹ. Whenue yé to dẹ̀ho, yé nọ jlọkọ̀ pọ́n agahomẹ kavi jẹklo. Kakati nado yí boṣiọ, yẹdide, ojẹ́, kavi owe odẹ̀ tọn lẹ zan, yé nọ hodẹ̀ sọn ahun mẹ to hogbe yedetiti tọn mẹ. Naegbọn odẹ̀ yetọn lẹ do nọ yin sisè?
Dile hosọ he jẹnukọn dohia do, yé nọ hodẹ̀ hlan Jiwheyẹwhe kẹdẹ, yèdọ mẹhe nọ yin Jehovah. Onú titengbe devo sọ jẹna ayidego. Mí hia to 1 Johanu 5:14 mẹ dọmọ: “Ehe sọ wẹ jidide he mí tindo to ewọ mẹ, dọ nudepope he mí biọ sọgbe hẹ ojlo etọn, ewọ nọ sè mítọn.” Na nugbo tọn, odẹ̀ mítọn lẹ dona nọ sọgbe hẹ ojlo Jiwheyẹwhe tọn. Etẹwẹ enẹ zẹẹmẹdo?
Nado sọgan hodẹ̀ sọgbe hẹ ojlo Jiwheyẹwhe tọn, mí dona yọ́n nuhe yin ojlo etọn whẹ́. Enẹwutu, dogbigbapọnna Biblu yin dandannu de na dẹ̀hiho. Be ehe zẹẹmẹdo dọ Jiwheyẹwhe ma na sè odẹ̀ mítọn eyin mí ma yin weyọnẹntọ Biblu tọn de wẹ ya? Paali, ṣigba Ewọ nọ donukun dọ mí ni yọ́n ojlo etọn, dovivẹnu nado mọnukunnujẹemẹ bosọ yinuwa sọgbe hẹ ẹ. (Matiu 7:21-23) Odẹ̀ mítọn lẹ sọ dona nọ sọgbe hẹ nuhe plọn mí te lẹ.
Dile mí to nuplọn gando Jehovah po ojlo etọn po go, yise mítọn nọ sinyẹn deji—yèdọ jẹhẹnu titengbe de he do kanṣiṣa hẹ odẹ̀. Jesu dọmọ: “Nudepope he mì biọ to odẹ̀ mẹ, eyin mì tindo yise, mì na mọyi.” (Matiu 21:22) Yise tintindo ma zẹẹmẹdo alọkikẹyi nulẹpo domọ poun. Kakatimọ, e zẹẹmẹdo nado kudo nude ji, eyin yè ma tlẹ mọ nulọ, amọ́ bọ kunnudenu dolido lẹ tin. (Heblu lẹ 11:1) Biblu bẹ kunnudenu susu hẹn he dohia dọ, dile Jehovah tlẹ yin gbigbọ mayinukundomọ de, ewọ tin nugbonugbo bọ mí sọgan dejidego, podọ e sọ nọ sè odẹ̀ mẹhe tindo yise to ewọ mẹ lẹ tọn. Humọ, mí sọgan nọ biọ Jehovah to whepoponu dọ ni do yise yise ji na mí, podọ ewọ sọ yiwanna nado nọ na mí nuhe sin hudo mí do lẹ.—Luku 17:5; Jakọbu 1:17.
Onú titengbe devo die gando lehe mí na nọ hodẹ̀ do go. Jesu dọmọ: “Mẹdepope ma nọ wá Otọ́ dè adavo gbọn yẹn gblamẹ.” (Johanu 14:6) Enẹwutu, Jesu ji wẹ mí sọgan gbọn do dọnsẹpọ Otọ́ lọ, Jehovah. Abajọ Jesu dọna hodotọ etọn lẹ nado nọ hodẹ̀ to oyín emitọn mẹ. (Johanu 14:13; 15:16) Enẹ ma dohia dọ Jesu wẹ mí dona nọ hodẹ̀ hlan gba. Kakatimọ, mí nọ hodẹ̀ to oyín Jesu tọn mẹ, na mí nọ hẹn do ayiha mẹ dọ Jesu wẹ hùnali bọ mí do penugo nado nọ dọnsẹpọ Otọ́ mítọn he yin pipé podọ wiwe lọ.
Hodotọ Jesu tọn he sẹpọ ẹ hugan lẹ tlẹ kanse e to gbèdopo dọmọ: “Oklunọ, plọn mí lehe mí na nọ hodẹ̀ do.” (Luku 11:1) E họnwun dọ, yé ma to hokanse e gando onú dodonu tọn he ji mí ṣẹṣẹ dọhodo ehelẹ go. Na nugbo tọn, yé jlo na yọ́n nue yé dona nọ dọ to odẹ̀ yetọn lẹ mẹ—to hogbe devo mẹ, nuhe kanse yé te wẹ, ‘Etẹlẹ ji wẹ mí dona nọ hodẹ̀ do?’
[Nudọnamẹ tangan lẹ]
Odẹ̀ he nọ yin sisè lẹ nọ sọgbe hẹ ojlo Jiwheyẹwhe tọn, nọ yin hihò po yise po, podọ to oyín Jesu tọn mẹ