Biblu Nọ Diọ Gbẹzan Mẹtọn

ETẸWẸ whàn jaguda akọhotọ de nado jo aṣa he mẹ e peve te lẹ do bo diọ gbẹzan etọn? Pọ́n nuhe e dọ.

‘To dai, n’yiwanna agbàwhinwhlẹn osọ́ tọn taun.’—RICHARD STEWART

OWHE HE MẸ N’YIN JIJI: 1965

OTÒ HE MẸ N’WÁ SỌN: JAMAÏQUE

OTÀN ṢIE: AKỌHOTỌ PODỌ SẸ́NHẸNGBATỌ

NUHE N’YIN DAI: N’whẹ́n to lẹdo ohẹ́n tọn, fie gbẹtọ sù te taun de mẹ to Kingston, tatọ́-tònọ Jamaïque tọn. Mẹhe ma mọ azọ́nwa lẹ sù taun, podọ sẹ́nhẹngba sọ gbayipe. Gbẹtọ lẹ nọ to sijọsijọ ji to whepoponu na danuwatọ lẹ wutu. Diblayin azán lẹpo gbè wẹ n’nọ sè osò-gbè.

Onọ̀ ṣie he yin azọ́n sinsinyẹnwatọ de wà nuhe go e pé lẹpo nado penukundo yẹn, nọvisunnu ṣie po nọviyọnnu ṣie po go. E dovivẹnu taun na mí nido mọ wepinplọn dagbe yí. N’ma tindo ojlo na wehọmẹ sọmọ, ṣigba n’yiwanna agbàwhinwhlẹn osọ́ tọn taun. N’nọ gọ̀n wehọmẹ nado yì agbàwhinwhlẹn osọ́ lẹ tọn tẹnmẹ. N’tlẹ sọ nọ kùn osọ́.

E ma dẹn bọ n’yí akọhiho osọ́ tọn do dó aṣa. N’nọ zan gbẹzan fẹnnuwiwa tọn bo gble do yọnnu ji taun. N’nọ nù marijuana bo nọ jẹajo nado hẹn pekọ wá na ojlo agọ̀ ṣie le. N’tindo osò susu, ṣigba todin, n’nọ dopẹ́ dọ mẹdepope ma yin hùhù to ajo madosọha he mẹ n’tindo mahẹ te lẹ mẹ.

To godo mẹ, ponọ lẹ wle mi bo sú mi do gànmẹ. To whenue yé jo mi godo, n’zindonukọn to gbẹzan ṣie hoho lọ mẹ. Na taun tọn, n’tlẹ sọ wá ylan hugan lehe n’te dai. Dile etlẹ yindọ n’tindo awusọhia homẹvọnọ tọn, n’nọ sinyẹnta, nọ yawu gblehomẹ, nọ wadanu bosọ yin ṣejannabinọ.

LEHE BIBLU DIỌ GBẸZAN ṢIE DO: To ojlẹ sinsinyẹn gbẹzan ṣie tọn ehe mẹ, onọ̀ ṣie plọnnu hẹ Kunnudetọ Jehovah tọn lẹ bo lẹzun dopo to yé mẹ. N’doayi e go dọ onọ̀ ṣie hẹn gbẹtọ-yinyin etọn pọnte, podọ ehe paṣa mi. N’basi dide nado yọ́n nuhe zọ́n bọ onọ̀ ṣie do diọ, enẹwutu n’jẹ hodọ gando Biblu go ji hẹ Kunnudetọ lẹ.

N’mọdọ nuplọnmẹ Kunnudetọ Jehovah tọn lẹ tọn gbọnvo na sinsẹ̀n devo lẹ tọn, podọ nuhe yé nọ dọ lẹpo wẹ sinai do Biblu ji. Yewlẹ kẹdẹ wẹ pipli he n’yọnẹn bọ yé nọ dọyẹwheho sọn whédegbè jẹ whédegbè taidi Klistiani dowhenu tọn lẹ. (Matiu 28:19; Owalọ lẹ 20:20) N’wá kudeji dọ n’ko mọ sinsẹ̀n nugbo lọ to whenue n’mọ owanyi nujọnu tọn he yé nọ dohia ode awetọ.—Johanu 13:35.

Nuhe n’plọn to Biblu mẹ lẹ gọalọna mi nado mọdọ n’dona basi diọdo tangan delẹ to gbẹzan ṣie mẹ. N’mọnukunnujẹemẹ dọ Jehovah Jiwheyẹwhe gbẹwanna galilọ podọ eyin n’jlo na hẹn homẹ etọn hùn, n’dona jo aṣa he nọ hẹn agbasa ṣie flu lẹ do. (2 Kọlintinu lẹ 7:1; Heblu lẹ 13:4) N’yin whinwhàn to whenue n’plọn dọ Jehovah tindo numọtolanmẹ podọ nuyiwa ṣie lẹ sọgan hẹn homẹgble e kavi hẹn homẹ etọn hùn. (Howhinwhẹn lẹ 27:11) Enẹwutu, n’magbe nado jo marijuana nùnù do, ma nado nọ zan osò ba, podọ nado dovivẹnu bo diọ jijọ ṣie. Delẹ to diọdo he vẹawuna mi hugan nado basi lẹ mẹ wẹ nado jo gbẹzan fẹnnuwiwa tọn po akọhiho po do.

To tintan whenu, n’ma jlo dọ họntọn ṣie lẹ ni yọnẹn dọ n’to Biblu plọn hẹ Kunnudetọ Jehovah tọn lẹ. Ṣigba, nulẹ diọ to whenue n’hia Matiu 10:33 godo, fie hogbe Jesu tọn ehelẹ yin kinkandai te dọmọ: “Mẹdepope he mọ́n mi to gbẹtọ lẹ nukọn, yẹn na mọ́n ẹn to Otọ́ ṣie he tin to olọn mẹ nukọn ga.” Hodidọ enẹ whàn mi nado dọna ogbẹ́ ṣie lẹ dọ n’to nuplọn hẹ Kunnudetọ Jehovah tọn lẹ. Ehe hẹn yé jọsi. Yé ma sọgan yise dọ gbẹtọ taidi yẹn nkọ jlo na lẹzun Klistiani. Ṣigba, n’dọna yé dọ n’masọ jlo na zan gbẹzan ṣie hoho tọn lọ ba.

ALE HE N’MỌYI LẸ: Homẹ onọ̀ ṣie tọn hùn taun to whenue e mọdọ n’jẹ gbẹnọ sọgbe hẹ nunọwhinnusẹ́n Biblu tọn lẹ ji. Todin, e masọ nọ hanú gando nuylankan he n’sọgan wà lẹ go ba. Mí nọ dọho gando nuhe mí tindo to kọndopọ mẹ go, enẹ wẹ owanyi mítọn na Jehovah. To whedelẹnu, eyin n’lẹnnupọndo nuhe n’yin dai ji, awú nọ ji mi gando diọdo he Jiwheyẹwhe gọalọna mi nado basi lẹ go. N’masọ nọ tindo ojlo zogbe na akuẹ po fẹnnuwiwa po ba.

Eyin n’ma ko kẹalọyi owẹ̀n Biblu tọn wẹ, n’sọgan ko kú kavi tin to gànpamẹ. Ṣigba todin, n’tindo whẹndo dagbe podọ ayajẹnọ de. E nọ vivi na mi taun dọ n’to Jehovah Jiwheyẹwhe sẹ̀n to pọmẹ hẹ asi godonọnamẹtọ ṣie po viyọnnu tonusetọ ṣie po. N’nọ dopẹ́ dọ Jehovah hùn dotẹnmẹ dote na mi nado yin dopo to pipli owanyinọ Klistiani lẹ tọn de mẹ. N’nọ dopẹ́ taun dọ mẹde dovivẹnu nado plọn mi nugbo Biblu tọn. Podọ n’yọ́n pinpẹn dotẹnmẹ voovo he n’tindo nado gọalọna mẹdevo lẹ nado plọn Biblu tọn. Jehovah Jiwheyẹwhe wẹ n’nọ dopẹna hugan, na e gbọn dagbewanyi etọn dali gọalọna mi nado dọnsẹpọ ẹ.

[Nudọnamẹ tangan lẹ to weda 27]

“N’plọn dọ Jehovah tindo numọtolanmẹ podọ nuyiwa ṣie lẹ sọgan hẹn homẹgble e kavi hẹn homẹ etọn hùn”

[Yẹdide to weda 27]

Yẹn po asi ṣie po gọna viyọnnu mítọn

[Yẹdide to weda 27]

N’doayi e go dọ onọ̀ ṣie hẹn gbẹtọ-yinyin etọn pọnte