Plọnnu sọn Ohó Jiwheyẹwhe Tọn Mẹ

Mẹnu Wẹ Jiwheyẹwhe?

Hosọ ehe fọ́n kanbiọ he hiẹ sọgan ko nọ kanse lẹ dote bo do fihe hiẹ sọgan mọ gblọndo lọ lẹ te to Biblu mẹ hia. Homẹ Kunnudetọ Jehovah tọn lẹ tọn na hùn nado dọhodopọ hẹ we do gblọndo ehelẹ ji.

1. Mẹnu wẹ Jiwheyẹwhe?

Jiwheyẹwhe nugbo lọ wẹ Didatọ onú lẹpo tọn. Biblu ylọ ẹ dọ “Ahọlu madopodo,” ehe zẹẹmẹdo dọ ewọ ma tindo bibẹ bo ma nasọ tindo opodo gbede. (Osọhia 15:3) Na Jiwheyẹwhe wẹ Asisa ogbẹ̀ tọn wutu, ewọ dopo kẹdẹ wẹ mí dona sẹ̀n.—Hia Osọhia 4:11.

2. Omẹ nankọ wẹ Jiwheyẹwhe yin?

Mẹdepope ma ko mọ Jiwheyẹwhe pọ́n na Gbigbọ wẹ ewọ wutu, ehe dohia dọ ewọ tindo wunmẹ ogbẹ̀ tọn de he yiaga taun hugan nudida yinukundomọ he nọ nọ̀ aigba ji lẹ tọn. (Johanu 1:18; 4:24) Jẹhẹnu Jiwheyẹwhe tọn lẹ nọ sọawuhia to nudida etọn lẹ mẹ. Di apajlẹ, eyin mí yí sọwhiwhe do pọ́n whanpẹ gọna wunmẹ voovo atin-sinsẹ́n po vounvoun lẹ po tọn, mí nọ doayi owanyi po nuyọnẹn Jiwheyẹwhe tọn po go. Gbigblo wẹkẹ lọ tọn yin kunnudenu huhlọn Jiwheyẹwhe tọn.—Hia Lomunu lẹ 1:20.

Mí sọgan sọ plọn nususu gando jẹhẹnu Jiwheyẹwhe tọn lẹ go to Biblu mẹ. Di apajlẹ, e dọ nuhe Jiwheyẹwhe yiwanna po nuhe e gbẹwanna po, lehe e nọ yinuwa hẹ gbẹtọ lẹ do po lehe e yinuwa to ninọmẹ voovo lẹ mẹ do po na mí.—Hia Psalm 103:7-10.

3. Be Jiwheyẹwhe tindo yinkọ ya?

Jesu dọmọ: “Otọ́ mítọn he tin to olọn mẹ, na oyín towe ni yin kinklandowiwe.” (Matiu 6:9) Dile etlẹ yindọ Jiwheyẹwhe tindo tẹnmẹ-yinkọ susu, yinkọ dopo gee wẹ e tindo. Aliho voovo mẹ wẹ yinkọ lọ nọ yin yiylọ te to ogbè dopodopo mẹ. To Gungbe mẹ, mí nọ saba ylọ ẹ dọ “Jehovah.”—Hia Psalm 83:18.

Yinkọ Jiwheyẹwhe tọn ko yin didesẹ sọn Biblu susu mẹ bo ko yin didiọ po tẹnmẹ-yinkọ lẹ po taidi Oklunọ kavi Jiwheyẹwhe. Ṣigba to ojlẹ he mẹ Biblu yin kinkan te, yinkọ Jiwheyẹwhe tọn sọawuhia dibla yì whla 7000. Jesu hẹn yinkọ Jiwheyẹwhe tọn zun yinyọnẹn gbọn yíyí i zan to whenue e to zẹẹmẹ Ohó Jiwheyẹwhe tọn basi na gbẹtọ lẹ dali. E gọalọna gbẹtọ lẹ nado yọ́n Jiwheyẹwhe.—Hia Johanu 17:26.

4. Be Jehovah nọ hò mítọn pọ́n ya?

Jehovah tindo ojlo to mí mẹ na ewọ lọsu wẹ nọ dotoaina odẹ̀ mítọn lẹ. (Psalm 65:2) Be yajiji he gbayipe dohia dọ Jiwheyẹwhe ma nọ hò mítọn pọ́n wẹ ya? Mẹdelẹ sọalọakọ́n dọ Jiwheyẹwhe nọ hẹn mí jiya nado whlé mí pọ́n, ṣigba lalo wẹ. Biblu dọmọ: “E ni tin dẹn do Jiwheyẹwhe, na ewọ nado wà ylankan.”—Job 34:10; hia Jakọbu 1:13.

Jiwheyẹwhe doyẹyigona gbẹtọvi lẹ gbọn mẹdekannujẹ nudide bibasi tọn nina yé dali. Be mí ma yọ́n pinpẹn etọn dọ mí tindo mẹdekannujẹ nado basi nudide bo sẹ̀n Jiwheyẹwhe ya? (Jọṣua 24:15) Nuhewutu yajiji do gbayipe wẹ yindọ mẹsusu nọ de nado wà nuylankan do mẹdevo lẹ. Homẹ Jehovah tọn ma nọ hùn nado mọ mawadodo mọnkọtọn.—Hia Gẹnẹsisi 6:5, 6.

To madẹnmẹ, Jehovah na yí Jesu zan nado de yajiji po mẹhe nọ hẹn ẹn wá lẹ po sẹ̀. Todin whẹ́, Jehovah tindo whẹwhinwhẹ́n dagbe nado na dotẹnmẹ yajiji na ojlẹ de. Nupinplọn devo to hosọ debọdo-dego ehelẹ mẹ na basi zẹẹmẹ nuhewutu Jiwheyẹwhe na dotẹnmẹ yajiji tọn.—Hia Isaia 11:4.

5. Etẹwẹ Jiwheyẹwhe jlo dọ mí ni wà?

Jehovah dá mí po nugopipe lọ po nado yọ́n ewọ bo yiwanna ẹn. E jlo dọ mí ni plọn nugbo lọ gando emi go. (1 Timoti 2:4) Eyin mí nọ plọn Biblu, mí sọgan wá yọ́n Jiwheyẹwhe taidi Họntọn de.—Hia Howhinwhẹn lẹ 2:4, 5.

To whenuena e yindọ Jehovah wẹ na mí ogbẹ̀, mí dona yiwanna ẹn hugan mẹdevo depope. Mí sọgan dohia Jiwheyẹwhe dọ mí yiwanna ẹn, eyin mí nọ dọho hẹ ẹ to odẹ̀ mẹ bo nọ wà nuhe e biọ to mí si lẹ. (Howhinwhẹn lẹ 15:8) Jehovah biọ to mí si nado nọ yinuwa hẹ mẹdevo lẹ po owanyi po.—Hia Malku 12:29, 30; 1 Johanu 5:3.

Nado mọ nudọnamẹ dogọ, pọ́n weta 1 owe Etẹwẹ Bliblu Plọn Mí Taun tọn, he Kunnudetọ Jehovah tọn lẹ zinjẹgbonu.

[Yẹdide to weda 17]

Be whẹwhinwhẹ́n dagbe de tin nado na dotẹnmẹ yajiji na ojlẹ de ya?