Plọnnu sọn Ohó Jiwheyẹwhe Tọn Mẹ

Nawẹ Osẹ́n Jiwheyẹwhe Tọn lẹ Nọ Hẹn Ale Wá Na Mí Gbọn?

Hosọ ehe fọ́n kanbiọ he hiẹ sọgan ko nọ kanse lẹ dote bo do fihe hiẹ sọgan mọ gblọndo lọ lẹ te to Biblu mẹ hia. Homẹ Kunnudetọ Jehovah tọn lẹ tọn na hùn nado dọhodopọ hẹ we do gblọndo ehelẹ ji.

1. Naegbọn mí dona setonuna Jiwheyẹwhe?

Na Jiwheyẹwhe wẹ dá mí wutu, e jẹ dọ mí ni setonuna ẹn. Jesu lọsu tlẹ nọ setonuna Jiwheyẹwhe to whepoponu. (Johanu 6:38; Osọhia 4:11) Osẹ́n Jiwheyẹwhe tọn lẹ nọ hùn dotẹnmẹ dote na mí nado dohia dọ mí yiwanna ẹn.—Hia 1 Johanu 5:3.

Osẹ́n Jehovah Jiwheyẹwhe tọn lẹpo wẹ yin alenu na mí. Yé nọ plọn mí aliho gbẹninọ tọn he yọ́n hugan todin po lehe mí sọgan mọ ale mavọmavọ lẹ yí to sọgodo do po.—Hia Psalm 19:7, 11; Isaia 48:17, 18.

2. Nawẹ osẹ́n Jiwheyẹwhe tọn lẹ nọ yidogọna agbasalilo mítọn gbọn?

Osẹ́n Jiwheyẹwhe tọn sọta ahànnumu nọ basi hihọ́na mí sọn awutu he nọ hẹn okú wá lẹ po asidan po si. E nọ vẹawu nado jo ahànnunu zẹjlẹgo do, podọ enẹ nọ dekọtọn do walọyizan nulú tọn mẹ. (Howhinwhẹn lẹ 23:20, 29, 30) Jehovah na mí dotẹnmẹ nado nù ahàn sinsinyẹn, ṣigba mí dona nọ nù do jlẹkaji.—Hia Psalm 104:15; 1 Kọlintinu lẹ 6:10.

Jehovah sọ na mí avase sọta awuwhàn, homẹgble he yè ma dava po walọ ylankan devo lẹ po. Lehe mí yí ayinamẹ etọn lẹ do yizan mẹ do sọ, mọ wẹ e na yidogọna agbasalilo mítọn do niyẹn.—Hia Howhinwhẹn lẹ 14:30; 22:24, 25.

3. Nawẹ osẹ́n Jiwheyẹwhe tọn sọgan basi hihọ́na mí gbọn?

Osẹ́n Jiwheyẹwhe tọn jẹagọdo kọndopọ zanhẹmẹ tọn to gbonu alọwle tọn. (Heblu lẹ 13:4) Asu po asi po he setonuna osẹ́n ehe lẹ nọ tindo numọtolanmẹ hihọ́ tọn bo nọ wleawuna lẹdo dagbe de na ovi lẹ. To alọ devo mẹ, kọndopọ zanhẹmẹ tọn to gbonu alọwle tọn nọ saba dekọtọn do awutu, gbẹdai, danuwadomẹgo, numọtolanmẹ awubla tọn po whẹndo godoponọ lẹ po mẹ.—Hia Howhinwhẹn lẹ 5:1-9.

Eyin mí nọ dapana ninọmẹ he nọ sisẹ́ mí nado tindo kọndopọ zanhẹmẹ tọn to gbonu alọwle tọn lẹ, mí na basi hihọ́na haṣinṣan mítọn hẹ Jiwheyẹwhe. Humọ, mí nasọ dapana awuhẹngblena mẹdevo lẹ.—Hia 1 Tẹsalonikanu lẹ 4:3-6.

4. Nawẹ sisi tintindo na ogbẹ̀ nọ hẹn ale wá na mí gbọn?

Mẹhe nọ na sisi nunina Jiwheyẹwhe tọn he yin ogbẹ̀ lẹ nọ mọaleyi to agbasa-liho eyin yé jo walọ delẹ taidi azọ̀-nùnù po aṣa devo he nọ ze ogbẹ̀ do owù mẹ lẹ po do. (2 Kọlintinu lẹ 7:1) Ogbẹ̀ viyẹyẹ he to homẹ de tọn lọsu họakuẹ na Jiwheyẹwhe. (Eksọdusi 21:22, 23) Enẹwutu, mí ma dona desọn ojlo mẹ bo hù viyẹyẹ he to homẹ de. Mẹhe yọ́n pinpẹn pọndohlan Jiwheyẹwhe tọn gando ogbẹ̀ go lẹ sọ nọ dapana nudepope he sọgan hẹn owù wá to azọ́nmẹ, to whégbè podọ to ohún mẹ. (Deutelonomi 22:8) Humọ, yé ma nọ doalọ to aihundida lanmẹyiya tọn he nọ ze ogbẹ̀ do owù mẹ lẹ mẹ, na ogbẹ̀ yin nunina de sọn Jiwheyẹwhe dè wutu.—Hia Psalm 36:9.

5. Nawẹ wiwe-yinyin ohùn tọn nọ hẹn ale wá na mí gbọn?

Ohùn yin onú wiwe de, na Jiwheyẹwhe dọ dọ e nọtena ogbẹ̀ kavi alindọn nudida de tọn. (Gẹnẹsisi 9:3, 4) Osẹ́n Jiwheyẹwhe tọn dohia dọ ohùn nọtena ogbẹ̀. To dodonu osẹ́n enẹ tọn ji wẹ Jiwheyẹwhe hẹn jona ylando mítọn lẹ tọn yọnbasi te.—Hia Levitiku 17:11-13; Heblu lẹ 9:22.

Nawẹ e wà ehe gbọn? E do Visunnu Etọn hlan aigba ji nado fli mí gọ̀ gbọn ohùn etọn gblamẹ. Na Jesu yin mẹpipe wutu, ohùn etọn họakuẹ taun. Jesu sọawuhia to Jiwheyẹwhe nukọn po nuhọakuẹ-yinyin ohùn etọn tọn po. Ohùn etọn nọtena ogbẹ̀ etọn. (Heblu lẹ 9:12) Hùnsọndai etọn hùn dotẹnmẹ ogbẹ̀ madopodo tọn dote na mí.—Hia Matiu 26:28; Johanu 3:16.

Na nudọnamẹ dogọ, pọ́n weta 12 po 13 owe Etẹwẹ Bliblu Plọn Mí Taun tọn po, he Kunnudetọ Jehovah tọn lẹ zinjẹgbonu.