Gọalọna Jọja lẹ Nado Jẹakọ hẹ Titobasinanu Jehovah Tọn

OVI lẹ nọ jlo na plọnnu. Pọ́n kanbiọ he na ko tin to linlẹn mẹ na ovi Islaelivi lẹ tọn lẹ he to Egipti to ozán Juwayi tintan lọ tọn mẹ: ‘Etẹwutu lẹngbọvu lọ dona yin hùhù?’ ‘Etẹwutu Papa to ohùn sá do ohọ̀ntin lọ lẹ go?’ ‘Fie wẹ mí jei?’ Nuhe Jehovah degbe etọn na otọ́ he yin Islaelivi lẹ dohia dọ ewọ ma jẹagọdo kanbiọ mọnkọtọn lẹ. Jehovah dọna yé gando oflin Juwayi lọ tọn to sọgodo go dọmọ:Whenuena visunnu mìtọn lẹ na dọ hlan mì, dọ, Etẹwẹ mì lo gbọn sinsẹ̀n he dali? Wẹ mì na dọ, dọ, Avọ́ juwayi OKLUNỌ tọn tọn wẹ, mẹhe dá gbọn owhé ovi Islaeli tọn lẹ tọn ji wayi to Egipti, whenuena e hò Egiptinu lẹ, bo whlẹn owhé mítọn lẹ.” (Eks. 12:24-27) To nukọn mẹ, Jehovah flinnu mẹjitọ he yin Islaelivi lẹ dọ nujọnu wẹ e yin nado na gblọndo kanbiọ ovi yetọn lẹ tọn gando ‘aṣẹdai lẹ lọ po whẹdida lẹ lọ po’ he Jehovah ko degbe etọn go.—Deut. 6:20-25.

E họnwun dọ Jehovah jlo dọ ovi lẹ ni penugo nado mọ gblọndo pekọhẹnwanamẹ tọn na kanbiọ yetọn lẹ gando sinsẹ̀n-bibasi nugbo go—yèdọ gblọndo he na whàn yé nado yiwanna Jehovah di Jiwheyẹwhe podọ Whlẹngántọ yetọn. Nudopolọ wẹ Jehovah jlo na jọja mítọn lẹ to egbehe. Dopo to aliho he mẹ mẹjitọ lẹ sọgan do owanyi ahundopo tọn na Jiwheyẹwhe po omẹ etọn lẹ po do ahun mẹ na ovi yetọn lẹ te wẹ gbọn alọgigọna yé nado jẹakọ hẹ titobasinanu Jehovah tọn podọ nado mọnukunnujẹ lehe mí nọ mọaleyi sọn e mẹ do mẹ. Enẹwutu, mì gbọ mí ni gbadopọnna delẹ to aliho he mẹ jọja lẹ sọgan yin alọgọna nado plọn nususu dogọ gando titobasinanu Jiwheyẹwhe tọn go te.

Agun Lọ

E jẹ dọ jọja lẹ ni jẹakọ hẹ agun he whẹndo yetọn nọ kọnawudopọ hẹ. Nado jẹ yanwle enẹ kọ̀n, e biọ dọ mì mẹjitọ lẹ ni nọ hẹn ovi mìtọn lẹ yì opli Klistiani tọn lẹpo. To aliho ehe mẹ, mì nọ hodo apajlẹ he Jehovah zedai na Islaelivi lẹ he yin gbedena dọmọ: ‘Bẹ gbẹtọ lẹ lọ pli, sunnusi lẹ po yọnnusi lẹ po po omẹ flinflin lẹ lọ po, na yé nido sè, podọ na yé nido plọnnu, bo nọ dibusi OKLUNỌ lọ Jiwheyẹwhe mìtọn, bosọ nọ payi nado basi ohó osẹ́n he tọn lẹ lọ lẹpo; podọ na ovi yetọn, he ma ko yọnẹn lẹ, nido sè, bosọ pọ́n nado nọ dibusi OKLUNỌ lọ Jiwheyẹwhe mìtọn.’—Deut. 31:12, 13.

Ovi lẹ sọgan jẹ nuplọn ji gando Ohó Jiwheyẹwhe tọn go sọn ovu whenu. Apọsteli Paulu dọ gando Timoti go dọmọ: “Sọn ovu whenu gbọ́n wẹ hiẹ ko yọ́n kandai wiwe lẹ.” (2 Tim. 3:15) To opli lẹ ji to Plitẹnhọ Ahọluduta tọn mẹ, ovi flinflin lẹ lọsu nọ jẹ nukunnumọjẹ nudọnamẹ he to yinyin zizedonukọnnamẹ lẹ mẹ ji bo nọ jẹakọ hẹ ohàn Ahọluduta lọ tọn lẹ. To finẹ, yé nọ plọn nado yí Biblu po owe sinai do Biblu ji lẹ po zan bo nọ na sisi yé. Humọ, to opli mítọn lẹ ji, yé na doayi jẹhẹnu he nọ dohiagona hodotọ nugbo Klisti tọn lẹ go—yèdọ owanyi ahundopo tọn. Jesu dọmọ: “Gbedide yọyọ de wẹ yẹn to nina mì, dọ mì ni yiwanna ode awetọ; kẹdẹdile yẹn ko yiwanna mì do, dọ mìlọsu ni yiwanna ode awetọ mìtọn. Gbọn ehe dali wẹ mẹlẹpo na yọnẹn dọ devi ṣie lẹ wẹ mì yin, eyin mì tindo owanyi to mìdelẹ ṣẹnṣẹn.” (Joh. 13:34, 35) Owanyi po hihọ́ nujọnu tọn he nọ yin mimọ to Plitẹnhọ Ahọluduta tọn mẹ po na whàn ovi lẹ bo gọalọna yé nado yí opli Klistiani tọn lẹ yìyì do basi adà gbẹzan yetọn tọn.

Eyin mì yí i do dó aṣa nado nọ jẹ Plitẹnhọ Ahọluduta tọn mẹ domẹwhenu podọ nado nọ nọte na ojlẹ de to opli lẹ godo, ovi mìtọn lẹ na tindo dotẹnmẹ hundote nado jihọntọn lẹ. Kakati nado dike yé ni dogbẹ́ hẹ ovi devo lẹ kẹdẹ, naegbọn mì ma na do yé hia mẹmẹsunnu po mẹmẹyọnnu he tindo owhè voovo lẹ po? Eyin jọja mìtọn lẹ jẹakọ hẹ mẹhomẹ lẹ, yé na mọdọ mẹhomẹ lẹ tindo numimọ po nuyọnẹn susu po. Kẹdẹdile Zekalia hohowhenu tọn he “tindo wuntuntun to onumọ Jiwheyẹwhe tọn mẹ” tindo nuyiwadomẹji dagbe do jọja Uzia, ahọlu Juda tọn ji do, mọ wẹ mẹhe ko sẹ̀n Jehovah po nugbonọ-yinyin po na owhe susu lẹ nọ tindo nuyiwadomẹji dagbe do jọja lẹ ji do niyẹn. (2 Otan. 26:1, 4, 5) Dile mì to Plitẹnhọ Ahọluduta tọn mẹ, mì sọgan sọ basi zẹẹmẹ nuhe wesẹdotẹn, owhlẹ nudọnamẹ tọn, po onú devo lẹ po nọ yin yiyizan na tọn na ovi mìtọn lẹ.

Titobasinanu Lẹdo Aihọn Pé Lọ

E jẹ dọ ovi lẹ ni mọnukunnujẹemẹ dọ agun mìtọn yin apadewhe titobasinanu lẹdo aihọn pé tọn de he bẹ nuhe hugan agun 100000 hẹn. Mì basi zẹẹmẹ nuhe titobasinanu ehe bẹhẹn lẹ, lehe e nọ yinuwa do, podọ adà he ovi lẹ tindo to godoninọna azọ́n etọn mẹ tọn. Mì dohia yé nuhewutu mì nọ wleawudaina plidopọ lẹdo tọn, plidopọ agbegbe tọn po dlapọn nugopọntọ lẹdo tọn po.—Pọ́n apotin lọ “Nuhe Yè Sọgan Gbadopọnna to Sinsẹ̀n-Bibasi Whẹndo Tọn Whenu Lẹ,” to weda 28.

Eyin dotẹnmẹ etọn tin, mì basi oylọna nugopọntọ tomẹyitọ lẹ, mẹdehlan lẹ, hagbẹ whẹndo Bẹtẹli tọn lẹ, po lizọnyizọnwatọ whenu-gigọ́ tọn devo lẹ po wá owhé mìtọn gbè nado dùnú. Mì ma lẹndọ yé ma tindo whenu na jọja lẹ blo. Devizọnwatọ whenu-gigọ́ tọn ehelẹ to vivẹnudo nado hodo apajlẹ Jesu tọn, mẹhe nọ kẹalọyi ovi lẹ to whepoponu bo nọ dọho hẹ yé. (Malku 10:13-16) Eyin ovi mìtọn lẹ sè numimọ he devizọnwatọ Jehovah tọn mọnkọtọn lẹ na bo doayi ayajẹ yetọn to sinsẹ̀nzọn wiwe mẹ go, yé lọsu sọgan yí lizọnyizọn whenu-gigọ́ tọn do basi yanwle yetọn.

Nudevo tẹwẹ mì sọgan wà taidi whẹndo de nado gọalọna ovi mìtọn lẹ nado jẹakọ hẹ titobasinanu Jehovah tọn dogọ? Ayinamẹ delẹ die: Mì basi titona whẹndo lọ nado gbadopọnna owe Les Témoins de Jéhovah: Prédicateurs du Royaume de Dieu. Mì nọ zinnudo mẹdezejo, whiwhẹ, po nugbonọ-yinyin he devizọnwatọ Jehovah tọn lẹ dohia po ji. Mì do lehe Jehovah yí yé zan nado hẹn wẹndagbe lọ gbayipe lẹdo aihọn pé do hia yé. Mì yí video he titobasinanu Jehovah tọn detọ́n lẹ zan nado plọn yé nuplọnmẹ vonọtaun hohowhenu po egbezangbe tọn lẹ po. Eyin nugopipe etọn tin, taidi whẹndo de mì dla wekantẹn alahọ tọn po owhe Bẹtẹli tọn he tin to otò mìtọn mẹ po pọ́n, kavi vlavo etlẹ yin to otò devo lẹ mẹ. Dlapọn mọnkọtọn lẹ na yinuwado ovi mìtọn lẹ ji to whenue yé mọ lehe adà aigba ji tọn titobasinanu Jehovah tọn yin tito basina do to anademẹ pipli afanumẹ nugbonọ lọ tọn glọ nado nọ wleawu núdùdù gbigbọmẹ tọn po anademẹ po tọn na mẹmẹsunnu lẹ lẹdo aihọn pé, dile e wà do to owhe kanweko tintan W.M.—Mat. 24:45-47; Owalọ 15:22-31.

Diọadana Nudọnamẹ lọ Sọgbe Hẹ Ovi Dopodopo

To ovi lẹ pinplọn whenu, mì nọ hẹn aliho he mẹ Jesu nọ plọn apọsteli etọn lẹ te do ayiha mẹ. E dọna yé pọ́n dọmọ: “Yẹn gbẹ́ tindo onú susu nado dọna mì, ṣigba mì ma penugo nado hẹn yé todin gba.” (Joh. 16:12) Jesu ma yí nudọnamẹ susu do hẹn agbọ́pe devi etọn lẹ. Kakatimọ, e plọn yé nugbo titengbe lẹ vudevude na yé nido sọgan mọnukunnujẹ yé mẹ ganji. To aliho dopolọ mẹ, mì ma hẹn agbọ́pe ovi mìtọn lẹ blo. Gbọn nupinplọn yé vudevude podọ to gbesisọ mẹ gando titobasinanu Jehovah tọn go dali, mì na nọ whàn yé bo hẹn nupinplọn gando agun Klistiani tọn go zun ayajẹnu na yé. Dile nuhudo ovi mìtọn lẹ tọn to didiọ, mì sọgan vọ́ plọn yé nuhe yé ko yọnẹn bo gbloada na nukunnumọjẹnumẹ yetọn.

Agun Klistiani tọn yin asisa titengbe alọgọ tọn de nado hẹn haṣinṣan mítọn hẹ Jiwheyẹwhe sinyẹn dogọ, podọ jọja he nọ tindo mahẹ zohunhun tọn to nuwiwa etọn lẹ mẹ lẹ nọ pegan ganji nado diahi hẹ nuyiwadomẹji aihọn Satani tọn. (Lom. 12:2) Mí deji dọ mì na mọ ayajẹ susu to alọgigọna ovi mìtọn lẹ nado jẹakọ hẹ titobasinanu Jehovah tọn mẹ. Po dona Jehovah tọn po, na yé ni yí nugbonọ-yinyin do tẹdo titobasinanu lọ po Jiwheyẹwhe owanyinọ he mí nọ sẹ̀n lọ po go.

[Apotin/Yẹdide to weda 28]

Nuhe Yè Sọgan Gbadopọnna to Sinsẹ̀n-Bibasi Whẹndo Tọn Whenu Lẹ

Onú delẹ die gando titobasinanu Jehovah tọn go he mì sọgan gbadopọnna to Sinsẹ̀n-Bibasi Whẹndo tọn whenu.

▪ Mì gbadopọnna whenuho agun mìtọn tọn. Whetẹnu podọ nawẹ e bẹjẹeji gbọn? Plitẹnhọ Ahọluduta tọn voovo tẹlẹ wẹ agun lọ ko yizan pọ́n? Naegbọn mì ma na basi-oylọna mẹhe ko tin to agun lọ mẹ na whenu dindẹn de wá owhé mìtọn gbè nado na gblọndo kanbiọ ovi mìtọn lẹ tọn?

▪ Mì basi zẹẹmẹ lẹndai opli agun tọn voovo lẹ, pipli daho lẹ po lehe ovi lẹ sọgan mọaleyi sọn yé mẹ do po tọn.

▪ Mì dọhodo lẹndai wehọmẹ voovo he yin zizedai gbọn titobasinanu Jehovah tọn dali ji. Mì dọ numimọ lẹ he do kọdetọn dagbe he mẹhe yì wehọmẹ lọ lẹ ko tindo lẹ hia.

▪ Mì gọalọna jọja lẹ nado mọ nuhewutu e do yin nujọnu nado lẹzun wẹnlatọ gbesisọnọ wẹndagbe lọ tọn. Mì do lehe yé sọgan yidogọna linlin lẹdo aihọn pé tọn he nọ yin zinzinjẹgbonu to Annuaire des Témoins de Jéhovah mẹ do hia yé.

▪ Mì dọhodo wunmẹ sinsẹ̀nzọn whenu-gigọ́ tọn he tin-to-aimẹ na jọja he to titobasinanu Jehovah tọn mẹ lẹ ji. Nudọnamẹ dagbe lẹ tin to weta 10tọ owe Mí Yin Tito-Basina Nado Wà Ojlo Jehovah Tọn mẹ.

▪ Mì gọalọna jọja lẹ nado mọnukunnujẹ nuhewutu aliho nuyiwa tọn delẹ do nọ yin hihodo to agun mẹ. Mì basi zẹẹmẹ nuhewutu yé ma dona jẹ mẹdekannu sọn anademẹ titobasinanu Jehovah tọn glọ etlẹ yin to aliho pẹvide mẹ tọn na yé. Mì do lehe yé sọgan yidogọna titojininọ dagbe to agun mẹ gbọn anademẹ mẹho lẹ tọn hihodo dali do hia yé.

[Yẹdide]

Taidi to Islaeli hohowhenu tọn mẹ, mẹjitọ lẹ nọ tẹnpọn nado na gblọndo pekọhẹnwanamẹ tọn na kanbiọ he yin kinkanse yé gando titobasinanu Jehovah tọn go

[Yẹdide to weda 28]

Ovi mìtọn lẹ na mọaleyi sọn họntọnjiji hẹ devizọnwatọ ojlẹ dindẹn tọn lẹ mẹ