Dọdai de He Yin Nujọnu Taun
“Yẹwheho wẹndagbe ahọluduta lọ tọn ehe na yin didọ to aigba fininọ lẹpo ji taidi okunnu de na akọta lẹpo; podọ whenẹnu wẹ opodo lọ na wá.”—MATIU 24:14.
WEYỌNẸNTỌ lẹ kọngbedopọ dọ wefọ titengbe de wẹ wefọ ehe yin. E yin titengbe na azọ́n he e basi zẹẹmẹ etọn lọ dona yin wiwà lẹdo aihọn pé. Podọ na e do nuhe Klistiani lẹ dona to wiwà hia—yèdọ azọ́n yẹwhehodidọ tọn he na jẹnukọn bo nasọ lá nujijọ ayidego tọn he na gbloada taun he Jesu ylọdọ “opodo lọ.”
Dọdai he wefọ enẹ bẹhẹn to hẹndi mọyi to egbehe. Ehe gando gowe na wẹndagbe lọ bẹ oylọ-basinamẹ po avase de po hẹn wutu. E hùn dotẹnmẹ dotena we nado basi nudide dopo: Kẹalọyi Ahọluduta Jiwheyẹwhe tọn kavi gbẹ́ ẹ dai. Nudide he hiẹ basi na gando gbẹzan towe go.
Lẹnnupọndo lẹdo hodidọ lọ tọn ji. Azán susu whẹpo Jesu do yin whiwhè do núgo, devi etọn lẹ wá e dè bo kanhose e gando sọgodo go. Yé jlo na yọ́n onú delẹ gando lehe Ahọluduta Jiwheyẹwhe tọn he Jesu nọ saba dọho etọn na yin didoai do go. Yé sọ jlo na yọ́n nuhe “vivọnu titonu lọ tọn,” kavi dile lẹdogbedevomẹ devo dọ do “opodo aihọn tọn,” na bẹhẹn lẹ.—Matiu 24:3, Biblu Wiwe Lọ Gun Alada.
To gblọndo Jesu tọn mẹ, e dọ dọdai dọ awhàn, huvẹ, azọ̀nylankan po aigba sisọsisọ daho po na tin to fisusu. E sọ dọ dọ sẹ́nhẹngba na jideji, mẹplọntọ sinsẹ̀n lalo tọn lẹ na hẹn mẹsusu buali, podọ Klistiani nugbo lẹ na pehẹ wangbẹna po homẹkẹn po. Owẹ̀n ylankan wẹ ehe lẹpo yin.—Matiu 24:4-13; Luku 21:11.
Ṣigba wẹndagbe de sọ tin. Na bọdo hodidọ enẹ go, Jesu dọ ohó he yin nùdego to aga lọ, yèdọ ohó he ko dọ̀n ayidonugo gbẹtọ lẹ tọn bosọ whàn yé to owhe kanweko lẹ gblamẹ. Dile etlẹ yindọ gbẹtọ lẹ yigbe dọ nuhe Jesu dọ lẹ yin nujọnu, yé ma kọngbedopọ do zẹẹmẹ nuhe e dọ lẹ tọn ji. Etẹwẹ wẹndagbe ehe yin na taun tọn? Etẹwẹ Ahọluduta lọ yin? Whetẹnu wẹ dọdai ehe na mọ hẹndi, podọ gbọn mẹnu dali? Podọ etẹwẹ “opodo lọ” yin? Gbọ mí ni pọ́n.
[Yẹdide to weda 2]
Facsimile of the Washington Manuscript of Four Gospels. Matiu 24:14 yin kinkan po wekun kiklo po
[Asisa Yẹdide tọn]
Yin didesọn owe lọ Facsimile of the Washington Manuscript of the Four Gospels in the Freer Collection 1912 mẹ