Aṣli 1

Yiwanna Gbẹtọ lẹ, E Ma Yin Akuẹ po Nutindo lẹ Po

ETẸWẸ BIBLU PLỌN MÍ? “Wanyina akuẹ wẹ yin adọ̀ onú ylankan wunmẹ lẹpo tọn.”—1 Timoti 6:10.

ETẸWẸ NỌ HẸN NUHAHUN LỌ WÁ? Ajọjlatọ lẹ nọ gbidikọna mí ma nado tindo pekọ to nuhe mí tindo lẹ mẹ. Yé nọ jlo dọ mí ni to azọ́nwa mapote nado mọ akuẹ he mí sọgan yizan nado họ̀ nuyọyọ, nudagbe po onú dahodaho lẹ po. Akuẹ nọ klọmẹ, podọ mí sọgan jai jẹ omọ̀ wanyina akuẹ tọn mẹ po awubibọ po. Ṣigba Biblu na avase dọ mẹhe yiwanna adọkunnu lẹ ma na tindo pekọ gbede. “Ewọ he yiwanna fataka, fataka ma na pekọna ẹn; mọ ewọ he yiwanna adọkun, adọkun ma na pekọna ẹn,” wẹ Ahọlu Sọlomọni wlan.—Yẹwhehodọtọ 5:10.

ETẸWẸ HIẸ SỌGAN WÀ? Hodo apajlẹ Jesu tọn bo plọn nado yiwanna gbẹtọ hugan nutindo lẹ. Jesu desọn ojlo mẹ nado yí nuhe e tindo lẹpo—kakajẹ ogbẹ̀ etọn ji—do sanvọ́ na e yiwanna gbẹtọ lẹ wutu. (Johanu 15:13) E dọmọ: “Ayajẹ sù to nunamẹ mẹ hú to mimọyi mẹ.” (Owalọ lẹ 20:35) Eyin mí yí i do dó aṣa nado nọ yí whenu po nutindo mítọn lẹ po zan na mẹdevo lẹ, yelọsu na nọ yinuwa to aliho dopolọ mẹ. Jesu dọmọ: “Mì nọ namẹ, gbẹtọ lẹ nasọ na mì.” (Luku 6:38) Mẹhe nọ doafọna akuẹ po nutindo agbasa tọn lẹ po lẹ nọ hẹn awufiẹsa po yajiji po wá yede ji. (1 Timoti 6:9, 10) To alọ devo mẹ, pekọ nujọnu tọn nọ wá sọn wanyina mẹdevo lẹ po owanyi he mẹdevo lẹ nọ dohia mí po mẹ.

Naegbọn hiẹ ma na pọ́n vlavo eyin hiẹ sọgan hẹn gbẹzan towe bọawu dogọ? Be hiẹ sọgan de sọha nuhe a tindo kavi to linlẹn nado họ̀ lẹ tọn pò ya? Eyin hiẹ wàmọ, vlavo a na mọdọ emi na tindo whenu po huhlọn po dogọ na nujọnu gbẹ̀mẹ tọn lẹ—enẹ wẹ alọgigọna gbẹtọ lẹ po sinsẹ̀n-bibasi hlan Jiwheyẹwhe po, yèdọ Mẹhe na we nuhe a tindo lẹpo.—Matiu 6:24; Owalọ lẹ 17:28.

[Yẹdide to weda 4]

“Mì nọ namẹ, gbẹtọ lẹ nasọ na mì”