Dọnsẹpọ Jiwheyẹwhe

“Jehovah Wẹ Lẹngbọhọtọ Ṣie”

PỌ́N yẹdide he to weda ehe ji. Be hiẹ sọgan yí nukun homẹ tọn do pọ́n hihọ́ he lẹngbọ he to akọ́nnu lẹngbọhọtọ lọ tọn to vivi etọn dù tọn ya? To Psalm 23tọ mẹ, Biblu yí apajlẹ lẹngbọhọtọ po lẹngbọ etọn lẹ tọn po zan nado do lehe Jehovah nọ penukundo omẹ etọn lẹ go po owanyi po do hia. E jlo dọ mí ni yin dopo to mẹhe na tindo hihọ́ mọnkọtọn lẹ tọn mẹ bo penugo nado yí jide do kọngbedopọ hẹ hogbe Psalm-kantọ Davidi tọn lẹ dọmọ: “Jehovah wẹ Lẹngbọhọtọ ṣie, NW.”a—Wefọ 1.

Lẹngbọhọtọ jọja de wẹ Davidi he kàn Psalm ehe yin. E yọ́n nuhudo lẹngbọ lẹ tọn po nuhe azọngban lẹngbọhọtọ tọn bẹhẹn lẹ po. Na Davidi tindo numimọ nukunpedomẹgo Jiwheyẹwhe tọn wutu, e wlan nuhe gbẹtọ lẹ nọ ylọdọ “Psalm jidenamẹ tọn.” Jehovah, yèdọ oyín jọnun Jiwheyẹwhe tọn sọawuhia to bẹjẹeji podọ to vivọnu Psalm 23tọ lọ tọn. (Wefọ 1 po 6 po) Nuhe Psalm lọ dọ to wefọ ṣẹnṣẹn tọn lẹ mẹ do aliho voovo atọ̀n he mẹ Jehovah nọ penukundo omẹ etọn lẹ go te hia dile lẹngbọhọtọ de nọ wà do.—Psalm 100:3.

Jehovah nọ deanana lẹngbọ etọn lẹ. Eyin lẹngbọ lẹ ma tindo lẹngbọhọtọ de, yé nọ danbú. Mọdopolọ, mí tindo nuhudo alọgọ tọn nado mọ aliho he sọgbe lọ to gbẹ̀mẹ. (Jelemia 10:23) Davidi basi zẹẹmẹ dọ Jehovah nọ deanana omẹ etọn lẹ yì “fie amamú kikọ te” po “agbàdo osin awumiọn tọn [po] mẹ.” E nọ plan yé “gbọn ali dodo tọn ji.” (Wefọ 2 po 3 po) Apajlẹ lẹngbọhọtọ tọn ehe vọ́ jide na mí dọ mí sọgan gboadọ do Jiwheyẹwhe go. Eyin mí nọ hodo anademẹ Jiwheyẹwhe tọn dile e sọawuhia do to Biblu mẹ, mí sọgan doafọna aliho ogbẹ̀ tọn he nọ hẹn pekọ wá namẹ, fakọnamẹ bosọ nọ namẹ hihọ́.

Jehovah nọ basi hihọ́na lẹngbọ etọn lẹ. Eyin lẹngbọhọtọ de ma to apá na lẹngbọ etọn lẹ, yé nọ dibu bo nọ jẹflumẹ. Jehovah na tuli omẹ etọn lẹ dọ yé ni gboadọ, etlẹ yin to whenue yé to “zọnlinzin gbọn agbàdo zinvlu gọ́ngọ́n tọn ṣẹnṣẹn”—enẹ wẹ ninọmẹ he taidi zinvlu gọ́ngọ́n tọn to gbẹzan yetọn mẹ lẹ. (Wefọ 4) Jehovah nọ họ́ omẹ etọn lẹ bosọ to gbesisọ mẹ to whepoponu nado gọalọna yé. E sọgan na omẹ etọn lẹ nuyọnẹn po huhlọn he yé tindo nuhudo etọn nado pehẹ whlepọn lẹ po.—Filippinu lẹ 4:13; Jakọbu 1:2-5.

Jehovah nọ na núdùdù lẹngbọ etọn lẹ. Lẹngbọ lẹ nọ ganjẹ lẹngbọhọtọ yetọn go nado dín núdùdù na yé. Mí tindo nuhudo gbigbọmẹ tọn he Jiwheyẹwhe kẹdẹ wẹ sọgan na mí. (Matiu 5:3) Mí dopẹ́ dọ Jehovah nọ gbọn alọtútlú dali wleawuna tafo he bẹ núdùdù dojó susu hẹn na devizọnwatọ etọn lẹ. (Wefọ 5) Biblu po owe mítọn lẹ po, taidi dehe hia a te ehe yin asisa núdùdù gbigbọmẹ tọn he nọ hẹn pekọ wá na nuhudo mítọn nado yọ́n zẹẹmẹ ogbẹ̀ tọn po lẹndai Jiwheyẹwhe tọn na mí po.

Davidi tindo numọtolanmẹ hihọ́ tọn, na e yọnẹn dọ eyin emi gbọṣi adà Lẹngbọhọtọ Daho lọ tọn mẹ, emi na mọ nukunpedomẹgo owanyinọ Jehovah tọn “to gbẹzan [emitọn] lẹpo mẹ.” (Wefọ 6) Be hihọ́ enẹ jlo we ya? Eyin mọ wẹ, plọn lehe hiẹ sọgan dọnsẹpọ Jehovah do. Gbọnmọ dali, a na tindo numọtolanmẹ hihọ́ tọn to awà Lẹngbọhọtọ Daho lọ tọn glọ, mẹhe nọ deanana, nọ basi hihọ́na, bosọ nọ na núdùdù mẹhe gbọṣi adà etọn mẹ lẹ.—Isaia 40:11.

[Nudọnamẹ odò tọn]