Dọnsẹpọ Jiwheyẹwhe

Hiẹ Sọgan Mọ “Oyọnẹn Jiwheyẹwhe Tọn”

JEHOVAH JIWHEYẸWHE ze adọkunnu mayọnjlẹ de donukọnna mí, podọ ojlo vivẹ́ etọn wẹ yindọ mí ni mọ ẹn yí. Adọkunnu ehe ma nọ hẹnmẹ jẹ adọkun to agbasa-liho gba, ṣigba e nọ dekọtọn do nuhe akuẹ aihọn ehe tọn lẹpo ma sọgan họ̀ de mẹ—enẹ wẹ jijọho ahun mẹ tọn, pekọ po gbẹzan ayajẹ tọn de po. Etẹwẹ adọkunnu ehe yin? Hogbe Ahọlu Sọlomọni nuyọnẹntọ lọ tọn he yin kinkandai to Howhinwhẹn lẹ 2:1-6 mẹ lẹ do e hia.

Sọlomọni do adọkunnu enẹ hia taidi “oyọnẹn Jiwheyẹwhe tọn,” yèdọ nugbo he gando Jiwheyẹwhe po lẹndai etọn he yin didehia to Biblu mẹ lẹ po go. (Wefọ 5) Adọkunnu enẹ bẹ adà susu hẹn.

Nuplọnmẹ nugbo lẹ. Biblu na gblọndo na kanbiọ delẹ taidi: Etẹwẹ yinkọ Jiwheyẹwhe tọn? (Psalm 83:18) Etẹwẹ nọ jọ to okú godo? (Psalm 146:3, 4) Naegbọn mí do tin to aigba ji? (Gẹnẹsisi 1:26-28; Psalm 115:16) Na taun tọn, be akuẹ sọha de sọgan họ̀ gblọndo kanbiọ titengbe enẹlẹ tọn ya?

Ayinamẹ nuyọnẹn tọn lẹ. Biblu do aliho gbẹninọ tọn he yọ́n hugan lọ hia mí. Nawẹ hiẹ sọgan hẹn alọwle towe dẹn-to-aimẹ gbọn? (Efesunu lẹ 5:28, 29, 33) Nawẹ a sọgan plọn ovi towe lẹ whẹ́n po kọdetọn dagbe po gbọn? (Deutelonomi 6:5-7; Efesunu lẹ 6:4) Nawẹ hiẹ sọgan mọ ayajẹ to gbẹ̀mẹ gbọn? (Matiu 5:3; Luku 11:28) Whladopo dogọ, be hiẹ ma mọdọ adọkunnu họakuẹ de wẹ ayinamẹ dejidego he gando whẹho enẹlẹ go yin ya?

Nukunnumimọjẹ jẹhẹnu Jiwheyẹwhe tọn lẹ mẹ. Biblu wẹ yin asisa tangan nudọnamẹ he sọgbe gando Jiwheyẹwhe go lẹ tọn. Omẹ nankọ wẹ ewọ yin? (Johanu 1:18; 4:24) Be e nọ hò mítọn pọ́n ya? (1 Pita 5:6, 7) Etẹwẹ yin delẹ to jẹhẹnu titengbe etọn lẹ mẹ? (Eksọdusi 34:6, 7; 1 Johanu 4:8) Be e ma yin nuhọakuẹ de wẹ e yin nado yọ́n nugbo lọ gando Mẹdatọ mítọn go ya?

Na nugbo tọn, adọkunnu gbigbọmẹ tọn de wẹ “oyọnẹn Jiwheyẹwhe tọn” yin. Nawẹ hiẹ sọgan mọ ẹn gbọn? Howhinwhẹn lẹ weta 2, wefọ 4 tá hinhọ́n do kanbiọ lọ ji, fie Sọlomọni yí oyọnẹn ehe jlẹdo “adọkunnu he whlá” de go te. Flindọ, adọkunnu he whlá de mimọ ma yin onú zedo adò ji bọ yọpọvu sẹ̀ miyọ́n do. Mí dona dovivẹnu vẹkuvẹku whẹpo do mọ ẹn. Onú dopolọ wẹ gando oyọnẹn Jiwheyẹwhe tọn go. Na taun tọn, adọkunnu enẹ yin whiwhla do Biblu mẹ. Eyin mí jlo na mọ ẹn, mí dona vánkan.

Sọlomọni basi zẹẹmẹ nuhe mí dona wà nado mọ “oyọnẹn Jiwheyẹwhe tọn.” Hogbe lọ “yí ohó ṣie lẹ” po “jlẹ ayiha towe hlan” po dohia dọ mí dona tindo ahun dagbe. (Wefọ 1, 2) Hogbe lọ “to awhádo hodo” po “dín in” po dohia dọ mí dona yí mídelẹ zan, bo ze afọdide tintan to vivẹnudido mítọn mẹ. (Wefọ 3, 4) Enẹwutu, nado mọ adọkunnu lọ, mí dona nọ plọn Biblu po sọwhiwhe po, bo nọ wàmọ po ahundopo po.—Luku 8:15.

Eyin mí ze afọdide tintan enẹ, Jehovah na gọalọna mí. “[Jehovah] wẹ nọ na oyọnẹn omẹ,” wẹ wefọ 6tọ dọ. Gbọn alọgọ Jiwheyẹwhe tọn kẹdẹ gblamẹ wẹ mí sọgan mọnukunnujẹ nugbo he tin to Biblu mẹ lẹ mẹ ganji. (Johanu 6:44; Owalọ lẹ 16:14) Deji dọ: Eyin a yí ahundopo do gbadopọnna Ohó Jiwheyẹwhe tọn, hiẹ na “mọ oyọnẹn Jiwheyẹwhe tọn,” yèdọ adọkunnu de he na hẹn dona mayọnjlẹ lẹ wá na we to gbẹzan towe mẹ.—Howhinwhẹn lẹ 2:10-21.a

[Nudọnamẹ odò tọn]